Parché che le Testimònie de Geovà no le selebra mia aniversàrio de nassimento?
Le Testimònie de Geovà no le selebra mia aniversàrio de nassimento parché le crede che la ze una festa che no ghe piase a Dio. L’è vera che nela Bìblia no ghen’è mia una òrdine scrita par no selebrar aniversari, ma la ne giuta a pensarghe sora quel che ghen’è par de drio e mostra cossa Dio el pensa sora questo assunto. Varda quatro robe sora i aniversari e cossa che la Bìblia la dise sora questo.
La selebrassion de aniversari la vien del ocultismo. De acordo con un dissionàrio sora tradission e lende, questa selebrassion la ze vegnesta fora parché le persone le credea che, nel giorno che se fea i ani, forse e spìriti rugni i podea farghe mal ala persona. E gaver i amighi darente par darghe tanti saludi giutea a protégerla. El libro The Lore of Birthdays (La Tradission de Aniversari de Nassimento) el dise che, nel passà, saver el giorno de nassimento l’era “tanto importante par far un oròscopo” de acordo cola “siensa mìstica dela astrologia”. El libro anca el dise che “le persone le credea che le candele de aniversàrio le gavea el poder màgico de realisar quel che la persona la volea.”
Ma la Bìblia la condana doperar magia, indovinassion, spiritismo o “robe come queste”. (Deuteronómio 18:14; Gàlati 5:19-21) Tanto che un dei motivi par Dio condanar la antiga cità de Babilònia l’è stà parché le persone che le era de star lì le fea la astrologia, che la ze una maniera de far indovinassion. (Isaia 47:11-15) Le Testimònie de Geovà no le va drio de saver de ndove vien tute le tradission. Ma quando ghen’è istrussion ciare nela Bìblia, come questa, noantri ghe obedimo.
I primi dissìpoli de Cristo no i selebrea aniversari. La Ensiclopèdia Delta Universal la dise che i primi dissìpoli “i vedea la selebrassion de aniversàrio come una cosa fata par persone che le pratichea la adorassion falsa”. La Bìblia la mostra che i apòstoli e i altri che i ga imparà del pròpio Gesù i ga assà el esémpio par tuti i dissìpoli far compagno. — 2 Tessalonissensi 3:6.
La Bìblia la dise che i cristiani i ga de far sol una selebrassion, e che no la ze de un nassimento, ma si de una morte: la de Gesù. (Luca 22:17-20) E no l’è de maraveiarse, parché la Bìblia la dise che el giorno dela morte l’è meio de che el giorno del nassimento. (Eclesiasti 7:1) Nel final dela so vita ntela Tera, Gesù el ga fato un bon nome davanti de Dio. Cossita, el giorno dela so morte l’è stà pi importante de che el giorno del so nassimento.
La Bìblia mai la parla de un servo de Dio che el ga selebrà un aniversàrio. Ma la Bìblia la parla de due selebrassion de aniversari, de persone che no le servia mia a Dio. E brute robe le ga sucedesto in tute due. — Génesi 40:20-22; Marco 6:21-29.
E i fioi dele Testimònie de Geovà? Sarà che lori i cata che i ze drio perder qualcossa parché no i selebra aniversari?
Compagno a tuti i bravi pare e mare, le Testimònie de Geovà le mostra che i ama i so fioi. Nò sol una volta al ano, ma tuto el ano. Lori anca i ghe piase de dar presenti ai fioi e riunirse par far feste. Questi genitori i proa far come el esémpio perfeto de Dio, che el dà de volentiera cose bone ai so fioi. (Mateo 7:11) Par quela, i fioi dele Testimònie de Geovà no i cata che i ze drio perder qualcossa. Varda cossa che i dise:
“L’è pi bel guadagnar un presente quando no lo spetemo mia.” — Tammy, 12 ani.
“Mi no guadagno presenti nel me aniversàrio, ma me pupà e me mama i me dà presenti in altri giorni. Me piase cossita, parché l’è una sorpresa par mi.” — Gregory, 11 ani.
“Te cati che 10 minuti, un bolo e una cansion l’è una festa? Te gavaria de vegner nela me casa e veder cossa che l’è una festa!” — Eric, 6 ani.