Seto questo?

Cossa che i sasserdoti del primo sècolo i fea col sangue dele bèstie dopo de coparle nel altar?

TUTI i ani, i sasserdoti de Israel i copea tante bèstie nel altar del témpio. De acordo con Giosefo, un giudeo del passà che el studiea la stòria, nela Pàscoa se copea de pi de 250 mila piegorete come sacrifìssio. Alora, ghen’era tanto sangue nel altar. (Lev. 1:10, 11; Nùm. 28:16, 19) Cossa che lori i fea con tuto questo sangue?

I sientisti i ga cavà intorno del témpio che ghen’era nela època de Gesù e che l’è stà doperà fin el ano 70. Lori i ga catà quel che i giudei i gavea fato su nel altar par el sangue corer do.

Varda due robe che fea che el altar el seitesse neto:

• Ghen’era un buso nel altar: Nela Mishnà, un libro che parla sora le lege e le tradission dei giudei e che l’è stà scrito dopo del ano 200, spiega cossa i gavea fato par el sangue ndar via del altar. In questo libro, dise che ghen’era due busi nte un canton del altar. Alora, el sangue e la àqua doperada par netar el altar i ndea rento questi busi e ndea do par una canaleta fin rivar nel Vale del Sèdron.

  Tanti studiosi i ze de acordo con quel che l’è scrito nela Mishnà. Par esémpio, ghen’è un libro che parla sora la stòria dei giudei e spiega che tanti studiosi i ga catà canalete darente el altar che le era doperade par far la àqua e el sangue ndar via del altar del témpio.

• Ghen’era tanta àqua: I sasserdoti i ghe ocorea de tanta àqua par netar el altar e far el sangue ndar do par quel buso. La àqua che i sasserdoti i doperea nel témpio la vegnea dela cità e ghen’era come che un posso par meterla via. El studioso Joseph Patrich el ga dito che fursi no ghen’era nantro témpio in quela època che gavesse una maniera tanto bona cossita de gaver àqua neta e de mandar via la àqua sporca.