Wahala a Nenli
29 Ezekiya+ aahikhala mwene orina ene iyaakha 25, nave aahilamulela iyaakha 29 oYerusalemu. Maama awe aihaniwa Abiya, mwaana a Zakariya.+ 2 Owo aanipaka itthu sooloka vamaithoni va Yehova,+ ntoko iirale awe muhavinre awe, Davidi.+ 3 Eyaakha yoopacerya ya olamulelo awe, mweeri woopacerya, aahihula mikhora sa empa ya Yehova, ni aahilokiherya.+ 4 Aahaalattula anamukuttho ni alevi, aathukumanya opuro woowaatta atthu, mpantta onikhuma nsuwa. 5 Owo aahaahimeerya wiira: “Nyuwo alevi, mukiwiriyane. Mwiireerihe+ ni mureerihe empa ya Yehova Muluku a amuhavinre anyu, nave mukumihe opuro woowaarya itthu soonanara.+ 6 Axipaapa ahu yaari oohiroromeleya, nave yaahipaka itthu soohiloka vamaithoni va Yehova, Muluku ahu.+ Awo khiyaattittiminhe etapernaakulu ya Yehova, nave yaahimunyanyala.+ 7 Nave-tho, yaahiwala mikhora suulupale+ ni yaahittipiha mithuko.+ Yaahihiya opaha nsenso*+ ni onvaha mikuttho soopahiwa+ Muluku a Isarayeli, opuro woowaarya. 8 Nto, Yehova aahinanariwa ni atthu a oYuda, ni a oYerusalemu.+ Tivonto, aahaakumiherya ehasara wiira ale yaaweha ni yaiwa eyo, yoove, atikinihiwe ni awiipele muturi, ntoko siniwerya anyu woona ni maitho anyu.+ 9 Amuhavinre ahu ahiiviwa ni espaata* opuro ola,+ nave aniihu axilopwana ni aniihu axithiyana, ni axaarihu, yaahikuxiwa ntoko ipottha mwaha wa etthu ela.+ 10 Vano, etthu kiniphavela aka ni murima aka, opaka nivarihano ni Yehova, Muluku a Isarayeli+ wiira ohiniviruwele-tho. 11 Anaaka, ola khahiyo okathi woomumula, okhala wiira Yehova ohoothanlani wiira mweemele ohoolo wawe, mmurumeele+ ni munvahe mwiixi wa mikuttho soopahiwa”.+
12 Vano, alevi akina yaahipacerya ovara muteko: Atthu a nloko na Kehathi,+ aahikhala Mahathi, mwaana a Amasayi, Yoweli mwaana a Azariya; atthu a nloko na Merari,+ aahikhala Kiixi, mwaana a Abidi ni Azariya mwaana a Yehaleleli; atthu a nloko na Gerisoni,+ aahikhala Yowa, mwaana a Zimma ni Eedeni, mwaana a Yowa; 13 anamwane a Elisafani, ahikhala Ximiri ni Yeweli; anamwane a Asafi,+ aahikhala Zakariya ni Mataniyahi; 14 anamwane a Hemani,+ aahikhala Yehiyeli ni Ximeyi; anamwane a Yedutuni,+ aahikhala Xemaya ni Uziyeli. 15 Nto awo yaahaathukumanya axinnaya ni yaahiireeriha, nave yaahirwa oreeriha empa ya Yehova, ntoko mwene aarumme awe ottharaka moolumo a Yehova.+ 16 Moottharelana, anamukuttho yaahikela mpaani mwa Yehova wiira areerihe, nave yaahikuxa itthu sootheene soohiloka yaaphwanyale aya mutemplo mwa Yehova, akumiherya ota+ wa empa ya Yehova. Siiso, alevi yaahikuxa itthu iyo, aroiha oxepani wa oKeduroni.+ 17 Siiso awo yaahipacerya oreeriha empa eyo nihiku noopacerya na mweeri woopacerya. Nihiku na neethanu neeraru na mweeri owo, yaahiphiya vamukhora wa Yehova.+ Awo yaahimaliha mahiku 8 areerihaka empa ya Yehova, nto yaahimaliha oreeriha nihiku na namuloko ni thanu namosa na mweeri woopacerya.
18 Nuumala-vo, yaahirowa wa mwene Ezekiya anamuleela wiira: “Nooreeriha empa yootheene ya Yehova, altaari a soovaha para opahiwa+ ni itthu sootheene saarumeeliwa memmo.+ Nave nooreeriha meesa anipwehiwa iphaawu+ sinivahiwa Muluku ni mireerelo saya sootheene. 19 Nave noolokiherya ni nooreeriha+ mireerelo sootheene mwene Akhazi aakuminhe awe okathi aalamulela awe, vaavo ahoonihenrye awe ororomeleya,+ nipweha ohoolo wa altaari a Yehova”.
20 Mwene Ezekiya aahivenya voosiisu ene, aathukumanya makhulupale a epooma ele, anarowa empa ya Yehova. 21 Awo yaahiruuha ipooyi 7, ipwittipwitthi 7 saamukhaani, ipwittipwitthi 7 soolopwana ni ipuri 7 soolopwana ntoko yoovaha para oleveleliwa etampi para omwene, opuro woowaarya ni para atthu a oYuda.+ Siiso, Ezekiya aahaaleela anamukuttho, osuulu wa Aroni, wiira avahe inama iyo valtaari a Yehova. 22 Nuumala-vo, yaahihita ipooyi,+ nto anamukuttho yaahikuxa ephome atathela valtaari.+ Moottharelana, yaahihita ipwittipwitthi saamukhaani, akuxa ephome atathela valtaari, nave yaahihita ipwittipwitthi soolopwana, akuxa ephome atathela valtaari. 23 Nuumala-vo, yaahiruuha ipuri soolopwana sa yoovaha para oleveleliwa etampi ohoolo wa mwene ni wa muloko, apweherya matata. 24 Anamukuttho yaahihita inama iyo ni yaahikuxa ephome aya aroiha valtaari ntoko yoovaha para oleveleliwa etampi, wiira atthu ootheene a Isarayeli aleveleliwe itampi, okhala wiira mwene aahihimya wiira yaahaana ovahiwa yoovaha para opahiwa ni yoovaha para oleveleliwa etampi, mwaha wa atthu ootheene a Isarayeli.
25 Vano, owo aahaahiya alevi empa ya Yehova akunxe ene isimbalo, atthakare ni aviola,+ moovarihana ni yooruma ya Davidi,+ Gadi+ yoowo aamutaphulela mwene itthu ooniheriwe awe ni Muluku ni profeta Natani,+ okhala wiira Yehova taarumme siiso aarumeelaka maprofeta awe. 26 Siiso alevi yaaheemela akunxe ene ikaruma sa Davidi, anamukuttho akunxe ene malope.+
27 Moottharelana, Ezekiya aahiruma wiira opahiwe mukuttho valtaari.+ Okathi waapacenrye aya opahiwa mukuttho, naahipacerya wiipiwa nsipo na Yehova ni orumihiwa malope, sitthariwaka ikaruma sa isipo sa Davidi mwene a wIsarayeli. 28 Nave muloko wootheene waahuurama okathi wiipiwa aya nsipo ni yaarumihiwa aya malope. Eyo yaahiiraneya mpakha omalihiwa opahiwa yoovaha. 29 Vaamanle aya ovahiwa yoovaha eyo, mwene ni atthu ootheene aarina awe yaahikokhora, yuurama mpakha vathi. 30 Mwene Ezekiya ni makhulupale yaahaaleela alevi wiira amuttottopele Yehova ni moolumo a Davidi+ ni a Asafi,+ yoowo aasuwela otaphulela itthu ooniheriwe awe ni Muluku. Nto awo yaahimuttottopela atteeliwe ene murima vanceene, nave yaahikokhora, yuurama mpakha vathi.
31 Moottharelana, Ezekiya aahihimya wiira: “Vano muthanliwe anyu wiira mukhale a Yehova, murwe, muruuhe mikuttho ni soovaha sa oxukhurela empa ya Yehova”. Nto muloko ole wa atthu waahipacerya oruuha mikuttho ni soovaha sa oxukhurela, nave khula mutthu aaniruuha ni murima awe wootheene soovaha para opahiwa.+ 32 Nummeru na soovaha para opahiwa muloko ole waaruuhale aya, waari wa ipooyi 70, ipwittipwitthi saamukhaani 100 ni ipwittipwitthi soolopwana 200. Sootheene iya saari ntoko yoovaha yoopahiwa enivahiwa Yehova.+ 33 Nave soovaha soowaarya saari ipooyi 600 ni ipwittipwitthi 3.000. 34 Masi khiyaakhanle anamukuttho anceene wiira apere esapala ya inama sootheene saavahiwa ntoko soovaha. Nto axinnaya, alevi, yaahaakhaliherya+ mpakha omalihiwa muteko owo ni mpakha anamukuttho wiireeriha,+ okhala wiira alevi yaanisuwela oratteene moota woowiireeriha waavikana anamukuttho. 35 Nave-tho, saahikhala soovaha sinceene para opahiwa,+ vamosa ni ekortuura ya mikuttho sa opatthani+ ni soovaha siniwuriwa, seiyo saavahiwa vamosa ni soovaha para opahiwa.+ Siiso waahivariwa muteko wa olokiherya empa ya Yehova. 36 Nto Ezekiya ni atthu ootheene yaahitteeliwa murima mwaha wa ele Muluku eekeekhai aapakenle awe atthu,+ maana itthu iye sootheene saakhumelenle mootutuxerya.