Chi che va al cielo?
La risposta dela Bìblia
Dio el scòlie un nùmero giusto de cristiani fedeli che i sarà ressussitadi par viver nel cielo dopo che i more. (1 Piero 1:3, 4) Dopo che i ze scoliesti, lori i ga de seitar fedeli e viver de una maniera che ghe piase a Dio par no perder la speransa de viver nel cielo. — Efesi 5:5; Filipensi 3:12-14.
Cossa quei che i va nel cielo i ndarà far là?
Lori i ndarà laorar come rè e sasserdoti insieme con Gesù par mila ani. (Apocalisse 5:9, 10; 20:6) Lori i ndarà far parte dei “novi cieli”, che l’è un governo nel cielo, e i ndarà governar sora la “nova tera”, che la ze le persone che le ndarà viver qua nela Tera. Quei che ndarà governar nel cielo i ndarà giutar le persone qua nela Tera a deventar perfete, cossita come Dio el volea quando el ne ga creà. — Isaia 65:17; 2 Piero 3:13.
Quanti che i sarà ressussitadi par viver nel cielo?
La Bìblia la mostra che 144 mila persone le sarà ressussitade par viver nel cielo. (Apocalisse 7:4) In Apocalisse 14:1-3, ledemo che el apòstolo Gioani el ga visto “el Piegoreto in pié nel monte Sion, e con lu 144.000”. In questa vision, “el Piegoreto” l’è Gesù dopo de esser ressussità. (Gioani 1:29; 1 Piero 1:19) “El monte Sion” vol dir la autorità de Gesù e dei 144 mila che i governa con lu nel cielo. — Salmo 2:6; Ebrei 12:22.
Quei che i ze ‘ciamadi e scoliesti’ par governar con Gesù nel Regno i ze ciamadi de “pìcolo grupo de piégore”. (Apocalisse 17:14; Luca 12:32) Cossita, vedemo che lori i saria pochi in comparassion con tute le piégore de Gesù. — Gioani 10:16.
Idee sbaliade sora quei che i va al cielo
Idea sbaliada: Tute le persone bone le va al cielo.
Verità: Dio el ga prometesto che la pi granda parte dele persone bone le ndarà viver par sempre nela Tera. — Salmo 37:11, 29, 34.
Gesù el ga dito: “Gnanca un omo l’è ndà su al cielo.” (Gioani 3:13) Cossita el ga mostrà che le persone bone che le ze morte vanti de lu, come Abraon, Moisè, Giò e Davi, no le ze mia ndate al cielo. (Ati 2:29, 34) Invesse, lore le gavea la speransa dela ressuression par viver nela Tera. — Giò 14:13-15.
La ressuression par viver nel cielo la ze ciamada “prima ressuression”. (Apocalisse 20:6) Alora capimo che ghen sarà nantra ressuression qua nela Tera.
La Bìblia la insegna che, quando el Regno de Dio governar, “no ghen sarà pi la morte”. (Apocalisse 21:3, 4) Questa promessa la ze par la Tera, parché mai ga bio morte nel cielo.
Idea sbaliada: Noantri scoliemo se ndaremo viver nel cielo o nela Tera.
Verità: L’è Dio che el scòlie chi che el va ‘ciamar par ndar su’, o sia, par chi che el va dar la speransa de viver nel cielo. (Filipensi 3:14) Anca se una persona la vol tanto ndar al cielo, l’è Dio che el scòlie ndove che la ndarà viver. — Mateo 20:20-23.
Idea sbaliada: La speransa de viver nela Tera no la ze tanto bona, e la ze data sol par quei che no i mèrita viver nel cielo.
Verità: Dio el ciama le persone che le ndarà viver par sempre nela Tera de “me pòpolo”, “me scoliesti” e “quei che Geovà el ga benedio”. (Isaia 65:21-23) Queste persone le gavarà la alegria de far quel che Dio sempre el ga volesto par lore, che l’è viver par sempre e far la Tera deventar un paradiso. — Génesi 1:28; Salmo 115:16; Isaia 45:18.
Idea sbaliada: El nùmero 144 mila che catemo in Apocalisse l’è sol una maniera de dir e nò un nùmero real.
Verità: L’è vera che in Apocalisse ghen’è tanti nùmeri che i ze sol maniere de dir, ma arquanti nùmeri i ze reai. Par esémpio, el parla dei “nomi dei 12 apòstoli del Piegoreto”. (Apocalisse 21:14) Come savemo che el nùmero 144 mila l’è un nùmero real?
Apocalisse 7:4 parla che 144 mila persone le ze scolieste par viver nel cielo. Pena dopo el libro el parla de nantro grupo difarente: “una granda mùcia de gente che gnanca un omo el podea contar”. Quei dela “granda mùcia de gente” anca i sarà salvi par Dio. (Apocalisse 7:9, 10) Se el nùmero 144 mila no’l fusse real, ma sol volesse parlar de una granda mùcia de gente sensa un nùmero giusto, no ghe volaria mia far una difarensa intrà i due grupi.a
Anca, el libro de Apocalisse el parla che i 144 mila “i ze stati compradi intrà la umanità come primìssie”. (Apocalisse 14:4) La spression “primìssie”, o primi fruti, l’è drio parlar de una pìcola parte de un grupo pi grando. Questa la ze una bona maniera de parlar de quei che i ndarà governar nel cielo insieme a Gesù sora un nùmero de persone che le viverà qua nela Tera e che no se pol mia contar. — Apocalisse 5:10.
a Dela medèsima maniera, el maestro Robert L. Thomas el ga scrito cossita sora el nùmero 144 mila che catemo in Apocalisse 7:4: “Qua l’è drio far la difarensa intrà un nùmero real e el nùmero che no se pol mia contar de Apocalisse 7:9. Se vedemo el nùmero 144 mila come sol una maniera de dir, no se podaria capir gnanca un altro nùmero in Apocalisse come real.” — Revelation 1-7: An Exegetical Commentary, pàgina 474.