Un gióveno el infronta tentassion quando el vede un toso e una tosa drio smorosar, due tosi drio vardar nte un telèfono e una tosa che la ze drio passar darente

I GIÓVENI I DOMANDA

Come darghene fora cole tentassion?

El apòstolo Paolo el ga scrito: “Quando mi vui far quel che l’è giusto, rento de mi ghen’è quel che l’è mal.” (Romani 7:21) Te te ghè belche sentio cossita? Alora, questo artìcolo pol giutarte a darghene fora cola voia de far qualcossa de sbalià.

Cossa che te ghè de saver

La pression dei coleghi la pol farte gaver la voia de far robe sbaliade. La Bìblia la dise che “brute compagnie le rovina i boni comportamenti”. (1 Corinti 15:33) Par causa dela pression del mondo e dele persone, pol esser che te vegna voia de far una roba sbaliada. E te pol fin “ndarghe drio ala pi granda parte dele persone par far el mal”. — Ésodo 23:2.

“Se te vol tanto esser amigo dei altri, pol esser che te scominsi a far tuto quel lori i fà, sol par gaver la so aprovassion.” — Jeremy.

Pensaghe sora: Parché che pol esser pi fadiga darghene fora con una tentassion quando te sì massa preocupà con quel che i altri i pensa de ti? — Proverbi 29:25.

Conclusion: No stà assar che la pression dei to coleghi la te fae gaver voia de far quel che te sè che l’è sbalià.

Cossa che te pol far

Sìpia sicuro de quel che te credi. Se no te sì mia sicuro de quel che te credi, te pol deventar un giugheto che i altri i controla. L’è tanto meio far quel che la Bìblia la dise in 1 Tessalonissensi 5:21: “Gavé de esaminar tute le cose. Gavé de tegnerve in quel che l’è bon.” Se te fè cossita, sarà pi fadiga ndar contra quel che te credi.

Proa pensarghe: Parché che te credi che obedir a Dio l’è el meio par ti?

“Go visto che le persone le ga pi rispeto par mi quando fao quel che mi credo che l’è giusto, invesse de ndar drio a una tentassion.” — Kimberly.

Esémpio dela Bìblia: Daniel. Quando l’era gióveno, “Daniel el ga dessidio nel so cuor” obedir ale lege de Dio. — Daniel 1:8.

Un gióveno el ga soghe ligade nei brassi e gambe, come se ghen fusse altre persone drio controlarlo come un giugheto — Se no te sì mia sicuro de quel che te credi, te pol deventar un giugheto che i altri i controla

Cognossi le to fiachesse. La Bìblia la parla dele “voie che i gióveni i ga”, o sia, quele voie che le ze tanto forte quando te sì gióveno. (2 Timòteo 2:22) No le ze sol le voie sessuai, ma anca la voia de che i altri i te acete e de no esser pi soto la autorità dei to genitori vanti che te sì pronto.

Proa pensarghe: La Bìblia la dise che “cada un l’è proà par esser provocà e imbroià par la so pròpia voia”. (Tiago 1:14) Par ti, che tentassion saria pi fadiga darghene fora?

“Sìpia onesto con ti stesso sora le tentassion che le ze pi fadiga par ti. Fà peschise sora come te pol darghene fora con queste tentassion e scrivi do arquanti consili che i pol giutarte. Cossita, la pròssima volta che te infronti una de queste tentassion, te vè saver come darghene fora.” — Sylvia.

Esémpio dela Bìblia: Davi. Dele volte, lu el se ga assà influensà par i altri e par le so pròpie voie. Ma Davi el ga imparà dei so sbali e el se ga sforsà par far meio. Lu el ga pregà a Geovà: ‘Giùtame a gaver un cuor puro, ò Dio, e mete rento de mi un spìrito novo, firme.’ — Salmo 51:10.

No stà assar le tentassion controlarte. La Bìblia la dise: “No sté mia assarve vinser par el mal.” (Romani 12:21) Questo vol dir che no te ghè mia de far una roba sbaliada sol parché te vien voia de farla. Ti te pol scòlier far la roba giusta.

Proa pensarghe: Pol esser che vien fora una situassion che pol darte voia de far una roba sbaliada. Alora, come che te pol esser sicuro che te vè far la roba giusta e mostrar che te sì bon de controlarte?

“Mi penso sora come vao sentirme se vao drio a una voia sbaliada. Sarà che vao sentirme meio? Pol esser, ma sarà par poco tempo. Sarà che vao sentirme meio dopo de un tempo? Nò, sarà pedo. Sarà che valerà la pena? Sicuro che nò!” — Sophia.

Esémpio dela Bìblia: Paolo. Paolo el ga dito che el gavea voie sbaliade, ma che lu l’era bon de controlarle. Lu el ga scrito: “Mi ghe dao bote nel me corpo e lo go come un schiavo.” — 1 Corinti 9:27.

Conclusion: Te sì bon de controlarte. Te pol dessider se te vè darghene fora con una tentassion o nò.

Ricòrdate che le tentassion no le ze par sempre. Melissa, che la ga 20 ani, la ga dito: “Quando mi ero nela scola, ghen’era tante robe che l’era fadiga de starghe distante. Ma adesso, no go pi voia de farle. Pensar in questo me fà esser sicura che le tentassion che son drio infrontar adesso le va passar via. E che, nel futuro, quando vardo in drio, mi vao veder che l’è stà tanto meio par mi no far quele robe sbaliade.”

Cossa altri gióveni i dise

“Esser sicura de quel che mi vui far e gaver el coraio de difender quel che mi credo sensa badar quel che i altri i pensa me giuta a darghene fora cole tentassion. Par esémpio, dopo che mi dessido che no vao mia far una roba, mi no càmbio pi de idea. Mi no resto mia in dùbio e gnanca vao drio a quel che i altri i fà.” — Olivia.

“I gióveni i infronta tanta pression par ndar a feste e far robe sbaliade, come bever massa, doperar droghe e far sesso. Ma una roba che me giuta tanto l’è parlar coi me genitori sora quel che son drio infrontar. Nantra roba che me giuta a darghene fora cola tentassion l’è sempre gaver robe de far.” — Jared.

“Una dele tentassion pi fadiga de darghene fora la ze la tentassion de far qualcossa che no la ze mia sbaliada par i altri, ma che la ze sbaliada par mi. Par esémpio, la diversion che vao scòlier. Te ghè de esser sicuro de quel che te credi par esser bon de darghene fora con questo tipo de pression. Par quela, ghe vol speriensa e tempo.” — Mayan.

“Te ghè de saver come doperar ben la internet e cossa far quando vien fora una roba imoral. Te toca dessider vanti cossa far par darghene fora cola tentassion.” — Julian.