Ruti
3 Nowemi, maathi awe, aahimuhimeerya Ruti wiira: “Mwanaka, kihaana woophavelelani opuro,+ wiira mukhaleke saana. 2 Bowazi, yoowo aaweemerenryeni okhala ni arumeyi awe axithiyana, mmusi ahu.+ Ohiyu ola, onooveera esevaata awe opuro oneepetthiwa etiriku. 3 Vano, murape, mwiirattele ni makhura oowunkhela. Nuumala-vo nware ikuwo sanyu sooreerexa ni mukhuruwele opuro oneepetthiwa etiriku. Masi ohiwooneni mpakha omaliha olya ni owurya. 4 Okathi onrowa awe orupa, mwasuwele opuro ompaathale awe, nuumala-vo mwakhunule inawu sawe, mumpaathi vaavo. Owo onimooleelani etthu yoopaka”.
5 Ruti aahaakhula wiira: “Kinimwiira itthu sootheene mukihimenrye anyu”. 6 Siiso, Ruti aahirowa opuro oneepetthiwa etiriku, ni aahiira itthu sootheene aaleeliwe awe ni maathi awe. 7 Bowazi aanilya ni aaniwurya, nave murima awe waahimutteela. Moottharelana, aahirowa wumpaathi waattamela opuro wuukeliwe ipyo. Nuumala-vo, Ruti aahimwaattamela Bowazi vakhaani-vakhaani, okhunula inawu sa Bowazi ni ompaathi vaavo. 8 Ohiyu eriyari, Bowazi aahipacerya othukumela. Okathi aarukununwe awe, aahimoona muthiyana ompaathale ene waametto wawe. 9 Bowazi aahimukoha wiira: “Nyuwo mwa pani?” Ruti aahaakhula wiira: “Miyo ka Ruti, murumeyi anyu. Mutapuruxe mukhumi anyu, mmukhuneele murumeyi anyu ola, okhala wiira ti nyuwo murina ehakhi ya onoopola mixankiho sahu”.+ 10 Siiso, Bowazi aahihimya wiira: “Yehova ooreeliheni, mwanaka. Ekwaha ela mootepa wooniherya ophenta woororomeleya, ovikana ekwaha yoopacerya,+ okhala wiira khimwaatthanre amiravo, akhale oothoiwa wala oothaaciri. 11 Vano, mwanaka, muhoove. Kinoowiirelani itthu sootheene muhimmye anyu,+ okhala wiira atthu ootheene a opooma, aasuwela wiira nyuwo mwa muthiyana ooreera murima. 12 Ekeekhai wiira kookhalana ehakhi ya owoopolani mixankiho sanyu.+ Maasi ookhala mmusi mukina ootepexa okhalana ehakhi ya owoopolani mixankiho sanyu okivikana miyo.+ 13 Murupe vaava ohiyu ola. Vakhala wiira voosiisu onoowoopolani mixankiho sanyu, vaareera, owoopolekeni.+ Masi, akhala wiira khonrowa owoopolani, kinnilapha mwa nsina na Yehova, Muluku mukumi, wiira miyo kinoowoopolani. Mumpaathi vaava mpakha oxa”.
14 Siiso, Ruti aahimpaathi waametto wa Bowazi, mpakha oxa, nuumala-vo aahivenya nsuwa nihinatthi okhuma, wiira ohisuweliwe. Vano, Bowazi aahihimya wiira: “Vahisuweliwe wiira aahirwa muthiyana opuro oneepetthiwa etiriku”. 15 Bowazi aahimuleela wiira: “Muruuhe ekuwo mphitenle anyu, mutapuruxe oratteene”. Ruti aahiira siiso, nto Bowazi aahiitthela vakuwoni-vo, etthu yoowiiraka ikiilu 25* sa esevaata,* ni aahimureya Ruti. Nuumala-vo, Bowazi aahirowa opooma.
16 Ruti aahitthikela wa maathi awe. Nto maathi awe aahimukoha wiira: “Mwanaka, yookhumelenleni exeeni?”* Nto Ruti aahimuleela maathi awe itthu sootheene Bowazi aamwiirenle awe. 17 Ruti aahihimya-tho wiira: “Bowazi ookivaha esevaata ela etthu yoowiiraka ikiilu 25, ni ookileela wiira: ‘Muhirowe wa maathi anyu matata-ru’”. 18 Nto, maathi awe aahimuleela wiira: “Mukilaathi-va, mwanaka, mpakha osuwela vanrowa aya omalela mwaha ola, okhala wiira Bowazi khonrowa omumula, mpakha omaliherya mwaha ola olelo”.