IN TUTO EL MONDO tante persone de difarente culture e religion le prega. Tante le prega lore sole o con altri insieme. Pol esser nte una ciesa, un témpio, una sinagoga, una meschita o nte un santuàrio. Arquanti i dopera tapeti par indenociarse e far orassion, un rosàrio, libro de orassion, imàgine, i fà una roda de orassion o scrive orassion in plachete e le pica su.

Intrà le persone e le bèstie ghen’è tante robe che se someia. Par esémpio, noantri ghemo de bisogno de magnar, de àqua e dela ària. Come le bèstie, anca noantri nassemo, vegnemo grandi e morimo. (Eclesiasti 3:19) Ma, de tuta la creassion nela Tera, sol le persone le prega. Parché?

La risposta la ze fàcile: noantri preghemo parché ghemo de bisogno. Le persone le fà orassion parché le vol parlar con una forsa pi poderosa, o sia, qualcossa che lore le vede come santa, sacra e eterna. La Bìblia la mostra che semo stati fati con questa nessessità. (Eclesiasti 3:11) Gesù Cristo el ga dito: “Felici i ze quei che i sà dele so nessessità spiritual.” — Mateo 5:3.

“Nessessità spiritual” vol dir che ghemo bisogno de rivarse a Dio. Par quela che ghen’è tanti posti de adorassion e arquanti i dopera scapulari, imàgine o altre robe come queste nela so adorassion. Ghen’è persone che le prega tanto. Tanti i proa ndar in serca de Dio dela so pròpia maniera o fursi i se fida de quel che i altri i ghe dise. Ma le persone no le ga mia poder, le vive pochi ani e no le ze mia bone saver tuto sora una situassion. Cossita, ne ocore el aiuto de una persona che sìpia pi sàbia, pi poderosa e che la gàpia vivesto par tanto de pi tempo che noantri par giutarne nela nostra nessessità spiritual. Alora, parché che sentimo che ghemo bisogno de pregar?

Gheto belche passà par qualche situassion che te ocorea de orientassion, sabedoria o risposte ale to domande ma nissun l’è stà bon de giutarte? Gheto belche sentio che te gavei de bisogno de consolo dopo de una desgràssia? O fursi te ocorea de aiuto quando te ga tocà far una dessision importante o de esser perdonà parché te eri drio sentirte tanto colpà?

De acordo cola Bìblia, tuti questi i ze boni motivi par far orassion. La Bìblia la ze el meio libro che parla sora questo parché la ga le orassion de tanti òmini e done fedeli e te pol fidarte in tuto quel che la dise. Queste persone le ga pregà a Dio par gaver consolo, orientassion, perdon e risposte ale domande pi importante dela vita. — Salmo 23:3; 71:21; Daniel 9:4, 5, 19; Abacuche 1:3.

Ancora che le orassion de queste persone le fusse difarente, ghen’era qualcossa che se someiea. Tute lore le savea che le gavea de far qualcossa importante par esser scoltade, una roba che ancoi arquanti no i ghe bada. Lore le savea a chi le gavea de pregar.

SARÀ che, no importa a chi che preghemo, tute le orassion le va pròpio a Dio? Nei di de ancoi, tante persone le pensa cossita. Tanti i ze de acordo cola idea de unir tute le religion e i pensa che tute le religion le ze bone, ancora che le sìpia difarente. Ma sarà che questa idea la ze pròpio vera?

La Bìblia la insegna che tante persone no le fà orassion ala persona giusta. Quando la Bìblia la ze stata scrita, tante persone le preghea ale imàgine. Ma Dio el ga parlà contra questo costume tante volte. Par esémpio, Salmo 115:4-6 dise sora le imàgine: “Le ga récie ma no le pol mia scoltar.” Alora, l’è pròpio ciaro. Parché pregar a un dio che no’l va mai scoltarte?

Una stòria interessante dela Bìblia la spiega meio sora questo assunto. Elia, un profeta fedele a Dio, el ga sfidà i profeti de Baal. Lori i gavaria de pregar al so dio, e Elia el gavaria de pregar al suo. Elia el ga dito che el vero Dio el ndaria risponder ala so orassion, ma quel falso dio nò. Alora, i profeti de Baal i ga pregà con tanta forsa, i ga fin osà, ma l’è stà par gnente. La Bìblia la dise: “Nissuni ghe rispondea, e nissuni ghe dea atension.” (1 Rè 18:29) Ma cossa che ga sucedesto dopo che Elia el ga pregà?

Pena dopo che Elia el ga finio de pregar, el so Dio el ghe ga rispondesto suito e el ga mandà fogo del cielo che el ga brusà la oferta che el gavea fato. Quala la ze stata la difarensa intrà le due orassion? Vedemo la risposta nela orassion de Elia in 1 Rè 18:36, 37. Lu el ga fato una orassion curta, sol con 30 parole nel ebraico. Ma lu el ga doperà tre volte el nome de Dio, Geovà.

Baal, che vol dir “paron”, l’era el dio del pòpolo de Canaan e in diversi posti ghen’era tanti tipi de questo dio in quela region. Geovà, invesse, l’è un nome ùnico, che serve sol par una Persona in tuto el Universo. Questo Dio el ga dito al so pòpolo: “Mi son Geovà e questo l’è el me nome. No dao a nissuni la me glòria, gnanca el onor che mi mèrito ale imàgine”. — Isaia 42:8.

Sarà che la orassion de Elia e le orassion dei profeti de Baal le ze rivade al stesso Dio? Nela adorassion a Baal le persone le pratichea imoralità e fea sacrifissi de persone, par quela, questa adorassion la ghe fea poco dele persone. Invesse, la adorassion a Geovà la fea Israel restar distante de quele brute robe e par quela i era un pòpolo che meritea onor e rispeto. Adesso, pénsaghe sora: se ti te scrivesse una carta a un caro amigo, te piaseria che la portesse a nantra persona, che gnanca la ze to amiga e che la fà tante robe brute? Sicuro che nò!

Quando te preghi a Geovà, te sì drio pregar al Creador, el Pare de tute le persone.a El profeta Isaia el ga pregà cossita: “Ti, Geovà, te sì el nostro Pare.” (Isaia 63:16) Infati, l’era de questo Dio che Gesù el parlea quando el ghe ga dito ai so seghidori: “Mi vao su insieme al me Pare e el vostro Pare, e al me Dio e el vostro Dio”. (Gioani 20:17) Geovà l’è el Pare de Gesù. L’è a lu che Gesù el preghea e l’è stà a questo Dio che el ga insegnà ai so seghidori a pregar. — Mateo 6:9.

Sarà che la Bìblia la dise che ghemo de pregar a Gesù, a Maria, ai santi o ai àngeli? Nò, ghemo de pregar sol a Geovà. Ma parché? Prima, parché pregar l’è una maniera de adorar a Dio e la Bìblia la dise che ghemo de adorar sol a Geovà. (Ésodo 20:5) Secondo, parché la Bìblia la dise che Dio l’è quel che “el scolta le orassion”. (Salmo 65:2) Ancora che Geovà el assa tante responsabilità ai altri, lu no’l ga mai assà a nissuni la responsabilità de scoltar le orassion. Lu l’è el Dio che el promete che lu stesso el va scoltarne quando preghemo a lu.

Alora, se ti te vol che Dio el scolte le to orassion, ricòrdate quel che la Bìblia la dise: “Tuti quei che invoca el nome de Geovà i sarà salvi.” (Ati 2:21) Ma, sarà che Geovà el scolta pròpio a tute le orassion o ghen’è qualche altra roba che ne ocore saver se volemo che lu el ne scolte quando preghemo?

TANTE religion le insegna che toca postarse sol de una maniera, doperar sempre le medèsime parole o seghir un costume par pregar. Ma la Bìblia la ne insegna che queste robe no le ze mia tanto importante, ghen’è altre robe che ghemo de star atenti. Ma alora, come che ghemo de pregar?

La Bìblia la parla de persone fedele a Dio che le se ga postà de maniere difarente par pregar e le ga pregà in diverse situassion. De acordo cola so situassion, lore le ga pregà sol in pensamento o a voce alta. Arquante le ga pregà intanto che le vardea su al cielo e altre le se indenociea par pregar. Lore no le doperea mia un rosàrio, un libro de orassion o imàgine, invesse, le parlea dei so sentimenti, de quel che le gavea de cuor. Ma parché che Dio el ga scoltà quando lore le preghea a Lu?

Parché le fea quel che ghemo visto nel artìcolo vanti: preghea sol par un Dio, Geovà. Ma lore le fea anca altra roba importante. Ledemo in 1 Gioani 5:14: “Noantri semo sicuri che, no importa cossa che ghe domandemo de acordo cola so volontà, Dio el ne scolta.” Ghemo de pregar sempre de acordo cola volontà de Dio. Cossa che questo vol dir?

Par pregar de acordo cola volontà de Dio, ne toca saver cossa che Dio el vol. Par quela, l’è importante studiar la Bìblia se volemo pregar dela maniera giusta. Ma sarà che Dio el scolta sol le orassion dele persone che le stùdia la Bìblia fà tanto tempo? Nò, ma ghemo de imparar quel che Dio el vol, sforsarse par capir e meter in pràtica nela nostra vita. (Mateo 7:21-23) Alora, ne toca pregar de acordo con quel che ghemo imparà.

Nantra roba tanto importante la ze la nostra fede. Quanto de pi imparemo sora Geovà e la so volontà tanto pi forte la restarà la nostra fede. Gesù el ga dito: “E tuto quel che domandé in orassion ndaré ricever, se gavé fede.” (Mateo 21:22) La fede no l’è mia sol creder in qualcossa sol parché i altri i crede. Pitosto, gaver fede vol dir creder in qualcossa, stesso che no te la vedi, e esser sicuro che la ze vera. (Ebrei 11:1) La Bìblia la mostra che ghen’è pròpio un Dio, anca se no podemo mia vederlo, e che lu el scolta quando le persone che le ga fede le prega. Come Geovà l’è sempre contento in giutarne, podemo anca domandarghe pi fede. — Luca 17:5; Tiago 1:​17.

Ghen’è nantra roba importante de ricordarse sora come pregar. Gesù el ga dito: “Nissun riva al Pare senò par meso de mi.” (Gioani 14:6) Alora, ne toca pregar al nostro Pare, Geovà, par meso del nome de Gesù. L’è stà lu che el ne ga insegnà a pregar cossita. (Gioani 14:13; 15:16) Ma, questo no vol mia dir che ghemo de pregar a Gesù. Invesse, bisogna ricordarse che l’è sol gràssie a Gesù che podemo parlar col nostro santo e perfeto Pare.

Una volta, i seghidori de Gesù i ghe ga domandà: “Signor, inségnane come pregar”. (Luca 11:1) Lori belche i savea la maniera de pregar, ma lori i ghe ga domandà sora cossa pregar.

GESÙ el ga insegnà una orassion che la ze cognossesta come orassion del Pare Nostro. Tanti i dise che questa la ze la orassion che de pi persone la fà in tuto el mondo. Ma ancora che milioni de persone la fà tuti giorni, drio dir sempre le medèsime parole e fursi de pi de una volta al giorno, podemo dir che la ze la orassion che le persone manco le capisse. Gesù no’l volea che questa orassion la fusse fata cossì. Parché che disemo questo?

Vanti de far questa orassion, Gesù el ga dito: “Quando te fè una orassion, no stà mia dir le medèsime parole una volta drio l’altra.” (Mateo 6:7) Sarà che Gesù el ga dito una roba e dopo el ga fato nantra? Sicuro che nò! Invesse de insegnar le parole che gavarìssino de dir in tute le nostre orassion, Gesù el ga insegnà sora le cose pi importante che ne ocore gaver in mente quando preghemo a Dio. Ndemo parlar adesso sora la orassion che Gesù el ga insegnà. Questa orassion la ze in Mateo 6:​9-​13.

“Pare Nostro che te sì ntei cieli, santificà sia el to nome.”

Queste parole de Gesù ne insegna che ghemo de pregar sol a so Pare, Geovà. Ma seto parché che el nome de Dio l’è tanto importante e parché che toca esser santificà?

Del scomìnsio del mondo, tanti i dise busie contra el nome de Dio. Sàtana, el nemigo de Dio, el ga dito che Geovà l’è un busier, che el pensa sol in lu stesso e che no’l ga mia el dirito de comandar le So creassion. (Génesi 3:​1-6) Tanti che i ze dela banda de Sàtana i insegna che Dio no’l bada quando sofrimo, che lu l’è rugno e che el castiga le persone par quel che lore le fà. Arquanti i dise che no ghen’è mia un Creador. Altri i ze ndati contra el nome de Geovà quando i lo ga tirà via dela Bìblia e i ga dito che no se pol mia doperarlo.

La Bìblia la mostra che Dio ndarà finir fora coi nostri problemi, el ne darà tuto quel che ne ocore e cossita, vegnarà fora la verità sora el so nome. (Ezequiel 39:7) Ma come che lu el farà questo? Varda cossa che Gesù el ga dito dopo nela so orassion.

“Vegna el to Regno.”

Ancoi tanti i fà confusion sora cossa che l’è el Regno de Dio. Ma quei che i era insieme de Gesù quando lu el ga insegnà questa orassion, i savea che i profeti i gavea parlà sora el Messia, un salvador che Dio el ga scoliesto come governante de un Regno che giutaria tuto el mondo. (Isaia 9:​6, 7; Daniel 2:​44) Questo Regno el ndarà santificar el nome de Dio parché el ndarà finir fora cole busie de Sàtana. Anca el finirà fora con Sàtana e con tuto quel che lu el ga fato. Le guere, le malatie, la fame e fin la morte no i ghen sarà pi. (Salmo 46:9; 72:12-​16; Isaia 25:8; 33:24) Alora, quando ti te domandi che vegna el Regno de Dio, te domandi che sìpia fato tuto questo.

“Sia fata la to volontà, come nel cielo, anca nela tera.”

Queste parole le insegna che la volontà de Dio la ze fata nel cielo, ndove Dio l’è de star, e anca che la sarà fata qua nela Tera. La volontà de Dio sempre la ze stata fata nel cielo. L’è stà là che el Fiol de Dio el ga fato una guera contra Sàtana e quei che i era dela so banda. Sàtana el ga perso questa guera e lori i ze stati mandadi do, qua nela tera. (Apocalisse 12:​9-​12) Le tre prime domande dela orassion che Gesù el ga insegnà ne giuta a star atenti a quel che l’è pi importante: la volontà de Dio, nò la nostra. Quel che Dio el vol l’è sempre el meio par noantri. Par quela che anca Gesù, che l’era perfeto, el ga dito a so Pare: “Sìpia fata la to volontà e nò la mia.” — Luca 22:42.

“Dane ancoi el nostro pan par questo di.”

Dopo, imparemo che quando preghemo a Dio podemo domandarghe tuto quel che ghemo de bisogno. Domandar el aiuto de Geovà ne fà ricordar che “l’è lu che el dà la vita, el fià e tute le robe.” (Ati 17:25) La Bìblia anca la ne insegna che Dio l’è come un pare che el ga tanto amor par i so fioi e che l’è contento de giutarli. Geovà l’è un pare tanto bon e lu mai el farà qualcossa che no sìpia par el nostro ben, ancora che qualchedun el ghe domande de farlo.

“Perdónane i nostri dèbiti.”

Gheto qualche dèbito con Dio? Gheto bisogno de domandar el so perdon? Ancoi, tanti no i se nicorde mia che ghen’è el pecato e par quela no i cata che el sia una roba sèria. Ma la Bìblia la ne insegna che ghemo dificoltà e anca morimo par causa del pecato. De quando semo nassesti ghemo el pecato e femo sbali tuti giorni. Par quela, ghemo bisogno del perdon de Dio par gaver la vita eterna. (Romani 3:​23; 5:​12; 6:​23) Che bel che l’è saver che la Bìblia la dise che “Geovà l’è bon e l’è pronto par perdonar.” — Salmo 86:5.

“Libèrane del Perverso.”

Sito nicorto de quanto te ocore dela protession de Dio? Difarente de quel che tanti i crede, Gesù el ga insegnà che ghen’è Sàtana e che lu l’è “el governante de questo mondo.” (Gioani 12:31; 16:11) Come paron del mondo, Sàtana el ga influensà tante persone e el ga fato che le restesse distante de Dio. Lu no’l vol che nissuni sìpie amighi de Geovà, par quela, el vol influensar anca noantri. (1 Piero 5:8) Ma Geovà l’è pi poderoso che Sàtana e el vol proteger quei che i lo ama.

Gesù el ne ga insegnà arquante cose che podemo dir quando preghemo. Ma, no l’è mia sol sora queste cose che podemo pregar. Ricòrdate de quel che dise 1 Gioani 5:​14: “No importa cossa che ghe domandemo de acordo cola so volontà, Dio el ne scolta.” Alora, parla a Dio de tuti i to problemi, parché lu mai el pensarà che i ze massa pìcoli par scoltarli. — 1 Piero 5:7.

Ma, sarà che fà difarensa la ora e el posto che semo quando preghemo a Dio?

SICURO che te ghè belche visto che tante religion le se preocupa de far su ciese o posti de adorassion che sìpie grandi e bei. Le religion anca le dise che ora le persone le ga de pregar a Dio. Ma, cossa che la Bìblia la dise sora questo? Sarà che toca gaver una ora giusta e un posto giusto par pregar?

La Bìblia la ne mostra che ghen’è arquante situassion che l’è importante far orassion. Par esémpio, Gesù el ga pregà a Dio par ringrassiarlo prima de magnar insieme coi so dissìpoli. (Luca 22:17) Quando i dissìpoli de Gesù i era insieme par adorar a Dio, lori i preghea. Questo l’era anca un costume dei giudei che i adorea a Dio nele sinagoghe e nel témpio in Gerusalen. Infati, Dio el volea che el témpio fusse una “casa de orassion par tute le nassion”. — Marco 11:17.

Dio el ghe piase tanto quando i so servi i prega a lu insieme, i ze tuti intesi sora quel che i ghe domanda e se quel che lori i ghe dise l’è de acordo cola so volontà. Questo pol fin motivarlo a far qualcossa che fursi no’l ndaria far. (Ebrei 13:18,19) Le Testimònie de Geovà le prega sempre nele so riunion. Te sì convidà a ndar a un Salon del Regno par scoltar queste orassion.

Ma la Bìblia no la dise che ghe toca pregar nte un posto o nte una ora giusta. Invesse, ghen’è tante stòrie dei servi de Dio che i ga pregà in diverse ore e in diversi posti. Gesù el ga dito: “Quando te preghi a Dio, va rento el to quarto ti sol, sera la porta e prega al to Pare, che nissun pol vederlo. Alora, el to Pare, che te varda de un posto che nissun pol veder, te benedirà.” — Mateo 6:6.

Pensa che maraveia! Infati, ti te pol rivar darente del Sovrano del Universo, la ora che te vol e te pol esser sicuro che lu ndarà scoltarte, ancora che te sìpia ti sol o che nissuni i sàpia che te sì drio pregar. Gesù l’è restà lu sol par pregar. Una volta lu el ga pregà tuta la note, fursi par domandar el aiuto de Dio par far una dessision importante. — Luca 6:​12, 13.

La Bìblia la parla anca de altri òmini e done che i ga pregà quando i gavea dessision importante par far o i era drio infrontar qualche dificoltà. Diverse volte lori i ga pregà in alta voce e in altre situassion i preghea sol in pensamento. I preghea insieme de altri e anca quando i era lori soli. No importa come, ma lori sempre i preghea. Infati, Dio el convida i so servi a ‘pregar sempre’. (1 Tessalonissensi 5:17) Dio l’è sempre pronto par scoltar quei che i fà la so volontà e questo mostra el grando amor che lu el ga.

Nei nostri giorni ghen’è tanti che no i crede mia che pregar podarà giutarli. Fursi anca ti te pensi: ‘Sarà che pregar me giutarà pròpio?’’

SICURO che si. La Bìblia la mostra che la orassion la giuta tanto i servi de Dio. (Luca 22:40; Tiago 5:13) La orassion la pol giutarte quando te sì straco, desanimà e anca te fà restar pi darente de Dio. Come cossita?

Par esémpio, se ti te ghè un fiol e lu el guadagna un presente, no basta sol insegnarghe a sentirse grato, ma te ghè de insegnarghe anca a ringrassiar a quel che ghe ga dato el presente. Parlar de quel che sentimo ne fà star atenti ai nostri sentimenti e cossita i restarà pi forti. Questo anca sucede quando preghemo a Dio. Varda arquanti esempi de come che te pol parlar con Dio.

Pregar par ringrassiar. Ringrassiar a Dio par quel che lu el ne dà ne fà restar pi atenti ale benedission che ricevemo. Cossita, restemo pi grati, contenti e positivi. — Filipensi 4:6.

Esémpio: Gesù el ga ringrassià al so Pare parché Dio el ga fato quel che lu el ghe gavea domandà in orassion. — Gioani 11:41.

Pregar par domandar perdon. Domandar el perdon de Dio ne giuta a trenar la nostra cossiensa, ciamarse grami de quel che ghemo fato e nicorderse de come l’è bruto far un pecato. Pregar anca ne giuta a no seitar sentirse tanto mal par i nostri sbali.

Esémpio: Davi el ga pregà par mostrar che l’era disgustà con quel che el gavea fato e che el se gavea ciamà gramo. — Salmo 51.

Pregar par saver cossa far. Domandar el aiuto de Geovà par saver cossa ghemo de far o anca par domandar sabedoria ne giuta a esser ùmili. Questo ne fà ricordar de quel che no semo mia boni de far e anca ne giuta a fidarse nel nostro Pare del cielo. — Proverbi 3:​5, 6.

Esémpio: Salomon el ga mostrà umiltà quando el ga domandà sabedoria par esser un bon rè in Israel. — 1 Rè 3:​5-​12.

Pregar quando te sì drio tribolar. Pregar e parlar a Dio de quel che sentimo quando ghemo dificoltà ne fà restar pi calmi parché se fidemo in Geovà e nò in noantri stessi. — Salmo 62:8.

Esémpio: El Rè Asa el ga pregà quando el ga infrontà un bruto nemigo. — 2 Cróniche 14:11.

Pregar par i altri. Domandar aiuto par i altri ne giuta a no pensar massa in noantri stessi, a meterse nel posto dei altri e mostrar compassion.

Esémpio: Gesù el ga domandà aiuto par i so seghidori. — Gioani 17:​9-​17.

Pregar par lodar a Dio. Quando lodemo a Dio par quel che lu el fà e par le so bele qualità el nostro rispeto e amor par Geovà i resta pi grandi. Queste orassion anca ne fà rivar pi darente del nostro Dio e Pare.

Esémpio: Davi el ga lodà de tuto el cuor a Dio par la so creassion. — Salmo 8.

Nantra benedission che podemo gaver la ze “la pace de Dio, che la ze pi granda de quel che podemo capir”. (Filipensi 4:7) L’è tanto fadiga gaver pace con tuti problemi che ghemo ancoi, ma la pace la fà tanto ben, anca par la nostra salute. (Proverbi 14:30) Ma sarà che podemo gaver questa pace sol par noantri stessi o ghemo bisogno de qualche altro aiuto?

TANTE persone le gavaria tanta voia de saver de questo. La Bìblia la insegna che Geovà el scolta pròpio le orassion. Magari, dipende de cada un de noantri se Dio el va scoltar e risponder ale orassion che femo.

Gesù el ga parlà contra i lìderi religiosi del so tempo. Quando lori i preghea, i fea finta de esser persone bone che le adorea a Dio, ma infati lori sol i volea farse veder. Gesù el ga dito che quei òmini i “gavaria la so ricompensa”. (Mateo 6:5) Lori i gavaria quel che i volea, o sia, la atension de altre persone. Ma quel che lori i gavea de bisogno, che l’era la atension de Dio, no i gavaria mia. Anca ancoi, tanti quando i prega i pensa sol in quel che lori i vol invesse de pensar in quel che Dio el vol. Queste persone no le ghe bada ai prinsipi bìblichi sora la orassion e, par quela, Dio no le scolta mia.

Ma e ti, sarà che Dio el va scoltarte intanto che te preghi? Dio no’l varda de ndove te sì vegnesto, chi che te sì o quanti soldi ti te ghè. La Bìblia la dise che “Dio el trata compagno tute le persone. Alora no importa de ndove che lore le ze, parché lu el aceta tute le persone che lo rispeta e le fà quel che l’è giusto”. (Ati 10:34, 35) E ti, sito come dise questo testo? Se te ghè tanto rispeto par Dio, alora te mostri che te lo ami e che no te vol mia far qualcossa che lo disguste. Se volemo esser persone giuste, ghemo de far quel che Dio el vol e nò quel che noantri volemo o quel che i altri i ne dise de far. Vuto che Dio el te scolte quando te preghi? Alora la Bìblia la podarà giutarte.a

Arquanti i speta che Dio el ghe risponda ale so orassion par meso de un miràcolo. Magari, nel tempo dela Bìblia, poche volte Dio el ga fato miràcoli par risponder a qualchedun. Dele volte ghe volea de pi de sento ani par suceder un miràcolo. Anca, la Bìblia la insegna che dopo dela morte dei apòstoli no ghen saria pi miràcoli. (1 Corinti 13:8-10) Alora, sarà che questo vol dir che nei nostri giorni Dio no’l va mia risponder ale orassion? Sicuro che nò! Vedemo come Dio el risponde ale orassion.

Dio el dà sabedoria. Sol de Geovà vien el vero saver. Dio el ghe dà tanta sabedoria a quei che i va in serca dele so orientassion e i se sforsa par meter in pràtica quel che lu el dise. — Tiago 1:5.

Dio el dà spìrito santo. Spìrito santo l’è la forsa de Dio. Questa la ze la forsa pi poderosa che ghen’è. El spìrito santo el pol giutarne a darghene fora con una situassion difìcile, el pol darne pace quando semo preocupadi e el pol giutarne a gaver bele qualità che ghe piase a tuti. (Gàlati 5:22, 23) Gesù el ga dito ai so seghidori che Geovà sempre el dà spìrito santo a quei che i ghe lo domanda. — Luca 11:13.

Dio el insegna a quei che i va in serca de lu de tuto el so cuor. (Ati 17:26, 27) In tuto el mondo ghen’è persone che le ze in serca de saver pròpio la verità. Lore le vol imparar sora Dio, che nome galo, cossa el ndarà far cola tera e cole persone e come le pol deventar so amighe. (Tiago 4:8) Tante volte le Testimònie de Geovà le cata persone cossita e le resta tanto contente de spiegarghe le risposte a queste domande nela Bìblia.

Vuto cognosser a Dio? Elo par questo che te ghè acetà questa revista? Fursi questa la ze la risposta de Dio ala to orassion.