Cossa l’è el segnal dei “ùltimi giorni” o del “fin dei tempi”?
La risposta dela Bìblia
La Bìblia la parla de come che saria el mondo, le persone e de quel che ndaria suceder nel ‘final del sistema de cose’, o nel ‘fin del mondo’. (Mateo 24:3; Versão Rei Jaime) La Bìblia la ciama questo tempo de ‘ùltimi giorni’ e ‘tempo del fin’, o ‘fin dei tempi’. — 2 Timòteo 3:1; Daniel 8:19; Bíblia Fácil de Ler.
Quale che le ze le professie che la Bìblia la parla sora i “ùltimi giorni”?
La Bìblia la parla de arquante cose che le ndaria suceder nel stesso tempo e che questo saria “el segnal” de che sarìssino nei ùltimi giorni. (Luca 21:7) Varda arquanti esempi:
Guere in tuta la Tera. Gesù el ga dito: “Nassion se levarà su contra nassion e regno contra regno.” (Mateo 24:7) Anca Apocalisse 6:4 el parla de un cavaliero simbòlico che vol dir le guere che le ndaria “cavar la pace dela tera”.
Fame. Gesù el ga dito: “Ghen sarà mancansa de magnar.” (Mateo 24:7) El libro de Apocalisse el parla de nantro cavaliero simbòlico che vol dir la fame che gavaria in tanti posti. — Apocalisse 6:5, 6.
Grandi teremoti. Gesù el ga dito che ghen saria “teremoti in un posto dopo l’altro”. (Mateo 24:7; Luca 21:11) I grandi teremoti che i ndaria suceder in tuto el mondo ndaria far tanti sofrir e morir come mai.
Malatie. Gesù el ga dito che ghen saria “brute malatie” in tuto el mondo. — Luca 21:11, Contemporary English Version.
Crimi. Anca se ghen’è crimi fà tanto tempo, Gesù el ga dito che nei ùltimi giorni ghen saria “aumento de quel che l’è contra la lege”. — Mateo 24:12.
Rovina dela tera. Apocalisse 11:18 dise che i òmini i ndaria ‘rovinar la tera’. Lori i la rovinaria de arquante maniere, par via dela violensa, dele robe sbaliade e anca par destruser la naturesa.
Persone cada volta pedo. In 2 Timòteo 3:1-4, la Bìblia la parla come che le persone le saria. Lore le saria ‘ingrate, sensa lealtà, . . . no le saria disposte a far acordi, le saria caluniadore, sensa autocontrolo, crudele, sensa amor a quel che l’è bon, traditore, testarde, piene de orgòlio’. Tante persone le saria cossita, par quela, se pol ciamar de “tempi crìtichi difìcili de soportar”.
Fameie che no le ze pi unide. In 2 Timòteo 3:2, 3, la Bìblia la parla che tanti i saria “sensa afeto natural”, o sia, no i gavaria amor par la fameia, e che i fioi i saria ‘desobedienti ai genitori’.
Sempre manco amor par Dio. Gesù el ga dito: “El amor dela maioransa el se sfredarà.” (Mateo 24:12) Gesù el ga dito che la pi granda parte dele persone no le ndaria pi amar a Dio. Anca, 2 Timòteo 3:4 dise che nei ùltimi giorni le persone ‘le amaria i piaseri invesse de a Dio’.
Falsità religiosa. In 2 Timòteo 3:5, la Bìblia la dise che le persone le faria finta de amar a Dio, ma in verità, no le faria quel che la Bìblia la dise.
Capir cada volta meio le professie dela Bìblia. El libro de Daniel el ga dito che ‘nel tempo del fin’, tante persone le ndaria cognosser cada volta de pi le verità dela Bìblia e le ndaria capir meio le professie. — Daniel 12:4.
El laoro de predicassion in tuto el mondo. Gesù el ga dito: “E queste bone notìssie del Regno le sarà predicade in tuta la tera abitada.” — Mateo 24:14.
Mancansa de interesse e tor in giro i altri. Gesù el ga dito che tanti no i badaria le prove de che el fin el saria drio rivar. (Mateo 24:37-39) E anca, 2 Piero 3:3, 4 el dise che tante persone le ndaria riderghe drio de queste prove, parché le pensa che no le vol dir gnente.
Realisassion de tute le professie. Gesù el ga dito che tute, no sol arquante dele professie, le gavaria de realisarse nel stesso tempo nei ùltimi giorni. — Mateo 24:33.
Semo drio viver nei “ùltimi giorni”?
Si. Le condission del mondo e anca i càlculi baseadi nele professie dela Bìblia i mostra che i ùltimi giorni i ga scominsià in 1914, stesso ano che ga scominsià la Prima Guera Mondial. Varda questo vìdeo par capir come che quel che l’è drio suceder nel mondo mostra che semo drio viver nei ùltimi giorni:
In 1914, el Regno de Dio el ga scominsià a governar nel cielo. Una dele prime robe che questo Regno el ga fato l’è stà parar via del cielo Sàtana, el Diaol, e i so demoni, cossita lori i ze drio far el mal sol qua nela Tera. (Apocalisse 12:7-12) Quando vedemo le robe rugne che le persone le fà podemo capir che Sàtana l’è drio influensar la umanità. Queste robe le fà che i ùltimi giorni i sia “tempi crìtichi difìcili de soportar”. — 2 Timòteo 3:1.
Tanti i ga aflission par via de questi tempi crìtichi. Lori i se preocupa parché le persone no le ze pi bone de viver insieme. Arquanti anca i ga paura che le persone le se finisse fora una col’altra.
Invesse, altre che anca le ga aflission par via dele condission del mondo, le varda el futuro con speransa. Lore le ze sicure che suito el Regno de Dio ndarà finir coi problemi del mondo. (Daniel 2:44; Apocalisse 21:3, 4) Lore le speta con passiensa el tempo che Dio el ndarà realisar le so promesse, e le cata consolo nele parole de Gesù: “Quel che el persevera fin el fin el sarà salvo”. — Mateo 24:13; Michea 7:7.