La nostra organisassion no la ga un clero salarià. Seghin­do el esémpio dei primi cristiani, superintendenti qualificadi i è nominadi “par guidar la congregassion de Dio”. (Atos 20:⁠28) Questi ansiani i è òmini spiritualmente sperienti che i è responsàbili par la congregassion e i guida le piégore, “nò forsadi, ma de bona volontà davanti de Dio; nò par amor al guadagno disonesto, ma con entusiasmo”. (1 Pedro 5:⁠1-⁠3) Cossa che lori i fà par el nostro benefìssio?

I ne tende e i ne protege. I ansiani i guida e i giuta la congregassion spiritualmente. I è cossienti che l’è stà Dio che el ga fidà questa funsion importante a lori, cossita no i comanda la congregassion, ma i ne dà aiuto par el nostro ben e alegria. (2 Coríntios 1:⁠24) Come un pastor che el da el so meio par tender cada piégora, i ansiani i fà sforsi par cognosser cada membro dela congregassion.​— Provérbios 27:⁠23.

I ne insegna come far la volontà de Dio. Tute le stimane, i ansiani i è responsàbili dele riunion de congregassion par fortificar la nostra fede. (Atos 15:⁠32) Questi òmini devotadi anca i da esémpio in partissipar nel laoro de evangelisassion, i ne acompagna in questa atività e i ne trena de tute le maniere par far sto laoro.

I ne dà incoraiamento. Col ogetivo de tender dele nostre nessessità spirituai, i ansiani i fà vìsite nela nostra casa o nel Salon del Regno par darne aiuto e consolo doperando la Bìblia.​— Tiago 5:⁠14, 15.

I ansiani no sol i da aiuto ala congregassion, ma quasi tuti i ga el so laoro e responsabilità cola fameia che anca tol parte del so tempo e atension. Questi fradei diligenti i è degni del nostro rispeto.​— 1 Tessalonicenses 5:⁠12, 13.

•  Quale ze le funsion dei ansiani dela congregassion?

•  De che maniere i ansiani i mostra interesse par cada un de noantri?

La Bìblia la parla de due grupi de òmini cristiani che i tende dele responsabilità nela congregassion: “superintendenti e servi ministeriai”. (Filipenses 1:⁠1) Generalmente, ghen’è arquanti de questi fradei in cada congregassion. Come i servi ministeriai i ne giuta?

I giuta el corpo de ansiani. I servi ministeriai, gióveni o pi veci, i ga bona spiritualità i è diligenti e che se pol fidarse. I tende de importanti laori manoai e de organisassion, generalmente de rotina, che ghe ocore esser fati nela congregassion. Questo el permete ai ansiani consentrarse nele responsabilità de insegnar e guidar le piégore.

I fà laori ùtili. Arquanti dei servi ministeriai i è nominadi come indicadori par ricever tuti quei che i vien ale riunion. Altri i tende del son, publicassion, conte dela congregassion e dei teritori par predicar. I giuta anca nela manutension del Salon del Regno. I ansiani i pol domandarghe che i giute i pi veci. No importa quala responsabilità che i servi ministeriai i riceve, i la fà de bona volontà, e come risultado i se guadagna el rispeto de tuti.​— 1 Timóteo 3:⁠13.

I dà un bon esémpio. I servi ministeriai i è scoliesti in base dele so bone qualità spirituai. Quando i presenta le so parte nele riunion, i fortifica la nostra fede. Dando esémpio nela predicassion i ne giuta aumentar el nostro zelo. Par meso dela so disposission de colaborar el ambiente resta pi felisse e unido. (Efésios 4:⁠16) Col tempo, i servi ministeriai i pol qualificarse par servir come ansiani.

•  Che tipo de òmini i è i servi ministeriai?

•  Come i giuta nel bon funsionamento dela congregassion?

Barnabè e el apòstolo Paulo i è mensonadi diverse volte nele Scriture Greghe Cristiane. Lori i servia come superintendenti viaianti e i visitea le congregassion nel primo sècolo. Par cossa? Parché i gavea vera preocupassion col ben dei so fradei cristiani. Paulo el ga dito che el volea ‘ritornar e visitar i so fradei’ par veder come che i era. Lu l’era disposto a far longhi viai par darghe coraio. (Atos 15:⁠36) Questa ze la voia dei nostri superintendenti viaianti ancoi.

I ne dà coraio. Cada superintendente de sircuito el visita intorno de 20 congregassion, el passa una stimana in cada congregassion due volte par ano. Podemo imparar tanto dela speriensa de sti fradei e dele so spose, se i è maridadi. I se sforsa par cognosser i gióveni e i adulti e ghe piase ndar insieme nel ministero de campo e anca nei nostri studi bìblichi. Questi superintendenti i fà vìsite insieme coi ansiani par dar coraio ai fradei. Lori i presenta discorsi animadori nele riunion e nele assemblee par fortificarne spiritualmente.​— Atos 15:⁠35.

I mostra interesse par tuti. I superintendenti de sircuito i se interessa sinsieramente cola condission spiritual dele congregassion. Lori i se riune coi ansiani e servi ministeriai par analisar el progresso dela congregassion e i ghe da consili pràtichi par tender dele so responsabilità. I giuta i pionieri a esser pi efissienti e ghe piase cognosser le persone che le è drio scominsiar vegner ale riunion e saver de pi sora el so progresso spiritual. Questi fradei i se sforsa del tuto come nostri ‘compagneri e colaboradori in favor dei nostri interessi’. (2 Coríntios 8:⁠23) Gavemo de imitar la so fede e devossion a Dio.​— Hebreus 13:⁠7.

•  Parché i superintendenti de sircuito i fà vìsite ale congregassion?

•  Come te pol benefissiarte dele so vìsite?

Dopo de un disastro, le Testimònie de Geovà sùito le organisa aiuto par dar alìvio ai so fradei nel posto dela desgràssia. Questi sforsi i è una prova del profondo amor che sentimo intra de noantri. (João 13:⁠34, 35; 1 João 3:⁠17, 18) Come demo sto aiuto?

Femo donativi. Quando ghen’era gran fame nela Giudea del primo sècolo, i cristiani in Antiochia i gavea mandà aiuto finansiero par i so fradei. (Atos 11:⁠27-30) Dela medèsima maniera, quando savemo che i nostri fradei in qualche parte del mondo i è drio infrontar una grave dificoltà, ghe mandemo donativi par meso dela nostra congregassion par socorerli de forma material.​ — 2 Coríntios 8:⁠13-15.

Ghe demo aiuto pràtico. I ansiani dela region del disastro i và in serca par saver se tuti membri dela congregassion i passa ben. Le Comission de Aiuto Umanitàrio organisa la distribuission de magnar, àqua potàbile, robe, posto de rifùgio e assistensa de dotori. Tante Testimònie de Geovà con abilità spessìfiche le và par conta pròpia fin el posto del disastro e cossita le fà parte nel laoro de aiuto umanitàrio o in rangiar le case e Saloni del Regno rovinadi. La union che gavemo come organisassion e la speriensa che gavemo ricevesto in laorar insieme le ne giuta agir sùito. Ancora che giutemo “i imparentadi con noantri nela fede”, ghe demo anca assistensa ale altre persone quando l’è possìbile, no importa de che religion le sìpia.​— Gálatas 6:⁠10.

Ghe demo aiuto spiritual e emossional. In spessial, vìtime de disastri le ghe ocore de consolo. In ocasion come queste, lore le pol esser fortificade par Geovà, “el Dio de tuto el consolo”. (2 Coríntios 1:⁠3, 4) Noantri parlemo con piaser sora le promesse bìbliche ale persone aflite, dando la garansia de che el Regno de Dio el finirà sùito con tute le desgràssie che le causa dolor e sofrimento. — Apocalipse 21:⁠4.

•  Cossa permete le Testimònie de Geovà dar sùito aiuto in un disastro?

•  Che consolo spiritual podemo darghe ale vìtime dei disastri?

Poco vanti de morir, Gesù el ga parlà in particolar con quatro dei so dissìpoli: Piero, Tiago, Gioani e Andrè. Al profetisar sora el segnal dela so presensa nei ùltimi di, Gesù el ga fato una domanda tanto importante: “Chi ze pròpio el schiavo fedele e prudente, che el so signor el ga nominà sora i so domèstichi, par darghe el alimento nel tempo aproprià?” (Mateus 24:3, 45; Marcos 13:⁠3, 4) Gesù, come “Signor” dei so dissìpoli, l’era drio darghe garansia che el nominaria un “schiavo” par darghe de maniera regolar alimento spiritual ai so seghidori durante el tempo del fin. Chi ze questo schiavo?

Ze un pìcolo grupo de seghidori ontadi de Gesù. Questo “schiavo” l’è identificà come el Corpo Governante dele Testimònie de Geovà. Lu el provede el oportuno alimento spiritual ai altri adoradori de Geovà. Noantri dependemo del schiavo fedele par ricever la nostra “misura de alimento nel tempo aproprià”.​— Lucas 12:⁠42.

El aministra la fameia de Dio. (1 Timóteo 3:⁠15) Gesù el ga dato al so schiavo la granda responsabilità de aministrar el laoro fato par la parte terestre dela organisassion de Geovà: tender dei beni materiai, organisar el laoro de predicassion e insegnarne par meso dele nostre congregassion. Col ogetivo de proveder quel che gavemo e quando gavemo de bisogno, el “schiavo fedele e prudente” el dà alimento par meso dele publicassion che doperemo quando predichemo e le informassion presentade nele nostre riunion e assemblee.

El schiavo l’è fedele ale verità bìbliche e ala so responsabilità de predicar le bone notìssie; e prudente nela maniera sapiente come el tende dei interessi de Cristo su la Tera. (Atos 10:⁠42) Geovà l’è drio benedir questo laoro col aumento e tanta abondansa spiritual. — Isaías 60:⁠22; 65:⁠13.

•  A chi Gesù el ga nominà par proveder el alimento spiritual ai so dissìpoli?

•  De che maniere el “schiavo” l’è fedele e prudente?

Nel primo sècolo, un pìcolo grupo de apòstoli e ansiani in Gerusalen el ga servio come Corpo Governante par risolver importanti assunti in nome de tuta la congregassion de cristiani ontadi. (Atos 15:⁠2) Lori i rivea ale dessision tuti intesi doperando come base le Scriture e anca i gavea la influénsia del spìrito de Dio. (Atos 15:⁠25) Questo modelo l’è doperà fin ancoi.

Ze doperà par Dio par far la so volontà. I fradei ontadi che i serve nel Corpo Governante i ga un grando interesse nela Parola de Dio e tanta speriensa in tratar assunti pràtichi e spirituai. Lori i se riune tute le stimane par considerar le nessessità dela fraternità mondial. Come nel primo sècolo, istrussion baseade nela Bìblia le è providensiade par meso de carte, superintendenti viaianti e altre persone. Questo ze drio contribuir parché el pòpolo de Dio el sìpia unido nela medèsima maniera de pensar e agir. (Atos 16:⁠4, 5) El Corpo Governante el parécia alimento spiritual, ghe dà forsa ala predicassion del Regno e fà la supervision dela nominassion dei fradei par posti de responsabilità.

El và drio ala orientassion del spìrito de Dio. El Corpo Governante el và in serca dela orientassion del Sovrano Universal, Geovà, e del Testa dela congregassion, Gesù. (1 Coríntios 11:⁠3; Efésios 5:⁠23) I membri de sto corpo no i se considera mia i paroni del pòpolo de Dio. Lori e anca tuti i cristiani ontadi, ‘i và drio al piegoreto ndove che lu el và’. (Apocalipse 14:⁠4) El Corpo Governante el valorisa le nostre orassion in favor de lori.

•  Chi fea parte del Corpo Governante del primo sècolo?

•  Come el Corpo Governante el và in serca dela orientassion de Dio ancoi?

Betel l’è un nome ebraico che vol dir “Casa de Dio”. (Gênesis 28:⁠17, 19) Questo nome l’è apropià par dar la giusta descrission ale istalassion dele Testimònie de Geovà in tuto el mondo che le è doperade par organisar e sostegner el laoro de predicassion. El Corpo Governante l’è de star nela sede mondial nel Stado de Nova York, SUA, de ndove el fà la supervision dele atività dele filiai in arquanti altri paesi. Quei che i serve in questi posti i è come una fameia: i vive, i laora, i magna e i stùdia la Bìblia insieme. Par quel, i è cognossesti come membri dela “fameia de Betel”.​— Salmo 133:⁠1.

Un posto spessial ndove le persone le fà un servìssio abnegà. I òmini e le done cristiani che i serve in cada Betel i ga el compromesso de far la volontà de Dio e sostegner i interessi del Regno par tempo integral. (Mateus 6:⁠33) Nissun de lori i guadagna salàrio, ma tuti i riceve acomodassion, magnar e un aiuto finansiero par le spese personai. A cada membro che serve in Betel se ghe dà un laoro: scritòrio, cosina, sala del magnar, gràfica, inquadernassion, netar le abitassion, lavanderia, manutension e altri laori.

Un posto de tanta atività che sostien la predicassion del Regno. El prinsipal ogetivo de cada Betel l’è che la verità bìblica la sìpia disponìbile par el màssimo nùmero de persone. Questo libreto l’è un esémpio. L’è stà scrito soto la supervision del Corpo Governante, dopo l’è mandà in formato eletrónico par sentene de grupi de tradussion, alora se fà la impression in rotative de alta velocità in diverse gràfiche de Betel e par fin l’è mandà in de pi de 110 mila congregassion. Durante tute le fase par far le publicassion, le fameie de Betel le da un aiuto fondamental par el laoro pi importante: la predicassion dele bone notìssie del Regno de Dio.​— Marcos 13:⁠10.

•  Chi serve in Betel, e quale provision le è fate par lori?

•  Che laoro urgente l’è sostegnesto cole atività de cada Betel?

I membri dela fameia de Betel i serve in arquanti setori, i tende dela atività de predicassion de un o de pi paesi. El so laoro el pol esser in grupi de tradussion, impression de riviste, inquadernassion de libri, depòsito de publicassion, produssion de àudio-vìdeo o supervision de altri assunti nela region.

Una Comission de Filial la fà la supervision dele atività. El Corpo Governante el fida la supervision de cada filial a una Comission de Filial costituida de tre o de pi ansiani ben qualificadi. Questa comission la informa el Corpo Governante sora el progresso dela atività in cada paese soto la so responsabilità e sora i problemi che i poderia suceder. Queste informassion le giuta el Corpo Governante a dessider che assunti i ga de esser consideradi nele publicassion, riunion e assemblee future. Rapresentanti del Corpo Governante i è mandadi regolarmente par visitar le filiai e dar orientassion ale Comission de Filial sora come tender de le so responsabilità. (Provérbios 11:⁠14) In queste ocasion ze organisà un programa spessial ndove el rapresentante dela sede mondial el fà un discorso par incoraiar quei che vive nel teritòrio dela filial.

Aiuto ze dato ale congregassion locai. Fradei responsàbili dela filial i nomina la formassion de congregassion. Ghen’è fradei che i tende dele atività dei pionieri, missionari e superintendenti de sircuito che i serve nel teritòrio dela filial. Lori i organisa assemblee e congressi, i cordina la costrussion de Saloni del Regno e i distribue le publicassion par le congregassion. Tuto quel che l’è fato in una filial contribue par el bon andamento del laoro de predicassion.​ — 1 Coríntios 14:⁠33, 40.

•  Come le Comission de Filial le giuta el Corpo Governante?

•  Una filial la tende de quale responsabilità?

Col ogetivo de proclamar dela meio maniera possìbile le “bone notìssie” in “cada nassion, e tribu, e léngua, e pòpolo”, femo publicassion in de pi de 750 léngue. (Apocalipse 14:⁠6) Come semo boni de far questo grando laoro? Col aiuto de un grupo internassional de redatori e de sforsadi tradutori, tuti Testimònie de Geovà.

El testo original l’è parecià in inglese. El Corpo Governante el fà la supervision dela atività del Departamento de Redassion nela nostra sede mondial. Questo departamento el organisa el laoro dei redatori che i laora nela sede mondial e in arquante filiai. Gaver un grupo internassional de redatori el ne dà la possibilità de considerar assunti multiculturai, cossita ze possìbile che persone de arquanti paesi i gàpia interesse in leser le nostre publicassion.

El testo l’è mandà ai tradutori. Dopo de esser edità e aprovà, el testo l’è mandà in formato eletrónico ai grupi de tradussion in tuto el mondo, che i fà la tradussion, i lo verifica e revisa. Lori i se sforsa par scòlier “parole esate de verità” par dar a intender cossa vol dir de maniera esata el testo in inglese par la so léngua.​— Eclesiastes 12:⁠10.

Computadori i asselera el prossesso. Un computador no l’è mia bon sostituir redatori e tradutori. Però, el so laoro el pol esser asselerà doperando dissionàrii in formato digital, programi de computador e feramente de peschisa. Le Testimònie de Geovà le ga creà un Sistema de Editorassion Eletrónica Multiléngue (MEPS), che l’è compatìbile con testi in sentene de léngue. Par meso de sto sistema se pol meter el testo insieme cole fotografie e far la formatassion par la impression.

Parché che femo tuto questo sforso, de far la tradussion anca par léngue parlade sol par pochi miliari de persone? Parché ze dela volontà de Geovà “che tute le sorte de persone le sìpia salve e le vegne a gaver una cognossensa giusta dela verità”.​— 1 Timóteo 2:⁠3, 4.

•  Come le nostre publicassion le è pareciade?

•  Parché tradusimo in tante léngue?

Tuti i ani la nostra organisassion la produse e la fà la distribuission de sentene de milioni de Bìblie e altre publicassion sensa cobrar gnente. Costruimo e tendemo de Saloni del Regno e filiai. Sostegnemo miliari de beteliti e missionari e quando sucede una desgràssia demo aiuto umanitàrio. Dele volte te pol domandarte: ‘Come ze finansià tuto questo?’

No cobremo gnente par i nostri laori, no domandemo el dìsimo e gnanca no tolemo su limòsina. Anca che i costi i sìpia tanti par far sto laoro de evangelisassion, no domandemo soldi. D’acordo col secondo nùmero dela nostra rivista A Sentinela, publicada de pi de un sècolo indrio, noantri credemo che Geovà el ne sostien e ‘mai domandaremo ai òmini el sostegno’ — e mai lo ghemo fato!​— Mateus 10:⁠8.

Le nostre atività le è mantegneste con donativi. Tante persone le dà valor ala nostra atività de educassion bìblica e le fà donativi par sostégnerla. Le Testimònie de Geovà le dà con alegria del so tempo, energia, soldi e altri ricorsi par giutar nela realisassion dela volontà de Dio in tuta la Tera. (1 Crônicas 29:⁠9) Nei Saloni del Regno, nele assemblee e nei nostri congressi, tuti i pol far contribuission nele cassete de donativi. Anca se pol far donativi par meso del nostro site, jw.org. Quasi tuti i valori ricevesti i vien de persone sémplisse, come quela védova poareta che Gesù la ga lodà parché la gavea deposità due monede de poco valor nele casse del tesoro del témpio. (Lucas 21:⁠1-⁠4) Cossita, tuti i pol regolarmente ‘meter qualcossa de banda’ par dar “conforme ga dessidio nel cuor”.​— 1 Coríntios 16:⁠2; 2 Coríntios 9:⁠7.

Semo sicuri che Geovà el continuarà a motivar quei che i vol ‘onorarlo cole so cose valiose’ a dar sostegno al laoro del Regno parché la volontà de Dio la sìpia realisada.​— Provérbios 3:⁠9.

•  De che maniera la nostra organisassion la é difarente dele altre religion?

•  Come i è doperadi i donativi?

Conforme indica el nome Salon del Regno, el prinsipal tema bìblico considerà in questo posto l’è el Regno de Dio — tema dela predicassion de Gesù.​— Lucas 8:⁠1.

I ze sentri dela vera adorassion. Ze nei Saloni del Regno che se organisa la predicassion dele bone notìssie del Regno nela località. (Mateus 24:⁠14) Questi Saloni del Regno i è sémplissi e i pol esser difarenti nela dimension e nel modelo, o anca doperadi par de pi de una congregassion. Fin adesso, gavemo costruio desene de miliari de Saloni del Regno (in mèdia, sinque par di) par acompagnar el aumento dele congregassion. Ma, come questo ze possìbile?​— Mateus 19:⁠26.

I ze costruidi coi donativi de un fondo spessìfico. Questi donativi i è mandadi ala filial parché le congregassion le gàpia soldi par costruir o riformar el so Salon del Regno.

I ze costruidi par meso de volontari de difarente formassion che no i è salariadi. In tanti paesi, se ga organisà Grupi de Costrussion de Saloni del Regno. Grupi de servi de costrussion e volontari i và de una congregassion a l’altra nel medèsimo paese, fin in posti isoladi, par giutar nela costrussion. In altri paesi, Testimònie de Geovà qualificade le è stade nominade par cordinar la costrussion e la riforma dei Saloni del Regno in una determinada region. In tute le costrussion, tanti profissionai spessialisadi dela region i laora volontariamente, ma la parte pi granda del laoro la è fata par meso dei membri dela congregassion local. Tuto questo ze possìbile par meso del spìrito santo de Geovà e dei sforsi sinceri del so pòpolo.​— Salmo 127:⁠1; Colossenses 3:⁠23.

•  Parché i nostri posti de riunion i è ciamadi de Saloni del Regno?

•  Come ze possìbile la costrussion de Saloni del Regno in tuto el mondo?

Cada Salon del Regno dele Testimònie de Geovà el porta el nome santo de Dio. Par quel consideremo un privilègio e una parte importante dela nostra adorassion mantegnerlo neto, de bona aparensa e in bona condission. Tuti i pol giutar.

Giutemo netarlo dopo de una riunion. Dopo de cada riunion, fradei e sorele i neta de maniera sguelta el Salon del Regno. Ma, una volta ala stimana lo netemo par completo. Un ansiano o servo ministerial cordina el laoro, generalmente doperando una lista dei laori che bisogna far. D’acordo cole nessessità, cada un el giuta nei laori come spassar, netar in tera, i bagni, le finestre e speci, meter a posto le careghe, tirar su la polver, netar la parte de fora del salon, tender del giardin e trar via le sporcarie. Al manco una volta al ano, l’è riservà un di par netar tuto. I tosatei i impara gaver rispeto par el nostro posto de adorassion, giutando a far diversi de questi mestieri.​— Eclesiastes 5:⁠1.

Giutemo nela manutension. Tuti i ani ze fata una ispession minussiosa rento e fora del Salon del Regno. Dopo de questa ispession, se fà manutension regolare par tegner el salon in bona condission, sparagnando i soldi. (2 Crônicas 24:⁠13; 34:⁠10) Un Salon del Regno neto e in bone condission l’è un posto degno par adorar el nostro Dio. Mostremo el nostro amor par Geovà e par el posto ndove lu l’è adorà quando giutemo in queste atività. (Salmo 122:⁠1) Questo produse una bona impression nela comunità.​— 2 Coríntios 6:⁠3.

•  Parché gavemo de tender del nostro posto de adorassion?

•  Cossa se fà par mantegner el Salon del Regno neto?

Te piaseria far una peschisa par aumentar la to cognossensa dela Bìblia? Sito curioso de imparar de pi sora un testo bìblico, una persona, un posto o qualcossa mensonà nela Bìblia? Te ghè belche domandà intra de ti se la parola de Dio la pol giutarte con arquante preocupassion che dele volte te ghè? Alora, dopera la biblioteca del Salon del Regno.

La ga boni strumenti de peschisa. Ze probàbile che no te ghè tute le publicassion bìbliche dele Testimònie de Geovà disponìbile nela to léngua. Ma la Biblioteca del Salon del Regno la ga la magioransa dele ùltime publicassion. Dele volte la pol gaver diverse tradussion dela Bìblia, un bon dissionàrio e altre publicassion de riferensa ùtile. Te sì benvenuto par doperar la biblioteca vanti e dopo dele riunion. Pol esser che ghen’è un computador col Watchtower Library (Biblioteca dela Tore de Guàrdia) instalà. Ze un programa in formato eletrónico che contien una granda colession dele nostre publicassion e un sistema de peschisa fàssile de doperar. Te pol ndar in serca de un assunto, una parola o un testo bìblico.

La è ùtile par i studianti che i partissipa dela Riunion Vita e Ministero. Te pol doperar la biblioteca del Salon del Regno par pareciar ben le to parte. El superintendente dela Riunion Vita e Ministero l’è el responsàbile dela biblioteca. Lu el ga de esser sicuro che le ùltime publicassion le sìpia là e che le sìpia ben organisade. Te pol domandar a lu o a to istrutor che te mostre come catar le informassion che te ocore. Ma no se pol portar via gnanca un libro del Salon del Regno. Volemo anca doperar i libri con atension e sensa scriverghe sora.

La Bìblia la spiega che, par trovar la “cognossensa de Dio”, gavemo de ndar in serca “come a tesori sconti”. (Provérbios 2:⁠1-⁠5) La biblioteca del Salon del Regno la pol giutarte a scominsiar la to peschisa.

•  Che strumenti de peschisa i è disponìbili nela biblioteca del to Salon del Regno?

•  Chi pol giutarte a doperar ben la biblioteca?

Gesù Cristo el ga dito ai so dissìpoli: “Dela medèsima maniera, assé slusar la vostra luce davanti dei òmini parché i veda i vostri boni laori e i daga glòria al vostro pare, che l’è nei cieli.” (Mateus 5:⁠16) Par quel, doperemo ben la tecnologia moderna, incluso la internet. Ze del nostro site ofissial, jw.org, de ndove vien le informassion sora quel che credemo e le atività dele Testimònie de Geovà. Cossa se pol catar in questo site?

Risposte dela Bìblia ale domande pi comun. Te pol catar le risposte a arquante dele domande pi importante. Par esémpio, i libretin El sofrimento ndarà finirse qualche di? e Sarà che quei che i ze morti i pol viver nantra volta ntela Tera?, i ze disponìbile nel site in de pi de 600 léngue. Te pol anca leser la Tradução do Novo Mundo in de pi de 130 léngue e diverse publicassion che le giuta a studiar la Bìblia, come el libro Cossa la Bìblia la Pol Insegnarne? e i ùltimi nùmeri de A Sentinela e Despertai!. Tante de queste publicassion le pol esser leseste o scoltade on-line o sbassade nei formati pi doperadi, come MP3, PDF e EPUB. Te pol anca imprimer arquante pàgine par spartirle con una persona interessada nela so pròpia léngua! Publicassion in vìdeo le è disponìbile in tante léngue de segnai. Te pol sbassar leture bìbliche dramatisade, drami bìblichi e bele mùsiche par scoltar in un momento tranquilo.

Vere informassion sora le Testimònie de Geovà. Publichemo anca le ùltime notìssie e vìdeo sora la nostra atività mondial, eventi sora le Testimònie de Geovà e i nostri sforsi de dar aiuto umanitàrio. Te pol catar notìssie dei congressi futuri e informassion par contatar le nostre filiai.

Par meso de ste robe, femo slusar ancora de pi la luce dela verità fin ai posti pi distanti dela Tera. Persone de tuti i continenti, anca dela Antàrtica, le è benefissiade. Femo orassion che “la parola de Geovà la continue a sténderse rapidamente” in tuto el mondo par la glòria de Dio.​— 2 Tessalonicenses 3:⁠1.

•  Come el site jw.org l’è drio giutar le persone a imparar la verità bìblica?

•  Cossa te voleria veder nel nostro site?