Come che un fiol el càmbia el matrimònio

Quando nasse un fiol, i genitori i resta tanto emossionadi e al medèsimo tempo spauradi. Se valtri sé genitori, pol esser una sorpresa veder che gavé de doperar tanto tempo e forse par tender del vostro fiol. Dormir poco e emossion difarenti pol intrigar la vostra relassion. Gavé de far cambiamenti insieme par tender del vostro tatin e del vostro matrimònio. Come che i consili dela Bìblia i pol giutarve a infrontar queste dificoltà?

1 SFORSÉVE DE CAPIR COME CHE UN FIOL EL CÀMBIA LA VITA

COSSA CHE LA BÌBLIA LA DISE: “El amor l’è passiente e bon.” Anca, el amor “no’l va in serca dei so interessi, no’l resta suito cativo”. (1 Corinti 13:4, 5) Adesso che te sì mare, l’è normal che te dè tuta la to atension al tatin. Pol esser che el to sposo el se sente assà de banda; alora no stà mia desmentegarte che anca lu el ga bisogno de atension. Con passiensa e bontà, te pol giutarlo a capir che te ghè bisogno de lu e che lu el pol giutarte a tender del tatin.

‘Valtri, sposi, seité viver cole vostre spose dàndoghe valor.’ (1 Piero 3:7) Te ghè de capir che la to sposa la ga de doperar la pi granda parte dele so forse par tender del tatin. Par via de queste nove responsabilità, pol esser che la reste straca, nervosa e fin con depression. Dele volte, pol esser che la reste inrabià con ti, ma sfòrsate par restar calmo parché “quel che el controla la ràbia l’è meio che un omo poderoso”. (Proverbi 16:32) Dopera bon senso e daghe el apoio che la ga de bisogno. — Proverbi 14:29.

COSSA CHE PODÉ FAR:

• Pari: Giuté le vostre spose a tender del tatin, anca de note. Doperé manco tempo par altre robe, cossita gavaré pi tempo par star cole vostre spose e col vostro fiol.

• Mare: Assé che el vostro sposo el ve giute a tender del tatin quando lu el vol giutarve. Anca se no’l fà tuto polito, no sté mia sbrontolar. Podé mostrarghe con bontà come far.

2 GAVÉ DE FAR PI FORTE LA VOSTRA RELASSION

COSSA CHE LA BÌBLIA LA DISE: ‘Lori i deventarà una sola carne.’ (Génesi 2:24) Anca se ghen’è una persona in pi nela fameia, gavé de ricordarve che el sposo e la sposa i seita esser “una sola carne”. Sforséve parché la vostra relassion la seite forte.

Spose, gavé de esser grate par el aiuto e el apoio del vostro sposo. Parole par ringrassiar le ze come una “cura” par el vostro sposo. (Proverbi 12:18) Sposi, gavé de dir ala vostra sposa che la amé e che la ze pressiosa par valtri. Gavé de lodarla par come che la tende dela fameia. — Proverbi 31:10, 28.

“Cada un el seite ndar in serca, nò del so interesse, ma de quel dei altri.” (1 Corinti 10:24) Fé sempre quel che l’è meio par el vostro sposo o sposa. Ciapé tempo par parlarve, lodarve e scoltarve. No gavé de esser egoisti sora le vostre relassion sessuai. Gavé de pensar nele nessessità del vostro sposo o sposa. La Bìblia la dise: “No sté mia star sensa, se nò de comun acordo.” (1 Corinti 7:3-5) Alora parlé sora questo con sinsierità. La vostra passiensa e comprension le farà pi forte la vostra relassion.

COSSA CHE PODÉ FAR:

• No sté mia desmentegarve de ciapar tempo sol par valtri due.

• Gavé de dimostrar amor con pìcole robe, come un carton o un presente.

3 GAVÉ DE INSEGNAR AL VOSTRO FIOL

COSSA CHE LA BÌBLIA LA DISE: “Fin de picinin te cognossi i scriti sacri, che i te pol dar el saver par la salvassion.” (2 Timòteo 3:15) Gavé de dessider vanti come ndaré slevar su el vostro fiol. Belche vanti de nasser, lu el ga una granda capassità de imparar. Intanto che l’è nela pansa de so mare, lu el ricognosse la voce de so mare e el ga una reassion ale so emossion. Gavé de leder qualcossa par lu fin de picinin. Anca se fursi lu no’l capisse quel che valtri sé drio lederghe, questo lo giutarà a piaserghe de leder quando el sarà pi grando.

El vostro fiol no l’è mia massa picinin par scoltar parlar sora Dio. Preghé a Geovà davanti de lu. (Deuteronómio 11:19) Quando che sé drio giugar con lu, podé parlar sora le robe che Dio el ga fato. (Salmo 78:3, 4) Intanto che el cresse, lu el vederà el amor che valtri gavé par Geovà e anca lu el impararà a amarlo.

COSSA CHE PODÉ FAR:

• Domandéghe a Geovà in orassion el saver par slevar su el vostro fiol.

• Seité parlarghe sora parole e idee importante; cossita el scomìnsia a imparar fin de picinin.