Ṱahulelani U Vha Na Zwilavhelelwa Zwo Linganyiselwaho, Nahone Ni Takale

“NDO dovha nda balelwa!” Naa ndi lungana he na vhuya na amba nga nḓila yeneyo nge na si kone u swikelela zwe na vha no zwi dzudzanya? Mme wa Mukriste ane a kha ḓi vha muswa a nga sumbedza maḓipfele o raloho nga ṅwambo wa u ḓipfa o tsikeledzea nga u ṱhogomela ṱhoḓea dza tshifhinga tshoṱhe dza ṅwana wawe wa lutshetshe na u ḓipfa o hanganea nga u sa vha na tshifhinga tsha u ṱhogomela madzangalelo a zwithu zwa muya. Muṅwe Mukriste a nga kha ḓi pfa a sa koni u ita zwiṅwe zwithu nga ṅwambo wa nḓila ye a aluswa ngayo nahone a humbula uri ha iti zwo eḓanaho tshivhidzoni. Mulala ane a vha Ṱhanzi a nga kha ḓi pfa o tsikeledzea nga ṅwambo wa u sa kona u ṱanganela nga vhuḓalo kha mishumo ya Vhukriste ye a vha a tshi ḓiphina ngayo musi a tshi kha ḓi vha na nungo na u kona u tshimbila zwavhuḓi. Christiane ane vhuimo ha muṱa wawe ha sa mu tendele uri a ite zwinzhi zwe a vha a tshi nga funa u zwi ita tshumeloni ya Yehova o amba uri: “Nyambo ine ya khou ṱuṱuwedza vhuvulanḓila, nga zwiṅwe zwifhinga i ita uri ndi tsengise miṱodzi.”

Ri nga ita mini arali ri tshi ḓipfa nga nḓila yeneyo? Vhaṅwe Vhakriste vho kona hani u ṱahulela mavhonele o teaho nga ha zwiimo zwavho? Ndi dzifhio mbuyelo dza u lavhelela zwithu nga nḓila yo linganyiselwaho?

Ivhani A Linganyiselaho

Muapostola Paulo o ri vhudza nḓila ine ra nga kona ngayo u dzula ro takala musi a tshi ri: “Takalani Murenani misi yoṱhe. Ndi dovha nda ri: Takalani! U linganyisela haṋu nga hu ḓihwe nga vhathu vhoṱhe.” (Vha-Fil. 4:4, 5, vhambedzani NW.) U itela u vha na dakalo na u fushea musi ri tshi khou shumela Mudzimu, ri fanela u ṱahulela u vha na zwilavhelelwa zwo linganyiselwaho u tendelana na vhukoni hashu na zwiimo zwashu. Arali ri tshi lwela u swikelela zwipikwa zwi songo linganyiselwaho hu sa londwi zwine zwa nga ṱoḓea u itela u zwi swikelela, ri ḓo vha ri tshi khou ḓivhea nga fhasi ha mutsiko zwi sa ṱoḓei. Kha ḽiṅwe sia, ri fanela u ṱhogomela uri ri sa lavhelele u ita zwiṱuku-ṱuku, na u shumisa vhushayanungo hashu sa tshiitisi tsha u vha na madebe vhuḓinḓani ha Vhukriste.

Hu sa londwi zwiimo zwashu, Yehova u ṱoḓa uri ri mu fhe zwa khwine-khwine—ri mu shumele nga mbilu yashu yoṱhe. (Vha-Kol. 3:23, 24) Arali ra nga ṋea Yehova zwine zwa si vhe zwa khwine-khwine ri ḓo vha ri sa khou ita u tendelana na u ḓiṋekedza hashu khae. (Vha-Roma 12:1) Zwiṅwe hafhu, zwi ḓo ita uri ri sa fushee nga ho dzikaho, ri sa wane dakalo ḽa vhukuma, na dziṅwe phaṱhutshedzo nnzhi dzine ra dzi wana musi ri tshi shuma nga mbilu yoṱhe.—Mir. 10:22.

Ipfi ḽo ṱalutshedzelwaho nga u ri “u linganyisela,” Bivhilini ḽi na muhumbulo wa u vha muthu a humbulelaho. Ḽi amba u “tendelana na zwiimo.” (Yak. 3:17) Ipfi ḽeneḽi ḽi dovha ḽa amba u sa lavhelela zwithu nga nḓila yo kalulaho. Nga zwenezwo, arali ri tshi linganyisela, ri ḓo kona u sedza zwiimo zwashu nga nḓila yo linganyiselwaho. Naa zwenezwo zwi a konḓa u zwi ita? Kha vhaṅwe zwi a konḓa, naho vha tshi nga kona u humbulela vhaṅwe. Sa tsumbo, arali khonani ya tsini yo vha i tshi khou sumbedza u neta nga ṅwambo wa u ita mishumo minzhi-minzhi, naa ro vha ri nga si lingedze u mu thusa uri a vhone vhuṱali ha u ita dziṅwe tshanduko vhutshiloni hawe? Nga hu fanaho, ri fanela u ṱhogomela tswayo dzine dza nga ri sumbedza arali ri tshi khou ita zwithu nga nḓila ine ya fhira vhukoni hashu na ine ya sa tendelane na zwiimo zwashu.—Mir. 11:17.

U vha na mavhonele o linganyiselwaho nga ha vhushayanungo hashu zwi nga vha khaedu arali ro aluswa nga vhabebi vhane vha lavhelela zwo engedzeaho kha riṋe. Vhaṅwe vho pfa u nga musi vha tshi khou aluwa vho vha vha tshi fanela u ita zwo engedzeaho tshifhinga tshoṱhe u itela u funwa nga vhabebi vhavho. Arali zwo vha zwo tou ralo nga riṋe, ri nga kha ḓi vha na mavhonele o khakheaho nga ha nḓila ine Yehova a ri dzhia ngayo. Yehova u a ri funa nga ṅwambo wa u mu shumela hashu nga mbilu yoṱhe. Ipfi ḽa Mudzimu ḽi a ri khwaṱhisedza uri Yehova u ‘a ḓivha zwiné ra vha zwone, ha hangwi zwauri ri luruli.’ (Ps. 103:14) U a ḓivha vhushayanungo hashu nahone u a ri funa musi ri tshi mu shumela nga u fhisea hu sa londwi vhushayanungo honoho. U humbula uri Mudzimu washu ndi muṋe wa mushumo ane a pfesesa zwi ḓo ri thusa uri ri linganyisele kha zwine ra lavhelela u zwi swikelela, nga u ṱhogomela uri ri na vhushayanungo.—Mixa 6:8.

Naho zwo ralo, vhaṅwe vha wana zwi tshi konḓa u ṱahulela mavhonele o raloho a u linganyisela. Arali zwo ralo nga ha inwi, ndi ngani ni sa ṱoḓi thuso ya Mukriste a re na tshenzhelo ane a ni ḓivha zwavhuḓi? (Mir. 27:9) Sa tsumbo, naa ni khou ṱoḓa u shuma sa muvulanḓila wa tshifhinga tshoṱhe? Ndi tshipikwa tshavhuḓi lungafhani tshenetsho! Naa ni khou wana zwi tshi konḓa u tshi swikelela? Khamusi ni khou ṱoḓa thuso ya uri ni leludze vhutshilo haṋu. Kana khonani yaṋu ya Mukriste i fulufhedzeaho i nga kha ḓi haseledza na inwi arali vhuḓifhinduleli haṋu vhunzhi ha muṱa vhu tshi nga ita uri u vha haṋu muvulanḓila wa tshifhinga tshoṱhe zwi vhe tshipikwa tshine tsha konadzea kana tshi sa konadzei nga tshifhinga tshenetsho. A nga ni thusa uri ni vhone arali ni tshi nga kona u ita mishumo yo engedzeaho ine ya katelwa kha u vha muvulanḓila kana arali ni tshi fanela u ita tshanduko dzine dza nga ṱoḓea u itela uri ni kone u ita zwo engedzeaho. Munna u dovha a vha vhuimoni havhuḓi ha u kona u thusa mufumakadzi wawe uri a ite zwine zwa tendelana na vhukoni hawe. Sa tsumbo, a nga kha ḓi mu eletshedza uri a awelenyana musi ṅwedzi une a ḓo vha a tshi khou ita ngawo tshumelo yo engedzeaho u sa athu thoma. Zwenezwo zwi nga ita uri a vhe na maanḓa na u mu thusa uri a dzule o takala vhuḓinḓani.

Sedzani Zwithu Zwine Na Nga Kona U Zwi Ita

U vha mulala kana u vha na mutakalo u si wavhuḓi zwi nga kha ḓi ni vhetshela mikano kha zwine na nga kona u zwi ita tshumeloni ya Yehova. Arali ni mubebi, ni nga kha ḓi vha na maḓipfele a uri ni vhuyelwa zwiṱuku nga pfunzo ya muthu nga eṱhe kana miṱanganoni ya Vhukriste nga ṅwambo wa uri tshifhinga tshaṋu na maanḓa aṋu manzhi ni zwi shumisela u ṱhogomela vhana vhaṋu vhaṱuku. Naho zwo ralo, naa zwi nga itea uri u livhisa ṱhogomelo kha vhushayanungo haṋu zwi nga kha ḓi ita uri nga zwiṅwe zwifhinga ni sa kone u vhona zwine na nga kona u zwi swikelela?

Miṅwahani ya zwigidi yo fhiraho, muṅwe Mulevi o sumbedza lutamo lwe a vha a sa ḓo kona u lu fusha. O vha e na ndugelo ya u shuma vhege mbili nga ṅwaha thembeleni. Naho zwo ralo, o sumbedza lutamo lwavhuḓi lwa u dzula tshifhinga tshoṱhe tsini na aletare. (Ps. 84:1-3) Ndi mini zwe zwa thusa munna onoyo a fulufhedzeaho uri a fushee? O ṱhogomela uri na u dzula ḓuvha ḽithihi fhedzi khoroni dza thembele yo vha i ndugelo yo khetheaho. (Ps. 84:4, 5, 10) Nga hu fanaho, nṱhani ha u dzula ri tshi vhilaedziswa nga vhushayanungo hashu, ri fanela u lingedza u pfesesa na u livhuha zwine ra nga kona u zwi ita.

Kha ri ite tsumbo nga Nerlande, wahashu wa tshisadzini wa Mukriste wa ngei Canada. U tshimbila nga tshidulo tsha vhaholefhali nahone o vha a tshi pfa u nga ha na zwinzhi zwine a nga kona u zwi ita vhuḓinḓani. Naho zwo ralo, o shandula mavhonele awe nga u dzhia mavhengele a re tsini sa tsimu yawe ya muthu nga eṱhe ine a huwelela khayo. O ṱalutshedza a ri: “Ndi dzula kha tshidulo tshanga tsha vhaholefhali tsini na bannga i re henefho mavhengeleni. Ndi wana dakalo nga u ṱanziela vhathu vhane vha ḓa vha dzula lwa tshifhinganyana vha tshi itela u awela.” U ṱanganela kha mufuda wonoyu wa ndeme wa vhuḓinḓa zwi ita uri Nerlande a fushee vhukuma.

Itani Tshanduko Arali Zwi Tshi Ṱoḓea

Tshikepe tshi nga kha ḓi gidima nga luvhilo luhulwane, muya u tshi khou vhudzula maseila atsho. Naho zwo ralo, musi mutshimbidzi watsho a tshi ṱangana na maḓumbu mahulwane, u a kombetshedzea u ita tshanduko kha maseila. Ha koni u langa maḓumbu, fhedzi nga u ita tshanduko, a nga kha ḓi kona u dzula a tshi khou langa tshikepe tshawe. Nga nḓila i fanaho, kanzhi a ri koni u langa zwiimo zwi si zwavhuḓi zwine zwa nga maḓumbu zwine ra ṱangana nazwo vhutshiloni. Fhedzi ri nga kona u langa vhutshilo hashu nga hune zwa nga konadzea ngaho nga u shandula nḓila ine ra shumisa ngayo maanḓa ashu, muhumbulo, na maḓipfele ashu. Musi ri tshi ṱhogomela zwiimo zwashu zwiswa, ri ḓo kona u wana thuso ya uri ri dzule ro fushea na u wana dakalo tshumeloni ya Mudzimu.—Mir. 11:2.

Ṱhogomelani dziṅwe tsumbo. Arali ri si na maanḓa manzhi, ri nga kha ḓi wana zwo tea u iledza mishumo i netisaho nga matsheloni u itela uri ri vhe na nungo dza u ya miṱanganoni ya Vhukriste nga madekwana. Zwenezwo zwi ḓo ita uri ri kone u vhuyelwa vhukuma nga vhukonani ha Vhakriste nga riṋe. Kana arali mme a sa koni u ṱanganela vhuḓinḓani ha nnḓu nga nnḓu nga ṅwambo wa uri ṅwana wawe a tshi khou lwala, a nga wana zwi khwine u ramba wahashu wa tshisadzini wa Mukriste hayani hawe uri vha ṱanganele vhoṱhe kha u ṱanziela nga luṱingo musi ṅwana o eḓela.

Hu pfi mini arali zwiimo zwaṋu zwi sa ni tendeli uri ni gude hu tshee nga phanḓa zwoṱhe zwine zwa ḓo haseledzwa miṱanganoni ya Vhukriste? Ni nga sedza uri ni nga kona u lugiselela zwingafhani nahone na zwi ita zwavhuḓi nga hune na nga kona ngaho. Nga u shandula zwipikwa zwashu zwa nga tshifhinga tshenetsho, ri nga kona u dzula ri tshi fhisea nahone ro takala.

U shandula zwipikwa zwashu zwi nga kha ḓi ṱoḓa u ḓiimisela na u ita vhuḓidini. Serge na Agnès, vhavhingani vha ngei Fura, vho vha vha tshi fanela u ita tshanduko khulwane kha zwe vha vha vho zwi dzudzanya. Serge o amba uri: “Musi ri tshi wana uri Agnès o vha a tshi khou ḓo vha na ṅwana, ro zwi ḓivha uri ri nga si tsha kona u vha vharumiwa, samusi ro vha ri tshi fulufhela u ita nga u ralo.” Serge, ane zwino a vha khotsi wa vhananyana vhavhili vho takalaho, o ṱalutshedza uri vhone sa vhavhingani vho mbo ḓi ḓivhetshela tshipikwa tshiswa. O amba uri: “Samusi ro vha ri sa tsha ḓo kona u yo shuma kha maṅwe mashango, ro ita phetho ya u ita mushumo u fanaho na une wa itwa nga vharumiwa, fhedzi ri shangoni ḽa hashu. Ro ṱanganela na tshigwada tsha luambo lusili.” Naa vho vhuyelwa nga u vhea tshipikwa tshenetshi tshiswa? Serge o ri: “Ri ḓipfa ri tshi shumiswa vhukuma tshivhidzoni.”

Odile, wahashu wa tshisadzini wa Mukriste wa ngei Fura ane a vha miṅwahani ya vhu-70 na ane a vha na vhulwadze ha marambo kha magona, ha koni u ima tshifhinga tshilapfu. O vha o kulea nungo nga ṅwambo wa mutakalo wawe u si wavhuḓi une wa ita uri a sa kone u ṱanganela vhuḓinḓani ha nnḓu nga nnḓu. Naho zwo ralo, ha ngo litsha. O shandula zwine a zwi ita nga u ṱanganela kha u ṱanziela nga luṱingo. O amba uri: “Zwi a leluwa nahone zwi a takadza u fhirisa nḓila ye nda vha ndi tshi zwi humbula ngayo!” Maitele enea a u huwelela o dovha a mu ṱuṱuwedza vhuḓinḓani.

Zwilavhelelwa Zwo Linganyiselwaho Zwi Ḓisa Phaṱhutshedzo

U ṱahulela mavhonele o linganyiselwaho nga ha zwine ra nga kona u zwi ita zwi ḓo ita uri ri iledze u hanganea. Nga u vhea zwipikwa zwo linganyiselwaho, ri nga kona u zwi swikelela, hu sa londwi vhushayanungo hashu. Nga zwenezwo, ri a takadzwa nga zwine ra kona u zwi khunyeledza, naho zwi si zwinzhi.—Vha-Gal. 6:4.

Samusi ri tshi khou ṱahulela u linganyisela kha zwine ra zwi lavhelela kha riṋe vhaṋe, ri ḓo vha vhane vha kona u humbulela Vhakriste nga riṋe. Ri tshi ṱhogomela vhushayanungo havho, ri ḓo dzula ri tshi livhuha zwine vha ri itela zwone. Nga u livhuha thuso naho i ifhio ine ra nga i wana, ri shela mulenzhe kha muya wa u shumisana na wa u pfesesana. (1 Pet. 3:8) Humbulani uri, sa Khotsi wa lufuno, Yehova ha vhuyi a ṱoḓa zwi fhiraho zwine ra nga kona u mu ṋea zwone. Nahone arali ri na zwilavhelelwa zwo linganyiselwaho na u vhea zwipikwa zwine zwa swikelelea, mishumo yashu ya lwa muya i ḓo ita uri ri fushee nga ho engedzeaho na uri ri vhe na dakalo.

[Maipfi o ṱumbulwaho kha siaṱari 29]

U itela u vha na dakalo na u fushea musi ri tshi khou shumela Mudzimu, ri fanela u ṱahulela u vha na zwilavhelelwa zwo linganyiselwaho u tendelana na vhukoni hashu na zwiimo zwashu

[Tshifanyiso kha siaṱari 30]

Nerlande u wana dakalo nga u ita zwine a nga kona vhuḓinḓani

[Tshifanyiso kha siaṱari 31]

Gudani u “shandula maseila a tshikepe”

[Ṱhaluso ya Vhubvo ha Tshifanyiso]

© Wave Royalty Free/age fotostock

[Tshifanyiso kha siaṱari 32]

Serge na Agnès vho vhuyelwa nga u vhea zwipikwa zwiswa