Samuweli Oopacerya

7 Alopwana a oKiriyathi-Yarimi, yaahirwa, akuxa Nivuku na Yehova, aroiha owannyawe Abinadabi,+ opuro woottukhuwa.* Nto yaahimuthanla* Eleyazari, mwaana a Abinadabi, wiira osukeke Nivuku na Yehova.

2 Waahivira okathi munceene, eyo piiyo, iyaakha 20, okhuma nihiku nenle Nivuku, naaroihiwe aya oKiriyathi-Yarimi. Vano atthu ootheene a Isarayeli yaahipacerya omphavela* Yehova.+ 3 Samuweli aahaaleela atthu ootheene a Isarayeli: “Vakhala wiira mmutthikenle Yehova ni murima anyu wootheene,+ mwaamala-malihe eriyari anyu amuluku a amalapo+ ni ilatarato sa Astoreti.+ Vano mmutthikele Yehova ni murima anyu wootheene, ni mmurumeeleke yoowo.+ Mwiira siiso, onoowoopolani mmatatani mwa afilisti”.+ 4 Nto, aisarayeli yaahimala-maliha ilatarato sa Bayaali ni sa Astoreti, anamurumeela Yehova paahi.+

5 Nto, Samuweli aahihimya wiira: “Mwaathukumanye atthu ootheene a Isarayeli oMisipa,+ miyo kinrowa onvekela Yehova mwaha wa nyuwo”.+ 6 Aisarayeli yaahithukumana oMisipa, ni yaahirika maasi yiitthela ohoolo wa Yehova, ni yaahitthukwa nihiku nle.+ Awo yaahihimya wiira: “Noomutthekela Yehova”.+ Vano Samuweli aahipacerya orumeela ntoko mulipa-oophuka milattu+ sa atthu a Isarayeli, oMisipa.

7 Okathi afilisti yaasuwenle aya wiira aisarayeli yaahithukumana oMisipa, anamalamulela a afilisti,+ yaahivenya orowa waatuphela atthu a Isarayeli. Nuumala osuwela eyo, aisarayeli yaahiwoova afilisti. 8 Aisarayeli yaahimuleela Samuweli wiira: “Muhihiye onvekela Yehova, Muluku ahu, wiira onikhaliherye+ ni onoopole mmatatani mwa afilisti”. 9 Vano, Samuweli aahimukuxa mwaapwittipwitthi ahaahiyale waamwa, onvaha Yehova ntoko yoovaha para opahiwa.+ Nto Samuweli aahinvekela Yehova wiira aakhaliherye aisarayeli. Siiso Yehova aahimwaakhula.+ 10 Nlelo Samuweli ovahaka yoovaha para opahiwa, yaahirwa afilisti waatuphela atthu a Isarayeli. Nihiku nenle, Yehova aahaakumiherya afilisti okukutteya* wuulupale,+ ni aahiwiiriha ohiiwanana.+ Nto yaahixinttiwa ni atthu a Isarayeli.+ 11 Alopwana a Isarayeli yaahikhuma oMisipa ni yaahiwoomola afilisti, awiivaka mphironi mpakha osuuli, muttetthe wa oBethi-Kari. 12 Moottharelana, Samuweli aahikuxa nluku+ opweha eriyari ya oMisipa ni oYexana, ni aahivaha nsina noowi Ebenezeri,* oriki: “Mpakha vano, Yehova oonikhaliherya”.+ 13 Nto, afilisti yaahiweriwa, ni khiyaatthikenle-tho otuphela muttetthe wa atthu a Isarayeli.+ Yehova aahithipelela waavirikanya afilisti mahiku ootheene Samuweli aari awe mukumi.+ 14 Nave-tho, ipooma seiyo afilisti yaawaakhale aya atthu a Isarayeli, saahittikiheriwa atthu a Isarayeli, okhuma wEkironi mpakha oGathi. Aisarayeli yaahikuxa muttetthe aya waakuxiwe ni afilisti.

Nave-tho, waahikhala murettele eriyari ya atthu a Isarayeli ni atthu a wAmori.+

15 Samuweli aahaalamulela atthu a Isarayeli okathi wootheene aari awe mukumi.+ 16 Khula eyaakha, aaneetta mukwaha orowaka oBeteli,+ oXiligali,+ ni oMisipa,+ aalamulelaka atthu a Isarayeli mapuro awo ootheene. 17 Nuumala-vo aanitthikela oRama,+ okhala wiira empa awe yaari weiwo, nave-tho aanaalamulela atthu a Isarayeli ori ene weiwo. Samuweli aahimutekela altaari Yehova,+ oRama.