Chi che ga fato Dio?

Proa imaginar un pare che l’è drio parlar al so fiol de sete ani: “Tanto tempo indrio, Dio el ga fato la Tera e tuto quel che ghen’è. Par esémpio, Dio el ga fato el Sol, la Luna e le stele.” Alora, el so fiol el ghe domanda: “Ma chi che ga fato Dio?”

Alora, el pare el risponde che nissun ga fato Dio parché lu no’l ga bio scomìnsio. Fursi el toseto el resta contento cola risposta. Ma dopo, quando el vien pi grando, el seita a domandarse: “Chi che ga fato Dio?” Lu el se fà questa domanda parché lu no’l capisse come che Dio no’l ga bio un scomìnsio se anca el Universo el ga bio un scomìnsio.

La Bìblia la dà la medèsima risposta che el pare el ga dato al so fiol. Moisè el ga dito che ghen’era Dio vanti ghen fusse i monti e la tera, o sia, che Dio no’l ga bio scomìnsio e no’l gavaria fin. (Salmo 90:​1, 2) El profeta Isaia el ga dito: “No te sè mia? No te ghè mai sentio? Geovà, quel che el ga creà tute le robe nela Tera, l’è Dio par sempre!” (Isaia 40:28) Anca el libro de Giuda el dise che Dio no’l ga bio un scomìnsio. — Giuda 25.

El apòstolo Paolo el ga dito che Dio l’è el “Rè dela eternità”. (1 Timòteo 1:​17) Cossa che questo el vol dir? Che Dio no’l ga bio un scomìnsio e gnanca el gavarà un fin. (Apocalisse 1:8) No importa quanto te sì bon de tornar indrio nel tempo, in questo tempo ghen’era belche Dio. Alora, sol Geovà el mèrita esser ciamà “Rè dela eternità”.

L’è fadiga capir questo parché noantri vivemo poco. Alora, noantri no vedemo el tempo come Geovà lo vede. Par esémpio, mila ani par noantri l’è sol come un giorno par Geovà. (2 Piero 3:8) Podemo capir meio questo quando pensemo nele cavalete. Lore no le saria bone de capir che noantri vivemo 70 o 80 ani parché lore le vive sol intorno de 50 giorni. E la Bìblia la dise che noantri semo come le cavalete par Dio parché no saremo mai boni de pensar come lu. (Isaia 40:22; 55:​8, 9) Par quela che no semo boni de capir tuto sora Geovà.

Anca che sìpia fadiga de capir, se pensemo un pochetin vedemo che podemo creder in questo. La Bìblia la dise che Dio el ga creà tute le robe, come el Universo. (Apocalisse 4:​11; Génesi 1:​1, 2) Dio el ga anca creà el so Fiol, Gesù e i àngeli. (Giò 38:4, 7; Colossensi 1:15) Alora capimo che, se qualchedun el gavesse fato a Dio, questa persona la saria el Creador. E anca capimo che, vanti de Dio crear tute le robe, l’era lu sol. Alora, no ghen’era nissun par farlo.

La nostra vita, tuto quel che ghen’è nel Universo e la maniera che l’è stà fato i prova che Dio no’l ga bio scomìnsio e gnanca el gavarà fin. Parché? Parché sol un Dio cossita el podaria dar vita a tute le robe. — Giò 33:4.