Agosto

Hiyo ninnavekela weera atthu antxipale yaakhulele mitthenka sooreera ni ekhale vamoha ni hiyo mookokhorelani mweekhaikhai. Vano ankha ale ehintthuna wiiwa emaara nnaaleelaahu? Pooti weeraka Yehova onoorowa waavuluxa atthu ale enrowa opaka matxentxo ni murima aya wootheene vaavo enrowaaya omoona Babilonia mutokweene anyaanyiwaka. Wakhala weera eyo enimweereya, nto onnooneya weera onnatthuneya opaka moowaakuveya muteko ola woolaleera. Etthu hiyo nnaaleelaahu atthu awo viinaano va, pooti wuupuwela muhoolo. (Munwehe-tho Ezekiyeli 33:33) Apaale awo enoorowa wuupuwela etthu naalenlaahu ni yiiwalaaya ni opwexeererana ni hiyo mwa okokhorela weekhaikhai moohipisa. Hiihaale ntoko kwaarta ole aaweherera mapresu aatxentxalaawe miyuupuwelo sawe vaavo ‘yeereñyaaya etetere etokweene,’ apaale atthu akina ehinaakhulela mitthenka viinaano va enoorowa otxentxa mirima saya vaavo Babilonia mutokweene yowo onnanariha elapo onrowaawe onyaanyiwa. — Mit. 16:25-34. w24.05 epaax. 17 eparag. 9-10

Hiyo ninnaxuttera etthu yootepa otthuneya yeeyo murummwa Paulo aalepenlaawe akristu Aheberi. Akristu akina khiyaakhanle oolipa moomunepani; awo ‘nlelo yaari alipa oowura [eleite], khaiyene eyootxa yoolipa.’ (Aheb. 5:12) Awo khiyaaxuttenre waakhulela itthu inyowani Yehova aaxuttihaawe. (Mir. 4:18) Mwa ntakihero, vaavo Kristu aakhwiiyaawe, nlamulo na Mose naahiya otthariwa, mene akristu akina aYuda yaavirelela otthara nlamulo nna. Neereke mpuwa mwa iyaakha 30 khawaakhanle woowereya aYuda oreherera moota yuupuwelaaya? (Tito 1:10) Mutthu ori poothe aarowa osoma ekaarta yoowuupuxeriwa murummwa Paulo aalepenlaawe Aheberi, aamurowa waakhulela weera eliivuru eyo yaakhalamo eyootxa yoolipa yoomunepani. Ekaarta eyo yahaakhavihera woona moota mukina woomukokhorela Yehova, yoowo waari wootepa oreera ni waarowa waavaha olipa murima weera evirelele olaleya. — Aheb. 10:19-23. w24.04 epaax. 6 eparag. 15

Okhumela Adamu ni Eva emuttharakaru Satana ni omurukunuwela Muluku, atthu antxipale ahookhwa. Etthu heeni enwehereraaya atthu ootheene awo? Nummero navakhaani paahi 144.000 atthareli oororomeleya a Kristu, enoorowa ovinyererihiwa weera ekhaleno ekumi yoohikhwa wiirimu. (Apok. 14:1) Ni nummero noowaatta na athiyana ni alopwana oororomeleya yaawo emmusivela Yehova, enimweerela eparte ‘ovinyererihiwa wa anaxariya,’ ni enookhala elapo ela ya vathi mahiku ootheene wakhala weera enoovirelela okhala anaxariya mpuwa mwa Olamulelo wa iyaakha 1.000 wa Kristu ni mpuwa mwa weereriwa woomalihera. (Dan. 12:13; Aheb. 12:1) Ni mpuwa mwa iyaakha 1.000, “alipa òhiloka” waahela mpuwa ale yaahanvarela Yehova ni ‘ale yaapanke itthu sootepa onanara’ enookhalano eparakha yootxentxa mikhalelo saya ni okhala oororomeleya. (Yoh. 5:29; Luka 23:42, 43) Mene atthu akina yaari ootepa onanara murima, yaawo yaathanliye omurukunuwela Yehova ni sootthuna sawe, mpaka Yehova othanla weera khiyaano yooweherera ya ovinyererihiwa. — Luka 12:4, 5. w24.05 epaax. 2 eparag. 3; epaax. 5 eparag. 15; epaax. 6 eparag. 17

Mutthu ontthuna weera aakhuleliwe ni Yehova, ontthuneya ‘wuuluma ekhaikhai vamurimani vawe.’ (Nsal. 15:2) Onnatthuneya opaka eyo ohiya paahi ohootha. Ohiya paahi ohima ekhaikhai emaara nnuulumaahu, nintthuneya ororomeleya mwa itthu sootheene nimpakaahu. (Aheb. 13:18) Eyo tiyootthuneya, “niwoko Yahvéh onnamuthanya mutakhali, vahera onthamwene’awe ti wa anaxariya.” (Mir. 3:32) Mutthu ‘onuuluma ekhaikhai vamurimani vawe,’ khonootherera ororomeleya wa Yehova waattiwavo, mene emara emoharu ohimmwiiwelela akhala meekhaawe. Moovirikana ni eyo, mutthu owo onnasepa okhala oowootha. Mutthu oowootha pooti opatxera wuupuwelaka weera khaiyene ti wooreera otthara malamulo a Yehova. (Yak. 1:5-8) Owo pooti opatxera ohimwiiwelela Yehova mwa itthu seiyo sinkhala ntoko khaiyene ti sootthuneya, ni emaara yeeyo onoonaawe ehimukhumelelaka etthu mwaha woohiroromeleya wawe, owo pooti opaka itthu itokweene. Nnaamweera mutthu owo uupuwelaka weera onanvarela Muluku, Yehova khonaakhulela okokhorela wawe. (Koh. 8:11) Mene hiyo, nintthuna okhala oororomeleya mwa itthu sootheene. w24.06 epaax. 10 eparag. 7-8

Atthu a Yehova ennaasivela ekhaikhai ya masu a Muluku. Mwaha wa yeeyo nroromelo nahu ninnalipa. (Arom. 10:17) Nroromeleke weera Yehova oopaka muloko wa ekristu ntoko “mukuryo ni ehitxe ya ekhaikhai.” (1 Tim. 3:15) Khiyaavo etthu ekina emmusivela Satana ohikhanle oneeriha oyeleela omuroromela Biblya ni miruku nnaakhelaahu mmarehereroni mwa Yehova. (Aef. 4:14) Moohipisa va, Satana onoorowa ovarihela muteko owera wawe weera aawoke atthu antxipale weera emurukunuwele Yehova. (Apok. 16:13, 14) Nave-tho nroromeleke weera Satana onoorowa wiilipihera vantxipale weera aawoke atthu a Yehova. (Apok. 12:9) Mwaha wa yeeyo ti wootepa otthuneya wiitxentxeriha viinaano va weera noone ovirikana okhanle woohima sa ekhaikhai ni yoowootha, weera nivirelele wiiwelela ekhaikhai. (Arom. 6:17; 1 Ped. 1:22) Mwaha wooweera mpuwa mwa maxupo matokweene ovuluwa wahu onlipa ni ekhaikhai! w24.07 epaax. 8 eparag. 1-3

Emaara Yehova aareherenraawe ana a Israeli ntoko nloko, owo aapaka nivarihano naawo. Wakhala weera awo yaamukosoopa malamulo awe, owo aamwaakosoopa ni waareeliha. Mene wakhala weera awo yammurukunuwela, mwa ntakihero, yaakokhorelaka amuluku akina, owo khaarowa waareeliha, nave yanviriha maxupo. Menento nnaamweera oreene hiiho, awo nlelo yanwera otthikela waakhuleliwa ni Muluku. Awo yanwera ‘omutthikela Yehova Muluku aya ni wiiwelela nsu nawe.’ (Ola. 30:1-3, 17-20) Ni masu makina, awo yanwera ottharuwa. Wakhala weera yampaka eyo, Yehova aamurowa owaattamela nave aamurowa waareeliha veeli. Atthu Yehova aathanliyaawe, yaahimurukunuwela ikwaha sintxipale. Yookhumelela aya, awo yaaviriha maxupo. Mene Yehova khaanyanyanle atthu awe ale yaamurukunuwela. Owo aahaarumiha maprofeti ikwaha sintxipale weera yaaleele atthu awe weera yaatthuneya ottharuwa ni otthikela wa yoowo. — 2 Mam. 17:13, 14. w24.08 epaax. 9 eparag. 4-5

Akristu Aheberi yaakhala oYerusalemu ni oYuda, yaahiviriha itthu sooxupa iyaakha soottharelana Yesu akhwiiyeene. Emaara waapakinwaaya muloko wa ekristu, muloko owo waapatxera otthara-tthariwa vantxipale. Nave-tho sivirakaru iyaakha 20, atthareli a Yesu yannaviriha maxupo a othoiwa, onooneya weera yaakhumelela maxupo ala mwaha wa etala yaakhumelenle elapo ele. (Mit. 11:27-30) Menento, eyaakha ya 61 Kristu awiiyeene, akristu yannaviriha etempu yoomaaleleya, nalikanxera ni itthu saarowa weereya muhoolo. Mpuwa mwa etempu ele, awo yaahaakhela ekaarta yaalempwale ni murummwa Paulo, yeeyo yaarowa waakhavihera mpuwa mwa maxupo awo. Ekaarta yaalepelinwaaya Aheberi, yaahaakhavihera mwaha wooweera murettele yaaraayano, khiwaarowa opisa. Paulo aahaavaha miruku soovareleya muteko seiyo saarowa waakhavihera akristu ale ovilela maxupo yeeraaya ekumanekeno. w24.09 epaax. 8 eparag. 1-2

Emaara hiyo ninvirihaahu maxupo, asinna ni asirokora, etthu emoha Yehova onooniheraawe weera onnansivela. Asinna pooti onimaaliha eniiwelelaka moomaaleleya, naari onikhavihera enxekuraka. Awo pooti onsomela eversu ya mBiblyani naari opaka nivekelo vamoha ni hiyo. (Arom. 15:4) Ikwaha ikina, munna pooti onuupuxera moota Yehova onuupuwelaawe ni onikhavihera okhalano moonelo wa eriyari-neeriyari. Nave-tho asinna pooti onikhavihera mwa mukhalelo wa weerutthuni, mwa ntakihero, enivahaka yootxa emaara ya maxupo. Weera naakhele nikhavihero na atthu akina, apaale onootthuneyaka hiyo waavekela atthu awo. (Mir. 17:17) Pooti weeraka awo khensuwela moota nniisoonelaahu naari etthu ninvirihaahu. (Mir. 14:10) Mwa yeeyo mukhaleke oolikaneene waaleela asinthamwene anyu oolipa moomunepani miyuupuwelo iyo. Mwaaleeleke etthu yaarowa wookhaviherani. Nyuwo pooti wuuluma ni mutokweene mmoha a mmulokoni naari eeli yaawo munoonaanyu okhweya wuulumano. Asirokora akina ahoona okhala wooreera wuuluma ni murokora mukina oolipa moomunepani. w24.10 epaax. 10 eparag. 15-16

Atthu antxipale ennatxa eyootxa yooreera ni ennapaka exercicío yoolipiha erutthu mahiku ootheene weera ekhaleno erutthu yooreera. Nnaamweera vareene hiiho, awo khenweherera okhalano ekumi yoohimala. Ekumi yoohimala enkhala ntoko etthu ehinwereya, mwaha wooweera atthu ennaxupeya mwaha woowuuluvala. Menento, moota enooniheraaya va Yohani 3:16 ni 5:24, Yesu onnuuluma moolipihera woohima sa “ekumi yohimala.” Nihiku nimoha, Yesu aahaatxiha atthu antxipale mwa mwiiriira ni ipaawu ni ihopa. Yaari etthu yootikiniha, mene etthu Yesu uulummaawe nihiku naattharelana yaari yootikinihaxa. Muloko ole wa atthu waamutthara mpaka oKafarnawu, waattamela oGalileya, iwo Yesu aahaaleela weera atthu ekhwiiye onoowereya ovinyererihiwa ni okhalano ekumi yoohimala. (Yoh. 6:39, 40) Awo pooti ovinyererihiwa, nave nyuwo ni ale munaasivelaanyu pooti okhalano ekumi yoohimala! w24.12 epaax. 8 eparag. 1-2

Soohimmwa sa mareherero a elapo yootheene enweha-weha ekumi (Organização Mundial de Saùde), sinnoonihera weera alopwana antxipale oothela, ennaahasula asaaraya weerutthuni, mmasuni naari mmuupuweloni. Mulopwana oothela ompaka eyo, apaale onnaathokorora amwaarawe mwa nttittimiho yakhala ni atthu, mene yakhala owaani annaahasula amwaarawe. Etthu heeni enweeriha alopwana akina okhalano mukhalelo ola wa nihasu? Pooti weera awo ehuuwale ni tiithi yoowo aari oowali, nto ti yeeyo enweeriha wuupuwela weera khaiyene woonanara okhalano mukhalelo owo. Akina aavoleeliwa ni sookhovelela sa elapo aya seiyo sinhima weera “mulopwana eekhaikhai”, ontthuneya ovarihela ikuru sawe weera awoonihere amwaarawe weera muhooleli a emusi. Alopwana akina khexuttihinwe okosoopa miyuupuwelo saya ni onyoonyiwa waya. Alopwana akina ahunnuwihera moonelo woohireera woohima sa asithiyana ni okonihana mwaha woowoonela voohihiyerereya iviidiyu sinkonihaniwa moohireerela. Opwaha mwa yeeyo, soohimmwa sinhima weera, eretta ya COVID-19 yohaatxeerera maxupo ala. Menento mulopwana, ehikhale etthu enrowa omweeriha waathokorora amwaarawe noowali. w25.01 epaax. 8 eparag. 2-3

“Omusivele Yehova Muluku aa, ni murima aa wootheene, ni ekumi aa yootheene, ikuru saa sootheene ni muupuwelo aa wootheene.” (Luka 10:27) Yesu aasuwela nlamulo nno okhala nootepa otthuneya mu nlamulo na Mose. Moone weera omusivela Yehova onhela mpuwa murima ahu, yoowo onoonihera sootthuna sahu, miyuupuwelo sahu ni moota nniisoonelaahu. Nave-tho omusivela wahu onhela mpuwa ekumi ahu yootheene ni ikuru sahu, weiwo onhela mpuwa wiilipihera wahu. Mene-tho, omusivela Yehova onhela mpuwa muupuwelo ahu, yoowo onoonihera moota nnuupuwelaahu woohima sa nyaha. Pooti weeraka hiyo khaninrowa wiiwexexa moomalela moota Yehova onuupuwelaawe, menento nnoowera wiiwexexa nnene sene moota Yehova onuupuwelaawe nxutteraka woohima sa ‘muupuwelo wa Kristu’ mwaha wooweera Yesu onnoonihera moomalela mikhalelo sa Atiithi awe. — 1 Akor. 2:16. w25.03 epaax. 8 eparag. 1

Yesu aari oomalela hiihaale ntoko Adamu aaraawe oomalela ahinaaye ottheka. (1 Akor. 15:45) Mwaha wa yeeyo, vaavo Yesu aakhwiiyaawe mwaha wa hiyo, ooliva nnene sene ele Adamu ayelenlaawe. (Arom. 5:19) Mwa mukhalelo ene yoola, Yesu ookhala “Adamu òmalihera.” Khontthuneya-tho mutthu mukina oomalela owa weera alive ele Adamu ayelenlaawe. Mwaha wooweera Yesu ohookhwa “khuluwi.” (Aheb. 7:27; 10:12) Ovirikana heeni okhanle eriyari ya otxipihiwa soottheka ni yoowoopola? Otxipihiwa soottheka, etthu Muluku ompakaawe weera hiyo niwere okhala asinthamwene awe. Yoowoopola, yoolivela elivinwe weera owereye otxipihiwa soottheka sa atthu. Yooliva ya yoowoopola, enthoonyereya ni ephome ya mwiitti ya Yesu yeeyo eyeehinwe mwaha wa hiyo. — Aheb. 9:14. w25.02 epaax. 5 eparag. 12-13

Omoona Yehova ntoko Muluku mukumi onoonikhavihera-tho woonaka maxupo ahu mooreerela. Moota heeni? Vaavo ninvirihaahu maxupo nintthuneya wuupuwelelaka itthu sootthuneya. Satana onhima weera vaavo ninvirihaahu maxupo, nnoorowa omuhiya Yehova. Moota nnoonelaahu maxupo onnanvoleela Yehova. (Yobi 1:10, 11; Mir. 27:11) Vaavo ninvirelelaahu okhala oororomeleya wa Yehova nnaamweera nivirihaka maxupo, ninnoonihera nsivelo nahu wa Yehova ni ninnoonihera weera Satana namootha. Nankha woohima sa nyuwo? Neereke nyuwo munviriha maxupo ootthara-tthariwa ni anamalamulela, othoiwa musurukhu, ohaakheliwa nnene mmutekoni moolaleera naari maxupo makina? Wakhala weera eyo enneereya, muupuweleleke weera maxupo munvirihaanyu ennoovahani eparakha yoomuhakalaliha Yehova. Menento muhittuwale, Yehova khonrowa woohiyani oviriha maxupo yaawo muhinweraanyu ovilela. Ikwaha sootheene owo onimoovahani ikuru weera nwere owina. w24.06 epaax. 22 eparag. 9

Neereke moosuwela itthu nyuwo sinaakuva oweererani? Nihiiwokeke nikhoottaka itthu sinaakuva oneerera nuupuwelaka weera naatthu oolipa ni khaninrowa opaka yoottheka. (1 Yoh. 1:8) Mwaha wooweera Paulo oolepa weera ‘ale eneettihiwa ni munepa’ pooti oweriwa ni sooweerera yaahiikosoopa vale. (Agal. 6:1) Nintthuneya wiisuwela asineene ahu ni osuwela sooweerera nihinweraahu owina. (2 Akor. 13:5) Wakhala weera nohoonelela itthu sinaakuva oneerera, etthu heeni nintthuneyaahu opaka? Onnatthuneya wiilipiha! Weera nlikanxere eyo, etempu ya Biblya, eparte yaakuva oweriwa ya ixiri sa isidade, saari milako saya. Mwaha wa yeeyo, milako sannaweha-wehiwa vantxipale. Moolikana ni eyo, hiyo onnatthuneya owehexexa nnene sene itthu ninsuwelaahu weera ti soowaakuva oneerera. — 1 Akor. 9:27. w24.07 epaax. 15 eparag. 5-7

Muteko wooreera, ntoko enhimaaya yoolepa yoolelo, muteko ola wooreera, onhela mpuwa olaleera. Nto vaavo nimmusomaahu Biblya ni ophimelela ele ninsomaahu, nroromelo nahu ni Yehova ninnakhala noolipa nave ninniiwexexa mwaha wa heeni oraaya wootthuneya waaleela atthu woohima sa Omwene. Weera muttottele mureerelo masu a Muluku, musomeke vakhaani-vakhaani ni mphimeleleke ele munsomaanyu. Musepeke waakuveya emaara munsomaanyu. Wakhala weera moosoma masu enooxupani wiiwexexa, muhihiye, opwaha mwa yeeyo, muthola-thole va Índice das Publicações da Torre de Vigia naari Guia de Pesquisa para Testemunhas de Jeová weera mphwanye wiiwanyeihiwa wa masu awo. Mwiihiyera etempu weera musome moomaaleleya, nyuwo munoolipiha nroromelo nanyu nooweera etthu Biblya onhimaawe ekhaikhai. (1 Ates. 5:21) Mwalipiha nroromelo nanyu, munoohakalala waaleela atthu akina ele munxutteraanyu. w24.04 epaax. 15 eparag. 4-5

Davidi ohimme weera, owo ti “òrera murima ni òlevelela.” (Nsal. 86:5) Mikeya olempe ha: “Muluku tani ori ntoko weyo, onatxipiha sopahula ni onalevelela sottheka?” (Mik. 7:18) Ni Yesaya ohimme ha: “Mutakhali ahiye ephiro awe, ni mulolo myupuwelo sawe, ahokolowele wa Yahvéh onommorela ikharari ni wa Muluku ahu, niwoko ti òwakuva olevelela.” (Yes. 55:7) Weera emutakihe Yehova, muloko ole wa oKorinto waaxuttihiwa omwaakhela mulopwana ole aattharunwe ni ommaaliha emooniheraka nsivelo. Vaavo yaattharaaya miruku, muloko waahoonihera ‘wiiwelela mwa itthu sootheene.’ Ekhaikhai weera saavinre miyeeri vakhaaneene paahi vaavo mulopwana ole aakumihinwaawe mmulokoni, mene nttaruxo naamweeriha ottharuwa. Tivawonto, asitokweene a mmulokoni khiyaatthuneya oweherera ovira etempu yintxipale weera emutthikihere mmulokoni. w24.08 epaax. 17-18 eparag. 12-13

Ninkhala etempu yeeyo empakeyaaya matxentxo matokweene! Yesu onoorowa waathoriha atthu ootheene a valaponi. Yesu oohima etempu eyo onrowaawe othoriha aavahaka atthareli awe ‘ethoonyero’ ya otthika wawe moohooneya ni ya “emalihero ya olumwenku.” (Math. 24:3) Eprofesiya ela elempwale va Matheyo ekapiitulu 24 ni 25 ni soolepa sa Marko ekapiitulu 13 ni Luka ekapiitulu 21. Yesu oohima itthu iya soovareleya muteko avarihelaka matakihero mararu. Matakihero awo, ta iputtiputthi ni ipuri, asimwali a miruku ni oohikhala miruku ni italentu. Nenne nri ntakihero, ninnanikhavihera wiiwexexa moota mukhalelo wa mutthu onvoleelaaya moota onrowaawe othorihiwa. w24.09 epaax. 20 eparag. 1-2

Ntakihero nahu ntokweene, Yesu Kristu, eettihiwa ni nsivelo, waasivela wawe Atiithi awe ni waasivela wawe atthu. Nsivelo nno naamweeriha ovara vantxipale ni waapakela akina miteko sintthuneya wiiyeviha. (Math. 20:28; Yoh. 13:5, 14, 15) Asinna wakhala weera nyuwo munimweettihiwa ni nsivelo, Yehova onoorowa wooreelihani ni onoorowa wookhaviherani okwanihera yoolakelaayu yoomunepani yookhala oolikaneene weera nvare ntoko murumeyi ookhavihera. (1 Ped. 5:5) Mulaponi, atthu ookhalano miritti ennatikhiniwa vantxipale. Mene mmarehereroni mwa Yehova khaiyene ti hiiho. Munna oneettihiwa ni nsivelo ntoko Yesu, khantthuna waahoolelaka asinna naari wiisoonihera weera owo tootthuneyaxa waapwaha asinna. Wakhala weera mutthu oowiisunnuwiha aamuthanliwa mmulokoni, moohihovela owo khaarowa opakaka miteko mikina sintthuneya wiiyeviha seiyo siri sootthuneya weera sikosoopiwe iputtiputthi sa Yehova. Owo aamurowaka wuupuwelaka weera tootthuneyaxa ohimphwanelaawe ovara miteko mikina. — Yoh. 10:12. w24.11 epaax. 15 eparag. 6-7

Elapo yootheene ninnaahaawela asinna naari neere, ‘atthu eri soovaha’ weera ehooleleke muloko. (Aef. 4:8) Wakhala weera nyuwo munna oopatisiwa, munoowera ‘okhavihera’? (Mir. 3:27) Nyuwo muri oolikaneene ovara ntoko murumeyi ookhavihera? Nyuwo munnatthuna okosoopa soohaawela sa asinna nvaraka ntoko mutokweene a mmulokoni? Nyuwo munoowera oreherera mikhalelo sanyu weera murowele Exikola ya anamalaleera a Omwene? Exikola eyo enimookhaviherani wiireherera weera nvareliwe muteko vantxipale ni Yesu. Wakhala weera nyuwo munniisoona ohiphwanelela, munvekeleke Yehova. Munvekeleke munepa awe wootteela weera wookhavihereni okhumela nnene mwa soothanleliwa sootheene munvahiwaanyu. (Luka 11:13) Asinna Yesu aathanliyaawe ntoko “atthu” enhoolela muloko, yoowoonihera weera owo onnaneettiha mahiku ala oomalihera. (Math. 28:20) Neereke nyuwo khamunxukurela mwaha wookhalano Mwene yoowo ori ansivelo, oovaha, onaapwattha atthu ni yoowo onivanhe asinna oolikaneene weera ekosoopeke soohaawela sahu? w24.10 epaax. 23 eparag. 16-17

Ekhaikhai weera atthu a Muluku ennaviriha maxupo mantxipale. Mene itthu iya ‘sinoottuwaliwa ni sinoovithiwa vamaithoni va Muluku.’ (Yes. 65:16) Yehova onoomaliha maxupo ootheene ninvirihaahu, noovira etempu, miyuupuwelo soonanara seiyo sinnikumihera maxupo, sinoorowa omala. Nave-tho olelo va, muupuwelo ahu onnakhala woomaaleleya vaavo ninrowaahu mmithukumanoni, omithukumanoni hiyo ninnakhala oomaaleleya nave ninnattuwala itthu sootheene sookhulumula sa elapo ela yoonanara. Vaavo nnooniheraahu mikhalelo sa yoowiima ya munepa wa Muluku ntoko, nsivelo, ohakalala, murettele, ovilela ni oreera murima, hiyo ninnakhavihera omaaleleya okhanle eparaisu ela yoomunepani. (Agal. 5:22, 23) Wa hiyo, eparakha etokweene okhala vamoha ni mareherero a Muluku! Ni ale eri eparaisu yoomunepani, moohipisa va enoorowa woona okwanela woomalela wa yoolaihera ya Muluku, vaavo onrowaawe opaka ‘erimu enyowani ni elapo enyowani.’ w24.04 epaax. 22 eparag. 9-10

Nnaamweera onamorari ereene etthu yooreera, onnatthuneya ottittimihiwa nave pooti ophiyiha woothelanani. Nihiku noothelana, ale enthelana ennamulaihera Yehova weera, vaavo enrowaaya okhalaka akumi eneereke ottittimihana ni osivelana mukina ni mukhwaawe. Nihaakunveene ommana natiri owo onnatthuneya othokorora nnene sene mwaha owo. Eyo ekhaikhai wa natiri oothelana. Onamorari onnaweeriha atthu osuwelana nnene ni opaka yoothanla yooreera, ikwaha ikina yoothanla eyo onkhala othelana naari omaliha onamorari. Wakhala weera ale yaanamorari aamaliha onamorari waya, eyo khentaphulela weera onamorari waya khokhumenle nnene, opwaha mwa yeeyo onamorari waya wookwanihera yootthunaaya ori waakhavihera opaka yoothanla yooreera. Mwaha wa heeni ontthuneyaaya okhalano moonelo wooreera woohima sa onamorari? Atthu ennamorari, entthuneya okhalano moonelo wooreerela woohima sa onamorari, awo khennamorari ehikhanleno yoolakela yootthuna othelana. w24.05 epaax. 26-27 eparag. 3-4

Amiravo makristu imaara ikina pooti waaxupa waakihera soororomela saya. Awo pooti woova vaavo musaala enkumiheriwaaya yooxuttiha weera hiyo nikhumme waakhole. Mwaha wa heeni? Maprusoore pooti ohima weera yooxuttiha yooweera hiyo nikhummwe waakhole ti yeekhaikhai. Wakhala weera nyuwo tiithi, moota heeni nyuwo munrowaanyu omukhavihera mwaninyu ororomela weera ele onaakhulelaawe ti yeekhaikhai? Mmuroromelihe weera owo khanrowa wuuliwa muru mwaha wooweera oosuwela ekhaikhai woohima sa soopattuxiwa. Mwaha wa heeni ninhimaahu hiiho? Ekhaikhai ti yooweera masiyentista mantxipale aasuwela weera ekumi khekhumelenle meekhaaya. Masiyentista awo ennoona itthu sinoonihera weera ookhala mutthu amiruku opattunxe itthu sootheene sikhanle ni sirino ekumi. Yookhumelelaaya, awo khenaakhulela yooxuttiha enhima weera hiyo nikhumme waakhole. Mwaninyu pooti olipiha soororomela sawe aphimelelaka itthu siweerinhe asinna akina ni asirokora ororomela weera ekumi eroopattuxiwa. w24.12 epaax. 18 eparag. 14-15

Yesu aavirelela okhalano moonelo wooreerela woohima sa muteko awe woolaleera, eyo yaamukhavihera ovirelela wiilipihera mmutekoni mwawe. Mwa ntakihero, okhwipi wa eyaakha 30 Kristu awiiyeene, Yesu aahoona weera atthu antxipale yaari oolikaneene waakhulela muteko awe woolaleera, ni aahaalikanxera ni ematta eri yoolikaneene weera ehemphwe. (Yoh. 4:35) Evinreene eyaakha emoha, owo aahaaleela atthareli awe eeraka: “Soohepha siri sintxipale.” (Math. 9:37, 38) Ni muhoolo mwaya, owo aattittimihera veeli eeraka: “Soohepha sohaatta . . . Tivawonto, munvekele Mwaneene ematta weera aaruuhe anamuteko akina.” (Luka 10:2) Yesu annaroromela weera yaamurowa okhala atthu yaarowa waakhulela mitthenka sooreera, ni emaara atthu yaapakaaya eyo, owo annahakalala.Yesu aahaaxuttiha atthareli awe okhalano moonelo wooreerela woohima sa mitthenka yaalaleeraaya, yeeyo yaarowa waakhavihera olaleera moowiilipihera. w25.03 epaax. 18-19 eparag. 15-16

Yehova ti ntthawelo nahu. Mpuwa mwa epheyo etokweene, hiyo ninnaphwanya okosoopeya munikhukuni. Vamoha-moharu, vaavo ninvirihaahu maxupo mweekumini, Yehova onnanikosoopa. Yehova onoorowa onikhavihera okosoopa onthamwene ahu nuuwo. Owo onnanroromeliha weera khiyaavo maxupo ninvirihaahu viinaano enrowa okhala wa mahiku ootheene. Mene Yehova oolaihera weera onoorowa opaka itthu ikina: Muhoolo owo onoorowa omaliha etthu eri yootheene enneeriha okhala ooxupeya ni ohaawa. (Ez. 34:25, 26) Mukhalelo mmoha woophwanya ntthawelo na Yehova, ori moorweela mwa nivekelo. Vaavo hiyo ninvekelaahu, Yehova onnanivaha “murettele wa Muluku” yoowo onkosoopa murima ahu ni muupuwelo ahu. (Afil. 4:6, 7) Ikwaha sootheene Yehova ori oolikaneene weera onikhavihere. Nave-tho hiyo pooti omuroromela Yehova mwaha wooweera owo ‘Mwala wa mahiku ootheene.’ (Yes. 26:3, 4) Yehova ikwaha sootheene owo mukumi. Nave ori oolikaneene okwanihera soolaihera sawe, wiiwa mavekelo ahu ni onikhavihera mwa itthu sootheene ninhaawelaahu. Hiyo pooti omuroromela Yehova mwaha wooweera owo toororomeleya wa ale enanvarela. (2 Sam. 22:26) Owo khonrowa ottuwala itthu sootheene nimpakenlaahu, ni mwaha wa yeeyo onoorowa ontthuvela. — Aheb. 6:10; 11:6. w24.06 epaax. 27 eparag. 4-6

Matthekulelo oohireerela, pooti okawanya murima ahu. Ntoko onthamwene woohireerela ni miyuupuwelo sootthunaxa itthu sa weerutthuni. Wakhala weera nohoonelela weera yookhala etthu empatxera oriiriha onthamwene ahu ni Yehova, nipake ele ninweraahu weera nisepe etthu eyo. (Math. 5:29, 30) Nihihiye murima ahu okawanyeyaka. Hiyo pooti wiiwoka nuupuwelaka weera naatteliwa ni miteko sa omunepani, khanintthuneya osepa onthamwene woohireera. Weera nilikanxere, nkuupuwelani mureene vaate nihiku nooriira ni enviraaya epheyo. Mwaphiya owaani, munnaligari maakina oovihiha mpaani. Eheeni yaarowa okhumelela mwaahiwala mulako? Epheyo yooriira yaamurowa osareya mpaani mmo moowaakuveya. Ninxuttera eheeni? Nintthuneya opaka itthu ikina ohiya paahi otxa yootxa yoomunepani yeeyo envihiha onthamwene ahu ni Yehova. Nave-tho onnatthuneya owala mulako weera onthamwene woohireera yoowo ori ntoko ‘epheyo’ yooriira ya elapo ela naari mikhalelo soohireera, sihivolowe vamurimani vahu ni onikawanya. — Aef. 2:2. w24.07 epaax. 21 eparag. 6-7

Nave hiyo pooti wuupuwelela moota Yesu oonaawe ovoreya ohela mpuwa ohittittimihiwa ni ohaawa ohixariya. Mene, owo khaawerinwe ni ohixariya aavirihaawe. Ohiya owuulumela anakhotto ale, yaamukhomenle vamwirini, owo aavekela eeraka: “Tithi, mwàlevelele, niwoko khansuwela yeyo anèraya.” (Luka 23:34) Emaara nnaavekelelaahu ale ennithokorora moohixariya, eyo pooti oneeriha ohuupuwelela itthu nipakelinwaahu naari onyoonyiwa, naari eyo pooti otxentxa moota ninwoonelaahu atthu ale enitthekenle. Niwehereraka omala elapo ela, khaninsuwela ohixariya heeni ninrowaahu oviriha. Mene nihipwatthaka ohixariya ninrowaahu okumanano, nihihiye onvekela nikhavihero Yehova. Opwaha mwa yeeyo, nimutakiheke Yesu moota oonelaawe ohixariya ni nivireleleke otthara miruku sa mBiblyani. Wakhala weera nnoopaka eyo nroromeleke weera nnimwaakhela mareeliho a Yehova. — 1 Ped. 3:8, 9. w24.11 epaax. 6 eparag. 16; epaax. 7 eparag. 17, 19

Yehova khaiyene Muluku onaasa waakhulela itthu, owo khonsiveliwa ni yoottheka. (Nsal. 5:5-7 [5:4-6, NM]) Owo onnanooperera ottittimiha malamulo awe ooreera, yaawo owo olempaawe mBiblyani. Ekhaikhai weera Yehova khonweherera omalela wa atthu. (Nsal. 130:3, 4) Mene emaara emoharu owo khonaasa waahiya atthu empaka itthu soonanara yaawo ‘entatuxa mahala a Muluku ahu ekhala anamuttompe.’ (Yuda 4) Tivawonto Biblya onuulumaawe sa ‘onyaanyiwa wa atakhali’ va ekhotto ya Harmagedoni yeeyo eri ekhotto ya Muluku. (2 Ped. 3:7; Apok. 16:16) Mene-tho, Yehova khontthuna weera naari mutthu mmoha anyaanyiwe. Biblya onnoonihera nnene sene weera Muluku ‘ontthuna weera ootheene erukunuxe murima.’ (2 Ped. 3:9) Asitokweene a mmulokoni ennamutakiha Yehova vaavo eneereraaya moopixa murima waakhavihera ale epanke soottheka otxentxa mikhalelo saya ni otthikela waakhuleliwa ni Yehova. w24.08 epaax. 26 eparag. 1-2

Ntoko Yehova, hiyo-tho pooti ovaha ni itthu sa weerutthuni. Mwa ntakihero, neereke nyuwo moomusuwela munna naari murokora onhaawela yootxa naari yoowara? Yehova pooti woovarihelani muteko nyuwo weera akosoope yoohaawela awe. Atthu a Yehova ennasuweliwa mwaha wookhala oovaha emaara yeeyo enkhumeleyaaya maxupo. Mwa ntakihero, mpuwa mwa eretta ya COVID-19, asinna ni asirokora yaahaavaha eyootxa, ikuwo ni itthu ikina ale yaahaawela. Antxipale yaahivaha ele yaaraayano weera ekhavihere muteko wa elapo yootheene, eyo yaahaakhavihera asinna ootheene yaaviriha maxupo. Awo yaavarihela muteko masu eri va Aheberi 13:16: “Muhittuwale opanka sorera ni okawana, wona wi amakeya si yala annamusivela Muluku.” w24.09 epaax. 27 eparag. 6-7

Muupuwele yooweereya ela. Nyuwo munaasa muteko weera nwereke otxiha emusi anyu. Munnaphwanya miteko miili. Nyuwo munnaweha itthu sootheene sinhela mpuwa nwehexexaka makhalelo a muteko owo, ewoora ya muteko, etempu munrowaanyu ovirihaka, ni itthu ikina. Opwaha mwa yeeyo, miteko iya soomiili khasinkhoottihiwa mBiblyani. Apaale nyuwo munoorowa othanla muteko mmoha mwaha wooweera onnoosivelani naari mwaha wooweera munoorowa waakhelaka musurukhu muntxipale. Menento, sookhala itthu ikina muntthuneyaanyu othokorora muhinaaye opaka yoothanla. Mwa ntakihero, neereke muteko owo waamurowa ovoleela ewoora ya mithukumano sa mmulokoni? Neereke muteko owo onoorowa owiiyerakani etempu mwaarowaanyu okosoopaka soohaawela sa mmuupuweloni naari sa omunepani sa erutthu anyu? Opaka makoho ala enoorowa wookhaviherani ‘ohela itthu sootepa otthuneya’ ori okokhorela ni soohaawela sa emusi anyu nipuro noopatxera ohiya itthu sa weerutthuni. Mwapaka eyo, nyuwo munoorowa opaka yoothanla yeeyo Yehova onrowaawe oreeliha. w25.01 epaax. 17 eparag. 11-13

Nnaamweera atthu akina yoothokoronreeneni nyuwo moohireerela, muroromeleke weera Yehova annoosivelani ni annoovahani mwiitti. Wakhala weera nyuwo munniisoona ‘ohivareleya muteko’, muupuweleke weera Yehova ohoona itthu sooreera vamurimani vanyu nave ohoopurulelani wa yoowo. (Yoh. 6:44) Owo ikwaha sootheene ori oolikaneene weera ookhavihereni, mwaha wooweera nyuwo tootthuneya wa yoowo. Hiyo pooti oxuttera miyuupuwelo sa Yehova nthokororaka ntakihero na Yesu. Yesu areene elapo ya vathi, aahaasuwela atthu yahaapwatthiwa ni atthu akina, ni aahaakosoopa mooreera murima. (Math. 9:9-12) Vaavo muthiyana mmoha aatthuna olamihiwa eretta awe aatanvaawe ikuwo sa Yesu weera alame, Yesu aahimmaaliha ni aamuttottopela mwaha wa nroromelo nawe. (Mar. 5:25-34) Yesu onnoonihera moomalela mikhalelo sa Tiithi awe. (Yoh. 14:9) Mwa yeeyo, nyuwo pooti ororomelaka weera Yehova onnoopwatthani ni onnaweha mikhalelo sanyu sooreera, ohela mpuwa nroromelo nanyu ni nsivelo mummooniheraanyu. w24.10 epaax. 7 eparag. 4-5

Mpuwa mwa ekumi awe, Davidi aaviriha maxupo mantxipale yaawo yaamweerinhe winla. Owo annakhaleliwa nrima ni aarukunuweliwa ni atthu aaroromelaawe. (1 Sam. 19:10, 11; 2 Sam. 15:10-14, 30) Owo olempe ha: “Kòkhulumuwa niwoko nowìpulela waka: ohiyu wothene kinnìnla vamwinlini vaka, ni maithori kinnananiha vanìsatalelaka’vo.” (Nsal. 6:7 [6:6, NM]) Nnaamweera Davidi aavirinhe maxupo mantxipale, owo annaroromela weera Yehova annamusivela. Owo olempe ha: “Yahvéh òhìwa nsu nowinla waka.” (Nsal. 6:9 [6:8, NM]) Masu eri va yoolepa ya olele ennoonihera moota Yehova ommoriwaawe ikharari vaavo ommukosoopaawe mutthu. Davidi aahoona weera waakhala ntoko Yehova aattottela maithori awe ahelaka mukarafani naari alepaka muliivuruni. Davidi annasuwela weera Yehova annoona ni wuupuwelela moota oonaawe ovoreya. Davidi annasuwela weera Tiithi awe a wiirimu annasuwela, ohiya paahi maxupo aavirihaawe, mene-tho moota yanvoleelaaya. w24.12 epaax. 22 eparag. 11-12