Yehova U A Ri Khwaṱhisedza Uri U Ḓo Ita Uri Ḽifhasi Ḽi Vhe Pharadiso

1. Ndi mulaedza ufhio we muporofita Yesaya a u vhudza Vhaisiraele?

MUPOROFITA Yesaya o amba uri Yehova ndi “Mudzimu wa ngoho.” Ipfi ḽo ṱalutshedzelwaho nga uri “ngoho” ḽi amba uri “amen.” (Yes. 65:16, ṱms.) “Amen” zwi amba uri “nga zwi vhe nga u ralo” kana “ndi ngoho.” Musi ipfi “amen” ḽi tshi shumiswa Bivhilini ḽi tshi khou ambela kha Yehova kana Yesu, ḽi vha ḽi tshi khou khwaṱhisedza uri zwine vha khou amba ndi ngoho. Ndi ngazwo mulaedza we Yesaya a u vhudza Vhaisiraele wo vha u tshi pfala: Zwine Yehova a amba zwi a itea. Yehova u khwaṱhisedza zwenezwo nga u ita zwoṱhe zwe a fhulufhedzisa.

2. Ndi ngani ri tshi fhulufhela zwe Yehova a zwi fhulufhedzisa nga ha vhumatshelo hashu nahone ndi mbudziso dzifhio dzine ra ḓo dzi haseledza?

² Naa na riṋe ri nga vha na fhulufhelo ḽa uri zwe Yehova a ri fhulufhedzisa nga ha vhumatshelo zwi ḓo itea? Hu ṱoḓaho u vha miṅwaha ya 800 musi Yesaya a si tsheeho, muapostola Paulo o ṱalutshedza uri ndi ngani zwine Yehova a fhulufhedzisa zwi tshi itea tshifhinga tshoṱhe. Paulo o amba uri: “Mudzimu ha zwifhi.” (Vhahev. 6:18) U tou fana na tshisima tshi re na maḓi avhuḓi, tshi nga si kone u vha na maḓi avhuḓi na a dungaho nga tshifhinga tshithihi, nga hu fanaho, na Yehova ane a vha Tshisima tsha ngoho a nga si ambe mazwifhi. Ndi ngazwo ri tshi fhulufhela zwoṱhe zwine Yehova a amba, u katela na zwe a ri zwi ḓo itea tshifhingani tshi ḓaho. Kha ino thero, ri ḓo haseledza mbudziso dzi tevhelaho: Yehova o fhulufhedzisa uri u ḓo ri ṋea mini tshifhingani tshi ḓaho? Nahone o ri khwaṱhisedza hani uri zwe a ri fhulufhedzisa zwi ḓo itea?

NDI ZWIFHIO ZWE YEHOVA A FHULUFHEDZISA?

3. (a) Ndi fhulufhedziso ḽifhio ḽine vhashumeli vha Yehova vha ḽi funesa? (Nzumbululo 21:3, 4) (b) Vhaṅwe vha aravha hani musi ri tshi vha vhudza nga ha ḽeneḽi fhulufhedziso?

³ Fhulufhedziso ḽine ra ḓo haseledza nga haḽo ndi ḽine ḽa funwa nga vhashumeli vha Yehova ḽifhasini ḽoṱhe. (Vhalani Nzumbululo 21:3, 4.) Yehova o fhulufhedzisa uri hu ḓo vha na tshifhinga tshine ‘lufu lwa si tsha ḓo vha hone, u ṱungufhala, u lila na vhuṱungu zwa si tsha ḓo vha hone.’ Vhunzhi hashu ri shumisa wonoyu mulaedza u kwamaho mbilu u bvaho Bivhilini u ambaho nga ha vhutshilo Pharadisoni musi ri tshi khou huwelela kha vhaṅwe. Vhaṅwe vhathu vha aravha hani musi ri tshi vha vhudza nga ha ḽeneḽi fhulufhedziso? Vha nga kha ḓi ri: “Hezwi zwi sokou vha muḽoro.”

4. (a) Musi Yehova a tshi ita fhulufhedziso ḽa Pharadiso, ndi mini zwe a vha a tshi ḓivha uri zwi ḓo itea tshifhingani tshashu? (b) Nga nnḓa ha fhulufhedziso ḽe Yehova a ḽi ita, ndi zwifhio zwiṅwe zwe a zwi ita?

⁴ Ndi ngoho uri musi Yehova a tshi hevhedza muapostola Yohane uri a ṅwale nga ha fhulufhedziso ḽa Pharadiso, o vha a tshi zwi ḓivha uri ṋamusi ri ḓo vhudza vhaṅwe nga ha ḽeneḽi fhulufhelo musi ri tshi huwelela mafhungo maḓifha a Muvhuso. Zwiṅwe hafhu, o vha a tshi zwi ḓivha uri vhathu vhanzhi vha ḓo wana ḽeneḽi fhulufhedziso ḽa “zwithu zwiswa” ḽi sa tendisei. (Yes. 42:9; 60:2; 2 Vhakor. 4:3, 4) Ri nga khwaṱhisedza hani vhaṅwe na riṋe vhaṋe uri dzenedzi phaṱhutshedzo dzo ambiwaho kha Nzumbululo 21:3, 4 dzi ḓo itea? Yehova ho ngo sokou ri fhulufhedzisa zwenezwi zwithu zwi kwamaho mbilu, o dovha a ri ṋea na zwiitisi zwi pfalaho zwa u zwi fhulufhela. Ndi zwiitisi zwifhio zwe a ri ṋea?

YEHOVA U RI KHWAṰHISEDZA URI ZWE A FHULUFHEDZISA ZWI ḒO ITEA

5. Ndi zwiitisi zwifhio zwine ra vha nazwo zwa u fhulufhela fhulufhedziso ḽa Yehova ḽa Pharadiso nahone ndi ngafhi hune ra zwi wana hone?

⁵ Ri wana zwiitisi zwa u fhulufhela fhulufhedziso ḽa Yehova nga ha Pharadiso kha ndimana dzi tevhelaho. Henefho ri vhala uri: “O dzulaho kha khuluṋoni a ri: ‘Zwoṱhe ndi zwi ita zwiswa.’ A dovha a ri: ‘Ṅwala, ngauri haya maipfi ndi ngoho, ni nga a fhulufhela.’ A amba na nṋe a ri: ‘Zwo itea! Ndi nṋe Alfa na Omega, mathomo na magumo.’”​—Nzumb. 21:5, 6a.

6. Ndi ngani maipfi a u khwaṱhisedza a wanalaho kha Nzumbululo 21:5, 6 a tshi khwaṱhisa fhulufhelo ḽashu kha fhulufhedziso ḽa Mudzimu?

⁶ Ndi ngani enea maipfi ane a bva Bivhilini a tshi khwaṱhisa fhulufhelo ḽashu kha zwe Mudzimu a ri fhulufhedzisa? Zwine Yehova a khou zwi ita kha dzenedzi ndimana ri nga zwi fanyisa na uri Yehova o saina u itela u ri khwaṱhisedza uri u ḓo ita zwe a ri fhulufhedzisa.b Zwe Mudzimu a fhulufhedzisa zwo ṅwalwa kha Nzumbululo 21:3, 4. Fhedzi kha vese ya 5 na 6 u engedza nga u saina, u itela u ri khwaṱhisedza uri zwe a ri fhulufhedzisa zwi ḓo itea ngangoho. Kha ri sedze nga vhuronwane maipfi e Yehova a a shumisa u ri khwaṱhisedza.

7. Ndi nnyi ane a khou amba maipfi a re kha ndimana 5 nahone ndi ngani zwenezwo zwo khethea?

⁷ Maipfi a u khwaṱhisedza e Mudzimu a a amba a thoma nga uri: “O dzulaho kha khuluṋoni a ri.” (Nzumb. 21:5a) Enea maipfi o khethea ngauri tshenetshi ndi tshiitea tsha u thoma kha zwiitea zwiraru zwi wanalaho kha bugu ya Nzumbululo he Yehova a amba ene muṋe. Enea maipfi a u khwaṱhisedza ho ngo ambiwa nga muruṅwa a re na maanḓa kana nga Yesu Kristo we a vuswa, fhedzi o ambiwa nga Yehova ene muṋe. Zwenezwi zwi sumbedza uri ri nga fhulufhela maipfi a tevhelaho e a a amba. Ndi ngani ri tshi ralo? Nga nṱhani ha uri Yehova ndi “Mudzimu a sa zwifhi.” (Tito 1:2) Enea maipfi a ita uri mafhungo ane ra a vhala kha Nzumbululo 21:5, 6 a vhe ane ra nga a fhulufhela nga ho fhelelaho.

“ZWOṰHE NDI ZWI ITA ZWISWA”

8. Ndi zwifhio zwe Yehova a amba u itela u khwaṱhisedza uri zwe a fhulufhedzisa zwi ḓo itea? (Yesaya 46:10)

⁸ Ndi mini zwe Mudzimu a zwi amba nga murahu? O ri: “Zwoṱhe ndi zwi ita zwiswa.” Ṱhogomelani uri Yehova o ri: “Zwoṱhe ndi zwi ita zwiswa,” ho ngo ri: “Zwoṱhe ndi ḓo zwi ita zwiswa.” Ndi ngoho uri Mudzimu u khou amba nga ha tshanduko dzi ḓaho, fhedzi khae ḽeneḽi fhulufhedziso ndi ḽa ngoho lune musi a tshi amba nga ha dzenedzi tshanduko, zwa tou fana na musi dzi tshi khou itea.​—Vhalani Yesaya 46:10.

9. (a) Maipfi ane a ri “zwoṱhe ndi zwi ita zwiswa” a ambela kha mini? (b) Hu ḓo itea mini kha “ḽiṱaḓulu” na “ḽifhasi” zwi re hone zwino?

⁹ Yehova o ri: “Zwoṱhe ndi zwi ita zwiswa.” Zwenezwo zwi amba mini? Yeneyi ndima i amba nga ha zwithu zwivhili zwine Mudzimu a ḓo zwi ita. Tsha u thoma, u ḓo fhelisa maitele a kale a zwithu. Tsha vhuvhili, u ḓo ḓisa maitele maswa a zwithu. Kha Nzumbululo 21:1, ri vhala uri: “Ḽiṱaḓulu ḽa kale na ḽifhasi ḽa kale zwo lovha.” “Ḽiṱaḓulu ḽa kale” ḽi imela mivhuso ya politiki ine ya langwa nga Saṱhane na madimoni awe. (Mat. 4:8, 9; 1 Yoh. 5:19) Bivhilini, “ḽifhasi” ḽi nga ambela kha vhathu vhoṱhe vhane vha dzula khaḽo. (Gen. 11:1; Ps. 96:1) Ndi ngazwo “ḽifhasi ḽa kale” zwi tshi ambela kha vhathu vhavhi vha tshino tshifhinga. Yehova ha nga ḓo sokou khwinisa “ḽiṱaḓulu” na “ḽifhasi” zwine zwa vha hone zwino. Nṱhani hazwo, u ḓo tou zwi fhelisa tshoṱhe. Ḽiṱaḓulu na ḽifhasi zwi ḓo dzhielwa vhudzulo nga ḽiṱaḓulu ḽiswa na ḽifhasi ḽiswa, zwine zwa amba muvhuso muswa une wa ḓo vhusa vhathu vho lugaho.

10. Ndi zwifhio zwine Yehova a ḓo zwi ita zwiswa?

¹⁰ Ndi ifhio iṅwe nḓila ine Yehova a ḓo ita ngayo uri zwithu zwoṱhe zwi vhe zwiswa? (Nzumb. 21:5) Yehova u ḓo ita uri ḽifhasi ḽi vhe ḽavhuḓi na uri vhathu vha si tsha vha na tshivhi. Samusi Yesaya o amba, Yehova u ḓo ita uri ḽifhasi ḽoṱhe ḽi vhe fhethu ho nakaho u fana na tsimu ya Edeni nahone muthu muṅwe na muṅwe u ḓo itwa muswa nga ho fhelelaho. Vho holefhalaho, vha sa vhoni na vho dzingaho nḓevhe vha ḓo fhodzwa, na vho faho vha ḓo vuswa.​—Yes. 25:8; 35:1-7.

“HAYA MAIPFI NDI NGOHO, NI NGA A FHULUFHELA. . . . ZWO ITEA!”

11. Yehova o vhudza Yohane uri a ite mini nahone ndi ngani?

¹¹ Ndi zwifhio zwiṅwe zwe Mudzimu a amba u itela u khwaṱhisedza uri ri nga mu fhulufhela? Yehova o vhudza Yohane uri: “Ṅwala, ngauri haya maipfi ndi ngoho, ni nga a fhulufhela.” (Nzumb. 21:5) Yehova o ita zwi fhiraho u sokou ṋea ndaela ya uri “ṅwala.” O dovha a ṋea tshiitisi. O ri: “Ngauri haya maipfi ndi ngoho, ni nga a fhulufhela,” zwine zwa amba uri maipfi a Mudzimu ndi a ngoho nahone ri nga a fhulufhela. Ri a livhuwa uri Yohane o thetshelesa ndaela ya Yehova ya uri “ṅwala.” Nga nṱhani ha zwenezwo, ri kona u vhala nga ha fhulufhedziso ḽa Yehova ḽa Pharadiso na u elekanya nga ha phaṱhutshedzo dzavhuḓi dzo ri lindelaho.

12. Ndi ngani Yehova o amba uri: “Zwo itea”?

¹² Ndi zwifhio zwiṅwe zwe Mudzimu a zwi amba? O ri: “Zwo itea!” (Nzumb. 21:6) Zwino, Yehova u amba u nga zwoṱhe zwe a fhulufhedzisa nga ha Pharadiso zwo no itea. Zwo tea uri Yehova a ambe nga u ralo ngauri a hu na tshine tsha nga mu thivhela u ita zwe a fhulufhedzisa. Yehova o dovha a amba zwiṅwe zwine zwa ri khwaṱhisedza uri zwe a ri fhulufhedzisa zwi ḓo itea ngangoho. O ri mini?

“NDI NṊE ALFA NA OMEGA”

13. Ndi ngani Yehova o ri: “Ndi nṋe Alfa na Omega”?

¹³ Samusi zwo ambiwa mathomoni, Yehova ene muṋe o amba na Yohane luraru kha mabono. (Nzumb. 1:8; 21:5, 6; 22:13) Kha tshiitea tshiṅwe na tshiṅwe, Yehova o amba maipfi mathihi ane a ri: “Ndi nṋe Alfa na Omega.” Ḽeḓere Alfa, ndi ḽone ḽine ḽa thoma kha maḽeḓere a Tshigerika nahone ḽeḓere Omega ndi ḽone ḽa u fhedzisela. Musi Yehova a tshi amba uri “ndi nṋe Alfa na Omega,” u ri thusa u pfesesa uri arali a thoma u ita tshiṅwe tshithu, u tshi ita u swika tshi tshi fhela.

14. (a) Ṋeani tsumbo ya musi Yehova a tshi ri “Alfa” nga lwa pfanyisedzo na ya musi a tshi ḓo ri “Omega” nga lwa pfanyisedzo. (b) Maipfi a re kha Genesi 2:1-3 a ri khwaṱhisedza mini?

¹⁴ Musi Yehova o no sika Adamu na Eva, o bvisela khagala tshipikwa tshawe nga ha vhathu na ḽifhasi. Bivhili i ri: “Mudzimu a vha fhaṱutshedza a ri: ‘Bebani ni vhe vhanzhi ni ḓadze ḽifhasi ni ḽi vhuse.’” (Gen. 1:28) Nga tshenetsho tshifhinga, zwo vha zwi tshi nga Yehova u khou ri: “Alfa.” O bvisela khagala tshipikwa tshawe. Ho vha hu tshi ḓo swika tshifhinga tshine vhaḓuhulu vha Adamu na Eva vha si na tshivhi vha ḓo ḓadza ḽifhasi nahone vha ḽi ita Pharadiso. Musi tshipikwa tshawe tshi tshi itea, zwi ḓo tou nga Yehova u khou ri “Omega.” Musi Yehova o no fhedza u sika “ḽiṱaḓulu na ḽifhasi na zwoṱhe zwi re khazwo,” o amba maipfi ane a sumbedza uri tshipikwa tshawe tshi ḓo itea ngangoho. Eneo maipfi a wanala kha Genesi 2:1-3. (Vhalani.) Yehova o amba uri ḓuvha ḽa vhusumbe ndi ḽikhethwa. Zwenezwo zwi amba mini? Yehova o khwaṱhisedza uri a nga si balelwe u ita zwe a fhulufhedzisa nga ha vhathu na ḽifhasi. Zwoṱhe zwe a amba o vha a tshi ḓo zwi khunyeledza mafheloni a ḓuvha ḽa vhusumbe.

15. Ndi ngani Saṱhane a tshi nga vha o humbula uri o kona u ita uri Yehova a si swikelele tshipikwa tshawe?

¹⁵ Musi Adamu na Eva vho no vha mashandukwa, vho vha vhaitazwivhi nahone vha fhirisela tshivhi na lufu kha vhana vhavho. (Vharoma 5:12) Nga nṱhani ha zwenezwo, zwo vhonala u nga Saṱhane o phusukanya tshipikwa tsha Yehova tsha uri ḽifhasi ḽi ḓadzwe nga vhathu vha si na tshivhi na vhane vha thetshelesa. Zwo vhonala u nga Saṱhane o ita uri zwi si konadzee uri Yehova a vhuye a ri “Omega.” Saṱhane a nga vha o humbula uri Yehova o balelwa u ita zwe a fhulufhedzisa. A nga vha o humbula uri Yehova o vha a tshi ḓo fhelisa Adamu na Eva nahone a sika vhaṅwe vhavhingani vha si na tshivhi uri tshipikwa tshawe nga ha vhathu tshi itee. Fhedzi, arali Yehova a ite nga u ralo, Saṱhane o vha a tshi ḓo mu pomoka uri u a zwifha. Ndi ngani? Ndi ngauri kha Genesi 1:28 Yehova o vhudza Adamu na Eva uri vhana vhavho vho vha vha tshi ḓo ḓadza ḽifhasi.

16. Ndi ngani Saṱhane a tshi nga vha o humbula uri a nga pomoka Mudzimu uri o kundelwa?

¹⁶ Ndi ifhio iṅwe phetho ine Saṱhane a nga vha o humbula uri Yehova a nga i dzhia? Khamusi Saṱhane a nga vha o humbula uri Yehova o vha a tshi ḓo tendela Adamu na Eva vha tshi beba vhana vhe vha vha vha tshi ḓo dzula vhe na tshivhi. (Muh. 7:20; Vharoma 3:23) Arali zwo ralo, a zwi timatimisi uri Saṱhane o vha a tshi ḓo pomoka Yehova uri o balelwa. Ndi ngani? Ngauri Yeneyo phetho yo vha i tshi ḓo ita uri tshipikwa tsha Yehova tsha uri ḽifhasi ḽa Pharadiso ḽi ḓale nga vhaḓuhulu vha Adamu na Eva vha si na tshivhi tshi si konadzee.

17. Yehova o lugisa hani vhushandukwa ha Saṱhane na vhathu vha u thoma nahone hu ḓo vha na mvelelo dzifhio? (Sedzani tshifanyiso.)

¹⁷ Saṱhane a nga vha a songo vhuya a humbula zwe Yehova a vha a tshi ḓo zwi ita. Naho Saṱhane, Adamu na Eva vho vha mashandukwa, Yehova o vha e na nḓila ya khwiṋe ya u swikelela tshipikwa tshawe. (Ps. 92:5) Nṱhani ha uri Yehova a vhonale sa muzwifhi, o tendela Adamu na Eva vha tshi vha na vhana, nga yeneyo nḓila Yehova o sumbedza uri zwoṱhe zwine a amba zwi a itea. O ita uri tshipikwa tshawe tshi itee nga u ṋea “ṅwana” we a vha a tshi ḓo tshidza vhaḓuhulu vha Adamu na Eva vha thetshelesaho. (Gen. 3:15; 22:18) Saṱhane a nga vha o akhamadzwa nga ndugiselo ya Yehova ya tshirengululi. Ndi ngani? Nga nṱhani ha uri yeneyo ndugiselo yo vha yo thewa kha lufuno lu si na tseḓa. (Mat. 20:28; Yoh. 3:16) Saṱhane ha na lufuno lwo raloho. U na tseḓa. Hu ḓo itea mini nga nṱhani ha yeneyo ndugiselo ya tshirengululi? Mafheleloni a Miṅwaha Ya Tshigidi Ya U Vhusa Ha Yesu Kristo, vhaḓuhulu vha Adamu na Eva vha si na tshivhi vha thetshelesaho, vha ḓo ḓadza ḽifhasi ḽa Pharadiso sa zwe Yehova a vha o dzula o amba. Nga tshenetsho tshifhinga, zwi ḓo nga Yehova u khou ri “Omega.”

RI NGA KHWAṰHISA HANI FHULUFHELO ḼASHU KHA FHULUFHEDZISO ḼA YEHOVA ḼA PHARADISO?

18. Ndi zwiitisi zwifhio zwiraru zwine Yehova a ri ṋea hu u itela u ri khwaṱhisedza? (Sedzani bogisi “Zwiitisi Zwiraru Zwine Zwa Ita Uri Ri Fhulufhele Zwe Yehova A Ri Fhulufhedzisa.”)

¹⁸ Kha ino thero ro haseledza vhuṱanzi ha uri ndi ngani ri na vhungoho ha uri ḽifhasi ḽi ḓo vha Pharadiso. Ndi mini zwine ra nga zwi vhudza vhaṅwe u vha khwaṱhisedza uri zwi ḓo itea zwa vhukuma? Tsha u thoma, ḽeneḽi fhulufhedziso ḽo itwa nga Yehova ene muṋe. Bugu ya Nzumbululo i ri: “O dzulaho kha khuluṋoni a ri: ‘Zwoṱhe ndi zwi ita zwiswa.’” U na vhuṱali, u na maanḓa nahone u a ṱoḓa u ita uri zwenezwi zwithu zwi itee. Tsha vhuvhili, zwenezwi zwithu zwe a fhulufhedzisa ndi zwa vhukuma lune khae zwa nga zwo no ḓi itea. Ndi ngazwo o amba uri: “Haya maipfi ndi a ngoho, ni nga a fhulufhela. . . . Zwo itea!” Tsha vhuraru, arali Yehova a thoma u ita tshithu, u tshi ita u vhuya u swika tshi tshi fhela, samusi na maipfi ane a ri: “Ndi nṋe Alfa na Omega” a tshi khwaṱhisedza zwenezwo. Yehova u ḓo sumbedza uri Saṱhane ndi muzwifhi nahone o kundelwa.

19. Ni nga ita mini musi vhathu vha tshi timatima fhulufhedziso ḽa Mudzimu ḽa Pharadiso?

¹⁹ Ni humbule uri, tshifhinga tshoṱhe musi ni tshi vhudza vhaṅwe nga zwe Yehova a zwi amba u itela u ri khwaṱhisedza uri zwe a fhulufhedzisa zwi ḓo itea, ni vha ni tshi khou khwaṱhisa fhulufhelo ḽaṋu kha zwe a zwi fhulufhedzisa. Nga zwenezwo, tshifhingani tshi ḓaho musi ni tshi vhala nga ha ḽeneḽi fhulufhedziso ḽa Pharadiso ḽi wanalaho kha Nzumbululo 21:4 nahone muṅwe a ri: “Hezwi zwithu zwi pfala zwi sa tendisei,” ni nga ita mini? Ndi ngani ni sa mu vhaleli na u mu ṱalutshedza ndimana 5 na 6? Ni mu sumbedze nḓila ye Yehova ene muṋe a tou nga o saina kha honoho vhuporofita.​—Yes. 65:16.