Ésodo

37 Dopo Bezalel el ga fato la Arca de legno de acàssia. Ela la era longa due cóvadi e meso, larga un cóvado e meso e alta un cóvado e meso. 2 Lu la ga querta de oro puro par rento e par fora, e el ga fato un orlo de oro tuto intorno. 3 Dopo lu el ga fato quatro anei de oro, par meter sora i so quatro pié. Due anei de una banda e due anei de quel’altra. 4 Dopo, el ga fato stanghe de legno de acàssia e le ga querte de oro. 5 Dopo, el ga fato le stanghe passar rento i anei nele bande dela Arca, par che la podesse esser portada. 6 Lu el ga fato el quèrcio de oro puro. El quèrcio l’era longo due cóvadi e meso e largo un cóvado e meso. 7 Lu el ga fato due cherubini de oro batesto col martel nele due bande del quèrcio. 8 Un cherubin l’era nte una banda e el altro cherubin l’era de nantra. Lu el ga fato tuti i due nele bande del quèrcio. 9 I due cherubini i stirea le ale par sora, querzendo el quèrcio cole ale. Lori i restea un davanti de quel altro. La fàcia dei cherubini la restea vardando par el quèrcio. 10 Alora lu el ga fato la tola de legno de acàssia. Ela la era longa due cóvadi, larga un cóvado e alta un cóvado e meso. 11 Lu la ga querta de oro puro e el ga fato un orlo de oro tuto intorno. 12 Dopo, intorno dela tola, lu el ga fato un orlo largo quatro déi e un bordo de oro intorno del orlo. 13 Anca, lu el ga fato par ela quatro anèi de oro e li ga metesti nei quatro cantoni ndove che ghen’era i quatro pié. 14 I anèi i era darente del orlo. Le stanghe de legno le passea rento i anèi par portar la tola. 15 Alora lu el ga fato le stanghe par portar la tola. Le stanghe le era de legno de acàssia e querte de oro. 16 Par la tola, el ga fato de oro puro i piati, i càlisse, i giari e le scudele par esser doperadi par trar le oferte de bebida. Lu li ga fati de oro puro. 25 Dopo el ga fato el altar de insenso con legno de acàssia. El altar l’era quadrado, longo un cóvado, largo un cóvado e alto due cóvadi. El altar e i so corni i era una roba sol. 29 Lu el ga fato anca el òio sacro de unsion e el insenso puro e profumado. Questi i ze stati ben fati.