Nùmeri

16 Alora Corà, fiol de Izar, fiol de Coate, fiol de Levi, l’è ndato drio Datan e Abiron, fioi de Eliabe, e anca On, fiol de Pelete, dei fioi de Ruben. 2 Lori i ze ndati contra Moisè, insieme de 250 israeliti, paroni scoliesti de intrà el pòpolo, òmini importanti. 3 Lori i se ga metesto insieme contra Moisè e Aron, e i ghe ga dito: “Basta de valtri! Tuto el pòpolo l’è santo e Geovà l’è intrà de lori. Alora, parché che valtri volé meterve come paroni sora la congregassion de Geovà?” 4 Quando Moisè el ga scoltà questo, suito el se ga indenocià cola fàcia par tera. 5 Alora, lu el ga dito a Corà e a tuti quei che i era insieme de lu: “De matina, Geovà el ndarà mostrar chi che l’è dela so banda, e chi che l’è santo, e chi che el ga de rivar darente de lu. Quel che lu el scolierà el ndarà rivar darente de lu. 6 L’è questo che gavé de far, Corà e tuti quei che i ze dela so banda: Ciapé i porta insenso 7 e doman gavé de meter rento bronse e insenso davanti de Geovà. E el omo che Geovà el ndarà scòlier l’è santo. L’è massa bruto quel che gavé fato, fioi de Levi!” 8 Alora, Moisè el ga dito a Corà: “Scolté, fioi de Levi. 9 Ve par poco che el Dio de Israel el ve ga scoliesto intrà i òmini de Israel? El ve ga assà rivar darente de lu par laorar par Geovà nel so tabernàcolo e restar davanti le persone par servirle. 10 Dio el ve ga assà rivar darente de lu insieme de tuti i vostri fradei, fioi de Levi. Adesso volé anca ciapar el laoro dei sasserdoti? 11 Par quela, ti e tuti quei che i ze dela to banda, sì contra Geovà. Alora, parché che gavé de sbrontolar anca contra Aron?” 32 Alora, la tera la se ga verto e li ga mandadi do, insieme cole so fameie, tuti quei che i era de Corà e con tuto quel che i gavea. 35 Alora, Geovà el ga mandà fogo e el ga finio fora coi 250 òmini che i era drio brusar insenso.