ASSUNTO PRINSIPAL | LA BÌBLIA — UNA STÒRIA CHE TE PIASERÀ SAVER
Ghemo la Bìblia fin ancoi anca se la original la se ga rovinà
LA DIFICOLTÀ: Quasi tuti i materiai che i scritori i ga doperà i era papiro e pergamino.a (2 Timòteo 4:13) Parché che questi materiai i ga metesto in rìscio el testo dela Bìblia?
El papiro l’è un material che el se sbrega e el se smarsisse fàcile. Richard Parkinson e Stephen Quirke, che i stùdia el antigo Egito, i dise: “Una foia de papiro la pol finirse in tocatei e polver. Quando metesto via, el pol far la mufa o desfarse par causa dela umidità. Anca el pol deventar magnar de sorsi e bissi, ancora de pi dele tarme.” Arquante foie de papiro che le ze state meteste ndove che l’era de pi ciaro o con umidità le se ga rovinade pi presto.
El pergamino el dura de pi che el papiro, ma anca lu se finisse fora presto se l’è mal doperà o metesto ndove l’è massa ciaro, massa ùmido o massa caldo.b Anca el pergamino el deventa magnar par i bissi. Par quela, el libro A Escrita do Dia a Dia no Leste Greco-Romano,c in inglese, el dise sora i scriti antighi che ghen’è ancora: “Ghemo pochi de questi scriti ancoi.” Se la Bìblia la fusse stata rovinada, noantri no gavarìssino mai ledesto el so messàgio.
COME CHE LA BÌBLIA LA GA DURÀ FIN ANCOI: La lege dei giudei la disea che i rè i gavea de ‘scriver una còpia dela lege’, o sia, i primi sinque libri dela Bìblia. (Deuteronómio 17:18) Anca, le persone che le gavea el laoro de far còpie, le ga fato tante còpie dela Bìblia, tanto che, nel tempo de Gesù, ghen’era manoscriti in tuto el Israel nele sinagoghe e anca in altri posti pi distanti, come la Macedónia. (Luca 4:16, 17; Ati 17:11) Come che arquanti manoscriti i ga durà fin ancoi?
I manoscriti cognossesti come Roli del Mar Morto i ze stati metesti via par sècoli rento de vasi de argila, in caverne, nte una region col clima seco.
Philip W. Comfort, spessialista nel Novo Testamento, el dise: “I giudei i gavea el costume de meter via i roli in giari o vasi, parché no i se rovinesse.” El par che anca i cristiani i fea cossita. Arquanti manoscriti i ze stati catadi in posti sechi, metesti via in vasi de baro e in posti scuri e nele caverne.
EL RESULTÀ: Fin ancoi ghen’è miliari de tochi de manoscriti dela Bìblia, arquanti con de pi de due mila ani! Gnanca un libro del passà el ga tanti manoscriti cossita.
a El papiro l’è un material fato de una pianta, che anca la se ciama papiro, che la vien del’àqua. El pergamino l’è fato con coro de bèstie e che se ghe scrivea sora.
b Par esémpio, la Dechiarassion de Indipendensa dei Stati Unidi la ze stata scrita nte un pergamino. Ancoi, manco de 250 ani dopo, la se ga smario tanto che no se pol veder quel che l’è scrito.
c Tìtolo original: Everyday Writing in the Graeco-Roman East.