Cossa che la Bìblia la dise sora ndar de star insieme sensa esser maridadi?

La risposta dela Bìblia

La Bìblia la dise che Dio no’l vol che le persone le fae “imoralità sessual”. (1 Tessalonissensi 4:3) Nela Bìblia, la spression “imoralità sessual” la ze doperada par parlar sora robe come adultèrio, ati omossessuai e relassion sessuai intrà un omo e una dona che no i ze mia maridadi.

Parché Dio el se interessa se un omo e una dona i ze maridadi o nò?

L’è stà Dio che el ga creà el matrimònio. Quando el ga metesto insieme el primo omo e la prima dona, el ga fato el primo matrimònio. (Génesi 2:22-24) Dio no’l ga mia creà el omo e la dona par star insieme sensa esser maridadi e sensa esser leai un al altro.
Dio el sa quel che l’è meio par le persone. Par via del matrimònio, Dio el vol che el omo e la so dona i reste insieme par sempre. Cossita, tuta la fameia la ndarà ben e la gavarà protession. Varda un esémpio: un fabricante el dà istrussion sora come meter insieme le parte par far un armàrio. Anca Dio el dà istrussion a quei che i ze maridadi. Se i mete in pràtica queste istrussion, lori i sarà felici. I comandamenti de Dio sempre i fà ben a quei che i ghe obedisse. — Isaia 48:17, 18.

Come le istrussion del fabricante le ne insegna a far un armàrio dela maniera giusta, anca le istrussion de Dio le ne insegna come gaver un matrimònio felice
Quei che i fà relassion sessuai fora del matrimònio i pol gaver bruti problemi. Par esémpio, la dona la pol restar gràvida sensa voler, se pol ciapar malatie che se passa par via dele relassion sessuai e pol causar problemi emossionai.
Dio el ga creà el omo e la dona de una maniera che i pol gaver fioi par meso dele relassion sessuai. La vita la ze sacra par Dio. Alora, poder gaver fioi l’è un presente tanto pressioso. Mostremo che demo valor a questo presente de Dio quando femo de acordo con quel che lu el dise sora le relassion sessuai. — Ebrei 13:4.

Cossa dir de ndar de star insieme vanti de maridarse par veder se va ben?

Quel che l’è pi importante par gaver un matrimònio felice l’è che el sposo e la sposa i sìpia determinadi a restar insieme e laorar insieme par risolver i problemi. Esser maridadi assa pi forte questa determinassion. Par quela, no ghe ocore mia ndar de star insieme vanti sol par “proar”. Se el omo e la dona no i ze maridadi, quando vien fora qualche problema, lori no i gavarà la medèsima determinassion de risolverli e i podarà spartirse par qualche motivo.a — Mateo 19:6.

Come gaver un matrimònio felice?

No ghen’è matrimoni perfeti. Ma quei che i ze maridadi i pol gaver un matrimònio felice quando i mete in pràtica i consili dela Bìblia. Varda arquanti esempi:

Invesse de pensar sol in quel che ti te vol, pensa in quel che l’è meio par el to sposo o la to sposa. — 1 Corinti 7:3-5; Filipensi 2:3, 4.
Seité amar e rispetar un al altro cada volta de pi. — Efesi 5:25, 33.
Impara a pensar ben vanti de parlar. — Proverbi 12:18.
Sìpia passiente e pronto par perdonar. — Colossensi 3:13, 14.

a Vedi el artìcolo “Fameia felice — Determinassion.”