Silempwale ni Marko
11 Okathi yaattamela aya oYerusalemu, yaahiphiya muttetthe wa oBethifaxe ni oBethania,+ vamwaako Olivera. Nto Yesu aahaaruma awiixutti awe anli,+ 2 aahimeeryaka wiira: “Murowe muttetthe ori ohoolo wanyu, mukelaka-ru munomphwanya mwaaxaana a puuru ohitonko oweliwa, otthukweleliwe ene. Mmutaphule, mukiruuhele. 3 Akhala mutthu onrowa wookohani wiira: ‘Munipaka exeeni?’, mmwaakhule so: ‘Apwiya tanimphavela. Nto anoomuttikiha niinaano’”. 4 Siiso, awo yaahirowa, amphwanya mwaaxaana a puuru otthukweleliwe ene ohoolo wa mukhora wa empa, yaari waattamela mustaraatani, khimutaphula.+ 5 Masi atthu yaari vaavale, yaahaakoha, ariki: “Munipaka-ni? Munimutaphulela-ni mwaaxaana owo a puuru?” 6 Vano awiixutti ale yaahaahimeerya ele Yesu aalenle awe, nto atthu ale yaahaahiya arowaka.
7 Awo yaahimuroihela Yesu mwaaxaana owo a puuru,+ yaahaatala malaya aya a ota vasulu vawe. Nto Yesu aahinwela.+ 8 Nave-tho, atthu anceene yaanikuxa malaya aya a ota, masi akina yaaninta makukhu a mikole, anaatala mustaraatani.+ 9 Atthu ootheene yaari ohoolo ni ale yaari ottuli wa Yesu, yaanikhuwela yiiraka: “Khoo Muluku, ninnoovekelani, mmoopole!+ Ooreelihiwa tuule onirwa mwa nsina na Yehova!*+ 10 Muluku oreelihe Omwene onirwa, yoowo ori wa tiithi ihu, Davidi!+ Khoo Muluku, ninnoovekelani, mmoopole, nyuwo munikhala wiirimu!” 11 Yesu aahiphiya oYerusalemu, aahikela mutemplo, khiweha itthu sootheene saari memmo. Masi okhala wiira vaaniila, aahirowa oBethania ni arummwa 12.+
12 Nuumala oxa, okathi yaakhuma aya oBethania, Yesu aahivoliwa etala.+ 13 Eettaka ottaiwene, aahiweha mwiri wa ifiiku, waarina makukhu. Aahirowa oweha akhala wiira amphwanya mihokorokho. Vano, okathi aattamenle awe, aaphwannye makukhu-ru paahi, maana khahiyo waari okathi wiima aya ifiiku. 14 Nto, Yesu aahiirela mwiri ole wiira: “Ahikhale-tho onrowa olya mihokorokho sanyu”.+ Awiixutti yaaniiwa moolumo ale.
15 Yesu ni awiixutti awe yaahiphiya oYerusalemu. Vano, Yesu aahikela mutemplo, onapacerya owoomola atthu yaatumiha ni yaathuma mutemplo memmo. Nave, aahipittula meesa a atthu yaaturuka musurukhu, ni aahipittula ikhatera sa atthu yaatumiha ipompa.*+ 16 Yesu, kheemererya wiira mutthu ovireke mutemplo okunxe ene etthu. 17 Aaniwiixuttiha atthu, iiraka: “Voolempwa wiira: ‘Empa aka, enrowa ohimmwaka okhala empa ya mavekelo ya maloko ootheene’.+ Masi nyuwo mookhaliha empa ya alatarau”.+ 18 Vano, makhulupale a anamukuttho ni alipa-oowiixuttiha nlamulo yaahisuwela etthu ela. Nto yaahipacerya ophavela enamuna ya omwiiva Yesu,+ maana awo yaanimoova, nave-tho mwaha woowi muttitthi wootheene waanitikinihiwa ni itthu aixuttiha awe.+
19 Nuumala wiila, Yesu ni awiixutti awe yaahikhuma epooma ya oYerusalemu. 20 Voosiisu, okathi yeetta aya mphironi, yaahiweha mwiri yoole wa ifiiku, wuumale ene ni mitathaari sene.+ 21 Pedru aahuupuwela mwiri ole, onamuhimeerya Yesu wiira: “Rabi,* mooneke! Mwiri yoole wa ifiiku mwaalamphe* anyu, ohuuma”.+ 22 Yesu aahiwaakhula oriki: “Mmwaaminiki Muluku. 23 Akhala mutthu oniirela mwaako ola wiira: ‘Nvenye-va, mmorele mphareya’, kinooleelani ekeekhai wiira, mutthu aahihoveryeke etthu vamurimani vawe, onaamini wiira ele enihimya awe enimwiiraneya, tthiri enimwiiraneya.+ 24 Tivo kinooleelaakani wiira, itthu sootheene munivekela anyu, munaamini ntoko murimwaakhela, nyuwo munimwaakhela.+ 25 Okathi onivekela anyu, muleveleleke itthu sootheene mwiireliwe anyu, wiira Tiithi inyu, yoowo ori wiirimu, nave-tho ooleveleleni itampi sanyu”.+ 26* ——
27 Awo yaahiphiya oYerusalemu. Nto okathi Yesu eetta awe mutemplo, makhulupale a anamukuttho ni alipa-oowiixuttiha nlamulo ni makhulupale a ayuda, yaahirwa, 28 anamukoha, yiiraka: “Niireke muheemereriwa opaka itthu iya? Murummwale naani?”+ 29 Yesu aahiwaakhula wiira: “Ni miyo kinimookohani etthu emosa. Mwakaakhula, miyo kinimooleelani ole okivanhe owerya wiira kipake itthu iya. 30 Opatiso wa Yohani,+ waakhumme wa Muluku* aahiiso wa atthu? Mukaakhule”.+ 31 Awo yaahipacerya ovaanela yaawo-ru ariki: “Naakhula wiira: ‘Wa Muluku’,* owo onoonikoha wiira: ‘Nto xeeni muhalaka ohimwaamini Yohani?’ 32 Masi niheererye waakhula wiira: ‘Wa atthu’”. Awo yaanoova muttitthi wa atthu, maana atthu awo ootheene yaanimoona Yohani okhala profeta eekeekhai.+ 33 Tivonto, yaahimwaakhula Yesu ariki: “Khaninsuwela”. Nto Yesu aahaaleela wiira: “Ni miyo-tho nkinooleelani ole okivanhe owerya wiira kipake itthu iya”.