Passé tempo de qualità insieme

Tanti che i ze maridadi i dise che no i se parla tanto, anca se i passa tanto tempo insieme. Parché?

• Insieme ma distanti — Parché?

• Cossa che te pol far

• Cossa che i maridadi i dise

• Par parlar insieme

Insieme ma distanti — Parché?

• Quando semo strachi

  “Quando mi e me omo ghemo un tempo par parlarse, o mi o lu semo strachi. E quando che mi son straca mi resto inrabiada, alora l’è meio che vardemo la television insieme.” — Anna.

• Internet

  “Ze fàcile restar tanto tempo nele rede sossiai e nela internet. Quando che te vedi le ore le ga passà e ti no te ghè gnanca parlà col to omo. Se l’è cossita noantri gnanca ghemo de bisogno de star nel medèsimo posto.” — Katherine.

• Gaver interessi difarenti

  “Quando el me omo el torna del laoro, lu el va far le robe che ghe piase. Mi cato che lu el ga de ver un tempo par descansar, parché lu el laora tanto. Ma mi me piaseria passar de pi tempo con lu.” — Jane.

• Laoro

  “Par via dela tecnologia, noantri semo boni de laorar stesso quando semo casa cola fameia. Tante volte mi vedo che son drio risponder e-mails e messagi de laoro, invesse de passar pi tempo cola me dona.” — Mark.

Cossa che te pol far

• Ricòrdate che passar tempo insieme no l’è una roba poco importante, l’è una nessessità.

  Prinsìpio dela Bìblia: “Sìpie sicuri de quale che le ze le robe pi importante.” — Filipensi 1:10.

  Par pensarghe sora: Te mostri che el to matrimónio l’è pi importante che el to laoro e le robe che te piase de far? Sarà che el to omo o la to dona i ga la to atension sol quando te vansa tempo?

  Proa far: Pensa de passar un tempo insieme sensa robe che le pol intrigar, no stà assar de farlo.

  “Me piase quando el me omo el pensa de far qualcossa sol par noantri due. Quando lu el fà cossita, mi me sento importante e vedo che lu el ghe piase de passar tempo con mi. Par quela mi lo amo ancora de pi.” — Anna

• Assa el selular de banda.

  Prinsìpio dela Bìblia: “Par tute le robe ghen’è un tempo.” — Eclesiasti 3:1.

  Par pensarghe sora: Quante volte te ghè assà de darghe atension al to omo o la to dona par risponder i messagi del telèfono?

  Proa far: Proa magnar insieme col to omo o la to dona al manco una volta al giorno, e assa el selular in nantro posto dela casa. Magnar insieme l’è una bela oportunità par parlar de quel che ga sucedesto nel giorno.

• Sempre che podé ndé al mercado e fé i laori de casa insieme.

  Prinsìpio dela Bìblia: “L’è meio due che un, parché lori i ga una bona ricompensa par el so laoro.” — Eclesiasti 4:9, varda la nota.

  Par pensarghe sora: Quante volte valtri ve sparti par far le compre o par far altri laori?

  Proa far: Fé le robe insieme, anca se sol una persona le pol farle.

  “Invesse de pensar che far compre, lavar i piati, piegar la roba o tender del giardin le ze robe che toca far, te pol pensar che le ze oportunità de passar pi tempo insieme.” — Nina

• No stà spetar robe impossìbile.

  Prinsìpio dela Bìblia: “Tuti i ga de cognosserve come persone che pensa de maniera echilibrada.” — Filipensi 4:5.

  Par pensarghe sora: Come che te pol saver se no te sì drio spetar massa robe del to omo o dela to dona?

  Proa far: Parlé de quel che un o el altro ga de bisogno. Proé pensar sora come ndaré passar el tempo e come far qualcossa che tuti i due i reste contenti.

  “El me omo el ga tanta energia, ma mi ghenò poca, par via dela me salute. Tante volte mi ghe digo che lu el pol ndar fora far quel che ghe piase, e dopo quando che el torna, podemo passar tempo insieme. Alora intanto che lu el fà i so esersissi mi posso descansar. Cossita restemo contenti, parché tuti i due ghemo fato qualcossa che gaveino de bisogno.” — Daniela

Par parlar insieme

Prima cada un risponde ale domande lu sol, dopo valtri podé parlarve sora le risposte che gavé dato.

• Te cati che valtri sì drio passar tempo insieme che basta o podé far meio?

• Che robe el to omo o la to dona i fà par passar tempo insieme che te pol lodarlo?

• Cossa che te piaseria che el to omo o la to dona el fesse difarente?

• Quante volte te ghè assà de scoltar el to omo o la to dona par darghe atension al telèfono o ala television?

• Cossa che valtri podé far par no spetar massa un del altro?

• Che cambiamenti podé far questa stimana, par esser boni de passar pi tempo insieme sensa qualcossa che ve intrighe?