Zakariya
8 Kaahisuwelihiwa-tho moolumo a Yehova a anakhotto yaahimya wiira: 2 “Etthu onihimya awe Yehova a anakhotto, tiila: ‘Kinimwaakiherya oSiyoni,+ aayo, kinimwaakiherya ni murima aka wootheene’”.
3 “Etthu onihimya awe Yehova, tiila: ‘Kinootthikela oSiyoni,+ nave kinrowa okhalaka oYerusalemu.+ OYerusalemu onrowa wiihaniwaka epooma yeekeekhai*+ ni mwaako wa Yehova a anakhotto, mwaako woowaarya’”.+
4 “Etthu onihimya awe Yehova a anakhotto, tiila: ‘Alopwana ni athiyana oowuuluvala anootthikela okilaathi mapuro oowaatta atthu a oYerusalemu, khula mmosa omukunxe ene ttootto awe mmatatani mwaha woowuuluvala.*+ 5 Nave mapuro oowaatta atthu a opooma anrowa osaryaka anamwane axithiyana ni axilopwana athweelaka’”.+
6 “Etthu onihimya awe Yehova a anakhotto, tiila: ‘Nnaamwi vakhalaka ntoko enrowa okhala etthu yooxankiha para atthu anrowa ohala mahiku awo, masi para miyo khahiyo etthu yooxankiha’. Yehova a anakhotto tonihimya”.
7 “Etthu onihimya awe Yehova a anakhotto, tiila: ‘Kinniwoopola atthu aka, kaakumihaka ilapo sa mpantta onikhuma nsuwa ni mpantta onikela nsuwa.+ 8 Kinimwaaruuha, wiira akhaleke oYerusalemu.+ Awo anrowa okhala atthu aka, nave miyo kinrowa okhala Muluku aya+ oororomeleya ni axariya’”.
9 “Etthu onihimya awe Yehova a anakhotto, tiila: ‘Mulipihe matata anyu,*+ nyuwo muniwiriyana moolumo ala anikhuma mwaano mwa maprofeta,+ moolumo mamosa-ru yaawo yaalavuliwe nihiku yaapaceriwe aya alisenso a empa ya Yehova a anakhotto, wiira etekiwe etemplo. 10 Okhuma okathi ole, atthu ni inama saavara muteko khiyaaliviwa.+ Nave khuuvo aawerya weetta mukwaha ni murettele mwaha wa awanani aya, okhala wiira kaahiwiiriha atthu orukunuwelana’.
11 “Yehova a anakhotto onihimya wiira: ‘Masi vano, nkiniwiirela etthu emosa-ru atthu ale ahanle ntoko kaawiirenle aka khalai.+ 12 Tthiri, enimwaaliwa epyo ya murettele. Mwiri wa ewuuva onimwiima mihokorokho, etthaya enooruwerya soolya,+ nave erimu enoomoroxa okame. Nto miyo kinimwaavaha atthu ahanle, itthu iyo sootheene.+ 13 Nyuwo atthu a nihimo na Yuda ni atthu a nloko na Isarayeli,+ ntoko siisaale mwaari anyu etthu yaatakhaliha maloko, siiso, miyo kinoowoopolani, nave awo anrowa oromolaka nsina nanyu ntoko mareeliho.+ Muhoove!+ Mulipihe matata anyu’.*+
14 “Etthu onihimya awe Yehova a anakhotto, tiila: ‘“Miyo kaahilakela wookumiheryani ehasara okathi amuhavinre anyu yaakiirinhe aya onanariwa, ni nkaikhupanyenrye”.+ Yehova a anakhotto tonihimya. 15 “Vano, koolakela owiirela itthu sooreera atthu a oYerusalemu ni atthu a nihimo na Yuda.+ Muhoove!”’+
16 “‘Itthu mukhanle anyu oopaka tiiya: Mulavuleke ekeekhai mukina ni mukhwaawe,+ nave okathi muniphuka anyu milattu vamukhora vanyu, muroromeleyeke ni mukhaliheke murettele.+ 17 Muhuupuwele owiirela itthu sootakhala atthu akina,+ nave muhilaphe moothaka,+ okhala wiira miyo kinninyokha itthu iyo sootheene’.+ Yehova tonihimya”.
18 Kaahisuwelihiwa-tho moolumo a Yehova a anakhotto, yaahimya wiira: 19 “Etthu onihimya awe Yehova a anakhotto, tiila: ‘Otthukwa wa mweeri wa neexexe,+ otthukwa wa mweeri wa neethanu,+ otthukwa wa mweeri wa neethanu nenli+ ni otthukwa wa mweeri wa na muloko,+ onrowa okhala okathi wootthapa ni wootteeliwa murima para atthu a etthoko ya Yuda, sinrowa okhala ifesta sootteeliha murima.+ Masi mphenteke ekeekhai ni murettele’.
20 “Etthu onihimya awe Yehova a anakhotto, tiila: ‘Nnoophiya nihiku atthu ni ale anikhala ipooma sinceene, anikela aya orwa opuro ola. 21 Nave ale anikhala epooma emosa anoorowa wa ale a epooma ekina ni animwaaleela wiira: “Nrowe namuxonttele Yehova ni namphavele Yehova a anakhotto. Miyo-tho kinoorowa”.+ 22 Vano atthu anceene ni maloko oowerya animoorwa omphavela Yehova a anakhotto a oYerusalemu,+ ni omuxonttela Yehova’.
23 “Etthu onihimya awe Yehova a anakhotto, tiila: ‘Mahiku awo, atthu 10 a mattaava ootheene a maloko,+ anoovara, aayo, anoovarela oratteene nlaya na muyuda,* ariki: “Nimphavela orowa ni nyuwo,+ okhala wiira nihiiwa wiira Muluku ori ni nyuwo”’”.+