LESSION 57
Cossa che te ocore far se te ghè fato un bruto pecato?
Anca se te ami tanto a Geovà e te te sforsi par far quel che l’è giusto, dele volte, te farè qualche sbali. Magari, ghen’è sbali che i ze pi bruti. (1 Corinti 6:9, 10) Se te ghè fato un bruto pecato, ricòrdate che Geovà ancora el te ama e el vol giutarte e perdonarte.
1. Cossa che ghemo de far par gaver el perdon de Geovà?
Quei che i ama a Geovà i resta tanto disgustadi quando i fà un bruto pecato. Ma quel che Geovà el ga prometesto ai so servi pol darghe tanto consolo. Lu el ga dito: ‘Anca se i vostri pecati i ze come un pano rosso, i deventarà bianchi come la neve.’ (Isaia 1:18) Podemo esser sicuri che se se ciamemo grami, Geovà el ndarà perdonarne del tuto. Ma come che mostremo che se ghemo pròpio ciamà grami? Ghemo de fermarse de far quel che l’è sbalià e domandar a Geovà che el ne perdone. Dopo, ghemo de sforsarse par no pensar o far robe che pol darne voia de far el pecato nantra volta. Noantri anca ndaremo sforsarse par far quel che Geovà el dise che l’è giusto. — Ledi Isaia 55:6, 7.
2. Come che Geovà el dopera i ansiani par giutarne quando femo un bruto pecato?
Geovà el dise che, se femo un bruto pecato, ne ocore “ciamar i ansiani dela congregassion”. (Ledi Tiago 5:14, 15.) I ansiani i ama a Geovà e a tuti i fradei. Lori i dopera quel che i sa dela Bìblia par giutarne a tornar a esser amighi de Geovà. — Gàlati 6:1.
Cossa che i ansiani i ndarà far se ghemo fato un bruto pecato? Due o tre ansiani i doperarà la Bìblia par mostrarne parché quel che ghemo fato l’è sbalià. Lori anca i ndarà darne consili par giutarne a mai pi far quel pecato. E se la persona che la ga fato un bruto pecato no la se ciama mia grama, la sarà cavada via dela congregassion, o sia, la assarà de esser una Testimònia de Geovà par un tempo. Cossita, ela no la sarà una bruta influensa par i altri nela congregassion.
IMPARA DE PI!
Come che Geovà el pol giutarne se ghemo fato un bruto pecato?
3. Quando contemo quel che ghemo fato, semo boni de tornar a esser amighi de Geovà
Quando femo un bruto pecato, assemo Geovà disgustà. Par quela, ne ocore parlar del nostro sbàlio a lu. Ledé Salmo 32:1-5, e dopo, parlé sora questo:
Parché che l’è meio contar a Geovà el pecato che ghemo fato invesse de proar sconderlo?
Se parlemo anca coi ansiani sora el sbàlio che ghemo fato, ndaremo sentirse meio. Vardé el VÌDEO, e dopo, parlé sora questo.
Come che i ansiani i ga giutà Canon a tornar a esser amigo de Geovà?
Noantri ghemo de parlarghe la verità ai ansiani e ricordarse che lori i vol giutarne. Ledé Tiago 5:16, e dopo, parlé sora questo:
Parché che sarà pi fàcile gaver el aiuto dei ansiani se ghe parlemo la verità a lori?
Conta el pecato che te ghè fato, parla sempre la verità ai ansiani e aceta el aiuto che Geovà el vol darte
4. Geovà el mostra misericòrdia a quei che ga fato un pecato
Se una persona che la ga fato un bruto pecato no la vol far quel che Geovà el dise che l’è giusto, ela la sarà cavada via dela congregassion, e noantri no passaremo pi tempo insieme a ela. Ledé 1 Corinti 5:6, 11, e dopo, parlé sora questo:
El levà el fà tuta la massa restar granda. Cossa che i altri nela congregassion i pol scominsiar a far se i seita a star insieme dela persona che no la se ga ciamà grama del so bruto pecato?
Geovà el mostra misericòrdia a quei che i ga fato bruti pecati. Compagno a Geovà, i ansiani i proa giutar quei che i ze stati cavadi via dela congregassion. L’è vera che no l’è tanto bon ricever dissiplina. Ma la dissiplina la ga belche giutà tanti a pensar dela maniera giusta e a tornar ala congregassion. — Salmo 141:5.
Come che Geovà el mostra misericòrdia, echilìbrio e amor a quei che ga fato un bruto pecato?
5. Se noantri se ciamemo grami, Geovà el ne perdona
Gesù el ga conta una ilustrassion par mostrarne che Geovà el pol perdonar una persona che la se ciama grama. Ledé Luca 15:1-7, e dopo, parlé sora questo:
Cossa che questo testo el ne insegna sora Geovà?
Ledé Ezechiel 33:11, e dopo, parlé sora questo:
Cossa che prova che una persona la se ga pròpio ciamà grama?
Geovà el se preocupa tanto coi so servi, compagno un pastor el fà cole so piégore
FURSI TE GHÈ BELCHE SCOLTÀ: “Mi go paura de contar ai ansiani el pecato che go fato e esser cavà via dela congregassion.”
Cossa che te podarissi dir a una persona che la se sente cossita?
COSSA CHE TE GHÈ IMPARÀ?
Se noantri femo un bruto pecato, ma se ciamemo grami e se fermemo de far quel che l’è sbalià, Geovà el ndarà perdonarne.
Sito bon de ricordarte?
Parché che l’è importante contar tuto a Geovà se ghemo fato un bruto pecato?
Cossa che ghemo de far par gaver el perdon de Geovà?
Parché che ghemo de domandar el aiuto dei ansiani se femo un bruto pecato?
VUTO SAVER DE PI?
Varda come che un omo el ga visto la misericòrdia de Geovà che la ze scrita in Isaia 1:18.
Come che i ansiani i proa giutar quei che i ga fato un bruto pecato?
Varda come quei che i ga fato un bruto pecato e no i se ga ciamà grami i ze tratadi con amor e misericòrdia.
Un omo che el se ga fermà de far quel che la Bìblia la dise el ga sentio che Geovà el volea tornar a esser so amigo. Par imparar de pi sora questa stòria, varda “Me ocorea tornar a Geovà”.
“La Bìblia la càmbia la vita dele persone” (La Sentinela, 1 de april de 2012)