1925 — Sento ani indrio

NO GA MIA SUCEDESTO QUEL CHE I SPETEA

In 1925, tanti Studianti dela Bìblia i spetea che la Tera la deventesse un Paradiso in quel ano. El fradel Albert Schroeder, che dopo el ga fato parte del Corpo Governante, el ga dito: “Penseino che i untadi che i fusse ancora qua nela Tera in quel ano i ndaria su al cielo par governar insieme con Gesù e che òmini fedeli del passà, come Abraon, Davi e altri, i saria ressussitadi par governar qua nela Tera.” Ma come questo no ga mia sucedesto, tanti fradei e sorele i ze restadi pròpio disgustadi. — Pro. 13:12.

Anca se tanti Studianti dela Bìblia i ze restadi disgustadi, lori i ga seità a predicar. Lori i ga capio che predicar sora Geovà l’era la roba pi importante de far. Ndemo veder come che i fradei i ga doperà el ràdio par predicar par ancora de pi persone.

LE TESTIMÒNIE DE GEOVÀ LE GA FATO ALTRE STASSION DE RÀDIO

In 1924, tante persone le gavea scoltà la stassion de ràdio WBBR. Alora, in 1925, i Studianti dela Bìblia i ga fato nantra stassion de ràdio darente de Chicago, Illinois. El nome de questa nova stassion l’era WORD. Un omo de nome Ralph Leffler, che el ga giutà a far questa ràdio, el ga dito: “Nele note frede de inverno, tante persone de posti pròpio distanti le ga podesto scoltar el programa.” Par esémpio, una fameia che la era de star nel Alasca, 5 mila chilòmetri dela stassion, la ga podesto scoltar belche i primi programi. Dopo, questa fameia la ga scrito una carta par ringrassiarghe, parché i ga cognossesto de pi a Dio e la Bìblia.

La Tore de Vigia de 1 de disembre de 1925 la ga spiegà parché che tanti i ga podesto scoltar la ràdio WORD. Ela la ga dito: “Questa ràdio la era una dele meio dei Stati Unidi, parché la gavea un trasmissor de 5 mila watts. Alora, fin le persone che le era de star in posti distanti nei Stati Unidi, nel nort del Alasca e in Cuba le podea scoltar la ràdio. Tanti che mai i gavea scoltà parlar dela verità i ga volesto saver de pi dopo de scoltarla.”

In questa medèsima època, i Studianti dela Bìblia i volea predicar le bone notìssie par meso dela ràdio anca nel Canadà. In 1924, lori i gavea fato su una stassion de ràdio de nome CHUC in Saskatoon, Saskatchewan. Questa la ze stata una dele prime ràdio nel Canadà che parlea sora la Bìblia. Ma in 1925, lori i ga visto che ghe tocaria cambiar par un posto pi grando. Par quela, la organisassion la ga comprà un teatro vècio in Saskatoon e lo ga rangià.

Par meso de questa nova stassion de ràdio, tante persone che le era de star in colònia le ga podesto scoltar le bone notìssie par la prima volta. Par esémpio, una dona che la era de star nte una cità pròprio distante dela ràdio, la ga scrito par domandar publicassion. El fradel George Naish el ga dito che lori i ga capio che la dona ghe ocorea de queste publicassion pròpio suito. Alora, lori i ga mandà i libri Estudos das Escrituras. Dopo de poco tempo, questa dona la era drio predicar.

GHEMO IMPARÀ UNA VERITÀ TANTO IMPORTANTE

La Tore de Vigia de 1 de marso de 1925 la gavea un artìcolo col tema “Nascimento da nação”. Questo artìcolo l’è stà tanto importante. Fea belche un tempo che i Studianti dela Bìblia i gavea capio che Sàtana el gavea una organisassion nela Tera (le religion false, i governi e el comèrsio) e anca una organisassion nel cielo (demoni). Ma in questo artìcolo, el “schiavo fedele e prudente” el ga spiegà che tuti quei che i serve a Geovà nel cielo e nela Tera anca i ze unidi nte una organisassion. Questa organisassion de Geovà la ze contra la organisassion de Sàtana e la ze pròpio difarente. (Mat. 24:45) El schiavo fedele anca el ga spiegà che el Regno de Dio el ga scominsià a governar nel cielo in 1914 e che dopo dela guere che ghen’è stà la su, Sàtana e i demoni i ze stati paradi via ala Tera e no i pol pi tornar al cielo. — Apo. 12:7-9.

Arquanti Studianti dela Bìblia i ga fato fadiga acetar questa nova verità. Par quela che la Tore de Vigia la ga dito: “Se no te sì de acordo con quel che l’è scrito, porta passiensa, fìdate in Geovà e seita leal.”

Nela Gran Bretagna, Tom Eyre, che l’era colportor (come se ciamea i pionieri), el ga dito come che quasi tuti i Studianti dela ­Bìblia i se ga sentio dopo de leder quela nova verità: “I fradei i ze restadi tanto contenti de capir meio Apocalisse 12. Dopo che lori i ga capio che el Regno de Dio l’era belche drio governar nel cielo, i ga bio ancora de pi voia de predicar e i ga visto che Geovà el faria robe maraveiose nel futuro.”

EL PÒPOLO DE DIO EL GA DE PARLAR SORA GEOVÀ

Ancoi, le Testimònie de Geovà le parla tanto sora Isaia 43:10, che dise: “Geovà el dise: ‘Valtri sì le me testimònie, si, valtri sì el servo che mi go scoliesto.’” Vanti de 1925, se gavea doperà questo testo ciare volte nele nostre publicassion. Ma in 1925, Isaia 43:10 e 12 l’è stà doperà in 11 reviste Tore de Vigia!

Nel fin del mese de agosto de 1925, i Studianti dela Bìblia i ze ndati nte un congresso in Indianapolis, Indiana. Nel programa del congresso, ghen’era bele parole del fradel Rutherford. L’era scrito: “Semo vegnesti a questo congresso par esser incoraiadi a far el nostro meio nela predicassion e par esser testimònie de Dio.” Nei oto giorni de congresso, i fradei e sorele i ze stati incoraiadi a parlar sora Geovà in tute le oportunità.

Nel sabo, 29 de agosto, el fradel Rutherford el ga fato el discorso col tema “Uma chamada à ação”. In questo discorso, lu el ga dito che l’è tanto importante parlar sora Geovà. Lu el ga dito: “Geovà el dise al so pòpolo . . . : ‘Valtri sì le me testimònie e mi son Dio.’ Alora, lu el ve dise: ‘Alsé su un segnal par i pòpoli.’ Sol i servi de Dio i pol alsar su el segnal par avisar le persone. Sol lori i ga el spìrito santo par esser le so testimònie.” — Isa. 43:12; 62:10.

Dopo del discorso del fradel Rutherford, lu el ga ledesto un documento de nome “Mensagem de Esperança”. Questo documento el parlea che sol el Regno de Dio el pol darne pace, salute, una bela vita, libertà e felicità par sempre. Dopo, questo documento l’è stà tradusio par arquante léngue e l’è vegnesto fora come un foieto. I Studianti dela Bìblia i ga fato intorno de 40 milioni de còpie.

I Studianti dela Bìblia no i ga cambià suito el so nome par Testimònie de Geovà. Ma col tempo, lori i ga capio che i gavea la responsabilità de esser so testimònie.

GHEMO SCOMINSIÀ A VISITAR NANTRA VOLTA LE PERSONE

Come adesso ghen’era de pi servi de Dio in tuto el mondo, la organisassion la volea che i fradei i tornesse a parlar cole persone che le gavea scoltà le bone notìssie. Dopo dela predicassion spessial col foieto Mensagem de Esperança, el Boletina el ga dito cossita: “Valtri gavé de tornar par parlar cole persone che le ga acetà el foieto.”

El Boletin de genaro de 1925 el ga parlà cossa che un fradel el ga dito sora la predicassion nel Texas: “L’è maraveioso de veder come che le persone le ga pi caro de scoltar le bone notìssie dopo che le visitemo arquante volte. Nte una pìcola cità del nostro teritòrio, ghemo visità tute le persone sinque volte nei ùltimi diese ani. . . . E fà poco che la sorela Hendrix e la me mare le ze tornade a quela cità e le ga assà publicassion come mai.”

E nel Panamà, un colportor el ga scrito: “Tante persone che le me gavea parà via nela prima volta le me ga ricevesto ben nela seconda o nela tersa volta. In questo ano, go doperà quasi tuto el me tempo par tornar a visitar le persone che le gavea mostrà interesse, e l’è stà tanto bel.”

COSSA NDARÌSSINO FAR?

Nel fin del ano de 1925, el fradel Rutherford el ga scrito a tuti i colportori cossa che l’è stà fato in quel ano e cossa che se spetea che i fesse de lì avanti. Lu el ga dito: “In questo ano, ghemo bio la oportunità de consolar tanti che i era disgustadi e sicuro che semo restadi tanto contenti. Nel pròssimo ano, gavaré la oportunità de dar testimònio de Dio e del so Regno e de mostrar che sì i so adoradori . . . Tuti insieme volemo doperar la nostra voce par lodar el nostro Dio e el nostro Rè.”

Nel final del ano de 1925, i fradei i era drio pareciarse par far pi grando el Betel de Brooklyn. Alora, in 1926, lori i ndaria scominsiar un laoro tanto grando de costrussion.