Deuteronómio

1 Questo l’è quel che Moisè el ga dito a tuto el pòpolo de Israel nela tera del rio Giordon, nele parte piane del deserto davanti a Sufe, intrà Paran, Tofel, Laban, Azerote e Dizaabe. 2 Ghe volea 11 giorni par ndar de Orebe a Cade Barnea par la strada dele montagne de Seir. 3 Nel ano quaranta, nel dèssimo primo mese, nel primo giorno del mese, Moisè el ga dito ai israeliti tuto quel che Geovà el ghe gavea mandà dir. 4 Questo ga sucedesto dopo che i ga vinsesto Siom, rè dei amorei, che l’era de star in Esbon, e Oghe, rè de Basan, che l’era de star in Astarote e l’è stà vinsesto in Edrei. 5 Darente el rio Giordon, nela tera de Moabe, Moisè el ga spiegà questa Lege. El ga dito: 6 “Quando èrino in Orebe, Geovà, el nostro Dio el ne ga dito: ‘Valtri sì restadi tanto tempo qua intrà queste montagne. 7 Gavé de pareciarve par ndar via par le montagne dei amorei par la banda dei vostri visini nel Arabà, in Sefelà, nel Neghebe, darente del mar, nela tera dei cananei, e nel Lìbano, fin el grando rio Eufrate. 8 Vardé, mi go metesto questo posto davanti de valtri. Ndé rento la tera e ciapéla par valtri, la tera che Geovà el ga prometesto dar ai vostri pare Abraon, Isache e Giacò e ai so fioi de lori.’ 9 “E in quel tempo mi ve go dito: ‘No son mia bon de menarve mi sol. 10 Geovà, el vostro Dio, el ve ga fato deventar tanti e ancoi sì tanti quanto le stele del cielo. 11 Che Geovà, el Dio dei vostri antenati, el ve fae deventar un pòpolo mila volte pi grando de che sì adesso e che el ve benediga come che lu el ve ga prometesto. 12 Come fao portar mi sol el peso e la responsabilità de valtri? Come fao darghene fora cole vostre barufe? 13 Gavé de scòlier nele vostre tribo òmini con sabedoria, che i capisse ben e che i ga speriensa. Mi vao meterli come paroni sora valtri.’ 14 Valtri me gavé rispondesto: ‘Ne par bel quel che vu gavé dito de far.’ 15 Par quela, mi go ciapà i paroni dele vostre tribo, òmini che i gavea sabedoria e speriensa, e li go metesti sora valtri come paroni de mila, de sento, de sinquanta e de diese, e altri come responsàbili par le vostre tribo. 16 “Quela volta, mi go dato istrussion ai vostri giuisi. Mi ghe go dito: ‘Quando valtri scolté un problema intrà i vostri fradei, gavé de giulgar con giustìssia intrà un omo e so fradel o un straniero. 17 No gavé de far difarensa nel vostro giulgamento. Gavé de scoltar dela medèsima maniera el pi pìcolo e el pi grando. No sté gaver paura dei òmini, parché l’è Dio che el giulga. Se el problema l’è massa fadiga par valtri, gavé de parlar con mi, e mi vao scoltarve.’ 18 Quela volta, mi go dato istrussion de tuto quel che gavei de far. 19 “Ghemo fato quel che Geovà el ne gavea mandà far. Semo partidi de Orebe e ghemo passà par tuto quel grando deserto che el fea paura, che valtri gavé visto nela strada dele montagne dei amorei. Alora, semo rivadi a Cade Barnea. 22 “Ma tuti valtri eri vegnesti darente mi e gavei dito: ’Mandemo òmini prima de noantri par vardar la tera e dirne par ndove ghemo de ndar e come le ze le cità che ndemo catar là.’ 23 Me parea che la idea la era bona. Alora, go scoliesto 12 òmini de intrà de valtri, un de cada tribo. 24 Lori i ze partidi, i ze ndati su par le montagne e i ze rivadi fin el vale de Scol par vardar la tera. 31 E nel deserto gavé visto che Geovà, el vostro Dio, ve ga portà in brasso par tuta questa strada, fin rivar a questo posto, come un pare el porta so fiol.’