Le Testimònie de Geovà le ga règole sora smorosar?

Le Testimònie de Geovà le crede che i consili e le lege dela Bìblia pol giutarne a far dessision che le ze bone par noantri e che le assarà Dio contento. (Isaia 48:17, 18) No semo mia stati noantri che ghemo creà questi consili e queste lege, ma noantri ghe ndemo drio. Varda arquanti esempi de consili dela Bìblia sora smorosar.a

• El matrimònio l’è par sempre. (Mateo 19:6) Par le Testimònie de Geovà, smorosar l’è una maniera de pareciarse par el matrimònio. Par quela, l’è una roba che toca pensar ben.

• Par una persona smorosar, no la ga mia de esser massa gióvena, la ga de ver belche passà dela età quando le voie sessuai le ze massa forte. — 1 Corinti 7:36.

• Quei che smorosa i ga de esser lìberi par maridarse. Arquante persone le ze divorsiade, ma par Dio no le ze mia lìbere par maridarse. Par lu, el ùnico motivo giusto par una persona divorsiarse l’è la imoralità sessual. — Mateo 19:9.

• La Bìblia la dise che i seghidori de Gesù che i vol maridarse i ga de farlo sol con una persona dela medèsima religion. (1 Corinti 7:39) Le Testimònie de Geovà le capisse che questa lege no la ze drio parlar de persone che sol rispeta le nostre credense, ma la ze drio parlar de persone che le ga le medèsime credense che noantri e che le vive de acordo con lore. Par quela, la ga de esser una Testimònia de Geovà batesada. (2 Corinti 6:14) Dio sempre el ga dito ai so servi par maridarse sol con persone che le crede nele medèsime robe che lori. (Génesi 24:3; Malachia 2:11) Studiosi de ancoi anca i ga dito che l’è bon far cossita.b

• I fioi i ga de obedir ai so genitori. (Proverbi 1:8; Colossensi 3:20) Quando i fioi i ze de star coi so genitori, i ga de obedir ale so dessision sora smorosar. Par esémpio, el pare e la mare i pol dessider quanti ani i so fioi i ga de ver vanti de smorosar e cossa che i fioi i pol far intanto che i ze drio smorosar.

• Le Testimònie de Geovà le dopera i prinsipi dela Bìblia par dessider se le va smorosar o nò e a chi che le va smorosar. Le fà de acordo col consìlio in Gàlati 6:5: “Cada un el portarà la so pròpia responsabilità.” Ancora cossita, vanti de far una dessision sora smorosar, tanti i va in serca de consili de amighi Testimònie de Geovà che i ga de pi speriensa. — Proverbi 1:5.

• Ghen’è tante robe che le persone le cata normal i morosi far, ma che infati le ze bruti pecati. Par esémpio, la Bìblia la dise che no ghemo mia de far imoralità sessual. Questo vol dir no gaver relassion sessual vanti de maridarse, no far sesso oral o sesso anal e gnanca sfrugnar de qualche altra maniera i òrgani sessuai. (1 Corinti 6:9-11) Persone che le ze drio smorosar e che le se sfrugna de una maniera che fà vegner fora voie sessuai le ze drio far impuressa, che la ze nantra roba che Dio el òdia. (Gàlati 5:19-21) La Bìblia anca la dise che l’è sbalià parlar de maniera imoral o sora robe che le fà vegner fora voie sessuai sbaliade. — Colossensi 3:8.

• El cuor o i sentimenti pol imbroiar la persona, cossita la pol far robe che la sa che le ze sbaliade. (Geremia 17:9) Par no assar el so cuor imbroiarli, una roba che i morosi i pol far l’è no restar lori soli in situassion che pol farli gaver voie sbaliade. Par tenderse, lori i pol dessider gaver una persona insieme o restar insieme con un grupo de persone. (Proverbi 28:26) I seghidori de Gesù che i ze in serca de una persona par maridarse i sa che pol esser pericoloso smorosar par meso dela internet, parché l’è fadiga cognosser ben la persona de questa maniera. — Salmo 26:4.