Silempwale ni Marko
3 Yesu aahikela-tho musinagoga.* Nto memmo, aahikhala mulopwana mmosa aarakanle ntata.+ 2 Siiso, afarisi yaaninwehexexa oratteene Yesu, wiira amoone aarowaka ompenuxa mulopwana ole esaabadu, wiira amukumiherye mulattu. 3 Vano Yesu aahimwiirela mulopwana ole oorakala ntata, wiira: “Mweemele, murwe variyari-va”. 4 Nuumala-vo, aahaakoha atthu ale wiira: “Esaabadu, vanneemereriwa mutthu opaka etthu yooloka aahiiso yootakhala, woopola okumi wala wiiva?”+ Awosa khiyaakhunle etthu. 5 Otikinihiwe ene, Yesu aahaaweha atthu ootheene yaamurukurenrye. Nave aahiriipiwa murima vanceene mwaha wa wuumiha waya murima,+ nto aahimuhimeerya mulopwana ole wiira: “Mookole ntata nanyu”. Mulopwana owo aahookola ntata nawe, nikhala saana. 6 Nuumala woona ele, afarisi yaahikhuma niinaano-ru, anarowa othukumana ni atthu yaamutthara Herodi,+ wiira yiiwanane moota yaarowa aya omwiiva Yesu.
7 Vano Yesu aahikhuma ni awiixutti awe, anarowa okerekhere wa ephareya. Nto muttitthi muulupale wa atthu waakhuma oGalileya ni oYudeya, waanimutthara.+ 8 Hata mittitthi suulupale sa atthu saakhuma oYerusalemu, wIdumeya, ekhopela ekina ya muro Yordani, mittetthe sa oTiiro ni oSiidoni, saahirowa okumana ni Yesu, nuumala wiiwa itthu sinceene aapaka awe. 9 Vano Yesu aahaaleela awiixutti awe omusukerya ekalawa yaamukhaani, wiira owele mukalawani-mmo, muttitthi ole wa atthu wapacerya vale omphunya. 10 Okhala wiira Yesu aahaapenuxa atthu anceene, tivo, ootheene ale yaawereiwa yaaniphunyana wiira aphiye vaari awe wiira anvare.+ 11 Hata atthu yaavariwe malaikha ootakhala,+ amoonaka-ru Yesu, yaanikhoroma ohoolo wawe, anakhuwela yiiraka: “Nyuwo mwa Mwaana a Muluku”.+ 12 Masi ikwaha sinceene, Yesu aanilopola oratteene malaikha awo ootakhala wiira ehimulaleye.+
13 Yesu aahiwela vamwaako, aalattula ale aathanlale awe.+ Nto awo yaahimutthara.+ 14 Nave aahaathanla alopwana 12, aavaha nsina na arummwa. Alopwana ala 12, yeetta vamosa ni Yesu ni aanaaruma waalaleerya atthu. 15 Nave-tho, aahaavaha owerya wa woomola malaikha ootakhala.+
16 Vano alopwana awo 12+ aathanlale awe, yaari: Simoni, yoowo-tho anvahale awe nsina na Pedru;+ 17 Yakobo, mwaana a Zebedeyo ni Yohani munnawe Yakobo (Yesu aahaavaha-tho ala anli nsina na Bowanerxe, nenlo nintaphulela “anamwane a etari”),+ 18 Andreya, Filipe, Bartolomeyo, Matheyo, Tome, Yakobo mwaana a Alfeyo, Tadeyo, Simoni mukanaani,* 19 ni Yuda Isikariyoti, yoowo muhoolo mwaya anvarinhe Yesu.
Nuumala-vo, Yesu aahirowa vatthokoni. 20 Nave muttitthi wa atthu waahimuthukumanela. Siiso Yesu ni awiixutti awe khiyaarina okathi woolya. 21 Masi okathi amusi awe Yesu yiiwale aya ele yiiraneya, yaahimurowela, maana yaahimya wiira: “Owo oroovahuwa”.+ 22 Nave-tho, alipa-oowiixuttiha nlamulo, yaawo yaakhuma oYerusalemu, yaahimya wiira: “Ola onoomola malaikha ootakhala okhaliheriwaka ni Satana,* namalamulela a malaikha ootakhala”.+ 23 Vano Yesu aahiwiihana atthu ale, onaaleela ni nlikanyiho oriki: “Vaniweryaneya sai Satana omoomola Satana? 24 Akhala wiira omwene onnikawanyeya yoowo-ru, onoohononeya.+ 25 Nave etthoko enikawanyeya yeeyo-ru, enoohononeya. 26 Siiso-tho, akhala wiira Satana onnimoomola Satana, owo onniikawanya mmansawe. Vano, omwene awe onnihononeya, onamala. 27 Tthiri, khuuvo onikela mpaani mwa mulopwana ootupa, khiyamwiiyerya mireerelo sawe, ohipacenrye omutthukwa mulopwana owo ootupa. Amutthukwa vale, toniwerya awe omwiiyerya mireerelo sawe. 28 Kinooleelani ekeekhai wiira, atthu anooleveleliwa itthu sootheene, hata itampi saya siri ene suulupale ni alavulaka moolumo ootepa oveeha. 29 Masi ole oniveeha ikuru soowaarya, khonleveleliwa,+ maana owo oolamuliwa etampi ehinimala”.+ 30 Yesu aalavunle siiso, mwaha wa atthu ale yaahimya wiira: “Owo orina nlaikha nootakhala”.+
31 Vano amamawe ni axihima awe Yesu,+ yaahirwa yeemela vate. Nto yaahimuruma mutthu omwiihana Yesu.+ 32 Muttitthi wa atthu wiira okilanthi ene ni omurukurenrye ene Yesu. Nto awo yaahimuhimeerya wiira: “Amaminyu ni axihima anyu, ari vate vale, aniphavela olavula ni nyuwo”.+ 33 Yesu aahaakoha wiira: “Ti pani ari amaama ni axihima aka?” 34 Nuumala waaweha atthu ale yaakilanthi amurukurenrye ene, Yesu aahihimya wiira: “Nwooneke! Amamaka ni axihima aka, taala!+ 35 Ole onipaka etthu oniphavela awe Muluku, yoowo tokhanle munnaka, murokoraka ni maama aka”.+