NGUDO 6

U Bvisela Khagala Mbuno Ya Luṅwalo

Yohane 10:33-36

MANWELEDZO: Ni songo sokou vhala luṅwalo nahone na fhirela phanḓa. Itani vhungoho ha uri vhathetshelesi vhaṋu vha khou vhona uri luṅwalo lwe na lu vhala lu tshimbidzana hani na mbuno ine na khou i amba.

NḒILA YA U ZWI ITA:

Khethani maipfi a ndeme. Musi ni tshi fhedza u vhala luṅwalo, khethani maipfi ane a tshimbidzana na mbuno yaṋu. Ni nga ita zwenezwo nga u dovholola eneo maipfi kana nga u vhudzisa mbudziso ine ya ḓo ita uri vhathetshelesi vhaṋu vha kone u pfa uri ndi dzifhio mbuno dza ndeme.

Arali ni tshi khou shumisa maipfi o fhambanaho u itela u ombedzela mbuno ine ya vha kha luṅwalo, itani vhungoho ha uri vhathetshelesi vhaṋu vha a kona u vhona uri eneo maipfi ane a vha Bivhilini a tshimbidzana hani na mbuno yaṋu.
Ombedzelani mbuno. Arali ni tshi khou ṱoḓa uri hu vhaliwe luṅwalo, ṱalutshedzani nḓila ine maipfi a ndeme ane a vha kha luṅwalo a tikedza ngayo yeneyo mbuno.

Ni songo vala Bivhili musi ni tshi khou haseledza lwonolo luṅwalo. Zwenezwo zwi ḓo thusa vhathetshelesi vhaṋu uri vha kone u ṱumanya zwe na zwi amba na luṅwalo lwe na lu vhala.
Sumbedzani uri lu shuma hani nga nḓila i leluwaho. Iledzani u amba zwidodombedzwa zwine zwa si tikedze mbuno. Ni fanela u khetha uri ndi mbuno nngana dzine dza ṱoḓea u itela uri vhathetshelesi vhaṋu vha kone u pfesesa zwavhuḓi, fhedzi ni ḓo ita zwenezwo zwi tshi ya ngauri ndi zwifhio zwine vhathetshelesi vhaṋu vha zwi ḓivha nga ha eneo mafhungo.