Geovà sempre el te amarà

1-2. Come che tanti fradei i pol scominsiar a sentirse?

PENSA nte un barco che l’è in meso un bruto temporal nel mar e le onde le ze drio portarlo de là in qua. Questo barco sol el restarà firme nel so posto se qualchedun el mola do una àncora nel mar.

² Se te sì drio infrontar una bruta dificoltà, pol esser che te te senti come quel barco in meso el temporal. Pol esser che te eri contento, ma de colpo, te sì restà tanto desanimà. Una volta te eri sicuro che Geovà el te amea e l’era drio giutarte, ma adesso no te sè gnanca pi se lu l’è drio veder quel che te sì drio infrontar. (Sal. 10:1; 13:1) Fursi un amigo el te ga dato consolo e el te ga giutà a sentirte meio. (Pro. 17:17; 25:11) Ma dopo de un tempo, te ghè scominsià a domandarte nantra volta se Geovà pròpio el te vol ben e se lu l’è drio giutarte. Alora, come che te pol seitar a esser sicuro che Geovà el te ama e che el va sempre giutarte?

3. (a) Cossa che vol dir gaver “amor leal”? (Salmo 31:7; 136:1) (b) Parché che podemo dir che Geovà l’è el meio esémpio de amor leal? (Varda anca la ilustrassion.)

³ Se te sì drio infrontar una bruta dificoltà, ricòrdate del amor leal de Geovà. (Ledi Salmo 31:7;a 136:1.b) Una persona che la ga “amor leal” la ga un sentimento tanto forte e no la ndarà mai abandonar quei che ela la ama. Geovà l’è el meio esémpio de amor leal. Ésodo 34:6, 7 dise che Geovà l’è “pien de amor leal”. La Bìblia anca la dise sora lu: “Ti te dimostri tanto amor leal par tuti quei che i te invoca.” (Sal. 86:5) Alora, questi testi i ne insegna che Geovà mai el ndarà abandonar i so servi. Ricordarte del amor leal che Geovà el ga par ti pol esser come una àncora che la ndarà giutarte a restar firme in meso le dificoltà. — Sal. 23:4.

RICÒRDATE CHE EL AMOR LEAL DE GEOVÀ L’È UNA DELE VERITÀ PI IMPORTANTE

4. (a) Parla de arquante verità importante che te ghè imparà nela Bìblia. (b) Parché che nissun podaria farte cambiar de idea?

⁴ Nantra roba che pol giutarte quando te sì drio infrontar una bruta dificoltà la ze capir che el amor leal de Geovà la ze una dele verità pi importante dela Bìblia. Ma cossa che le ze queste verità pi importante dela Bìblia? Varda un per de verità che te ghè belche imparà. Par esémpio, che el nome de Dio l’è Geovà, che Gesù l’è el Fiol de Dio, che i morti no i sa gnente, che la Tera la deventarà un paradiso e che le persone le podarà viver par sempre. (Sal. 83:18; Ecl. 9:5; Gio. 3:16; Apo. 21:3, 4) Dopo che te ghè capio queste verità, nissun podaria farte creder in nantra roba parché te ghè visto le prove che questi insegnamenti i ze veri. Alora, ghemo de veder el amor leal de Geovà come una dele verità pi importante che ghen’è nela Bìblia. Adesso, ndemo veder come questa verità la pol giutarne a esser ancora pi sicuri che Geovà el ne ama e che el ndarà sempre giutarne.

5. Cossa che giuta una persona a assar indrio una busia e scominsiar a creder in quel che l’è vero?

⁵ Quando te eri drio studiar la Bìblia, cossa che te ga giutà a capir che una roba che te credei no la era mia vera? Pol esser che te ghè comparà quel che te credei con quel che la Bìblia la dise. Par esémpio, metemo dir che te credei che Gesù l’era Dio. Intanto che te ghè studià la Bìblia, fursi te te ghè domandà: ‘Sarà che questo l’è pròpio vero?’ Dopo che te ghè visto quel che la Bìblia la dise, te ghè capio che nò. Alora, te ghè scominsià a creder che Gesù l’è el ‘primo’ e el “ùnico Fiol” de Dio. (Col. 1:15; Gio. 3:18) L’è vera che fursi l’è stà fadiga assar indrio quel che te credei. Ma dopo che te ghè capio quala che la ze la verità, gnente podaria farte tornar a creder in quela busia. — 2 Cor. 10:4, 5; Fil. 3:13.

6. Parché che te pol esser sicuro che el ‘amor leal de Geovà el dura par sempre’?

⁶ Te pol far la medèsima roba quando te pensi sora quel che la Bìblia la dise sora el amor leal de Geovà. Se te sì drio infrontar una dificoltà e te scominsi a pensar che Geovà no’l te ama, domandate: ‘L’è giusto pensar cossita?’ Dopo, varda quel che dise el Salmo 136:1, che l’è el testo de questo stùdio, e domandate: ‘Parché che Geovà el dise che el so amor l’è leal? Parché che nel Salmo 136 lu el dise 26 volte che el so amor leal el dura par sempre?’ Ricòrdate che el amor leal de Geovà l’è una verità tanto importante cossita come tante altre che te credi. Alora, se te scominsi a pensar che Geovà no’l te ama o che no te ghè mia valor par lu, ricòrdate che questo l’è una busia. Cossita come te sè che tante altre robe no le ze vere, sìpia sicuro che anca questa la ze una busia!

7. Che testi dela Bìblia i prova che Geovà el te ama?

⁷ Nela Bìblia, ghen’è tante prove del amor che Geovà el ga par noantri. Par esémpio, Gesù el ga dito ai so dissìpoli: “Valtri valé de pi che tanti pardai.” (Mat. 10:31) E Geovà el ga dito ai so servi: “Vao darte forsa, si, vao giutarte. Vao tégnerte firme cola me man drita de giustìssia.” (Isa. 41:10) Varda che bel che l’è quel che Geovà e Gesù i ga dito. Gesù no’l ga mia dito: ‘Fursi valtri valé de pi.’ Ma el ga dito: ‘Valtri valé de pi.’ E Geovà no’l ga mia dito: ‘Pol esser che mi vao giutarte.’ Ma el ga dito: ‘Mi vao giutarte.’ Te ghè belche pensà che Geovà no’l te amea par causa dele dificoltà che te eri drio infrontar? Alora, questi testi i pol giutarte a sentirte meio, ma anca i va giutarte a esser sicuro del amor che lu el ga par ti. Parché? Parché questi testi i ze prove del amor de Geovà. Cossita, se te pensi sora questi testi e te preghi a Geovà par contar quel che te sì drio sentir, te podarè dir: ‘Mi son sicuro del amor che Dio el ga par mi e credo in questo amor.’c — 1 Gio. 4:16

8. Cossa che te pol far se gnancora no te sì sicuro che Geovà el te ama?

⁸ Ma cossa te pol far se gnancora no te sì sicuro che Geovà el te ama? Invesse de starghe drio ai to sentimenti, pensa in quel che te sè. Noantri no podemo fidarse in quel che sentimo, ma podemo fidarse del tuto nela Bìblia. E la Parola de Dio la dise che Geovà el ne ama. Ghemo anca de ricordarse che, se no credemo che Geovà el ne ama, l’è come se fussino drio dir che lu no’l ga la so qualità pi importante, che la ze el amor. — 1 Gio. 4:8.

RICÒRDATE CHE GEOVÀ ‘EL TE VOL BEN’

9-10. Sora cossa che Gesù l’era drio parlar vanti de dir: “El Pare el ve vol ben”? (Gioani 16:26, 27) (Varda anca la ilustrassion.)

⁹ Noantri podemo imparar de pi sora el amor de Geovà quando pensemo sora una roba che Gesù el ga dito ai so dissìpoli. Lu el ga dito: “El Pare el ve vol ben.” (Ledi Gioani 16:26, 27.d) Gesù no’l ga dito queste parole ai so dissìpoli sol par farli restar pi contenti. Quando ledemo i versìcoli prima, vedemo che Gesù no l’era gnanca drio parlar sora quel che i dissìpoli i era drio sentir. Invesse, lu l’era drio parlar sora la orassion.

¹⁰ Gesù el ga dito ai so dissìpoli che lori i gavaria de pregar par meso de lu e nò par lu. (Gio. 16:23, 24) L’era tanto importante che Gesù ghe insegnesse questa roba. Parché? I dissìpoli i vedea a Gesù come un grando amigo. Alora, pol esser che, dopo che lu l’è stà ressussità, lori i gavesse voia de pregar a lu. Come lori i savea che Gesù ghe volea ben, fursi i ga pensà che lu ghe piaseria de scoltar le so orassion e el domandaria che Geovà li giutesse. Alora, Gesù ghe ga dito che no i gavea de pensar cossita. Parché? Lu el ga dito: “El Pare el ve vol ben.” Qua catemo una verità tanto importante dela Bìblia. Geovà el te vol tanto ben! Alora, anca se te ghè imparà sora Gesù e te ghè scominsià a amarlo, te ghè de pregar a Geovà parché te sì sicuro che ‘lu el te vol ben’. (Gio. 14:21) Te mostri che te credi che Geovà el te ama tute le volte che te preghi a lu. — 1 Gio. 5:14.

PROA CAPIR PARCHÉ CHE TE PENSI CHE GEOVÀ NO’L TE AMA

11. Parché che Sàtana el resta contento se scominsiemo a gaver dubi del amor de Geovà?

¹¹ Sàtana el fà de tuto par farne pensar che Geovà no’l ne ama. Lu el resta contento quando ghemo dubi del amor de Geovà parché lu l’è drio proar ‘finirne fora’. (1 Pie. 5:8) Par esémpio, lu el vol che pensemo che no meritemo el sacrifìssio de Gesù. (Ebr. 2:9) Se te scominsi a pensar cossita, domandate: ‘Ma chi che resta contento se penso cossita? E chi che vol che resto desanimà e desisto de servir a Geovà?’ Sol Sàtana. Lu no’l ga mia el amor de Geovà. Alora, lu el vol che anca noantri pensemo che Geovà no’l ne ama mia e che no’l vol esser nostro amigo. (Efe. 6:11) Quando se ricordemo de quel che Sàtana l’è drio far, gavaremo ancora de pi forsa par ‘meterse contra lu’. — Tia. 4:7.

12-13. Come che fursi se sentimo par causa del pecato?

¹² Ma fursi anca ne vien dubi sora el amor de Geovà par causa del pecato che ghemo. (Sal. 51:5; Rom. 5:12) El pecato el ga rovinà la amicìssia che i umani i gavea con Geovà e anca el ga rovinà la so maniera de pensar, i so sentimenti e so salute.

¹³ Par causa del pecato, noantri sentimo colpa, ansietà, paura e vergogna. L’è vera che se sentimo cossita quando desobedimo a Geovà. Ma anca quando no femo gnente de sbalià, podemo gaver questi sentimenti parché semo imperfeti, e Geovà no’l ne ga creà cossita. (Rom. 8:20, 21) Compagno un auto no’l laora ben quando el ga el pneu sbusà, noantri no semo mia boni de viver de maniera perfeta parché ghemo el pecato. L’è par quela che dele volte scominsiemo a pensar che Geovà no’l ne ama. Alora, ghemo de ricordarse che lu l’è ‘grando, che el mèrita profondo rispeto e che el mostra amor leal a quei che i lo ama e che i obedisse ai so comandamenti’. — Nee. 1:5.

14. Come che pensar nel sacrifìssio de Gesù pol giutarne a creder che Geovà el ne ama? (Romani 5:8) (Varda anca el quadro “Ghemo de star atenti parché el pecato el pol imbroiarne”.)

¹⁴ Anca cossita, dele volte, pensemo che no meritemo gaver el amor de Geovà. E par dirla giusta, no meritemo pròpio. Par quela che l’è tanto bel saver che Geovà el ne ama. No ghemo fato gnanca una roba par meritar el so amor. Anca cossita, lu el ga mandà el so Fiol qua ala Tera par morir par i nostri pecati. (1 Gio. 4:10) Ricòrdate che Gesù l’è vegnesto ala Tera par salvar pecadori e nò persone perfete, e che Geovà no’l ne ga mai domandà de far tuto perfeto. (Ledi Romani 5:8.e) Alora, come ghemo visto, pol esser che ghemo dubi del amor che Geovà el ga par noantri par causa del pecato che ghemo. Capir che questo pol suceder ne giutarà a gaver ancora de pi forsa de no seitar a pensar cossita. — Rom. 7:24, 25.

SFÒRSATE DE SEITAR LEAL

15-16. De cossa che podemo esser sicuri se seitemo leai a Geovà, e parché? (2 Samuel 22:26)

¹⁵ Geovà el vol che seitemo a esser so amighi. (Deu. 30:19, 20) Se femo cossita e seitemo leai a lu, podemo esser sicuri che anca lu el seitarà leal a noantri e che el ne giutarà a darghene fora con tute le dificoltà che ghemo nela vita. — Ledi 2 Samuel 22:26.f

¹⁶ Come ghemo imparà in questo stùdio, podemo esser sicuri che gavaremo el aiuto che ne ocore par infrontar le dificoltà ­adesso e nel futuro. Come ghemo imparà nela Bìblia, podemo anca esser sicuri che Geovà el ne ama e che sempre el ndarà giutarne. E se magari ghemo dubi del amor de Geovà, ghemo de pensar in quel che noantri savemo invesse de ndar drio a quel che noantri sentimo. Alora, sìpia sicuro che el amor leal de Geovà mai el finirà!