El naso del can

I studiosi i dise che i can i pol doperar el so naso par saver la età de altri can, se i ze masci o fémene e par saver come che i se sente. Anca i pol esser trenadi par catar bombe e droghe. Le persone le dopera i so oci par saver cossa che ghen’è intorno de lori, ma i can i dopera el so naso. L’è come se i fusse boni de “leder” col naso.

Pensaghe sora: La capacità del can de snasar la ze tanto meio che la nostra. De acordo col Instituto Nacional de Normas e Tecnologia dos Estados Unidos, un can “l’è bon de snasar una roba che la ze in meso a un trilion de altre robe. L’è come se ti te fusse bon de tastar la ponta de un cuciaro de sùcaro mescolà in meso a milioni de litri de àqua”.

Parché che la capacità dei can de snasar la ze tanto meio dela nostra?

• El naso del can l’è moio. Par quela, l’è pi fàcile par lu snasar pìcoli odori che i ze par ària.

• El naso del can el ga due parte ndove passa la ària: una par tirar el fià e nantra par snasar. Quando el can el snasa, la ària la passa par la parte del naso che la ga le sèlule par sentir el odor.

• La mesura dela parte del naso del can che lu el dopera par snasar la ze de 130 sentìmetri quadri o de pi. Ma quela de una persona la ga sol 5 sentìmetri quadri.

• Un can el pol gaver fin 50 volte de pi sèlule par sentir el odor de che noantri.

  Tuto questo pol giutar un can a saver la difarensa intrà tute le pìcole parte de un odor. Par esémpio, i umani i pol sentir el odor de una minestra. Ma i studiosi i dise che i can i ze boni de sentir el odor de tuto quel che va nela minestra.

I peschisadori dela Fundação Pine Street, che fà peschise sora el càncaro, i dise che el sarvel e el naso dei can i laora insieme, e i ze un dei meio apareli che ghen’è nela Tera par snasar. I sientisti i ze drio far “nasi” eletrònichi par esser boni de catar fora bombe e malatie come el càncaro.

Cossa che te cati? El naso del can l’è vegnesto dela evolussion? O qualchedun lo ga fato?