Silempwale ni Yohani
19 Vano Pilato aahimukuxa Yesu, khiruma owaxuliwa.+ 2 Atoropa yaahipaka ekhara ya miiwa, anwariha mmuru. Nave yaahinwariha ekuwo ya ekoore violeeta.+ 3 Awo yaanirowa ohoolo wawe ariki: “Ihaali, nyuwo Mwene a ayuda!” Nave-tho, yaanimmana owiitho.+ 4 Pilato aahikhumela-tho vate, onaaleela ayuda wiira: “Mwiiwe! Miyo kinoomukumiherya vate wiira musuwele wiira nkinimphwanyana mulattu”.+ 5 Siiso, Yesu aahikhumela vate, owanre ene ekhara ya miiwa ni ekuwo ya ekoore violeeta. Nave Pilato aahaahimeerya wiira: “Mmooneke mulopwana ola!” 6 Masi, okathi makhulupale a anamukuttho ni makwarta yaamoonale aya Yesu, yaahikhuwela ariki: “Okhomeliwe vamwirini! Okhomeliwe vamwirini!”*+ Pilato aahaaleela wiira: “Mmukuxeke yeenyu mwamukhomeleke,* okhala wiira miyo nkinimphwanyana mulattu”.+ 7 Ayuda yaahimwaakhula Pilato wiira: “Hiyo nookhalana nlamulo. Nto natthara nlamulo nlo, owo ohaana okhwa,+ maana onniihimya okhala mwaana a Muluku”.+
8 Okathi Pilato aiwale awe moolumo aya, aahitepa woova, 9 nto aahikela mpaani onamukoha Yesu wiira: “Nyuwo munikhuma vai?” Masi Yesu khaamwaakhunle etthu.+ 10 Tivo, Pilato aahimukoha Yesu wiira: “Khamunikaakhula etthu? Khamunisuwela wiira miyo kookhalana owerya wa wootaphulani ni owerya wa wookhomelani?”* 11 Yesu aahimwaakhula oriki: “Nyuwo khimwaarowa okhalana owerya wookiiriha etthu, mwahaavahiwe ni Muluku. Tivo, ole okivaherenrye wa nyuwo, ookhalana etampi yuulupale”.
12 Mwaha wa yeeyo, Pilato aaniphavela enamuna ya omutaphula Yesu, masi ayuda yaanikhuwela ariki: “Mwamutaphula mulopwana ola, khamuhiyo mpatthani a Seesari. Ootheene ale aniikhaliha mwene, anninvirikanya Seesari”.+ 13 Vano Pilato, vaiwale awe moolumo awo, aahimukumiherya Yesu vate ni aahikilaathi opuro waaphukiwa milattu, waihaniwa Nipuro Nowaapatthiwa ni Maluku, nenlo nttaava na eheeperi niihaniwa Gabatha. 14 Nihiku nno naari nihiku na omulokiherya+ Paasikha. Yaari etthu yoowiiraka 12 oora.* Nave Pilato aahaahimeerya ayuda wiira: “Mmooneke mwene anyu!” 15 Masi, awo yaahikhuwela ariki: “Iiviwe! Iiviwe! Okhomeliwe vamwirini!”* Pilato aahaakoha wiira: “Kiireke kihaana omwiiva mwene anyu?” Makhulupale a anamukuttho yaahaakhula ariki: “Khanrina mwene mukina, ohikhanle Seesari”. 16 Nto Pilato aahaavahererya Yesu wiira yamukhomele vamwirini.+
Vano awo yaahimukuxa, anarowa. 17 Nave, Yesu aahikuxa mwiri wa nihaaxeryo* onarowa opuro waihaniwa Muru Ohanle Makhuva-ru,+ yoowo nttaava na eheeperi oniihaniwa oGolgotha.+ 18 Weiwo, awo yaahimukhomela Yesu vamwirini.+ Yesu owo, aakhomeliwe eriyari ya alopwana anli, mmosa aari moono awe woolopwana, mukina aari moono awe woothiyana.+ 19 Nave-tho, Pilato aahiruma olempwa vanipaweni wiira nithomeiwe vamwirini wa nihaaxeryo.* Nipawe nlo, naalempwe so: “Yesu munazarethi, Mwene a ayuda”.+ 20 Ayuda anceene yaahisoma nipawe nne, maana opuro aakhomeliwa awe Yesu, waattamenle oYerusalemu. Nave nipawe nne naalempwale mattaava mararu: eheeperi, elatino ni ekereku. 21 Makhulupale a anamukuttho a ayuda, yaahimuhimeerya Pilato wiira: “Muhilepe wiira: ‘Mwene a ayuda’, masi mulepe wiira mulopwana ola aaniihimya oriki: ‘Miyo ka mwene a ayuda’”. 22 Pilato aahaakhula wiira: “Etthu kilempe aka, koolepa”.
23 Nuumala omukhomela Yesu vamwirini, atoropa ale yaahikawanya malaya awe a ota mipantta mixexe, khula toropa aahikuxa epantta awe ni yaahikuxa nlaya nawe na muhina. Masi nlaya nlo na muhina khinaattotthiwe, ohiya-vo naarootthaviwa okhuma osulu mpakha vathi. 24 Nto, atoropa ale yaahihimeeryana wiira: “Nihikhere nlaya nna, masi naavererye esoorti wiira nimoone onrowa ohalana”.+ Eyo yaahiiraneya wiira emaliheriwe yoolempwa eni: “Awo aakawana malaya aka ni ahaavererya esoorti ikuwo saka”.+ Vano, ele atoropa yaapanke aya, ti yeeyo soolempwa saahimmye aya wiira yaamwiiraneya.
25 Waattamela mwiri wa nihaaxeryo* waari Yesu, aaheemela maama awe Yesu+ ni munnawe maama awe. Nave-tho, aaheemela vaavale, Maria mwaara a Kolopha ni Maria Madalena.+ 26 Okathi Yesu anwenhe awe maama awe ni mwiixutti amphenta awe,+ yeemenle ene vakhiviru vaavale, aahimuhimeerya maama awe wiira: “Mwaninyu owo-vo!” 27 Nuumala-vo, aahimuleela mwiixutti owo wiira: “Maama anyu owo-vo!” Nave okhuma ewoora ele orowa ohoolo, mwiixutti ole aahaakuxa amamawe, onaaroiha owannyawe.
28 Okathi Yesu aasuwenle awe wiira itthu sootheene saahiiraneya, wiira omaliherye soolempwa, aahihimya wiira: “Koovoliwa ntthona”.+ 29 Waahikhala vaavale, murinki waasareyale eviinyu yoonyuunya. Akina yaari vaavale, yaahikuxa exiponxa,* aruweya nviinyuni-mme, atthukwelela vamutathini,* anaroiha mwaano mwa Yesu.+ 30 Okathi Yesu aavahiwe awe eviinyu eyo yoonyuunya, aahihimya wiira: “Itthu sootheene soomaliheriwa”.+ Nuumala-vo, aahuurama, khukhwa.*+
31 Okhala wiira naari nihiku naalokiheriwa aya esaabadu,*+ ayuda khiyaaphavela wiira mirutthu sihale vamwirini wa nihaaxeryo sikhomeliwe ene+ esaabadu (esaabadu eyo, yaari yuulupale).+ Tivo, ayuda yaahinvekela Pilato wiira orume wuntakasiwa metto sa alopwana ale yaakhomeliwe vamwirini ni sikuruxiwe mirutthu. 32 Siiso, atoropa yaahirwa yintakasa metto sa alopwana ale anli yaakhomeliwe vamosa ni Yesu. 33 Masi okathi yaaphiyale aya vaari Yesu, yaahoona wiira owo iira okhwiiye ene. Tivo, khiyaamuntakanse metto. 34 Vano, toropa mmosa aahimuhoma mpararini ni nivaka,+ niinaano-ru yaahikhuma ephome ni maasi. 35 Ole aawenhe eyo, onnikhalela onamoona. Nto onamoona awe ti weekeekhai. Nave onnisuwela wiira itthu sinihimya awe ti seekeekhai, wiira nyuwo-tho mukupali.+ 36 Tthiri, itthu iyo saahiiraneya wiira emaliheriwe yoolempwa enihimya wiira: “Khaninrowa wuntiwa* nikhuva nawe, nnakhala nimosa”.+ 37 Nave yoolempwa ekina enihimya wiira: “Awo anonweha ole amuhomme aya”.+
38 Nuumala itthu iya, Yosefe a wArimathaya, aahinvekela Pilato wiira omweemererye okuxa murutthu wa Yesu. Nto, Yosefe owo aari mwiixutti awe Yesu, masi voohisuweliwa,* okhala wiira aaniwoova ayuda.+ Pilato aahimweemererya. Siiso, Yosefe aahirowa okuxa murutthu wa Yesu.+ 39 Nave Nikodemo,+ yoowo khalai aaronwe okumana ni Yesu ohiyu, aahirwa okunxe ene makhura oowunkhela a miira, ni makhura a alowe,* etthu yoowiiraka ikiilu 33.*+ 40 Nto awo yaahikuxa murutthu wa Yesu, avitikelela ni ekuwo ya eliinyu yooreera, yiitthela makhura oowunkhela,+ anarowa ovitha ntoko yaalimalenle aya ayuda. 41 Vano, opuro waakhomeliwe awe* Yesu, yaahikhala exarti. Nto, exarti ele yaahikhala mahiye masya,+ yaahatonko ovithiwa mutthu. 42 Okhala wiira naari nihiku ayuda yaalokiherya aya esaabadu,+ ni mwaha woowi mahiye ale yaahikhuveela, awo yaahivitha murutthu wa Yesu mmahiye-mme.