Wahala Oopacerya
29 Mwene Davidi aahihimeerya nloko nootheene wiira: “Mwanaka Salomooni, yoowo othanliwe ni Muluku,+ mmiravo ni khonisuwela itthu sinceene.+ Nave muteko ola khoreere waatta, okhala wiira etemplo* enrowa awe oteka khahiyo ya mutthu, masi ti ya Yehova Muluku.+ 2 Miyo kihiimananiha vanceene wiira kilokiherye itthu sinrowa otekeliwa empa ya Muluku aka, kikumihaka eweero wiira epakeliwe itthu sa eweero, eparatha wiira epakeliwe itthu sa eparatha, ekoopiri wiira epakeliwe itthu sa ekoopiri, eyuuma wiira epakeliwe itthu sa eyuuma,+ matera+ wiira epakeliwe itthu sa matera, maluku oowaarya aniihaniwa oonikisi, maluku anrowa opakeliwa alukamasa, maluku macikhaani a mosaiku, mithinto soovirikana sa maluku oowaarya, ni maluku manceene a alapasturu. 3 Nave-tho, mwaha wa okisivela empa ya Muluku aka,+ ohiya itthu sootheene kilokihenrye aka+ wiira etekiwe empa yoowaarya, kinnivaha-tho mihakhu saka sa eweero ni eparatha wiira etekiwe empa ya Muluku aka, 4 vamosa ni italento 3.000 sa eweero sa wOfiri+ ni italento 7.000 sa eparatha yooreerexa, wiira esirikeliwe ixiri sa isaala soovirikana, 5 eweero wiira epakeliwe itthu sa eweero, eparatha wiira epakeliwe itthu sa eparatha ni itthu sootheene sinrowa ovareliwa muteko ni ale anisuwela opattha. Vano, ti pani onrowa oruuha etthu wiira onvahe Yehova olelo?”+
6 Nto makhulupale a ahooleli a imusi saya, makhulupale a mahimo a Isarayeli, maxeefi a atthu 1.000, maxeefi a atthu 100+ ni ale yaakhapelela myaha sa mwene,+ yaahiivahererya voohikhanyereriwa. 7 Musurukhu yaavanhe aya wiira etekeliwe empa ya Muluku eekeekhai tuula: Italento 5.000 sa eweero, idariko* 10.000, italento 10.000 sa eparatha, italento 18.000 sa ekoopiri ni italento 100.000 sa eyuuma. 8 Ale yaarina maluku oowaarya yaahivaha wiira esukiwe opuro waasukiwa muhakhu empa ya Yehova, seiyo saakhapeleliwa ni Yehiyeli,+ mugerisoni.+ 9 Atthu yaahitteeliwa murima mwaha woovaha itthu iya voohikhanyereriwa, okhala wiira yanvaha Yehova ni murima aya wootheene,+ nave mwene Davidi aahitteeliwa murima vanceene.
10 Moottharelana, Davidi aahimuttottopela Yehova ohoolo wa nloko nootheene. Davidi aahihimya wiira: “Yehova, Muluku a Isarayeli ni tiithi ahu, muttottopeliwe mahiku ootheene. 11 Yehova, okhulupale,+ owerya,+ ovuwa, waarya ni ottittimiheya+ ti wawinyu, okhala wiira itthu sootheene siri wiirimu ni mulaponi ti sawinyu.+ Yehova, omwene ti wawinyu.+ Nyuwo mwa muhooleli a atthu ootheene. 12 Mihakhu ni ovuwa sinikhuma wa nyuwo,+ nave nyuwo munnilamulela itthu sootheene.+ Nyuwo mookhalana ikuru+ ni owerya,+ nave munniwerya waavuwiha+ ni waavaha ikuru atthu ootheene.+ 13 Vano, Muluku ahu, hiyo ninnooxukhurelani ni ninnittottopela nsina nanyu nooreerexa.
14 “Miyo kaapani ni atthu aka tani wiira noovaheeni mireerelo iya voohikhanyereriwa? Tthiri itthu sootheene sinikhuma wa nyuwo, nave hiyo ninnoovahani itthu naakhenle ahu mmatatani mwanyu. 15 Hiyo ninlikana ni anamurwa ni aletto ohoolo wanyu, ntoko amuhavinre ahu ootheene.+ Tthiri mahiku ahu elapo ela anlikana ni muuttutthi,+ khanrina nlipelelo na okhala-mu. 16 Yehova Muluku ahu, mihakhu sootheene nilokihenrye ahu wiira mutekeliwe empa enrowa okhalana nsina nanyu noowaarya sinikhuma wa nyuwo, nave itthu sootheene ti sawinyu. 17 Muluku aka, miyo koosuwela wiira nyuwo munnitokosa murima+ ni munnisiveliwa ni atthu oororomeleya.+ Nto kihoovahani itthu iya ni murima aka wootheene, nave kinnihakalala kaawehaka atthu anyu yoovahakani itthu iya voohikhanyereriwa. 18 Yehova, Muluku a amuhavinre ahu Abrahamu, Isaakhi ni Isarayeli, mwaakhaliherye atthu ala osuka vamurimani vaya ophavela ovaha ni mwaakhaliherye wiira yoorumeelekeni ni murima aya wootheene.+ 19 Nave munvahe mwanaka Salomooni murima wooloka,+ wiira eetteleke sooruma sanyu,+ malakiheryo anyu ni malamulo anyu, nave opake itthu iya sootheene ni oteke etemplo orumeelaka itthu kilokihenrye aka”.+
20 Moottharelana, Davidi aahaaleela atthu a nloko nootheene wiira: “Mmuttottopele Yehova Muluku anyu”. Vano atthu a nloko nootheene yaahimuttottopela Yehova Muluku a amuhavinre aya, akokhora, yuurama mpakha vathi ohoolo wa Yehova ni wa mwene. 21 Nave, mmeeloni mwaya awo yaahinvaha mikuttho Yehova. Nave-tho, yaahinvaha Yehova soovaha para opahiwa:+ Ipooyi saamukhaani 1.000, ipwittipwitthi saamukhaani 1.000, ipwittipwitthi soolopwana 1.000 ni soovaha siniwuriwa.+ Awo yaahivaha mikuttho sinceene wiira yaaphwanyihe mureerelo atthu ootheene a Isarayeli.+ 22 Nihiku nle, awo yaahilya ni yaahiwurya ohoolo wa Yehova ahakalanle ene vanceene,+ nave yaahitthikela-tho omukhaliha mwene, Salomooni mwaana a Davidi. Yaahimuthanla ohoolo wa Yehova wiira okhale muhooleli,+ nave-tho yaahimuthanla Sadoki wiira okhale namukuttho.+ 23 Vano Salomooni aahikilaathi veehiceni ya Yehova+ ntoko mwene nipuro na paapa awe, Davidi. Owo aaneetta saana, nave aisarayeli ootheene yaanimwiiwelela. 24 Makhulupale ootheene,+ anakhotto ootupa,+ ni anamwane ootheene a mwene Davidi,+ yaanimwiiwelela mwene Salomooni voohinlaseya. 25 Nave Yehova aahimwiiriha Salomooni ottittimihiwa vanceene ni atthu ootheene a Isarayeli ni aahinvuwiha vanceene waavikana mamwene makina a wIsarayeli yaakhanle ohinatthi yena.+
26 Siiso Davidi, mwaana a Yese, aahaalamulela aisarayeli ootheene. 27 Owo aahaalamulela atthu a wIsarayeli iyaakha 40. Aahilamulela oHebroni iyaakha 7,+ nave aahilamulela oYerusalemu iyaakha 33.+ 28 Davidi aahikhwa uuluvanle ene saana+ ohakalanle ene ni mahiku manceene a okumi awe, orina ene mihakhu ni ovuwa. Vano mwanawe Salomooni aahikhala mwene nipuro nawe.+ 29 Soowiiraneya sa mwene Davidi, okhuma woopaceryani mpakha wookiseryani, soolempwa ni Samuweli, mulipa onisuwela otaphulela itthu ooniheriwa awe ni Muluku, profeta Natani,+ ni Gadi,+ mulipa onisuwela otaphulela itthu ooniheriwa awe ni Muluku, 30 vamosa ni omwene awe wootheene, owerya wawe ni itthu saamwiiranenle, atthu a Isarayeli, ni mamwene ootheene a ilapo saamurukurenrye.