Khandiso Dzo Shumiswaho Kha Tshibugwana Tsha Muṱangano Wa Vhutshilo Na Vhuḓinḓa
© 2023 Watch Tower Bible and Tract Society of Pennsylvania
1-7 MAY
LUPFUMO LWO TUMBULWAHO IPFINI ḼA MUDZIMU | 2 KORONIKA 17-19
“Vhonani Vhaṅwe Nga Nḓila Ine Yehova A Vha Vhona Ngayo”
Naa Ni Ḓo Livhisa Ṱhogomelo Kha Zwithu Zwo Ṅwalwaho?
7 Hu pfi mini nga Yosafati murwa wa Asa? O vha e na pfaneleo nnzhi dzavhuḓi. Yosafati o ita zwithu zwinzhi zwavhuḓi musi a tshi ḓitika nga Mudzimu. Naho zwo ralo, na ene o dzhia phetho dzi si dzavhuḓi. Sa tsumbo, o dzudzanya uri murwa wawe a vhingane na ṅwananyana wa Khosi mmbi Ahaba ya muvhuso wa devhula. Hu sa londwi tsevho ye a ṋewa nga muporofita Mika, Yosafati o shela mulenzhe na Ahaba musi vha tshi lwa na Vhasiria. Musi vhe nndwani, Yosafati o ponya nga lubuli lwa ṋeleṱe. Nga murahu ha zwenezwo a vhuyelela Yerusalema. (2 Koron. 18:1-32) Muporofita Yehu o mu vhudzisa a ri: “Naa U farisa vhavhi? Naa U funana na maswina a Yehova?”—Vhalani 2 Koronika 19:1-3.
Elekanyani Nga Ha Lufuno Lwa Yehova Lwa Tshoṱhe
8 Yehova u ṱoḓa ri tshi ḓivha uri u a ri funa nahone u ḓivha zwinzhi zwi fhiraho u sa fhelela hashu. U sedza zwivhuya kha riṋe. (2 Koronika 16:9) Kha ri ṱhogomele nḓila ye Yehova a vhona ngayo zwivhuya kha Khosi ya Yuda Yosafati. Yosafati o dzhia phetho i si yavhuḓi ya u ṱanganela na Khosi ya Isiraele Ahaba nahone vha ya u lwa na Vhasiria ngei Ramothe kha ḽa Gileada. Naho vhaporofita vha mazwifhi vha 400 vho vhudza Ahaba muvhi uri u ḓo kunda nndwani, Mika muporofita wa Yehova wa ngoho o vhudza Yosafati na Ahaba uri arali vha lwa vha ḓo kundwa. Nahone zwenezwo ndi zwe zwa itea kokotolo. Ahaba o fela nndwani nahone Yosafati o ponya nga lubuli lwa ṋeleṱe. Nga murahu ha nndwa, Yehova o shumisa Yehu uri a ṋee Yosafati nyeletshedzo kha vhukhakhi hawe. Naho zwo ralo, Yehu o dovha a ri khae: “Hu kha ḓi vha na zwivhuya zwe zwa wanala kha iwe.”—2 Koronika 18:4, 5, 18-22, 33, 34; 19:1-3.
9 Miṅwahani yo fhiraho, Yosafati o vhudza vhaḓinḓa, Vhalevi na vhotshifhe uri vha dalele miḓi yoṱhe ya Yuda uri vha gudise vhathu Mulayo wa Yehova. Vho vha vho bvelela vhukuma lwe na vhathu vha dziṅwe dzitshaka vha thoma u ḓivha Yehova. (2 Koronika 17:3-10) Naho nga murahu Yosafati o dzhia phetho i si yavhuḓi, Yehova ho ngo hangwa zwivhuya zwe a zwi ita vhutshiloni tshifhingani tsho fhiraho. Tsumbo yeneyi i a ri khuthadza vhukuma ngauri nga zwiṅwe zwifhinga ri a khakha. Naho zwo ralo, arali ra nga ita zwoṱhe zwine ra nga kona u itela u shumela Yehova, u ḓo bvela phanḓa a tshi ri funa nahone a nga si hangwe zwivhuya zwe ra zwi ita.
U Fukula Madzanga A Re Bivhilini
17.03 20 ¶10-11
humelani Yehova Nga Mbilu Yoṱhe!
10 Yosafati murwa wa Asa “o tevhela dzinḓila dza khotsi-awe Asa.” (2 Koron. 20:31, 32) O zwi ita hani zwenezwo? U fana na khotsi awe, Yosafati o ṱuṱuwedza vhathu uri vha ṱoḓe Yehova. O ita zwenezwo nga u dzudzanya fulo ḽa u funza a tshi shumisa “bugu ya Mulayo wa Yehova.” (2 Koron. 17:7-10) O dovha a ya kha muvhuso wa devhula wa Isiraele, thavhani dza Efuraimi u itela u “vha humisela ha Yehova.” (2 Koron. 19:4) Yosafati o vha e khosi ye ya “ṱoḓa Yehova nga mbilu [yayo] yoṱhe.”—2 Koron. 22:9.
11 Roṱhe ri nga shela mulenzhe kha fulo ḽa u funza ḽe Yehova a ita uri ḽi vhe hone ṋamusi. Naa no ḓivhetshela tshipikwa tsha u funza vhaṅwe Ipfi ḽa Mudzimu ṅwedzi muṅwe na muṅwe na u vha ṱuṱuwedza uri vha shumele Mudzimu? Ni nga kona u thoma pfunzo ya Bivhili musi ni tshi ita vhuḓidini na nga phaṱhutshedzo dza Mudzimu. Naa tshenetsho ndi tshipikwa tshine na tshi rabelela? Naa no ḓiimisela u ita zwenezwi naho zwi tshi ṱoḓa uri ni fhedze tshifhinga tshaṋu tsha u ita zwiṅwe zwithu? Samusi Yosafati o ya Efuraimi u itela u thusa vhathu uri vha humele kha vhurabeli ha ngoho, na riṋe ri nga ita zwoṱhe zwine ra nga kona u itela u thusa vhathu vho fholaho muyani. Zwiṅwe hafhu, vhahulwane vha tshivhidzo vha dzudzanya u ya u dalela na u thusa vhathu vho bviswaho tshivhidzoni tsimuni ya tshivhidzo tshavho, vhane vha nga vha vho litsha zwivhi zwavho zwa tshifhingani tsho fhiraho.
8-14 MAY
LUPFUMO LWO TUMBULWAHO IPFINI ḼA MUDZIMU | 2 KORONIKA 20-21
“Fhulufhelani Yehova Mudzimu Waṋu”
U Sedzana Na Vhufhelo Ha Ḽino Shango Ḽa Kale Nga Vhuthihi
8 Misini ya Khosi Yosafati, vhathu vha Mudzimu vho sedzana na “gogo fulu” ḽa maswina, ane a bva mashangoni o vha tangaho. (2 Koron. 20:1, 2) Nga hu fanaho, vhashumeli vha Mudzimu a vho ngo lingedza u kunda maswina nga nungo dzavho. Nṱhani hazwo, vho ḓitika nga Yehova. (Vhalani 2 Koronika 20:3, 4.) A vho ngo ita zwenezwo nga vhone vhaṋe, na nga nḓila ye muṅwe na muṅwe a vhona ngayo. Bivhili i ri vhudza uri: “Vha-Yuda vhoṱhe vhó ima phanḓa ha Yehova, na vhana vhavho vhaṱuku, na vhasadzi vhavho, na vharwa vhavho.” (2 Koron. 20:13) Hu sa londwi uri ndi vhaṱuku kana ndi vhahulwane, vho ima vhoṱhe kha lutendo u itela u tevhela vhulivhisi ha Yehova nahone Yehova o vha tsireledza kha maswina avho. (2 Koron. 20:20-27) Naa yeneyi a si tsumbo yavhuḓi ya nḓila ine ra fanela u sedzana ngayo na khaedu sa vhathu vha Mudzimu?
Vhane Na Kha Ḓi Bva U Vhingana, Itani Uri U Shumela Yehova Zwi Ḓe U Thoma Vhutshiloni Haṋu
7 Yehova o fhindula Yehoshafati a tshi shumisa Mulevi a vhidzwaho Yahasiele. Yehova o ri: “Khwaṱhani, ni ime ni vhone Yehova a tshi ni tshidza.” (2 Koron. 20:13-17) Yeneyo a si nḓila yo ḓoweleaho ya u lwa nndwa. Naho zwo ralo, honoho vhulivhisi ho ngo vhu ṋewa nga muthu zwawe, fhedzi o vhu ṋewa nga Yehova. Nge a vha a tshi fhulufhela Yehova, Yehoshafati o ita zwe Yehova a amba. Musi Yehoshafati na vhathu vhawe vha tshi ya u ṱangana na maswina, o vhea vhaimbi vha si na zwihali phanḓa ha mmbi yawe, nṱhani ha maswole a re na tshenzhelo nndwani. Yehova o ita zwe a fhulufhedzisa Yehoshafati; Yehova o kunda maswina awe.—2 Koron. 20:18-23.
U Fukula Madzanga A Re Bivhilini
it-1-E 1271 ¶1-2
Yehoramu
Yehoramu ho ngo tevhela tsumbo yavhuḓi ya khotsi awe Yehoshafati, khamusi zwi tshi itiswa nga ṱhuṱhuwedzo i si yavhuḓi ya mufumakadzi wawe Athalia. (2Dz 8:18) Yehoramu ho ngo sokou vhulaya fhedzi vharathu vhawe na vhaṅwe vhakololo vha Yuda, o dovha a ita uri vhathu vha shandukele Yehova vha gwadamele midzimu ya mazwifhi. (2Krk 21:1-6, 11-14) Nga miṅwaha ye a vha a tshi khou vhusa, ho vha hu si na vhudziki. Tsha u thoma, Vhaedomo vho mu shandukela na muḓi wa Libina wa vutshela Yuda. (2Dz 8:20-22) Muporofita Elia o sevha Yehoramu, kha luṅwalo lwe a mu ṅwalela, o ri: “Yehova u ḓo pfisa vhuṱungu vhuhulu vhathu vhau, vharwa vhau, vhafumakadzi vhau na zwoṱhe zwine zwa vha zwau.” Nahone o dovha a amba uri Khosi Yehoramu, ‘u ḓo farwa nga malwadze manzhi, u katela na vhulwadze ha mala, u swika mala awe a tshi bvela nnḓa zwi tshi itiswa nga u lwala ḓuvha ḽiṅwe na ḽiṅwe.’—2Krk 21:12-15.
Zwo itea nga yeneyo nḓila zwoṱhe. Yehova o tendela Vhaarabu na Vhafilisita vha tshi dzhia ḽeneḽo shango nahone vha thuba vhafumakadzi vha Yehoramu na vharwa vhawe. Mudzimu o tenda uri Yoahasi (ane a dovha a vhidzwa Ahasia), murwa muṱukusa wa Yehoramu a ponyoke. Zwenezwo o zwi itela mulanga wa Muvhuso we a vha o u vhofha na Davida. ‘Nga murahu, Yehova a ḓisela [Yehoramu] vhulwadze ha mala vhu sa fholi.’ Ho no fhela miṅwaha mivhili, “mala awe a bvela nnḓa” nahone a fhedzisela o fa. Vhutshilo ha onoyu munna muvhi ho fhela nga yeneyi nḓila nahone “a hu na na muthihi we a pfa vhuṱungu musi a tshi fa.” O vhulungwa Muḓini wa Davida, “fhedzi ho ngo vhulungwa mavhiḓani a mahosi.” Ahasia murwa wawe a vha khosi vhudzuloni hawe.—2Krk 21:7, 16-20; 22:1; 1Krk 3:10, 11.
15-21 MAY
LUPFUMO LWO TUMBULWAHO IPFINI ḼA MUDZIMU | 2 KORONIKA 22-24
“Yehova U Lambedza Vhathu Vha Re Na Tshivhindi”
w09-E 4/1 24 ¶1-2
Yehoashi O Litsha U Shumela Yehova Nga Nṱhani Ha U Konana Na Vhathu Vhavhi
HO VHA hu tshifhinga tshi konḓaho Yerusalema, muḓi we thembele ya vha yo fhaṱiwa khawo. Khosi Ahasia o vha a tshi kha ḓi tou bva u vhulawa. Zwe Athalia mme a Ahasia a ita muthu a nga si zwi kholwe. O ita uri vhaḓuhulu vhawe vhane vha vha vharwa vha Ahasia vha vhulawe! Ni a ḓivha uri ndi ngani? O ṱoḓa hu tshi vha ene khosi madzuloni a uri muṅwe wavho a vhe khosi.
Naho zwo ralo, muṅwe wa vhaḓuhulu vha Athalia, Yehoashi o ponyoka nahone makhulu wawe vha si vhuye vha zwi ḓivha. Naa ni a ṱoḓa u ḓivha uri zwo itea hani? Makhadzi wawe ane a pfi Yehoshabathi o mu dzumba thembeleni ya Mudzimu. Zwenezwo o zwi kona ngauri mukalaha wawe o vha e Tshifhe Muhulu Yehoyada. Vhuvhili havho vho ita uri Yehoashi a tsireledzee.
w09-E 4/1 24 ¶3-5
Yehoashi O Litsha U Shumela Yehova Nga Nṱhani Ha U Konana Na Vhathu Vhavhi
Yehoashi o fhedza miṅwaha ya rathi o dzumbiwa thembeleni. Henefho o gudiswa nga ha Yehova na milayo yawe. Mafheleloni musi Yehoashi e na miṅwaha ya sumbe, Yehoyada o dzhia vhukando ha u mu ita uri a vhe khosi. Naa ni a ṱoḓa u pfa uri o zwi itisa hani na uri ho itea mini kha Athalia muvhi ane a vha makhulu wa Yehoashi?
Yehoyada a vhidza vhalindi vho khetheaho vhe vha vha vha tshi linda khosi nga tshenetsho tshifhinga a zwi ita tshiphirini. O vha vhudza nga ha nḓila ye ene na mufumakadzi wawe vha tshidza ngayo ṅwana wa Khosi Ahasia. Nga zwenezwo Yehoyada a ḓisa Yehoashi kha vhenevho vhalindi vho khetheaho, vhe na vhone vha zwi pfesesa uri o vha ene muḽaifa. Vha vhamba maano.
Yehoyada a bvisela Yehoashi nnḓa nahone a mu vhea sa khosi. Vhathu “vha thoma u vhanda zwanḓa vha ri: ‘Khosi nga i lalame!’” Vhalindi vha tanga Yehoashi u itela u mu tsireledza. Musi Athalia a tshi pfa vhathu vho takala, a bvela nnḓa a thoma u hanedzana navho. Yehoyada a vhudza vhalindi uri vha vhulaye Athalia.—2 Dzikhosi 11:1-16.
it-1-E 379 ¶5
Mavhiḓani, Fhethu Hune Ha Vhulungwa Hone
Tshifhe Muhulu Yehoyada o ṱhonifhiwa nge a vhulungwa “Muḓini wa Davida hune ha vha na maṅwe mahosi.” Ndi ene muthu e eṱhe o ambiwaho we a vha e si mukololo we a wana yeneyo ndugelo.—2Krk 24:15, 16.
U Fukula Madzanga A Re Bivhilini
it-2-E 1223 ¶13
Sakaria
12. Honovhu vhuporofita ho itea musi Siria ḽi tshi tshinyadza muḓi wa Yuda nahone Yehoashi a vhulawa nga vhashumeli vhawe vhavhili “nge a shulula malofha a vharwa vha tshifhe Yehoyada.” Greek Septuagint na Latin Vulgate dzi amba uri Yehoashi o vhulawa hu u lifhedza malofha a “murwa” wa Yehoyada.—2Krk 24:17-22, 25.
22-28 MAY
LUPFUMO LWO TUMBULWAHO IPFINI ḼA MUDZIMU | 2 KORONIKA 25-27
‘Yehova A Nga Kona U U Ṋea Zwi Fhiraho Zwenezwi’
it-1-E 1266 ¶6
Yehoashi
Khosi ya Yuda yo thola maswole a 100 000 a Yehoashi u itela u lwa na Vhaedomo. Fhedzi “mushumeli wa Mudzimu wa ngoho” o mbo ḓi eletshedza khosi ya Yuda uri i humisele enea maswole murahu. Naho eneo maswole o vha o badelwa talente dza 100 ($660,600), vho sinyuwa nga uri vho vha vha si tsha ḓo wana zwe vha vha vha tshi ḓo zwi thuba nndwani. Musi vha tshi humela thungo ya devhula vho ṱhasela na u thuba zwithu ḓoroboni dza muvhuso wa tshipembe u bva Samaria (khamusi vho vha vha tshi gammba henefho) u swika Bethe-horoni.—2Krk 25:6-10, 13.
Ni Nga ‘Thetshela’ Hani Na Vhona Uri Yehova Ndi Wavhuḓi?
16 Ḓidzimeni zwiṅwe zwithu ni tshi itela Yehova. A zwi ambi uri ri tea u ṱutshela zwithu zwoṱhe zwine ra zwi takalela ri tshi itela Yehova. (Muh. 5:19, 20) Fhedzi arali ra litsha u ita zwo engedzeaho tshumeloni ya Yehova nga nṱhani ha uri ri khou shavha u ḓidzima zwiṅwe zwithu, ri nga ita vhukhakhi vhu fanaho na ha munna we Yesu a mu amba kha tshifanyiso tshawe, we a shuma nga maanḓa uri a vhe na zwithu zwinzhi, fhedzi e si na ndavha na Mudzimu. (Vhalani Luka 12:16-21.) Muṅwe wahashu ane a pfi Christian ane a dzula Fura u ri: “Ndo vha ndi sa khou ita zwoṱhe zwine nda nga kona tshumeloni ya Yehova nahone ndi sa fhedzi tshifhinga tshinzhi na muṱa wanga.” Ene na mufumakadzi wawe vho mbo ḓi thoma u vula nḓila. Fhedzi vho tea u thoma vha litsha mushumo wavho uri vha kone u vula nḓila. Vho thoma bindu ḽiṱuku ḽa u kunakisa uri vha kone u ḓiṱhogomela nahone vho guda u fushea nga zwiṱukuṱuku zwine vha vha nazwo. Naa vho takala nge vha ṱutshela mushumo wavho uri vha kone u vula nḓila? Christian u ri: “Ri vho takalela tsimu nga ho engedzeaho nahone ri a takala musi vhagudiswa vhashu na nyendo dzashu dza u vhuyelela vha tshi guda nga ha Yehova.”
U Fukula Madzanga A Re Bivhilini
w07-E 12/15 10 ¶1-2
Naa Ni Na Muthu Ane A Ni Thusa U Ita Phetho Dzavhuḓi?
Musi Usia a tshi vha khosi ya muvhuso wa Yuda tshipembe ha Isiraele, o vha e na miṅwaha ya 16 fhedzi. O vhusa miṅwaha i fhiraho 50, u bva mafheleloni a ḓana ḽa vhuṱahe ḽa miṅwaha u swika mathomoni a ḓana ḽa vhumalo B.C.E. Usia o vha “a tshi ita zwo lugaho phanḓa ha Yehova” u bva vhuṱukuni hawe. Ndi mini zwo mu ṱuṱuwedzaho u ita zwo lugaho? Ḓivhazwakale yo amba uri: “[Usia] dzula a tshi ṱoḓa Mudzimu misini ya Sakaria, ndi ene we a mu funza u ofha Mudzimu wa ngoho. Tshifhingani tsha musi a tshi khou ṱoḓa Yehova, Mudzimu wa ngoho o mu fhaṱutshedza.”—2 Koronika 26:1, 4, 5.
A hu na zwinzhi zwine ra zwi ḓivha nga ha Sakaria mueletshedzi wa khosi nga nnḓa ha zwo ṅwaliwaho kha tshenetshi tshiitea Bivhilini. Sakaria o vha e ṱhuṱhuwedzo yavhuḓi kha Usia ngauri o vha a tshi “mu funza u ofha Mudzimu wa ngoho.” The Expositor’s Bible yo amba uri zwi tou vha khagala uri Sakaria o vha e “munna ane a ḓivha zwavhuḓi maṅwalo, ane a vha na tshenzhelo kha zwithu zwa Mudzimu nahone a tshi kona u funza vhaṅwe zwenezwo zwithu.” Muṅwe mugudi wa Bivhili o amba uri Sakaria o vha a tshi ḓivha zwavhuḓi vhuporofita, o vha e munna o lugaho, o ṱalifhaho, o ḓiṋekedzaho nahone zwi vhonala u nga o vha e na ṱhuṱhuwedzo khulwane kha Usia.
29 MAY–4 JUNE
LUPFUMO LWO TUMBULWAHO IPFINI ḼA MUDZIMU | 2 KORONIKA 28-29
“Ni Nga Shumela Yehova Naho Vhabebi Vhaṋu Vha Songo Vha Tsumbo Dzavhuḓi”
Edzisani Khonani Dza Yehova Dza Tsini
8 Nḓila ye Hiskia a aluswa ngayo yo vha yo fhambana vhukuma na ya Ruthe. O vha e tshipiḓa tsha lushaka lwe lwa vha lwo ḓiṋekedzela kha Mudzimu. Fhedzi a si Vhaisiraele vhoṱhe vhe vha dzula vha tshi fulufhedzea. Khotsi a Hiskia ane a vha Khosi Ahasi o vha e muvhi. O nyadza thembele ya Mudzimu nahone a ṱuṱuwedza vhaṅwe vhathu uri vha gwadamele miṅwe midzimu. Ahasi o dovha a ita uri vharathu vha Hiskia vha fhiswe vha tshi khou tshila sa zwiṱhavhelo zwa midzimu ya mazwifhi. Hiskia o aluwa nga nḓila i vhavhaho!—2 Dzikhosi 16:2-4, 10-17; 2 Koronika 28:1-3.
Edzisani Khonani Dza Yehova Dza Tsini
9 Tsumbo i si yavhuḓi ya Ahasi yo vha i tshi ḓo vha yo ita uri murwa wawe Hiskia a sinyutshele Yehova. Ṋamusi, vhaṅwe vhe vha konḓelela vhuṱungu vhu sa fani na ha Hiskia, vha pfa u nga vha na tshiitisi tshavhuḓi tsha u “ṅalela Yehova” kana u sinyutshela ndangulo yawe. (Mirero 19:3) Vhaṅwe vha pfa u nga nḓila i si yavhuḓi ye vha aluswa ngayo yo vha ita uri vha vhe na vhutshilo vhu si havhuḓi kana u ita vhukhakhi he ha itwa nga vhabebi vhavho. (Hesekiele 18:2, 3) Naa zwenezwi ndi ngoho?
10 Vhutshilo ha Hiskia vhu sumbedza uri phindulo ya yeneyo mbudziso ndi hai! A hu na tshiitisi na tshithihi tshi pfalaho tsha u sinyutshela Yehova. Ha iti uri zwithu zwivhi zwi itee kha vhathu. (Yobo 34:10) Ndi ngoho uri vhabebi vha nga gudisa vhana vhavho u ita zwo lugaho kana zwi songo lugaho. (Mirero 22:6; Vhakolosa 3:21) Fhedzi zwenezwi a zwi ambi uri maṅa a mutukana ndi vhumatshelo hawe. Ndi ngani? Ngauri Yehova o ri ṋea tshifhiwa tsha mbofholowo ya u ḓikhethela zwine zwa amba uri ri nga kona u khetha u ita zwo lugaho kana zwi songo lugaho. (Doiteronomio 30:19) Hiskia o shumisa hani tshenetsho tshifhiwa tsho khetheaho?
11 Naho khotsi awe o vha e muṅwe wa khosi mmbi dza ngei Yuda, Hiskia o vha khosi ya khwine vhukuma. (Vhalani 2 Dzikhosi 18:5, 6.) O khetha u sa tevhela tsumbo ya khotsi awe i si yavhuḓi. Nṱhani hazwo, o khetha u thetshelesa nga vhuronwane vhaporofita vha Yehova vha ngaho Yesaya, Mixa na Hosea. O thetshelesa nga vhuronwane musi vha tshi mu eletshedza na u mu khakhulula. Zwenezwi zwo mu ṱuṱuwedza uri a lugise thaidzo dze dza itwa nga khotsi awe. O kunakisa thembele, a humbela Mudzimu uri a hangwele vhaitazwivhi na u fhelisa midzimu shangoni ḽoṱhe. (2 Koronika 29:1-11, 18-24; 31:1) Nga murahu, musi Sanheribi khosi ya Asuri i tshi amba uri i ḓo vutshela Yerusalema, Hiskia o sumbedza u vha na tshivhindi na lutendo. O fulufhela uri Yehova u ḓo mu tsireledza na u khwaṱhisa vhathu vhawe. (2 Koronika 32:7, 8) Nga tshiṅwe tshifhinga, Hiskia o ḓikukumusa, fhedzi musi Yehova a tshi mu kaidza, o ḓiṱukufhadza. (2 Koronika 32:24-26) Vhukuma, Hiskia ndi tsumbo yavhuḓi ine ra nga i edzisa. Ho ngo tendela nḓila ye a aluswa ngayo i tshi tshinya vhutshilo hawe. Nṱhani hazwo, o sumbedza uri u khonani ya Yehova.
U Fukula Madzanga A Re Bivhilini
Nathani—Muimeleli A Fulufhedzeaho Wa Vhurabeli Ho Kunaho
Sa mugwadameli wa Yehova a fulufhedzeaho, Nathani o ṱanganedza nga u fhisea pulane dza Davida dza u fhaṱa fhethu ha lwa tshoṱhe ha u thoma kha ḽifhasi ha vhurabeli ho kunaho. Naho zwo ralo, kha tshenetsho tshiitea zwi vhonala u nga Nathani o amba maḓipfele awe nṱhani ha u amba nga ha dzina ḽa Yehova. Nga honoho vhusiku, Mudzimu o rumela muporofita wawe uri a vhudze khosi mulaedza wo fhambanaho na zwenezwo: Davida a nga si fhaṱele Yehova thembele. Muthu ane a ḓo ita zwenezwo ndi muṅwe wa vharwa vha Davida. Fhedzi Nathani o ḓivhadza uri Mudzimu o vha a tshi khou vhofha mulanga na Davida une wa sumbedza uri khuluṋoni yawe i ḓo “khwaṱha ya vha ya lini na lini.”—2 Sam. 7:4-16.
Ndivho ya Mudzimu a yo ngo tshimbidzana na zwe Nathani a zwi amba malugana na u fhaṱa thembele. Naho zwo ralo, onoyo muporofita a ḓiṱukufhadzaho o tshimbidzana na ndivho ya Yehova a sa gunguli. Vhukuma, yeneyi ndi tsumbo yavhuḓi ine ra nga i tevhela musi Mudzimu a tshi ri khakhulula! Mishumo ya Nathani ya vhuporofita ye ya tevhela i sumbedza uri o bvela phanḓa a tshi takalelwa nga Mudzimu. Zwi re zwone ndi uri Yehova o hevhedza Nathani na Gada kha bono uri vha ṋee Davida vhulivhisi ha u dzudzanya vhaimbi vha 4 000 tshumeloni ya thembele.—1 Koron. 23:1-5; 2 Koron. 29:25.
5-11 JUNE
LUPFUMO LWO TUMBULWAHO IPFINI ḼA MUDZIMU | 2 KORONIKA 30-31
“U Kuvhangana Roṱhe Zwi A Vhuyedza”
it-1-E 1103 ¶2
Hiskia
O Vha A Tshi Fhisetshela Vhurabeli Ha Ngoho. Hiskia o vha khosi e na miṅwaha ya 25 nahone nga u ṱavhanya o sumbedza uri u fhisetshela vhurabeli ha Yehova. Tshithu tsha u thoma tshe a ita ndi u vula na u lugisa thembele. A kuvhanganya vhotshifhe na Vhalevi a amba navho a ri: “Zwino ndi tama u vhofha mulanga na Yehova Mudzimu wa Isiraele.” Mulanga wa u fhulufhedzea we a u ita wo vha u si mulanga muswa, o vha a tshi khou vusulusa mulanga wa Mulayo ngei Yuda we wa vha u hone fhedzi u si tsha tevhedzwa. O dzudzanya mishumo ya Vhalevi nga mafulufulu, a ita nzudzanyo dza uri hu vhe na zwilidzo zwa muzika na nyimbo dza thendo. Ho vha hu Nisani, ṅwedzi une Paseka ya pembelwa ngawo, fhedzi thembele yo vha i songo kuna u katela na vhotshifhe na Vhalevi. Nga ḽa 16 Nisani, thembele na zwishumiswa zwayo zwo vha zwo no kunakiswa. Vhaisiraele vhoṱhe vho vha vha tshi tea u itelwa tshipfumelelo tsho khetheaho. Ho thoma vhakololo vha ḓisa zwiṱhavhelo, zwifhiwa zwa u pfumelela tshivhi tsha muvhuso, tsha nnḓu khethwa na tsha vhathu vhoṱhe, ha tevhela vhathu vho ḓisa zwifhiwa zwinzhi zwa u fhiswa.—2Krk 29:1-36.
it-1-E 1103 ¶3
Hiskia
Vhathu vho kundelwa u pembelela Paseka nga tshifhinga tsho ḓoweleaho nga nṱhani ha uri vho vha vha songo kuna. Hiskia o shumisa mulayo une wa tendela uri vhathu vha songo kunaho vha pembelele Paseka nga murahu ha ṅwedzi. Ho ngo ramba Vhayuda fhedzi, o ramba Isiraele loṱhe u bva Beresaba u swika Dani. Naho vhaḓinḓa vhawe vhe a vha ruma uri vha rambe vhathu vho kolelwa nga vhathu vhanzhi, vhaṅwe vha lushaka lwa Efuraimi, Ashere, Manase, Sebuloni na Isashari vho ḓiṱukufhadza vha ḓa. Ho ḓa na vhathu vhane vha si vhe Vhaisiraele vhane vha gwadamela Yehova. Zwi nga vha zwo konḓela vhane vha tikedza vhurabeli ha ngoho vha re muvhusoni wa devhula u ḓa. Vha nga vha vho pikisiwa na u kolelwa u fana na vhaḓinḓa vha Hiskia ngauri wonoyo muvhuso wa tshaka dza fumi wo vha u kha vhuimo vhu si havhuḓi. Wo vha wo ḓi dzhenisa tshoṱhe kha vhurabeli ha mazwifhi ngeno nga thungo u tshi khou ṱhaselwa nga Vhaasuri.—2Krk 30:1-20; Num 9:10-13.
it-1-E 1103 ¶4-5
Hiskia
Nga murahu ha Paseka, ho vha na Vhuṱambo ha Vhurotho vhu si na Mbiliso lwa maḓuvha a sumbe. Vhathu vho vha vho takala lwe vha vhu engedza nga maṅwe maḓuvha a sumbe. Naho vho vha vha tshi khou tshila zwifhingani zwi konḓaho, Yehova o vha fhaṱutshedza lwe “ha vha na dakalo ḽihulu ngei Yerusalema, ngauri u bva tshifhingani tsha Salomo murwa wa Davida khosi ya Isiraele, ho vha hu sa athu u itea zwithu zwo raloho ngei Yerusalema.”—2Krk 30:21-27.
Zwe zwa itea nga murahu zwo sumbedza uri ho vha hu si vhuṱambo ha u pembelela fhedzi, fhedzi ho vha hu vhuṱambo ha u vusulusa vhurabeli ha ngoho. Musi vha sa athu u ya hayani, vhe vha ḓa vhuṱamboni vho ya vha kwashekanya phuphu khethwa vha rema thanda khethwa, vha thutha fhethu ha vhurabeli na dziaḽeṱare kha ḽoṱhe ḽa Yuda na ḽa Benyamini, u katela na ḽa Efuraimi na ḽa Manase. (2Krk 31:1) Hiskia o vhetshela vhathu tsumbo nga u vha ene wa u thoma u kwashekanya ṋowa ya koporo ye Mushe a i ita, ngauri vhathu vha Isiraele vho vha vha tshi vho i dubisela zwiṱhavhelo. (2Dz 18:4) U itela uri vhurabeli ha ngoho vhusi fele mbevha, nga murahu ha vhuṱambo Hiskia o vhea vhotshifhe u ya nga zwigwada zwavho, a dzudzanya uri hu tikedzwe tshumelo ine ya itwa thembeleni. O dovha a ṱuṱuwedza vhathu uri vha thetshelese zwine Mulayo wa zwi amba nga ha tshafumi na zwiranzhe zwine zwa tea u ṋewa Vhalevi na vhotshifhe. Vhathu vha tevhedza wonoyo Mulayo nga mbilu yoṱhe.—2Krk 31:2-12.
U Fukula Madzanga A Re Bivhilini
“Arali Ni Tshi Ḓivha Zwenezwi Zwithu, Ni Ḓo Takala Arali Na Zwi Ita”
14 Iṅwe nḓila ine ra nga sumbedza ngayo uri ri a ḓiṱukufhadza, ndi nga u thetshelesa vhaṅwe. Yakobo 1:19 i amba uri ri fanela “u ṱavhanya u thetshelesa.” Yehova ndi tsumbo yavhuḓi ya zwenezwo. (Gen. 18:32; Yosh. 10:14) Kha ri vhone zwine ra nga zwi guda kha nyambedzano i re kha Ekisodo 32:11-14. (Vhalani.) Naho Yehova o vha a sa khou ṱoḓa thuso ya Mushe, o mu tendela a tshi amba nḓila ye a vha a khou ḓipfa ngayo. Ndi nnyi ane a nga thetshelesa muthu ane a humbula nga nḓila yo khakheaho nahone a ita zwe onoyo muthu a amba? Fhedzi Yehova u thetshelesa a sa fheli mbilu vhathu vhane vha rabela khae vhe na lutendo.
15 Ḓivhudziseni uri: ‘Arali Yehova a tshi kona u ḓiṱukufhadza na u thetshelesa vhathu nga nḓila ye a thetshelesa ngayo Abrahamu, Rahele, Mushe, Yoshua, Manoa, Elia na Hiskia, naa ndi nga si kone u lingedza u ita zwi fanaho? Naa ndi nga kona u hulisa vhahashu nga u thetshelesa mavhonele avho na u a shumisa arali zwi tshi konadzea? Naa hu na muthu tshivhidzoni tshanga kana muṱani wanga ane nda nga mu sumbedza lufuno nga yeneyi nḓila? Ndi fanela u ita mini? Ndi ḓo ita mini?’—Gen. 30:6; Vhahaṱ. 13:9; 1 Dzikh. 17:22; 2 Koron. 30:20.
12-18 JUNE
LUPFUMO LWO TUMBULWAHO IPFINI ḼA MUDZIMU | 2 Koronika 32-33
“Khwaṱhisani Vhahaṋu Nga Zwifhinga Zwi Konḓaho”
it-1-E 204 ¶5
Asuri
Saniheribi. Saniheribi murwa wa Saragoni o ṱhasela muvhuso ya Yuda nga ṅwaha wa vhu 14 (732 B.C.E.) hu tshi khou vhusa khosi Hiskia. (2Dz 18:13; Yes 36:1) Hiskia ho ngo tevhedza zwe khotsi awe Ahasi a zwi ita. Ene o shandukela khosi ya Asuri a hana u i shumela. (2Dz 18:7) Saniheribi o dzhia vhukando nga u ya a lwa na miḓi ya Yuda nahone a kunda ya 46 (vhambedzani na Yes 36:1, 2) a ri Hiskia a mu ṋee nduvho ya talente dza 30 dza musuku (c. $11,560,000) na talente dza 300 dza siḽiva (c. $1,982,000). (2Dz 18:14-16; 2Krk 32:1; vhambedzani na Yes 8:5-8.) Naho Hiskia o badela yeneyo nduvho, Saniheribi o rumela vhaambeleli vhawe uri vha vhudze vhathu vha Yerusalema uri vha ḓikumedzele kha Vhaasuri. (2Dz 18:17–19:34; 2Krk 32:2-20) Nga ṅwambo wa zwenezwo, Yehova a vhulaya maswole a 185 000 a Saniheribi nga vhusiku vhuthihi, zwenezwo zwa ita uri onoyo Muasuri ane a ḓikukumusa a humele Ninive. (2Dz 19:35, 36) Musi e henengei vharwa vhawe vhavhili vha mu milisa tshivhindi nahone murwa wawe Esarahadoni a dzhia tshidulo. (2Dz 19:37; 2Krk 32:21, 22; Yes 37:36-38) Zwenezwi zwiitea zwo ṅwaliwa kha ḓivhazwakale ya Saniheribi na ya Esarahadoni, fhedzi a ho ngo ambiwa nga ha u fheliswa ha mmbi ya Vhaasuri.—PICTURES, Vol. 1, p. 957.
13 11/15 19 ¶12
lisa Vha Sumbe Na Vhalanga-vhathu Vha Malo—Vha Amba Mini Kha Riṋe Ṋamusi?
12 Yehova u dzula o ḓiimisela u ri itela zwithu zwine riṋe vhaṋe ra sa kone u ḓiitela zwone, fhedzi u lavhelela uri ri ite zwine ra zwi kona. Hiskia o amba na “vhahulwane na vhahali vhawe,” nahone vhoṱhe vha dzhia phetho ya “uri hu fukedzwe zwisima zwa nga nnḓa ha muḓi . . . [Hiskia] A ita nga maanḓa a tshi vusa mitsheṱo ye ya piḓimuwa, a fhaṱa na madzhavhelo khayo’; a fhaṱa na muṅwe mutsheṱo wa vhuvhili wa nga nnḓa, . . . a ita mafumo manzhi na zwiṱangu zwinzhi.” (2 Koron. 32:3-5) Nga tshenetsho tshifhinga, u itela u tsireledza na u lisa vhathu Vhawe, Yehova o shumisa tshivhalo tsha vhanna vha re na maanḓa—Hiskia, vhahulwane vhawe na vhaporofita vho khwaṱhaho nga lwa muya.
Vhalisa Vha Sumbe Na Vhalanga-vhathu Vha Malo—Vha Amba Mini Kha Riṋe Ṋamusi?
13 Zwe Hiskia a dovha a zwi ita zwo vha zwi zwihulwane nga maanḓa u fhira u fukedza zwisima kana u khwaṱhisa mbondo dza muḓi. Samusi o vha e mulisa a re na lufuno, Hiskia o kuvhanganya vhathu nahone a vha ṱuṱuwedza nga lwa muya nga maipfi ane a ri: “Ni songo ofha, ni songo timatima ni tshi vhona khosi ya Asuri . . . , ngauri ri na Washu ane a fhira wawe. Tshawe ndi tshanḓa tsha ṋama; Washu ndi Yehova Mudzimu washu wa u ri lamulela na wa u ri lwela nndwani dzashu.” Ndi khumbudzo i khwaṱhisaho lutendo vhukuma—Yehova o vha a tshi ḓo lwela vhathu vhawe! Musi vha tshi pfa zwenezwo, Vhayuda “vha fulufhela vha tshi pfa zwe [Hiskia] khosi ya Yuda a amba.” Ṱhogomelani uri ho vha hu “maipfi a Hiskia” e a ita uri vhathu vha vhe na fulufhelo. Ene na vhahulwane na vhahali vhawe, khathihi na muporofita Mixa na Yesaya, vho sumbedza u vha vhalisa vhavhuḓi, sa zwe Yehova a dzula o zwi amba nga muporofita wawe.—2 Koron. 32:7, 8; vhalani Mixa 5:4, 5.
U Fukula Madzanga A Re Bivhilini
Muthu U Sumbedza Hani Uri O Rembuluwa Zwa Vhukuma?
11 Yehova o fhedzisela o fhindula thabelo dza Manase. O zwi vhona uri onoyo munna o shanduka zwi tshi bva mbiluni nga nṱhani ha zwe a zwi amba kha thabelo dzawe. Ndi ngazwo Yehova o thetshelesa Manase musi a tshi humbela uri a mu hangwele nahone a dovha a mu vhuyedzedza vhuhosini. Manase o ita zwoṱhe zwe a vha a tshi nga kona uri a sumbedze uri o vha o rembuluwa zwa vhukuma. O ita zwe Ahaba a si zwi ite. O shandula nḓila ine a ḓifara ngayo. O lwa na vhurabeli ha mazwifhi o ḓiimisela nahone a ṱuṱuwedza vhathu uri vha gwadamele Yehova. (Vhalani 2 Koronika 33:15, 16.) Zwi tou pfala uri zwo ṱoḓa uri Manase a vhe na tshivhindi na lutendo ngauri ho vha ho no fhela miṅwaha minzhi e tsumbo mmbi muṱani wawe, kha vhaṅwe vharangaphanḓa na kha vhathu vhoṱhe. Fhedzi musi Manase o no kalaha, o lingedza u lugisa zwe a tshinya. Khamusi o ṱuṱuwedza muḓuhulu wawe Yosia nga nḓila yavhuḓi. Nga murahu, onoyo muḓuhulu wawe o vha khosi yavhuḓi.—2 Dzikh. 22:1, 2.
12 Ri nga guda mini kha Manase? O ḓiṱukufhadza a ita na zwiṅwe. O rabela a humbela uri Mudzimu a mu khathutshele. O shandula nḓila ye a vha a tshi ḓifara ngayo. O ita zwe a vha a tshi nga kona uri a lugise zwe a tshinya nahone a ḓidina vhukuma u gwadamela Yehova na u thusa vhaṅwe u ita zwenezwo. Tsumbo ya Manase i ita uri na vhathu vho itaho zwivhi zwihulwane vha vhe na fhulufhelo. Zwenezwi zwi ri khwaṱhisedza uri Yehova Mudzimu ndi “wavhuḓi, [o] ḓiimisela u hangwela.” (Ps. 86:5) Vho rembuluwaho zwa vhukuma vha ḓo hangwelwa.
19-25 JUNE
LUPFUMO LWO TUMBULWAHO IPFINI ḼA MUDZIMU | 2 KORONIKA 34-36
“Naa Ipfi Ḽa Mudzimu Ḽi Khou Ni Vhuyedza?”
it-1-E 1157 ¶4
Huluda
Musi Yosia a tshi pfa hu tshi vhalwa “bugu ya Mulayo” ye ya wanwa nga tshifhe muhulu Hilikia musi hu tshi khou lugiswa thembele, o rumela vhathu uri vha yo wana mafhungo o engedzeaho kha Yehova. Vho ya kha Huluda we a vha vhudza mulaedza u bvaho ha Yehova, wonoyo mulaedza wo vha u tshi sumbedza uri vha ḓo welwa nga khombo dzoṱhe dzo ṅwalwaho kha yeneyo “bugu” samusi vhe lushaka lwa vhagunei. O dovha a amba uri nga nṱhani ha uri Yosia o ḓiṱukufhadza phanḓa ha Yehova, a nga si vhone enea maṱungu oṱhe, fhedzi u ḓo vhulungwa na vhomakhulukuku wawe ḽo lala.—2Dz 22:8-20; 2Krk 34:14-28.
Fhisetshelani Nnḓu Ya Yehova!
20 Tshifhingani tsha mushumo wa u vusulusa we wa dzudzanywa nga Khosi Yosia, Tshifhe Muhulu Hilikia o “wana Bugu ya Milayo ye Yehova a i vhea nga Mushe.” O i ṋea Safani muṅwali we a vhalela Yosia mafhungo a re khayo. (Vhalani 2 Koronika 34:14-18.) Ho vha na mvelelo dzifhio? Nga u ṱavhanya khosi yo mbo ḓi kherukanya nguvho dzayo nga ṅwambo wa u pfa vhuṱungu, nahone ya humbela vhanna uri vha ye vha vhudzise Yehova. A tshi shumisa muporofita wa musadzi Huluda, Mudzimu o vha ṋea mulaedza we wa vha u tshi sasaladza maṅwe maitele a vhurereli e a vha a tshi itwa ngei Yuda. Naho zwo ralo, vhuḓidini havhuḓi ha Yosia ha u fhelisa maitele a u rabela zwifanyiso ho ṱhogomelwa, nahone o dzula a tshi takalelwa nga Yehova hu sa londwi khombo ye ya ambiwa hu tshee nga phanḓa ye ya vha i tshi ḓo wela lushaka lwoṱhe. (2 Koron. 34:19-28) Ri guda mini kha zwenezwi? I ngoho, ri na lutamo lu fanaho na lwe Yosia a vha e nalwo. Ri ṱoḓa u aravha nga u ṱavhanya musi ri tshi livhiswa nga Yehova, ri elekanye nga ha tsumbo i sevhaho ya zwine zwa nga itea arali ra tendela vhugunei na u sa fulufhedzea zwi tshi dzhenelela kha vhurabeli hashu. Nahone ri nga vha na vhungoho ha uri Yehova u ḓo ṱhogomela nga dakalo u fhisetshela hashu vhurabeli ha ngoho, u fana na zwe a zwi ita kha mafhungo a Yosia.
U Fukula Madzanga A Re Bivhilini
Naa Ni Ḓo Livhisa Ṱhogomelo Kha Zwithu Zwo Ṅwalwaho?
15 Ndi tsevho ifhio ine ra i wana kha zwe zwa itea kha Khosi Yosia? Kha ri ṱolisise zwe zwa ita uri a kundwe na uri a vhulahwe. (Vhalani 2 Koronika 35:20-22.) Yosia o ya u lwa na Neko khosi ya Egipita naho yeneyo khosi yo mu vhudza uri yo vha i sa ṱoḓi u lwa nae. Bivhili i amba uri zwe Neko a zwi amba ho vha hu “fhungo ḽa Mudzimu.” Fhedzi ndi ngani Yosia o ya u lwa nae? Bivhili a i ri vhudzi.
16 Yosia o vha a tshi ḓo zwi ḓivha hani uri zwe Neko a zwi amba zwo vha zwi tshi bva ha Yehova? O vha a tshi nga vhudzisa Yeremia we a vha e muṅwe wa vhaporofita vha fulufhedzeaho. (2 Koron. 35:23, 25) Fhedzi a hu na vhuṱanzi vhu sumbedzaho uri o ita nga u ralo. Zwiṅwe hafhu, Neko o vha a tshi khou ya Karakemisi u lwa na luṅwe “lushaka” hu si u lwa na Yerusalema. Zwiṅwe hafhu, dzina ḽa Mudzimu ḽo vha ḽi songo katelwa ngauri Neko o vha a sa khou sema Yehova kana vhathu vhawe. Nga zwenezwo, Yosia o vha a songo fanela u lwa na Neko. Naa hu na zwine ra nga zwi guda kha zwenezwi? Musi ri na thaidzo, zwi nga vha zwavhuḓi uri ri ṱolisise zwine Yehova a nga ṱoḓa ri tshi zwi ita kha eneo mafhungo.
17 Arali ha vha na thaidzo, ri fanela u thoma ra humbula nga ha nḓila ine Bivhili ya nga ri thusa ngayo na nḓila ine ra nga shumisa ngayo zwe ra zwi guda. Kha vhuṅwe vhuimo, zwi nga ṱoḓea uri ri ambe na vhahulwane vha tshivhidzo. Ri nga vha ro humbula nga ho dzikaho nga ha zwine ra zwi ḓivha nga ha eneo mafhungo na u ita ṱhoḓisiso kha khandiso dzashu. Naho zwo ralo, hu nga vha hu na maṅwe mafhungo ane a vha Bivhilini ane ra fanela u a ṱhogomela ane vhahulwane vha nga ri thusa uri ri a ṱolisise. Sa tsumbo, kha ri ri wahashu wa tshisadzini o vhingwa nga muthu ane a si vhe mutendi. Onoyo wahashu u a zwi ḓivha uri u na vhuḓifhinduleli ha u huwelela mafhungo maḓifha. (Mish. 4:20) Fhedzi nga ḓuvha ḽe a dzudzanya ngaḽo u ya u huwelela, munna wawe ha ṱoḓi a tshi ya. Munna wawe u amba uri ndi kale vha si tsha fhedza tshifhinga tshinzhi vhe vhoṱhe nahone u ṱoḓa vha tshi ita zwiṅwe zwithu zwo khetheaho sa vhavhingani. Onoyo wahashu a nga ṱolisisa Maṅwalo a ambaho nga ha u thetshelesa Mudzimu na ndaela ya u ita vhafunziwa. (Mat. 28:19, 20; Mish. 5:29) Fhedzi u fanela u dovha a humbula nga ha vhuḓifhinduleli hawe sa mufumakadzi na u humbulela munna wawe. (Vhaef. 5:22-24; Vhafil. 4:5) Naa munna wawe u a mu hanela u ya vhuḓinḓani kana u khou mu humbela uri a ite zwiṅwe zwithu ḽeneḽo ḓuvha ḽithihi fhedzi? Ri fanela u linganyisela musi ri tshi ṱoḓa u ita zwine Mudzimu a zwi funa na u lwela u vha na luvalo lwavhuḓi.
26 JUNE–2 JULY
LUPFUMO LWO TUMBULWAHO IPFINI ḼA MUDZIMU | ESERA 1-3
“Tendelani Yehova A Tshi Ni Shumisa”
Naa Ni Khou Vhona Zwe Sakaria A Zwi Vhona?
VHAYUDA vho vha vho takala ngauri Yehova Mudzimu o “ṱuṱuwedza Khosi Korese wa Peresia” uri a vhofholole Vhaisiraele vhe vha vha vho thubiwa Babele lwa miṅwaha minzhi. Khosi yo ḓivhadza uri Vhayuda vha nga vhuyelela shangoni ḽa havho uri vha “fhaṱulule nnḓu ya Yehova Mudzimu wa Isiraele.” (Esera 1:1, 3) Eneo o vha e mafhungo a takadzaho! Zwenezwo zwo vha zwi tshi amba uri Vhayuda vha ḓo dovha vha gwadamela Mudzimu wa ngoho kha shango ḽe a vha ṋea ḽone.
Goloi Dza Nndwa Na Khare Zwi Tsireledza Inwi
2 Sakaria o vha a tshi zwi ḓivha uri Vhayuda vhe vha pfulutshela Yerusalema ho vha hu vhanna na vhafumakadzi vhe vha vha vhe na lutendo. Ho vha hu “vhoṱhe vhe Mudzimu a vusa mimuya yavho” uri vha ṱutshele mahaya avho na mabindu. (Esera 1:2, 3, 5) Vho ṱutshela shango ḽe vha vha vha tshi ḽi ḓivha, vha pfulutshela shangoni ḽe vhunzhi havho vha vha vha sa athu u vhuya vha ḽi vhona. Arali u fhaṱululwa ha thembele ya Yehova zwo vha zwi si zwa ndeme, vho vha vha nga si fare lwendo lwa khilomithara dzi ṱoḓaho u vha 1 600 vha tshi ya fhethu hune ha vha na dzithavha na matombo.
U Fukula Madzanga A Re Bivhilini
Manweledzo a Bvaho kha Bugu ya Esera
1:3-6. U fana na vhaṅwe Vhaisiraele vhe vha sala Babele, ṋamusi Ṱhanzi dza Yehova dzi sa koni u dzhenela tshumelo ya tshifhinga tshoṱhe kana u shuma hune ha vha na ṱhoḓea khulwane dzi a tikedza mushumo wa u huwelela nga ha Muvhuso na u ita vhafunziwa nga miṋeelo ya u tou ḓifunela.