Amoosi
3 “Nwiriyane moolumo ala Yehova onilavula awe, oohimyakani nyuwo atthu a Isarayeli, ohimyaka nloko nootheene okuminhe awe elapo ya wExiitu:
2 ‘Eriyari ya maloko ootheene a mulaponi,+ ti nyuwo paahi kinoosuwelaakani.
Tivo munimwaakhula ohoolo waka mwaha wa soottheka sanyu sootheene.+
3 Niireke atthu anli anneetta mukwaha ahiiwananne toko opuro wookumana?
4 Niireke kharamu onnoopa murukulu mutakhwani, ohiphwannye etthu yookhuura?
Niireke kharamu mwaamukhaani onnoopa murukulu mukhukuni mwawe ohivanre enama?
5 Niireke mutthu onninvara mwaapalame ohirenye ntapha?*
Niireke ntapha ninnivara etthu nihikwannyiwe?
6 Akhala wiira nlope ninnoopiwa opooma, niireke atthu khanithukumela?
Vakhala wiira annikhumelela maxakha opooma, kiira Yehova toneemererya?
7 Tthiri, Pwiya Muulupalexa Yehova khonrowa opaka etthu,
Ohaasuwelinhe arumeyi awe maprofeta etthu omphavela awe opaka.*+
8 Kharamu ohoopa murukulu!+ Ti pani ohinrowa woova?
Pwiya Muulupalexa Yehova oolavula! Ti pani ohinrowa olaleya eprofesia?’+
9 ‘Mulaleye etthu ela ipa soorakamela osulu soolipihiwa sa wAxidodi,
Nave mulaleye etthu ela ipa soorakamela osulu soolipihiwa sa elapo ya wExiitu.
Muhimye wiira: “Muthukumane wiira mwatuphele miyaako sa oSamariya.+
Moone onyakulihana okhanle eriyari aya,
Nave itthu soohiloka sinipakiwa weiwo.+
10 Awo khansuwela opaka etthu yooloka,
Annisariha otakhala ni opwetexa ipa saya soorakamela osulu ni soolipihiwa”. Yehova tonihimya’.
11 Masi etthu onihimya awe Pwiya Muulupalexa Yehova, tiila:
‘Nwanani anyu onoorukurerya elapo anyu,+
Owo onoowaakhani owerya wanyu,
Nave itthu sootheene siri ipa sanyu soorakamela osulu soolipihiwa, sinookuxiwa’.+
12 Etthu onihimya awe Yehova, tiila:
‘Ntoko siisaale makampusi onikumiha awe mwaano mwa kharamu metto miili aahiiso niyaru nimosa na epwittipwitthi,
Ti siiso atthu vakhaani a Isarayeli anrowa aya woopowa,
Yaawo vano ari oSamariya yimpaathenle ene ikhaama sooreera ni akilaathenle ene ikhatera sooreera’.+
13 ‘Mwiiwe ni mwaalopole atthu a etthoko ya Yakobe’. Pwiya Muulupalexa Yehova, Muluku a anakhotto tonihimya.
14 ‘Nihiku atthu a Isarayeli anrowa aya waakhula ohoolo waka mwaha wa soottheka* saya,+
Nave-tho altaari a oBeteli animwaakhula ohoolo waka.+
Manyaka a altaari animwiikitthiwa ni anoomorela vathi.+
15 Miyo kinoopwexa empa ya eyiita vamosa ni empa ya elimwe’.