I GIÓVENI I DOMANDA
Come la Bìblia la pol giutarme? — Parte 2: Proa assar la letura dela Bìblia pi interessante
Un gióveno che ga nome Will el ga dito: “Fursi te cati che leder la Bìblia l’è un laoro che va stufarte. Questo sol el sucede se te assi de far qualche cosa quando te ledi.”
Vuto saver cossa che pol giutarte a gaver piaser in leder la Bìblia? Alora, questo artìcolo l’è par ti.
Daghe vita ala to letura
Imagina che te sì lì ntela stòria che te ledi. Te pol far questo:
Scoli una stòria dela Bìblia che te vol studiar. Te pol scòlier un toco de un Vangelo o una stòria de nantra parte dela Bìblia, o te pol scòlier una Letura de una stòria dela Bìblia che la ze ntel site jw.org.
Ledi la stòria. Te pol leder ti sol, cola to fameia o coi to amighi. Un pol contar la stòria e i altri i pol far le vose dele altre persone dela stòria.
Proa far una o de colaltre sugestion che ghen’è qua soto:
Proa far desegni par contar la stòria ntela òrdine che la ga sucedesto. Dopo, scrivi soto cada desegno cossa l’è drio suceder.
Fà un gràfico o un diagrama. Par esémpio, quando te ledi sora una persona che la era fedele, mostra come le so qualità e quel che la ga fato i ga relassion cole benedission che la ga ricevesto.
Conta la stòria come se fusse nte un giornal ntela television. Conta quel che ga sucedesto de punti de vista difarenti. Fà una “intervista” col personàgio prinsipal e cole altre persone dela stòria.
Proa imaginar una maniera difarente che la stòria la podaria finirse. Pensa nte una persona che la ga fato una scòlia sbaliada e come che saria se ela la gavesse fato nantra dessision. Par esémpio, pensa in quando Piero el ga dito che no’l cognossea mia Gesù. (Marco 14:66-72) Cossa che Piero el podaria gaver fato soto pression?
Se te vol inventar de pi, proa tirar dela Bìblia una stòria e scriverla come che par far un teatro. Meti anca quale lession che podemo imparar de questa stòria. — Romani 15:4.
Te pol darghe vita ala to letura dela Bìblia!
Va in serca de de pi detali
Se te dè de pi atension ai detali, te vè catar lession pressiose che le era sconte. Tante volte, sol una o due parole de una stòria dela Bìblia le pol far tanta difarensa.
Par esémpio, fà una comparassion intrà Mateo 28:7 e Marco 16:7.
Parché che Marco el ga dito che suito Gesù el ndaria mostrarse ai dissìpoli “e a Piero”?
Una idea: Marco no l’era là quando queste cose le ga sucedesto. L’è probàbile che Piero ghe ga dito questa informassion.
Lession pressiosa sconta: Gesù el volea veder Piero ancora. Parché che questo el ga assà Piero contento? (Marco 14:66-72) Come che Gesù el ga mostrà che lu l’era un vero amigo par Piero? Come che te pol far compagno a Gesù e esser un vero amigo par i altri?
La letura dela Bìblia la resta pi interessante quando te dè vita ala stòria e te vè in serca de de pi detali!