Esteri
2 Nuumala okhumelela itthu iya, okathi mwene Asuwero+ wammalenle aya onanariwa wawe, owo aahuupuwela etthu Vasti aapanke awe+ ni ele aalakenle awe omwiiriha.+ 2 Moottharelana, atthu yaamukhaliherya mwene yaahihimya wiira: “Ohaaveriwe mwene athiyana ooreera ni ahitonko orupa ni mulopwana. 3 Mwene aathanle atthu iprovinsia sootheene sa omwene awe,+ wiira yaaroihe opuro woolipihiwa wa oSusa, empa ya athiyana, athiyana ootheene ooreera ni ahitonko orupa ni mulopwana. Athiyana awo anrowa okhapeleliwaka ni Hegayi,+ mulipa-oohuliwa a mwene ni onaakhapelela athiyana, nave onrowa waavahaka itthu sinimureeriha mutthu.* 4 Nave muthiyana onrowa otepa omusiveliha mwene, tonrowa okhala pwiyamwene nipuro na Vasti”.+ Moonelo owo waahimusivela mwene, nto aahiira siiso.
5 Aahikhala muyuda mmosa, opuro woolipihiwa wa oSusa,+ aihaniwa Mordekayi,+ mwaana a Yayiri, mwaana a Ximeyi, mwaana a Kiixi, a nihimo na Beniyamini.+ 6 Owo aahikuxiwa oYerusalemu ni atthu akina aroihiwa weepotthani vamosa ni mwene Yekoniya+ a oYuda, yoowo aaroihiwe weepotthani ni Nabukodonosori mwene a oBabiloonia. 7 Mordekayi taamuhunwe Hadasa, eyo piiyo, Esteri, mwaana mwaamuthiyana a tiiyu awe a woopaapani,+ okhala wiira khaarina paapa awe nnakhala maama awe. Owo aari muthiyana ooreera ni ookuxa murima. Nuumala paapa awe ni maama awe okhwa, Mordekayi aahimukuxa wiira okhale ntoko mwanawe. 8 Okathi yooruma ya mwene ni nlamulo nawe naalaleiwale aya, athiyana anceene aroihiwa opuro woolipihiwa wa oSusa, ahiiwa anakhapeleliwa ni Hegayi,+ nave-tho Esteri aahiroihiwa empa ya mwene, ohiiwa onakhapeleliwa ni Hegayi, yoowo aakhapelela athiyana.
9 Muthiyana owo aahimusiveliha Hegayi, nto owo aahimureerela murima.* Hegayi aahaakuva onvaha itthu sinimureeriha mutthu+ ni yoolya yoolokexa, aahimuthanlela athiyana 7 yaahuuwa etthoko ya mwene. Ohiya-vo, aahimuthaamiha owo ni athiyana awo, aaroihaka opuro wootepa oloka wa empa ya athiyana. 10 Esteri khaalavunle etthu aahimyaka atthu awe,+ anamuyari awe, okhala wiira Mordekayi+ aahimuruma wiira ohimuleele mutthu mukina.+ 11 Mahiku ootheene, Mordekayi aanivira ohoolo wa nivate na empa ya athiyana, wiira osuwele moota Esteri aari awe ni etthu yaamwiiraneela.
12 Ehinatthi ophiya ekwaha aya wiira yiixooniherye ohoolo wa mwene Asuwero, athiyana ootheene yaanireerihiwa miyeeri 12 ntoko yaalepeliwe aya athiyana. Awo yaanireerihiwa mwa enamuna ela: Miyeeri 6 yoottihiwa makhura a miira+ ni miyeeri 6 yoottihiwa makhura a baalsamu+ ni makhura makina oowiireerihana. 13 Siiso, muthiyana owo aanikhala oolikana ene wiira iixooniherye wa mwene, nave aanaakhela itthu sootheene aavekeliwa awe wiira okuxe empa ya athiyana oroihaka empa ya mwene. 14 Ohiyu, owo aanirowa empa ya mwene, nave voosiisu aanikhuma orowaka empa ya nenli ya athiyana, yeeyo yaakhapeleliwa ni Xaxagazi, mulipa-oohuliwa a mwene+ aakhapelela athiyana akina.* Owo khaatthikela ohoolo wa mwene vahikhanle wiira mwene aaroosiveliwa ni yena, ni omwiihaniha oromolaka nsina nawe.+
15 Yaaphiyale aya ekwaha awe wiira iixooniherye wa mwene, Esteri mwaana a Abihayili, tiiyu awe Mordekayi, yoowo aamukunxe awe wiira okhale ntoko mwanawe,+ khaavekenle etthu ehikhanle paahi ele aarummwale awe ni Hegayi, mulipa-oohuliwa a mwene, yoowo aakhapelela athiyana. (Okathi owo wootheene, atthu ootheene yaamoona yaanisiveliwa ni Esteri.) 16 Esteri aahikuxiwa oroihiwaka etthoko ya mwene Asuwero mweeri wa namuloko, eyo piiyo, mweeri wa Tebethi,* eyaakha ya neethanu nenli+ ya olamulelo awe. 17 Vano mwene aahipacerya omphenta vanceene Esteri waavikana athiyana ootheene akina, nave owo aahisiveliwa vanceene ni Esteri waavikana athiyana akina yahaatonko orupa ni mulopwana. Nto mwene aahinwariha Esteri ekhara* ya omwene mmuru, nave aahimukhaliha pwiyamwene+ nipuro na Vasti.+ 18 Nave mwene aahaapakela efesta yuulupale makhulupale awe ootheene ni arumeyi awe. Eyo yaari efesta ya Esteri. Moottharelana mwene aahilaleya iprovinsia sootheene wiira atthu yaahaana otaphuliwa mukhatteya,* nave aahaavaha itthu moovarihana ni ele paahi mwene aawerya awe.
19 Okathi yaaruuhiwa aya ekwaha ya nenli athiyana yahaatonko orupa ni mulopwana,+ Mordekayi aakilanthi vamukhora va mwene. 20 Esteri khaalavunle etthu aahimyaka amusi awe nnakhala atthu awe,+ ntoko Mordekayi aamuhimenrye awe. Nave Esteri khaahiyale wiiwelela malakiheryo a Mordekayi, ntoko iira awe okathi aakhapeleliwa awe ni yena.+
21 Mahiku ale, okathi Mordekayi aakilanthi awe vamukhora va mwene, Bigitani ni Terexi, makhulupale manli a etthoko ya mwene, yaawo yaakhala vamukhora, yaahinanariwa vanceene ni yaahimpaka palano wiira amwiive* mwene Asuwero. 22 Masi Mordekayi aahisuwela etthu eyo, nave moowaakuveya aahimuleela pwiyamwene Esteri. Nuumala-vo, Esteri aahimuleela mwene mwa nsina na Mordekayi. 23 Mwaha ole waahitokosiwa ni vaahooniwa wiira yaari ekeekhai. Tivo alopwana ale oowanli yaahithomeiwa vamwirini. Nave itthu iye sootheene saahilempwa ohoolo wa mwene muliivuruni mwa itthu siiraneyale okathi ole.+