Tante persone le se ga fermà de ndar in serimónie religiose parché no le ga incontrà orientassion spiritual o consolo. Alora, parché te gavaria de assister ale riunion cristiane dele Testimònie de Geovà? Cossa te ndarè catar là?

La alegria de esser in meso de persone amorose e afetuose. Nel primo sècolo, i cristiani i era organisadi in congregassion e i realisea riunion par adorar a Dio, par studiar la Bìblia e incoraiarse un col altro. (Hebreus 10:⁠24, 25) Riunidi in un ambiente de amor, i sentia che i era in meso de veri amighi: i so fradei spirituai. (2 Tessalonicenses 1:⁠3; 3 João 14) Noantri seghimo sto esémpio e sentimo la medèsima alegria.

I benefissi de imparar e meter in pràtica i prinsipi dela Bìblia. Come nei tempi bìblichi, òmini, done e tosatei i se riune tuti insieme. Istrutori qualificadi i dopera la Bìblia par giutarne a saver come aplicar i prinsipi bìblichi nel nostro di a di. (Deuteronômio 31:⁠12; Neemias 8:⁠8) Tuti i pol spressar la so fede par meso de comentari e càntichi.​— Hebreus 10:⁠23.

La benedission de gaver la to fede in Dio fortificada. El apòstolo Paulo el ga dito a una dele congregassion dei so di: “Parché son premoso de véderve. . . parché podemo aver un scàmbio de incoraiamento un cola fede del altro, tanto la vostra come la mia.” (Romanos 1:⁠11, 12) Nele riunion, la compagnia regolar coi nostri fradei riforsa la nostra fede e la nostra determinassion de viver de una maniera cristiana.

Te sì convidà a assister ala nostra pròssima riunion e veder personalmente sora quel che ze stà scrito in questa lession. Te sarè benvenuto! Tute le nostre riunion le è gratuite e mai se tol su limòsina.

•  Che modelo le nostre riunion de congregassion le dopera?

•  Come assister ale riunion pol giutarne?

Anca se gavemo de caminar in meso de selve fisse o infrontar condission climàtiche rugne, no assemo de assister ale nostre riunion cristiane. Anca se gavemo dificoltà nela vita e che semo strachi dopo de un di de laoro, parché le Testimònie de Geovà se sforsa tanto par star coi so fradei cristiani?

Fà ben par noantri. Parlando del relassionamento coi nostri fradei dela congregassion, Paulo el ga dito che gavemo de ‘pensar un nel altro’. (Hebreus 10:⁠24) Queste parole le mostra che gavemo de sforsarse par cognosser ben i nostri fradei. Anca le ne dà un insentivo par dimostrar interesse par i altri. Al cognosser altre fameie cristiane, scopriremo che arquante de lore le ga superà dificoltà someiante ale nostre e che le pol giutarne a far compagno.

Proporsiona grande amicìssie. Nele nostre riunion, no semo in compagnia de sémplissi cognossidi, ma de veri amighi. In altre ocasion, passemo tempo insieme par divertirse de maniera sana. Come questa compagnia la ne benefissia? Imparemo a valorisar de pi un al altro, e questa fortifica el vìncolo de amor intra de noantri. Par quel, quando i nostri fradei i è drio passar par problemi semo pronti par giutarli. (Provérbios 17:⁠17) Par meso dela associassion con tuti i membri dela nostra congregassion, mostremo la preocupassion che gavemo un col altro.​— 1 Coríntios 12:⁠25, 26.

Te insentivemo a gaver come amighi persone che fà la volontà de Dio. Te trovarè amighi cossita in meso dele Testimònie de Geovà. No stà assar gnente impedirte de gaver associassion con noantri.

•  Parché la compagnia nele riunion la ne benefissia?

•  Quando te piaseria cognosser la nostra congregassion?

Quando i primi cristiani i se riunia, lori cantea, fea orassion, lesea e spieghea le Scriture sensa gnanca un ritual. (1 Coríntios 14:⁠26) Te ndarè catar una programassion someiante nele nostre riunion.

Le istrussion le è baseade nela Bìblia e le è pràtiche. Nei fin de stimana, cada congregassion la se riune par scoltar un Discorso Bìblico de 30 minuti sora come le Sacre Scriture le è pràtiche par la nostra vita e ai tempi che semo drio viver. Tuti noantri semo insentivadi a acompagnar la letura dei testi nela nostra pròpia Bìblia. Dopo del discorso vien el Stùdio de A Sentinela, una considerassion de una ora in che tuti quei che i vol pol far comentari. Ze doperà un artìcolo dela edission de stùdio dela rivista A Sentinela, che ne giuta a meter in pràtica i consili bìblichi. El medèsimo tema l’è studià in tuto el mondo in de pi de 110 mila congregassion.

Semo giutadi a insegnar dela meio maniera. Durante la stimana, gavemo anca una riunion ciamada Nostra Vita Cristiana e el so Ministero. Catemo le informassion par esser studiade nela Guida de Atività par la Riunion Vita e Ministero, che ricevemo tuti i mesi. La riunion la è fata in 3 parte. La prima parte, Tesori dela Parola de Dio, la ne giuta a cognosser meio una parte dela Bìblia che quei dela congregassion i ga belche lesesto a casa. Nela seconda parte, Fà el to Meio nel Ministero, ghen’è dimostrassion de come parlar con altri sora la Bìblia. Un insegnante el dà consili che i giuta a leser e a insegnar meio. (1 Timóteo 4:⁠13) La ùltima parte, Nostra Vita Cristiana, la ne giuta a doperar i prinsipi dela Bìblia nela nostra vita. Ghen’è anca una parte con domande e risposte che la ne fà capir meio la Bìblia.

Quando te ndarè in una dele nostre riunion, sicuramente te restarè impressionà cola qualità dela istrussion bìblica.​— Isaías 54:⁠13.

•  Cossa te pol spetar scoltar nele riunion dele Testimònie de Geovà?

•  Te piaseria assister a quala dele nostre riunion?

Te ghè belche visto nele fotografie de sto libreto come le Testimònie de Geovà le è ben vestide par assister ale so riunion? Parché demo atension ala maniera de vestirse e pareciarse?

Par mostrar rispeto al nostro Dio. Ze vero che Dio el vede de pi che la nostra aparensa. (1 Samuel 16:⁠7) Ma, quando se riunimo par adorar a Dio, la nostra sinsiera voia la è mostrar rispeto a lu e anca par i nostri fradei. Se noantri gavéssino de rivar davanti de una audiensa in un tribunal, ze probàbile che starìssino atenti ala nostra aparensa in considerassion ala autorità del giuis. Dela medèsima maniera, el modo come se vestimo e pareciemo par le riunion mostra che rispetemo “el Giuis de tuta la tera”, Geovà Dio, e anca el posto ndove lo adoremo.​— Gênesis 18:⁠25.

Par rifleter i valori che i guida la nostra vita. La Bìblia insentiva i cristiani a vestirse “con modèstia e bon giudìssio”. (1 Timóteo 2:⁠9, 10) Vestirse “con modèstia” vol dir evitar robe stravagante, provocante e reveladore. Gaver “bon giudìssio” anca ne giutarà a scòlier bele robe e che no le sìpie strànie o esagerade. Questi prinsipi i permete una granda varietà de gusti propi. Sensa parlar, podemo ‘adornar el insegnamento del nostro Salvador’ e ‘glorificar a Dio’ par meso dela nostra aparensa bela e de bon gusto. (Tito 2:⁠10; 1 Pedro 2:⁠12) Podemo giutar le persone a gaver una idea positiva sora la adorassion de Geovà quando ndemo ben vestidi ale nostre riunion.

Stesso che no te gàpia robe sossial, no stà assar de ndar nel Salon del Regno. Le nostre robe no ocore che sìpia massa care o pompose, basta che le sìpie nete e de bona aparensa.

•  Parché la maniera de vestirse la é importante quando adoremo a Dio?

•  Che prinsipi i guida la nostra maniera de vestirse e pareciarse?

Se te sì drio studiar la Bìblia cole Testimònie de Geovà, ze probàbile che te pareci quel che sarà considerà in cada stùdio. Par ricever el màssimo benefìssio, saria bon far dela medèsima maniera vanti de assister a una riunion de congregassion. I meio risultadi i vien quando se ga un bon programa de stùdio.

Scòlie quando e ndove studiar. Quando che te sì bon consentrarte meio? De matina bonora, vanti de scominsiar a laorar, o ala note, dopo che i fioi i è belche ndadi dormir? Se no te pol mia studiar par tanto tempo, te pol scòlier quanto tempo te pol studiar e fà sforso parché gnente te perturbe. Và in serca de un posto calmo e tira via tute le distrassion, smorsa el ràdio, la TV e el telèfono celular. Far orassion vanti studiar el te giutarà a gaver manco preocupassion cole cose del di par consentrarte nela Parola de Dio.​— Filipenses 4:⁠6, 7.

Fà marcassion e paréciate par partissipar. Prima, ze bon che te gàpia una idea de tuto el assunto. Pensa nel tìtolo del artìcolo o capìtolo, analisa come cada sototìtolo l’è relassionà col tema, esamina anca le figure e le domande de recapitulassion che mostra i ponti prinsipai. Dopo lesi cada paràgrafo e và in serca dela risposta ala domanda. Dopo de catarla lesi i testi bìblichi mensonadi e pensa in come i apoia el assunto. (Atos 17:⁠11) Quando che te cati la risposta, marca le parole ciave o le frase par giutarte a ricordar dela risposta durante la riunion. Par fin, se te vol, te pol alsar la man e far comentari curti cole to parole.

Studiar i difarenti assunti consideradi tute le stimane nele riunion zontarà idee nove al to “tesoro” dela cognossensa bìblica.​— Mateus 13:⁠51, 52.

•  Che programassion te pol gaver par pareciarte par le riunion?

•  Come te pol pareciarte par far comentari nele riunion?

Dai tempi antighi fin ancoi, Geovà el vol che tute le fameie le passe tempo insieme, fortificando la so spiritualità e la union. (Deuteronômio 6:⁠6, 7) Ze par quel che le fameie dele Testimònie de Geovà le riserva un tempo tute le stimane par adorar a Dio, parlando in un ambiente tranquilo sora assunti spirituai d’acordo cole so nessessità. Anca se te vivi ti sol, questo perìodo el pol esser doperà par rivarte pi darente de Dio par meso de un programa de stùdio sora un assunto bìblico dela to preferensa.

Ze un momento par rivarse darente a Geovà. “Rivé darente de Dio e lu el rivarà darente de valtri.” (Tiago 4:⁠8) Noantri cognossemo meio a Geovà quando imparemo detali dela so personalità e dele so assion par meso dela so Parola scrita. Una maniera fàssile de scominsiar a far la adorassion in fameia la è doperar parte del tempo par leser la Bìblia in alta vose, doperando la programassion stimanal dela Riunion Vita e Ministero. Cada persona dela fameia la pol leser una parte difarente e dopo tuti i pol discorer sora quel che i ga imparà.

Ze un momento par rivarse ai membri dela fameia. Sposi e spose, anca genitori e fioi, i se riva pi darente un al altro quando i stùdia la Bìblia come fameia. Ga de esser una ocasion felisse e tranquila — un dei meio momenti dela stimana. I genitori i pol scòlier assunti ùtili d’acordo cola età dei fioi, dele volte doperando artìcoli de A Sentinela e Despertai! o del nostro site jw.org. Te pol considerar un problema che i fioi i ga bio nela scola e come infrontarlo. Nantra roba che te pol far l’è assister insieme a lori un programa del JW Broadcasting (nel site tv.jw.org) e dopo te pol parlar sora quel che lori i ga imparà. Dele volte te pol pensar che ze interessante praticar i càntichi scoliesti par le riunion e anca magnar qualcossa dopo dela adorassion in fameia.

Questa ocasion spessial doperada tute le stimane par adorar a Geovà come fameia la giutará a tuti sentir piaser nela Parola de Dio e lu el benedirà tanto i vostri sforsi. — Salmo 1:⁠1-⁠3.

•  Parché riservemo tempo par la adorassion in fameia?

•  Cossa i genitori i pol far parché questa ocasion la sìpia agradàbile par tuti nela fameia?

Parché queste persone le è tanto felisse? Lore le è drio assister a una dele nostre assemblee. Come i servi de Dio del passà — che ghe ze stà insegnà a realisar tre grandi eventi par ano —, noantri spetemo le nostre assemblee e i nostri congressi con granda spetativa. (Deuteronômio 16:⁠16) Tuti i ani gavemo tre eventi: due assemblee de sircuito de un di e un congresso regional de tre di. Come queste ocasion ne benefissia?

Le fortifica la nostra fraternità cristiana. Come i israeliti che i sentia alegria in lodar a Geovà “nela granda congregassion”, noantri gavemo piaser de riunirse par adorarlo in eventi spessiai. (Salmo 26:⁠12; 111:⁠1) Queste riunion ne dà la oportunità de cognosser Testimònie de Geovà de altre congregassion o de altri paesi. Nela ora de disnar, magnemo qualcossa insieme nel posto dela assemblea promovendo un ambiente amigàbile in queste ocasion spirituai. (Atos 2:⁠42) Sentimo personalmente che el amor mantien la union dela nostra “intiera fraternità” mondial. — 1 Pedro 2:⁠17.

Le ne giuta a far progresso spiritual. I israeliti i se benefissiea de sti grandi eventi par ‘capir le parole’ dele Scriture. (Neemias 8:⁠8, 12) Noantri anca valorisemo la istrussion bìblica che ricevemo nele nostre assemblee. Cada una la è baseada in un tema bìblico. Par meso de discorsi, simposi e dimostrassion interessante, imparemo come far la volontà de Dio nela nostra vita. Restemo incoraiadi al scoltar stòrie de persone che le ga problemi in questi tempi difìssili, ma che stesso le continua a viver de una maniera cristiana. Nei congressi regionai, teatri i dà vita ale stòrie bìbliche e ne insegna lession pràtiche. In tute le assemblee e congressi, persone che le vol simbolisar la so dedicassion a Dio le è batesade.

•  Parché le assemblee le è ocasion felisse?

•  Che benefìssio te pol ricever de assister a una assemblea?

Poco vanti dela so morte, Gesù el ga dito: “E queste bone notìssie del Regno le sarà predicade in tuta la tera abitada, in testimònio a tute le nassion; e alora vegnerà el fin.” (Mateus 24:⁠14) Questo laoro mondial de predicassion el saria fato dela medèsima maniera che Gesù el ga fato quando l’era su la Tera.​— Lucas 8:⁠1.

Ndemo in serca dele persone nele so case. Gesù el ga insegnà ai so dissìpoli a far la predicassion dele bone notìssie de casa in casa. (Mateus 10:⁠11-13; Atos 5:⁠42; 20:⁠20) Questi evangelisadori del primo sècolo i gavea ricevesto teritori spessìfichi par far la predicassion. (Mateus 10:⁠5, 6; 2 Coríntios 10:⁠13) Dela medèsima maniera, el nostro laoro de predicassion ancoi l’é ben organisà, e cada congregassion la riceve un teritòrio spessìfico par far questa predicassion. Cossita ze possìbile obedir la òrdine che Gesù el ga dato de ‘predicar e dar un testimònio’ completo.​— Atos 10:⁠42.

Noantri femo sforsi par rivar ale persone dapartuto. Gesù el ga dato el esémpio de predicar in posti pùblichi, darente al mar o intorno de possi comunitari. (Marcos 4:⁠1; João 4:⁠5-15) Cossita come Gesù, discoremo cole persone sora la Bìblia in tuti i posti possìbili: nele vie pùbliche, nel comèrsio, nei parchi o par telèfono. Sempre che aproprià, demo testimònio ai vissini, coleghi de laoro e de scola e a parenti. Gràssie a tuti questi sforsi, milioni de persone in tuto el mondo le pol scoltar “le bone notìssie dela salvassion”.​— Salmo 96:⁠2.

Sito bon pensar in una persona che te poderia parlarghe sora le bone notìssie del Regno de Dio e spiegarghe come queste notìssie le pol influensiar el so futuro? No sta mia tegner questo messàgio de speransa sol par ti. Parla de questo messàgio nela prima oportunità possìbile!

•  Che “bone notìssie” gavemo de predicar?

•  Come le Testimònie de Geovà le è drio imitar la maniera de Gesù de far la predicassion?

La parola “pioniero” generalmente se rifere a una persona che splora teritori novi e verze strade par altre persone. Se pol dir che Gesù l’era un pioniero, parché l’è vegnesto su la tera par un ministero che da vita e par verzer la strada par la salvassion. (Mateus 20:⁠28) Ancoi, i so seghidori i imita el so esémpio dedicando tuto el tempo possìbile ‘fando dissìpoli’. (Mateus 28:⁠19, 20) Arquanti i partissipa in quel che ciamemo de servìssio de pioniero.

Un pioniero l’è un evangelisador de tempo integral. Tute le Testimònie de Geovà le predica le bone notìssie. Ma, arquanti i ga organisà la so vita par servir come pionieri regolari, dedicando 70 ore par mese nel servìssio de predicassion. Par quel, tanti i desside gaver un laoro de mesa giornada. Altri i è scoliesti par esser pionieri spessiai in posti ndove ghen’è pi nessessità de proclamadori del Regno, dedicando 130 ore o de pi par mese nela predicassion. I pionieri i se contenta de viver una vita sémplisse, confiando che Geovà el suprirà le so nessessità. (Mateus 6:⁠31-33; 1 Timóteo 6:⁠6-⁠8) Quei che no i ga la condission de esser pionieri de tempo integral i pol servir, sempre che la so situassion la permete, come pionieri ausiliari, dedicando 30 o 50 ore par mese nela predicassion.

El pioniero l’è motivà par el amor a Dio e ale persone. Come Gesù, ancoi semo drio veder la situassion spiritual disisperada de tante persone. (Marcos 6:⁠34) Ma noantri gavemo cognossensa che pol giutarle adesso, dando una speransa sicura par el futuro. El amor al pròssimo motiva el pioniero a dar tanto del so tempo e energia par giutar i altri spiritualmente. (Mateus 22:⁠39; 1 Tessalonicenses 2:⁠8) Come risultado, la so fede la è fortificada, el se riva pi darente a Dio e aumenta la so felissità.​— Atos 20:⁠35.

•  Come te descriveria un pioniero?

•  Cossa motiva arquanti a esser pionieri de tempo integral?

Da tanto tempo, la educassion teocràtica la è una caraterìstica evidente dele Testimònie de Geovà. Trenamento spessial l’è providensià par quei che se dedica de tempo integral nela predicassion del Regno, parché i possa ‘realisar completamente el so ministero’.​— 2 Timóteo 4:⁠5.

Scola del Servìssio de Pioniero. Nel final del primo ano de servìssio de tempo integral, el pioniero regolar l’è convidà par una scola de sei di. El ogetivo l’è giutar el pioniero a rivarse darente de Geovà, meliorar in tuti i aspeti del so ministero e continuar fedele nel so servìssio.

Scola par Evangelisadori del Regno. Questa scola de due mesi la è stada programada par trenar pionieri sperienti che i è disposti a assar el posto ndove i vive par servir ndove ghen’è pi nessessità. Seghindo el esémpio del pi grando evangelisador che el ga servio su la Tera, Gesù Cristo, l’è come se cada un de lori i disesse: “Mi son qua! Màndame.” (Isaías 6:⁠8; João 7:⁠29) Cambiarse par un posto lontan dele volte ghe vol cambiar par un modo de vita sémplisse. La cultura, el clima e el magnar pol esser difarente de quel che semo abituadi. Fursi bisogna imparar una nova léngua. Questa scola la giuta i fradei e sorele maridadi o nò, de 23 fin 65 ani, a coltivar qualità spirituai e ghe da la capassità che ghe ocore par esser doperadi pi amplamente par Geovà e la so organisassion.

Scola Bìblica de Gileade dela Tore de Guàrdia. In ebraico, “Gileade” vol dir “Mùcio de Testimònio”. Dopo dela so inaugurassion in 1943, de pi de 8 mila diplomadi de questa scola i è stadi mandadi come missionari par dar testimònio “fin la stremità dela tera”, con esselenti risultadi. (Atos 13:⁠47) Quando i nostri missionari i è rivadi al Perù, no ghen’era gnanca una congregassion nel paese. Ancoi ghen’è ben de pi de mila congregassion. Quando i ga scominsià far la predicassion nel Giapon, ghen’era manco de diese Testimònie de Geovà. Ancoi ghen’è ben de pi de 200 mila. Durante i sinque mesi del corso de Gileade se stùdia profondamente la Parola de Dio. Pionieri spessiai, missionari, membri dela fameia de Betel o i superintendenti de sircuito i pol esser convidadi par questa scola de trenamento intensivo, col ogetivo de dar forsa e stabilità al laoro mondial.

•  Qual ze el ogetivo dela Scola del Servìssio de Pioniero?

•  Chi pol partissipar nela Scola par Evangelisadori del Regno?