Arquante persone le fà fadiga amar a Dio. Queste persone le pensa che no le pol capir a Dio, che lu no’l ga interesse in noantri e fin che lu l’è tanto rugno. Vedi cossa che le ga dito arquante persone:

• “Mi ghe domandea aiuto a Dio, ma mi catea che lu l’era massa distante par giutarme. Par mi, lu l’era sol una forsa sensa sentimenti.” — Marco, Itàlia.b

• “Anca se mi volesse servir a Dio, lu l’era massa distante de mi. Mi pensea che lu l’era un Dio massa severo, che el castighea le persone e no’l gavea compassion.” — Rosa, Guatemala.

• “Quando era picinina, mi pensea che Dio el ndea in serca dei sbali dele persone sol par castigarle. Dopo, go scominsià a pensar che lu no’l gavea interesse par le persone. Mi pensea in lu come un governante che el fea dessision par tuti, ma sensa importarse con lori.” — Rosanne, Canadá.

Cossa pénsito? Dio el mèrita esser amà? Fà tanti ani che i seghidori de Cristo i se domanda questo. Intrà i sècoli V e XV le persone no le fea gnanca orassion al Dio Tuto Poderoso. Parché? Lore le gavea massa paura de lu. El storiador Will Durant el ga dito cossita: “Come che un poro gramo, umano imperfeto el podaria voler far una orassion a un trono de spaurarse e tanto distante?”

Parché arquante persone le pensa che Dio l’è de “spaurarse e tanto distante”? Cossa che la Bìblia veramente la insegna sora Dio? Sarà che imparar la verità sora Dio pol giutarte a amarlo?

QUEL CHE TANTI I CREDE

“No semo rivadi a gnanca un acordo se ghemo de doperar el nome de Dio o nò e, se ghemo de doperarlo, qual elo questo nome?” — Professor David Cunningham, Theological Studies.

QUEL CHE LA BÌBLIA LA DISE

Dio el ga dito: “Mi son Geovà e questo l’è el me nome.” (Isaia 42:8) Geovà l’è un nome ebraico che el ghe vol dir “Lu el fà deventar”. — Génesi 2:4, nota.

Geovà el vol che doperemo el so nome. La Bìblia la dise: “Invoché el so nome! Fé cognosser quel che el ga fato intrà i pòpoli. Proclamé che el so nome l’è el pi grando!” — Isaia 12:4.

Gesù el doperea el nome de Dio. Parlando sora i so dissìpoli, lu el ga dito nte una orassion a Geovà: “E mi go dato a cognosser el to nome e lo go de dar a cognosser.” Parché che Gesù el ga fato cognosser el nome de Dio ai so dissìpoli? Anca el ga dito: “Cossita el amor che ti te me ghè amà el sarà con lori, e mi sarò in union con lori.” — Gioani 17:26.

PARCHÉ QUESTO L’È IMPORTANTE

“Un omo che no’l cognosse a Dio par nome, no’l pol cognosserlo come persona”, ga scrito el teòlogo Walter Lowrie, “e no’l pol amarlo se lo cognosse sol come se el fusse una forsa.”

Victor el ndea in ciesa tute le stimane, ma el vedea che no’l cognossea a Dio. Lu el dise: “Quando go imparà che el nome de Dio l’è Geovà, l’è stà come se lo gavesse cognossesto par la prima volta. Par fin go cognossesto quel che go scoltà tanto parlar. Go scominsià a véderlo come una vera Persona e come el me amigo.”

Anca, Geovà el se riva darente de quei che i dopera el so nome. Par quei ‘che i pensa sora el so nome’, Dio el promete: “Gavarò compassion de lori cossita come un omo el ga compassion del so fiol che lo serve.” (Malachia 3:16, 17) Lu anca el ricompensa quei che i dopera el so nome. La Bìblia la dise: “Tuti quei che i invoca el nome de Geovà i sarà salvi.” — Romani 10:13.

QUEL CHE TANTI I CREDE

“Le tre religion prinsipai che le dise seghir Cristo, la catòlica, la ortodossa e la protestante, lore le dise che ghen’è un Dio in tre persone: el Dio Pare, el Dio Fiol e el Dio Spìrito Santo. Par la teologia cristiana, lori no i ze mia tre dèi, ma queste tre persone le ze una.” — The New Encyclopædia Britannica (Nova Enciclopédia Britânica).

QUEL CHE LA BÌBLIA LA DISE

Gesù el fiol de Dio no’l ga mai proà esser compagno de so pare. Invesse de questo, lu el ga dito: “Mi son drio ndar al Pare, parché el Pare l’è pi grando de mi.” (Gioani 14:28) Lu el ga anca parlà a una dele so seghidore. “Mi vao su fin me Pare e vostro Pare, par el me Dio e el vostro Dio.” — Gioani 20:17.

El spìrito santo no l’è una persona. I seghidori de Cristo del primo sècolo “i ze restadi pieni de spìrito santo”, e Geovà el ga dito: “Ghe darò parte del me spìrito a tuti i tipi de persone.” (Ati 2:1-4, 17) El spìrito santo no’l fà parte de una trinità ma l’è el poder, o la forsa, che Dio el dopera.

PARCHÉ QUESTO L’È IMPORTANTE

I studiosi catòlichi Karl Rahner e Herbert Vorgrimler i spiega che la trinità “no la pol esser spiegada sensa una revelassion, e anca dopo dela revelassion, ancora cossita no se pol capirla ben”. Te sarissi bon de amar qualchedun che no te pol cognosser e gnanca capir? Questo insegnamento dela trinità no’l assa che le persone le cognossa a Dio e gnanca che lo ame.

Marco, belche mensionà, el vedea la trinità come un ostàcolo par cognosser a Dio. Lu el ga dito: “Mi pensea che Dio no’l volea mia che mi lo cognossesse e questo el fea che Dio el fusse ancora de pi distante, un mistero e che no se podea mia capirlo.” Ma “Dio no l’è mia Dio de confusion”. (1 Corinti 14:33, Centro Bíblico Católico) Lu no’l sconde de noantri quel che lu l’è. Lu el vol che lo cognossemo. Gesù el ga dito: “Noantri adoremo quel che cognossemo”. — Gioani 4:22.

Marco el dise: “Quando mi go imparà che Dio no’l fà parte de una Trinità, alora go podesto gaver una amicìssia con lu. Se vedemo Geovà come una ùnica persona e nò come un mistero che no cognossemo, resta tanto pi fàcile amarlo”. La Bìblia la dise: “Quel che no’l ama no’l cognosse a Dio parché Dio l’è amor”. — 1 Gioani 4:8.

QUEL CHE TANTI I CREDE

“Dopo dela morte, le ànime de quei che i more col pecato sensa perdon le va suito al inferno, ndove le tribula el castigo del Inferno, ‘el fogo eterno’.” (Catecismo da Igreja Católica) Arquanti lìderi religiosi i dise che el inferno l’è un posto tanto distante e sensa Dio.

QUEL CHE LA BÌBLIA LA DISE

“La ànima che peca, ela la morirà.” (Ezechiel 18:4) I morti “no i sà pròpio gnente”. (Eclesiasti 9:5) Se la ànima la more e no la sente pi gnente, come che la podaria sofrir nte un “fogo eterno” o sentir el mal de no gaver pi Dio?

Nela Bìblia, le parole in ebraico e greco traduside “inferno” ghe vol dir la tomba ndove che i intera le persone. Par esémpio, una professia dela Bìblia che la parla de Gesù la dise: “Ti no te me abandonarè nel sepolcro [“nel inferno”, version Antônio Pereira de Figueiredo].” (Ati 2:27, Nova Versão Internacional) Alora se pol veder che Gesù no l’era mia nte un posto de tormento e gnanca distante de Dio, ma lu l’era nela tomba.

PARCHÉ QUESTO L’È IMPORTANTE

Pensar che Dio l’è tanto rugno ne fà restar distante de lu e nò darente. Rocío, che la vive nel Mèssico, la ga dito: “Go imparà el insegnamento del inferno de fogo quando era pìcola. Mi restea tanto spaventada che no era bona de veder a Dio come una persona bona. Mi catea che lu l’era cativo e severo.”

Rocío la ga cambià la so maniera de veder a Dio par causa de quel che la ga imparà dela Bìblia sora i giulgamenti de Dio e sora la verità de quel che sucede nela morte. Ela la dise: “Me go sentio lìbera e sensa questo peso. Ancoi son sicura che Dio el me ama, el vol el nostro meio e mi posso amarlo. Lu l’è come un pupà che el tien la man del so fiol e el vol el meio par lu.” — Isaia 41:13.

Tante persone le deventa devote par causa dela paura del inferno de fogo, ma Dio no’l vol che te lo servi par causa dela paura. Gesù el ga dito: “Te ghè de amar a Geovà, el to Dio.” (Marco 12:29, 30) Anca, podemo fidarse che i so giulgamenti sora el futuro i sarà sempre giusti parché imparemo che Dio no’l fà mai gnente de ingiusto. Come el amigo de Giò, Eliù, podemo dir con confiansa: “El vero Dio mai el fà robe rugne, el Tuto Poderoso mai el fà robe sbaliade!” — Giò 34:10.

Un giorno, in Gerusalen, Gesù el ga parlà de so pare, Geovà, e el ga mostrà chi che i era i falsi lìderi religiosi dei so di. (Gioani 8:12-30) Quel che lu el ga parlà con lori ne insegna che l’è importante capir quel che le persone le crede sora Dio. Gesù el ga dito: “Se valtri obedí a quel che mi insegno, sì pròpio me dissìpoli. Cognosseré la verità e la verità la ve libertarà.” — Gioani 8:31, 32.

“Se valtri obedí a quel che mi insegno.” Qua Gesù el mostra una maniera par saver se quel che le religion le insegna l’è pròpio “la verità”. Quando te scolti qualcossa sora Dio, pensa: ‘Questo elo de acordo cole parole de Gesù e con quel che la Bìblia la dise?’ Fà come quei che i ga scoltà el apòstolo Paolo e che i ga esaminà “le Scriture cada di con atension, par capir se queste robe [le robe che lori i era drio imparar] le era pròpio cossita.” — Ati 17:11.

Marco, Rosa e Rosanne, belche mensionadi, i ga esaminà con atension quel che i ga imparà quando i ga studià la Bìblia cole Testimònie de Geovà. Cossa che lori i ga imparà?

Marco: “La Bìblia la ga rispondesto a tute le domande che mi e la me sposa gaveino. Ghemo scominsià a amar a Geovà e anca semo restadi pi unidi come casal.”

Rosa: “Mi pensea che la Bìblia la era un libro de filosofia che proea insegnar chi che l’è Dio par meso de idee umane. Ma col tempo, go catà le risposte dele me domande. Adesso, sento che Geovà l’è una persona de verità che posso fidarme.”

Rosanne: “Mi go fato orassion a Dio par che el me giutesse a cognosserlo. Dopo mi e el me sposo ghemo scominsià a studiar la Bìblia. E cossita ghemo imparà la verità sora Geovà. Semo restadi contenti de saver che tipo de Dio che lu l’è.”

La Bìblia la fà de pi de che sol mostrar la verità sora Dio. Anca la mostra le so bele qualità. Ela la ze la so Parola ispirada. Ela la ne giuta a ‘saver le robe che Dio el ne ga dato con bontà’. (1 Corinti 2:12) Te piaseria saver quel che la Bìblia la dise sora Dio, quel che el vol far e anca sora el nostro futuro? Par veder la risposta, va in “Cossa insegna la Bìblia > Domande che la Bìblia la risponde”, nel site www.pr2711.com. Anca te pol domandar un stùdio bìblico par meso del site, o a una Testimònia de Geovà. Se te fè cossita de vederè che l’è pi fàcile amar a Dio de quel che te pensei.