Ri Nga Ita Hani Uri Lufuno Lu Re Hone Vhukati Hashu Lu Dzule Lwo Khwaṱha?

1-2. (a) Ndi ngani muapostola Paulo o amba uri lufuno ndi tshone tshithu “tshihulwane”? (b) Ndi mbudziso dzifhio dzine ra ḓo dzi haseledza?

MUSI muapostola Paulo a tshi khou amba nga ha lutendo, fhulufhelo na lufuno, o phetha nga uri, “tshihulwane kha zwenezwi zwiraru ndi lufuno.” (1 Vhakor. 13:13) Ndi ngani o amba zwenezwi? Tshifhingani tshi ḓaho a ri tsha ḓo tea u vha na lutendo kha mafulufhedziso a Mudzimu nga ha ḽifhasi ḽiswa kana u vha na fhulufhelo kha zwe Mudzimu a fhulufhedzisa ngauri zwi ḓo vha zwo no itea. Fhedzi ri ḓo tea u dzula ri tshi funa Yehova na vhaṅwe. Zwavhuḓivhuḓi, ri ḓo vha funa u ya nga hu sa fheli.

² Samusi ri tshi ḓo tea u dzula ri na lufuno, ri ḓo haseledza mbudziso tharu. Ya u thoma, ndi ngani ri tshi tea u funana? Ya vhuvhili, ri nga sumbedza hani uri ri a funana? Ya vhuraru, ri nga ita hani uri lufuno lune lwa vha hone vhukati hashu lu dzule lwo khwaṱha?

NDI NGANI RI TSHI TEA U FUNANA?

3. Ndi zwiitisi zwifhio zwine ra vha nazwo zwa uri ri funane?

³ Ndi ngani zwi zwa ndeme uri ri dzule ri tshi funana? Tshiṅwe tsha zwiitisi ndi ngauri lufuno lu ri ṱalula sa Vhakriste vha ngoho. Yesu o vhudza vhaapostola vhawe uri: “Arali ni tshi funana, ndi hone vhathu vhoṱhe vha tshi ḓo ḓivha zwa uri ni vhafunziwa vhanga.” (Yoh. 13:35) Zwiṅwe hafhu, musi ri tshi funana nga tshashu, zwi ita uri hu vhe na vhuthihi. Paulo o amba nga ha lufuno a ri “lu ita uri vhathu vha vhe na vhuthihi nga ho fhelelaho.” (Vhakol. 3:14) Fhedzi hu kha ḓi vha na tshiṅwe tshiitisi tsha ndeme tshine tsha ita uri ri funane. Muapostola Yohane o ṅwalela vhatendi ngae a ri: “Ane a funa Mudzimu u tea u funa wahawe.” (1 Yoh. 4:21) Musi ri tshi sumbedza uri ri a funana, ri vha ri tshi khou sumbedza uri ri funa Mudzimu.

4-5. Fanyisani uri u funa hashu Mudzimu zwi tshimbidzana hani na u funa vhaṅwe.

⁴ U funa vhahashu na u funa Mudzimu zwi tshimbidzana hani? Sa tsumbo, kha ri sedze nḓila ine mbilu yashu na zwiṅwe zwipiḓa zwa muvhili washu zwa tshimbidzana ngayo. Musi dokotela a tshi ṱoḓa u ṱola mutakalo wa mbilu yashu, a nga thetshelesa lutsinga lwa tshanḓa tshashu hu u itela u pfa uri mbilu yashu i na maanḓa lungafhani. Ri nga shumisa hani konoku kuitele musi ri tshi amba nga ha lufuno?

⁵ Samusi dokotela a tshi nga kona u vhona mutakalo wa mbilu yashu nga u ṱola lutsinga lu re kha tshanḓa, na kha riṋe zwo tou ralo. Nḓila ine ra funa ngayo vhahashu i nga thusa uri ri vhone nḓila ine ra funa ngayo Mudzimu. Arali ra ṱhogomela uri lufuno lwashu kha vhahashu lu khou thenga-thenga, zwi nga ri sumbedza uri lufuno lwashu kha Mudzimu lu khou fhungudzea. Fhedzi arali ri tshi dzula ri tshi sumbedza lufuno kha vhatendi nga riṋe, ndi luswayo lwavhuḓi lwa uri lufuno lwashu kha Mudzimu lwo khwaṱha.

6. Ndi ngani ri tshi tea u vhilaela arali lufuno lwashu kha vhahashu lu tshi khou fhungudzea? (1 Yohane 4:7-9, 11)

⁶ Zwi fanela u ri vhilaedzisa vhukuma arali lufuno lwashu kha vhahashu lu tshi khou fhungudzea. Ndi ngani? Ngauri zwi ḓo vha zwi tshi amba uri vhushaka hashu na Yehova vhu khomboni. Muapostola Yohane o zwi ita zwa pfala musi a tshi ri humbudza uri: “A sa funi wahawe ane a kona u mu vhona, a nga si fune Mudzimu ane a si kone u mu vhona.” (1 Yoh. 4:20) Ri guda mini? Yehova u a takala musi a tshi vhona ri “tshi funana.”​—Vhalani 1 Yohane 4:7-9, 11.

RI NGA SUMBEDZA HANI URI RI A FUNANA?

7-8. Ri nga sumbedza hani uri ri a funana?

⁷ Ipfi ḽa Mudzimu ḽi ri vhudza lunzhi-lunzhi uri ri “funane.” (Yoh. 15:12, 17; Vharoma 13:8; 1 Vhathes. 4:9; 1 Pet. 1:22; 1 Yoh. 4:11) Naho zwo ralo, lufuno ri nga si kone u lu vhona, lu bva mbiluni kana ndi muthu wa nga ngomu. Nga zwenezwo, ri nga ita hani uri zwi vhonale uri ri funa vhahashu? Ri nga zwi sumbedza nga maipfi na nga zwine ra ita.

⁸ Hu na nḓila nnzhi dzine ra nga sumbedza ngadzo uri ri funa vhahashu. Dziṅwe tsumbo dzadzo khedzi: “Ni songo zwifhelana.” (Sak. 8:16) “Ni dzule ni na mulalo nga tshaṋu.” (Marko 9:50) “Kha u hulisa vhaṅwe ni vhe wa u thoma.” (Vharoma 12:10) “Ni ṱanganedzane.” (Vharoma 15:7) “Bvelani phanḓa ni tshi . . . hangwelana.” (Vhakol. 3:13) “Dzulani ni tshi ṱhaḓulana mihwalo.” (Vhagal. 6:2) “Dzulani ni tshi khuthadzana.” (1 Vhathes. 4:18) “Bvelani phanḓa ni tshi . . . fhaṱana.” (1 Vhathes. 5:11) “Ni rabelelane.”​—Yak. 5:16.

9. Ndi ngani u khuthadza vhaṅwe i nḓila ya ndeme ya u sumbedza uri ri a vha funa? (Sedzani tshifanyiso.)

⁹ Kha ri haseledze nga ha iṅwe ya nḓila dzo ambiwaho kha phara yo fhiraho ine ra nga sumbedza ngayo lufuno. Ri ḓo ṱolisisa maipfi a Paulo ane a ri: “Dzulani ni tshi khuthadzana.” Ndi ngani u khuthadza vhaṅwe i nḓila ya ndeme ya u sumbedza lufuno? U ya nga iṅwe ṱhoḓisiso ya Bivhili, ipfi ḽe Paulo a ḽi shumisa ḽine ḽa amba u “khuthadza” ḽi amba “u vha tsini na muthu musi e kha vhuimo vhu konḓaho na u mu ṱuṱuwedza.” Nga zwenezwo, musi ri tshi khuthadza, ri vha ri tshi khou thusa mutendi nga riṋe ane a vha fhasi ha mutsiko uri a takuwe a ime na u bvela phanḓa a tshi tshimbila kha nḓila ya vhutshilo. Tshifhinga tshoṱhe musi ri tshi thusa vhahashu, ri vha ri tshi khou vha sumbedza lufuno.​—2 Vhakor. 7:6, 7, 13.

10. U pfela vhaṅwe vhuṱungu zwi tshimbidzana hani na u vha khuthadza?

¹⁰ U pfela vhuṱungu na u khuthadza zwi a tshimbidzana. Nga nḓila-ḓe? Muthu ane a pfela vhuṱungu u khuthadza vhaṅwe na u lingedza u vha thusa musi vhe maṱunguni. Ngauralo, ri thoma ra pfela vhuṱungu ra kona u khuthadza. Paulo o ṱalutshedza uri musi Yehova a tshi pfela vhathu vhuṱungu, u dovha a vha khuthadza. Paulo o amba uri Yehova ndi “Khotsi wa u khathutshela hoṱhe na Mudzimu wa u khuthadza hoṱhe.” (2 Vhakor. 1:3) Paulo o shumisa maipfi ane a ri “u khathutshela hoṱhe,” a tshi khou sumbedza nḓila ine Mudzimu a pfela vhaṅwe vhuṱungu ngayo. Ngauralo, Mudzimu u vhidzwa Khotsi kana Tshisima tsha u khathutshela hoṱhe ngauri u pfela vhathu vhuṱungu nga nḓila khulwane. Honoho u pfela vhuṱungu hu ita uri Yehova a ri khuthadze “kha milingo yoṱhe.” (2 Vhakor. 1:4) Samusi maḓi avhuḓi ane a elela a tshi bva tshisimani a tshi dzimula ḓora, na Yehova u a thusa na u khuthadza vho tsikeledzeaho. Ri nga edzisa hani Yehova kha u pfela vhaṅwe vhuṱungu na u vha khuthadza? Iṅwe nḓila ine ra nga zwi ita ngayo ndi u ita uri mbilu dzashu dzi dzule dzo lugela u pfela vhuṱungu na u khuthadza vhaṅwe. Ndi mini zwine zwa nga ri thusa?

11. U ya nga Vhakolosa 3:12 na 1 Petro 3:8, ndi zwifhio zwiṅwe zwine zwa nga ri thusa uri ri fune vhaṅwe na uri ri vha khuthadze?

¹¹ Ndi mini zwine zwa nga ri thusa uri ri dzule ri na lufuno lune lwa ḓo ita uri ri dzule ri tshi “khuthadzana” ḓuvha ḽiṅwe na ḽiṅwe? Ri fanela u pfelana vhuṱungu, ri funane sa vharathu na vhakomana, ri sumbedzane vhuthu. (Vhalani Vhakolosa 3:12; 1 Petro 3:8.) Zwi ḓo ri thusa hani? Musi ri tshi pfela vhahashu vhuṱungu na u vha na ndavha navho, zwi ḓo ri ṱuṱuwedza uri ri vha khuthadze musi vhe maṱunguni. Samusi Yesu o amba, “zwine muthu a zwi amba zwi bva mbiluni. Muvhuya u bvisa zwithu zwavhuḓi kha lupfumo lwawe lwavhuḓi.” (Mat. 12:34, 35) U khuthadza vhahashu vha re maṱunguni ndi yone nḓila ya ndeme nga maanḓa ine ra sumbedza ngayo uri ri a vha funa.

RI NGA ITA HANI URI LUFUNO LUNE LWA VHA HONE VHUKATI HASHU LU DZULE LWO KHWAṰHA?

12. (a) Ndi ngani ri tshi tea u dzula ro fhaṱuwa? (b) Ndi mbudziso ifhio ine ra ḓo i fhindula?

¹² Roṱhe ri ṱoḓa u ‘bvela phanḓa ri tshi funana.’ (1 Yoh. 4:7) Naho zwo ralo, ndi zwa ndeme kha riṋe u humbula uri Yesu o ri sevha uri “lufuno lwa vhathu vhanzhi lu ḓo fhungudzea.” (Mat. 24:12) Yesu o vha a sa khou amba uri vhunzhi ha vhafunziwa vhawe vha ḓo litsha u sumbedzana lufuno. Fhedzi ri tea u dzula ro fhaṱuwa uri ri si tendele mavhonele a vhathu vha ḽino shango vha si na lufuno a tshi ṱuṱuwedza nḓila ine ra fara vhahashu ngayo. Ri na zwenezwo muhumbuloni, kha ri ṱolisise mbudziso ya ndeme i tevhelaho: Naa hu na nḓila ine ra nga ḓivha ngayo arali lufuno lwashu kha vhahashu lwo khwaṱha?

13. Ndi mini zwine zwa nga ri thusa u ḓivha arali lufuno lwashu kha vhahashu lwo khwaṱha?

¹³ Nḓila ine ra ḓifara ngayo musi ro sedzana na zwiṅwe zwiimo i nga ri thusa u vhona arali lufuno lwashu lwo khwaṱha. (2 Vhakor. 8:8) Vhuṅwe ha honoho vhuimo ndi ho ambiwaho nga muapostola Petro musi a tshi ri: “Zwa ndeme vhukuma, ni funane nga maanḓa ngauri lufuno lu fukedza zwivhi zwinzhi.” (1 Pet. 4:8) Ngauralo, zwine ra ita musi vhahashu vho ri khakhela kana vho ita zwithu zwine zwa ri vhaisa, zwi ḓo ri thusa u vhona arali lufuno lwashu khavho lwo khwaṱha.

14. U ya nga 1 Petro 4:8, ri tea u funa vhahashu lungafhani? Fanyisani.

¹⁴ Kha ri humbulisise nga ha maipfi a Petro nga vhuronwane. Tshipiḓa tsha u thoma tsha ndimana 8 tshi amba nga ha lufuno lune ra fanela u vha nalwo. Tshi ri: “Ni funane nga maanḓa.” Ipfi ḽe muapostola Petro a ḽi shumisa ḽi ambaho uri “nga maanḓa” ḽi ambela kha “tshithu tsho ṱharamudzwaho.” Tshipiḓa tsha vhuvhili tshi amba zwine ra ḓo ita musi ri tshi funa vhahashu nga maanḓa. U funa vhahashu nga maanḓa zwi ḓo ri thusa uri ri fukedze zwivhi zwavho zwinzhi. Ri nga zwi fanyisa nga heyi nḓila: Ri khou fara lufuno lwashu nga zwanḓa zwivhili, zwa tou nga ri khou ṱharamudza labi u swika ḽi tshi fukedza, zwa tou nga ri khou fukedza zwivhi, hu si tshithihi, hu si zwivhili, fhedzi “zwivhi zwinzhi.” U fukedza ndi ipfi ḽine ḽa amba u hangwela zwivhi. U tou fana na musi labi ḽi tshi nga fukedza fhethu ho tshinyalaho kha ṱafula, na lufuno lu nga fukedza vhushayanungo na zwivhi zwa vhaṅwe.

15. Ndi zwifhio zwine ra ḓo kona u zwi ita arali lufuno lwashu kha vhahashu lwo khwaṱha? (Vhakolosa 3:13)

¹⁵ Lufuno lwashu kha vhahashu lu tea u vha lwo khwaṱha nga nḓila ine ra nga kona u vha hangwela zwivhi naho zwi tshi nga vha zwi tshi ri konḓela. (Vhalani Vhakolosa 3:13.) Musi ri tshi hangwela vhaṅwe, ri sumbedza uri lufuno lwashu lwo khwaṱha na uri ri ṱoḓa u takadza Yehova. Ndi mini zwiṅwe zwine zwa nga ri thusa u hangwela vhukhakhi ha vhahashu na uri ri si ṱavhanye u sinyuswa nga zwine vha zwi ita?

16-17. Ndi zwifhio zwiṅwe zwine zwa ḓo ri thusa uri ri hangwele vhahashu? Fanyisani. (Sedzani tshifanyiso.)

¹⁶ Livhisani ṱhogomelo kha zwithu zwavhuḓi zwine vhahashu vha ita, hu si kha zwithu zwi si zwavhuḓi. Humbulani nga hetshi tshifanyiso. Kha ri ri no kuvhangana na vhahaṋu. Ni khou ḓiphiṋa nga tshifhinga tshavhuḓi navho nahone nga murahu na dzhia tshinepe tsha tshenetsho tshigwada. Kha ri ri ni dovha na dzhia zwiṅwe zwinepe zwivhili, u itela arali tsha u thoma tshi songo bva zwavhuḓi. Zwino ni na zwinepe zwiraru, fhedzi na ṱhogomela uri kha tshiṅwe tsha zwenezwo zwinepe, muṅwe wahaṋu wa tshinnani o sinyalala. Ni nga ita mini nga tshenetsho tshinepe? Ni nga tshi thutha ngauri ni na zwiṅwe zwivhili zwine khazwo vhathu vhoṱhe vho takala, vha khou ṅweṅwela, u katela na onoyo wahaṋu.

¹⁷ Kha ri fanyise zwinepe zwine ra zwi vhulunga na zwithu zwine ra zwi vhulunga mihumbuloni yashu. Kanzhi ri humbula zwithu zwavhuḓi na tshifhinga tshavhuḓi tshe ra tshi fhedza ri na vhahashu. Fhedzi, kha ri ri kha tshiṅwe tsha zwenezwo zwiitea zwine ra zwi humbula, muṅwe wahashu o ita kana o amba zwithu zwi si zwavhuḓi. Ri nga ita mini musi ri tshi zwi humbula? Ndi ngani ni sa lingedzi u zwi hangwa u fana na musi ni tshi thutha tshiṅwe tsha zwenezwo zwinepe? (Mir. 19:11; Vhaef. 4:32) Ri nga hangwa honoho vhukhakhi vhuṱuku ha wahashu ngauri hu na zwithu zwinzhi zwavhuḓi zwine ra zwi humbula nga ha onoyo wahashu. Zwenezwo ndi zwiṅwe zwa zwithu zwine ra nga zwi vhulunga na u dzula ri tshi zwi humbula.

NDI NGANI LUFUNO LU TSHI ṰOḒEA ṊAMUSI U FHIRA NAHO HU LINI?

18. Ndi dzifhio mbuno dza ndeme nga ha lufuno dze ra dzi haseledza kha ino thero?

¹⁸ Ndi ngani ri tshi ṱoḓa u ita uri lufuno lune lwa vha hone vhukati hashu na vhaṅwe lu dzule lwo khwaṱha? Samusi ro zwi haseledza, musi ri tshi sumbedza vhaṅwe lufuno, ri vha ri tshi khou sumbedza uri ri funa Yehova. Ri nga sumbedza hani uri ri funa vhahashu? Iṅwe nḓila ine ra nga zwi ita ngayo ndi nga u vha khuthadza. Ri nga kona u ‘dzula ri tshi khuthadzana’ arali ri tshi pfela vhaṅwe vhuṱungu. Ri nga ita hani uri lufuno lune ra vha nalwo kha vhaṅwe lu dzule lwo khwaṱha? Ri nga zwi ita nga u lingedza nga nungo dzoṱhe uri ri vha hangwele musi vha tshi ri khakhela.

19. Ndi ngani zwi zwa ndeme u sumbedza vhahashu lufuno zwihuluhulu ṋamusi?

¹⁹ Ndi zwa ndeme vhukuma uri ri funane ṋamusi u fhira naho hu lini. Ndi ngani? Ṱhogomelani zwe Petro a amba. O ri: ‘Vhufhelo ha zwoṱhe ho sendela. Ndi ngazwo ni tshi tea u funana nga maanḓa.’ (1 Pet. 4:7, 8) Samusi vhufhelo ha ḽino shango ḽivhi vhu tshi khou sendela, ndi mini zwine ra nga zwi lavhelela? Yesu o amba zwi tevhelaho nga ha vhatevheli vhawe. O ri: “Ni ḓo vhengiwa nga tshaka dzoṱhe nga nṱhani ha dzina ḽanga.” (Mat. 24:9) Uri ri kone u konḓelela honoho u vhengiwa, ri tea u dzula ri na vhuthihi. Musi ri tshi funa vhahashu, Saṱhane a nga si kone u ri fhandekanya ngauri “lufuno lu ita uri vhathu vha vhe na vhuthihi nga ho fhelelaho.”​—Vhakol. 3:14; Vhafil. 2:1, 2.