Come esser un vero amigo?

TE GHÈ belche sentio che te ghè de infrontar arquanti problemi ti ti sol? Noantri semo drio viver in “tempi crìtichi, difìcili de soportar”. (2 Tim. 3:1) Par quela, pol esser che dele volte sentimo che no ghemo nissuni par giutarne e restemo desanimadi. Ma la Bìblia la dise che veri amighi i pol giutarne tanto quando ghen’è situassion difìcile. (Pro. 17:17) Alora, no te ghè mia de infrontar i to problemi ti ti sol.

COME CHE I VERI AMIGHI I POL GIUTAR?

Quando el apòstolo Paolo ga fato i so viai, i so amighi i era insieme e lori lo ga giutà de tante maniere. (Col. 4:7-11) E quando Paolo l’era preso in Roma i so amighi lo ga giutà e i ga fato arquante robe che lu no’l podea mia. Par esémpio, quando i fradei e sorele de Filipo i ga mandà arquante robe a Paolo, l’è stà Epafrodito che ghe ga portà. (Fil. 4:18) Tìchico el ga portà a tante congregassion le carte che Paolo el gavea scrito. (Col. 4:7) Sicuro che l’è stà par causa del aiuto dei so amighi che Paolo l’è stà bon de seitar a incoraiar le congregassion, anca quando no podea mia ndar via de casa o quando l’era in preson. Ma come che ti te pol esser un vero amigo?

Ancoi, nostri fradei e sorele i mostra che i ze veri amighi. Varda par esémpio quel che ga sucedesto con Elisabete, una pioniera regolar dela Spagna. Quando la ga savesto che so mama gavea càncaro e gavea poco tempo de vita, una sorela la ga scominsià a mandarghe messagi con testi dela Bìblia par incoraiarla. Elisabete la ga dito: “Quei messagi me ga assà tanto contenta parché savea che ela la era drio pensarse de mi. Cossita, go bio forsa par far quel che mi gavea de bisogno.” — Pro. 18:24.

Anca ti te pol incoraiar i to fradei e sorele quando te li giuti a ndar nela predicassion e nele riunion. Par esémpio, sarà che te podarissi tor quei che i ze pi veci e giutarli a ndar ale riunion? Se te fè cossita, ndaré incoraiarve tanto. (Rom. 1:12) Ma, anca ghen’è de quei fradei che no i pol mia ndar via de casa. Alora, come che ti te pol esser un vero amigo par lori?

SÌPIA UN VERO AMIGO PAR QUEI CHE NO I POL NDAR VIA DE CASA

Arquanti fradei e sorele no i pol mia ndar ale riunion par causa de una malatia o de altre robe. Varda par esémpio quel che ga sucedesto con David, un fradel che ga bio càncaro e che el ga fato quimioterapia par 6 mesi. In questo tempo, lu e la so dona, Lìdia, no i era boni de ndar ale riunion e le vedea de casa par la internet.

Come che i fradei e sorele dela congregassion i ga mostrà che i ze veri amighi? Dopo cada riunion, arquanti de quei che i era nel Salon del Regno proea parlar con David e Lìdia par meso dela internet. E quando lori i fea qualche comentàrio, i fradei i mandea un messàgio e disea cossa che ghe gavea piasesto. Cossita, David e Lìdia i ga sentio el amor dei so cari fradei e sorele.

Te pol anca predicar con quei fradei e sorele che no i pol ndar via de casa. Come? Se te fè qualche cambiamento te pol star insieme a lori e mostrar che i ze tanto importante par ti. (Pro. 3:27) Par esémpio, te pol far una programassion e scriver carte o predicar par meso del telèfono con questi cari fradei. Fursi, lori i pol assister le riunion par la predicassion par meso de vìdeo. Nela congregassion de David e Lìdia, i fradei i ga fato pròpio cossita. David el ga dito: “Sol assister la riunion par la predicassion e scoltar la orassion insieme a me cari fradei e sorele me incoraiea tanto.” Nantra roba che te pol far l’è domandar a questi fradei se te podarissi menar un studiante casa soa par far el stùdio.

Se te resti insieme a questi fradei e sorele, te ndarè cognosser so bele qualità e valtri deventaré boni amighi. Par esémpio, quando te vedi come un fradel insegna la Bìblia a qualchedun e ghe giuta a esser pi amigo de Geovà, lu el deventarà ancora pi caro par ti. Sicuro che te gavarè boni e novi amighi se te giuti questi cari fradei a ndar ale riunion e ala predicassion. — 2 Cor. 6:13.

Quando Paolo el ga bio dificoltà, Tito lo ga giutà tanto. (2 Cor. 7:5-7) Cossa che imparemo? Quando un fradel o una sorela ga bisogno de aiuto, podemo incoraiarli par meso de quel che parlemo. Ma el esémpio de Tito ne mostra che anca podemo restar insieme a lori par giutarli. — 1 Gio. 3:18.

SÌPIA UN VERO AMIGO QUANDO GHEN’È PERSEGHISSION

I nostri fradei e sorele nela Rùssia i ze drio dar un bel esémpio de come giutarse un al altro. Varda quel che ga sucedesto con Sergey e Tatiana. La polìssia la ze ndata rento la so casa e i ga fato un rabalton, parché i era in serca de qualcossa che i gavesse fato de sbalià. Dopo, i polissiai i ga portà lori due par farghe domande e i ga assà che Tatiana la tornesse casa prima de Sergey. Lu el ga dito: “Quando ela la ze rivada casa, belche ghen’era una sorela lì par giutarla. Poco tempo dopo, altri fradei e sorele i ze rivadi e lori i ga giutà a meter a posto tute le robe nela nostra casa.”

Sergey anca el ga dito: “Sempre me ga piasesto de Proverbi 17:17, che dise: ‘Un vero amigo el ama tuto el tempo e el deventa come un fradel quando ghen’è situassion difìcile.’ Ma dopo che go infrontà perseghission e go bio bisogno del aiuto dei me fradei, go visto che quel che el testo el dise l’è pròpio vero. Geovà el me ga dato amighi coraiosi che i me ga giutà e che i ze sempre restadi dela me banda.”a

Ghemo bisogno dei nostri amighi quando infrontemo una dificoltà, e nela granda tribolassion gavaremo ancora de pi bisogno de lori. Par quela, sfòrsate de esser un vero amigo adesso! — 1 Pie. 4:7, 8.