Zakariya
10 “Munvekele Yehova epula, yeeyo enirupa nuuvira okathi aya.
Yehova tonikumiherya meeku a munamukhaya,
Nave tonaavaha atthu epula yoowaatta,+
Ni tonaavaha atthu ootheene malaxi a mutakhwani.
2 Tthiri amuluku anirumeeliwa vatthokoni, annilavula itthu soowoothiwa,
Nave alipa-oowaaxerya ehako, annooniheriwa itthu soowoothiwa.
Awo annilavula sooloha sihirina efaita,
Nave anneererya waamaaliha atthu mahala ene.
Tivo atthu anrowa weettaka ntoko ipwittipwitthi.
Nto awo anoohaawa, mwaha woohikhalana makampusi.
3 Miyo koonanariwa vanceene ni amakampusi,
Nave ahooleli anaahaaxa atthu animwaakhula ohoolo waka,
Okhala wiira Yehova a anakhotto ootthikela oweha nikoto nawe,+ etthoko ya Yuda.
Nave owo ohaakhaliha ntoko ekhavalo awe yoottittimiheya eri okhottoni.
4 Eriyari aya onookhumelela muhooleli,*
Onookhumelela namalamulela onikhaliherya,*
Onookhumelela muura onirumeeliwa okhottoni,
Nave anookhumelela makhulupale, ootheene ala anrowa okhuma eriyari aya.
5 Nave awo anrowa okhala ntoko anakhotto,
Aninyakela mattophe a mustaraatani okhottoni.
Awo anooxintta ekhotto, okhala wiira Yehova ori naawo.+
Nave alipa-ooweettiha ikhavalo animuuliwa muru.+
6 Miyo kinimwiiriha etthoko ya Yuda okhala yuulupale,
Nave kinimoopola etthoko ya Yosefe.+
Miyo kinimwaattikiherya elapo aya,
Okhala wiira kinimwaamorela ikharari.+
Nave vanrowa okhalaka ntoko nkitonko waakhootta,+
Okhala wiira miyo ka Yehova Muluku aya, kinoowaakhula.
7 Atthu a wEfrayimi anookhala ntoko anakhotto ootupa,
Nave murima aya onimwaatteela okhalaka ntoko awunrye eviinyu.+
Anaaya anooweha eyo ni anootteeliwa murima.
Mirima saya sinoohakalala mwaha wa Yehova.+
8 ‘Miyo kinoowoopela muturi ni kinimwaathukumanya opuro omosa.
Tthiri miyo kinoowoopola,+ nto awo anrowa okhala oowaatta,
Nave anrowa otepaka okhala oowaatta.
9 Hata kaamwara-mwaryaka ntoko ipyo eriyari ya atthu,
Awo anookuupuwela ari ene ottaiwene.
Awo ni anaaya, anookhalana ikuru ni anootthika.
10 Miyo kinimwaattikiha elapo ya wExiitu,
Nave kinimwaathukumanya okhuma wAsiiria.+
11 Owo onoolapuwa mphareya okumiheryaka mixankiho,
Nave onoomana mawimpi a mphareya.+
Mapuro ootheene oowiixerya a muro Niilo animuuma.
Wiixinnuwiha wa Asiiria onoomala-mala,
Nave ekopo ya wExiitu enookumihiwa.+