Dio el ga doperà la evolussion par crear diverse qualità de vita?
La risposta dela Bìblia
Nò. La Bìblia la parla ciaro e la dise che Dio el ga creà i òmini e difarente “sorte” de bèstie e piante.a (Génesi 1:12, 21, 25, 27; Apocalisse 4:11) La Bìblia dise che tuta la fameia dei òmini la ze vegnesta fora dei primi pupà e mama, Adon e Eva. (Génesi 3:20; 4:1) Quel che dise la Bìblia no sostién la teoria che Dio el ga doperà la evolussion par crear difarente sorte de vita, e arquante volte questo se ciama de evolussion teìsta. Invesse, la Bìblia la assa ciaro che le difarense che catemo rento la stessa sorte de vita no va contra quel che dise la siensa.b
Dio el ga doperà la evolussion?
Le persone che crede che Dio el ga doperà la evolussion par far tute le robe, le ga difarente maniere par spiegar come che questo gavaria sucedesto. De acordo cola Enciclopèdia Britànica,c la evolussion teìsta la porta avanti la idea che “Dio el dopera la scòlia che fà la naturessa da sola par comandar tute le robe naturai”.
Quei che i crede ntela evolussion teìsta i pol gaver queste idee:
Tute le qualità de vita che vedemo ancoi le ga le medèsime orìgine.
Una sorte de vita pol cambiar e deventar nantra sorte de vita tuta difarente, una idea che arquante volte se ciama de macroevolussion.
De una maniera o nantra, Dio el ga el controlo de questa situassion.
La Bìblia zela de acordo cola evolussion?
La idea de quei che i crede ntela evolussion teìsta ze che la stòria dela creassion che catemo in Génesi no la ze giusta. Ma Gesù el ga parlà dela stòria de Génesi come qualcossa che podemo fidarse. (Génesi 1:26, 27; 2:18-24; Mateo 19:4-6) La Bìblia la dise che Gesù, vanti de vegner ntela Tera, el vivea ntel cielo con Dio e lo ga giutà a crear “tute le robe”. (Gioani 1:3) Alora, la idea che Dio el ga doperà la evolussion par crear difarente sorte de vita, no la ze de acordo con quel che insegna la Bìblia.
El fato che bèstie e piante le ze bone de adatarse, proa che la evolussion la ze vera?
La Bìblia no la dise quante difarente varietà pol èsserghe rento la stessa “sorte” de vita. E no la dise gnente contra el fato che difarente sorte de piante e bèstie creae da Dio, pol cambiar qualcosseta ntela reprodussion o al adatarse a posti novi. Arquanti i cata che questa la ze una forma de evolussion, ma in verità questi cambiamenti no i produse nissuna sorte de vita nova.
a La Bìblia dopara la parola “sorte” par pi robe de quel che dise i sientisti. Dele volte i sientisi i dopara la spression evolussion quando invesse se trata de qualche pìcolo cambiamento rento dela stessa “sorte”, secondo quel che vol dir la parola doperada ntel libro de Génesi.
b Sta idea arquante volte la ze ciamada de microevolussion.
c Tìtolo original: Encyclopædia Britannica.