Wahala Oopacerya
16 Nto yaahikuxa Nivuku na Muluku eekeekhai, ehela mutentani, yeeyo* Davidi aalokihenrye awe, epweha opuro aya.+ Nave yaahivaha soovaha para opahiwa ni mikuttho sa opatthani ohoolo wa Muluku eekeekhai.+ 2 Nuumala Davidi ovaha soovaha para opahiwa+ ni mikuttho sa opatthani,+ aahaareeliha atthu mwa nsina na Yehova. 3 Nuumala-vo, Davidi ahaavaha aisarayeli ootheene, khula mulopwana ni khula muthiyana, ephaawu yoovilikeya yoowooxiwa, epoolu ya itaamara, ni epoolu ya ifiiku soonyakattiwa. 4 Moottharelana, yaahaathanla alevi akina wiira avareke muteko ohoolo wa Nivuku na Nivarihano na Yehova,+ amuttittimiheke,* amuxukhureleke ni anvuwiheke Yehova Muluku a Isarayeli. 5 Muhooleli aari Asafi,+ a nenli aari Zakariya, Yeyeli, Xemiramothi, Yehiyeli, Matithiya, Eliyabi, Benaya, Obedi-Edomi ni Yeyeli,+ yaawo yaarumiha ikaruma sikina sa masipo ni aviola.+ Vano Asafi aarumiha isimbalo.*+ 6 Nave anamukuttho Benaya ni Yahaziyeli, yaarumiha malope mahiku ootheene ohoolo wa Nivuku na Nivarihano na Muluku eekeekhai.
7 Naari nihiku nenla, Davidi aavaherenrye awe ekwaha yoopacerya nsipo na omuxukhurela Yehova, omurumeelaka Asafi+ ni axinnawe:
9 Mmwiipele Muluku, mmwiipeleke isipo mmuttottopelaka,+
10 Mwiittottopeke mwaha wa nsina nawe noowaarya.+
Ale animwaavya Yehova, etteeliweke murima.+
11 Mmwaavyeke Yehova+ ni muroromeleke ikuru sawe.
Okathi wootheene,+ mphaveleke wiira ookhaliheryeni.
12 Muupuweleke miteko sootikiniha ovanre awe,+
Muupuweleke miiriirya sawe ni enamuna aaphukenle awe atthu,
13 Nyuwo osuulu wa Isarayeli, murumeyi a Muluku,+
Nyuwo anamwane a Yakobe, muthanliwe nuuwo.+
14 Owo ti Yehova, Muluku ahu.+
Owo onniphukela elapo yootheene.+
15 Muupuweleke nivarihano nawe, mahiku ootheene,
Muhikhala-khale muliyalaka etthu oleihenrye awe,*+
16 Nivarihano opanke awe ni Abrahamu,+
Ni etthu omulaphenle awe Isaakhi.+
17 Muluku aahimulipiherya Yakobe,+ etthu ele aalamphe awe,
Nave aahiiriha okhala nivarihano na mahiku ootheene para Isarayeli.
19 Eyo yaahiiraneya okathi mwaari anyu vakhaani,
Aayo, vakhaanixa, nave mwaari anyu anamurwa mulaponi.+
20 Awo yaaneetta akhumaka elapo emosa, arowaka elapo ekina,
Akhumaka omwene omosa, arowaka omwene mukina.+
21 Owo khamweemerenrye nnakhala mutthu mmosa waahaaxa,+
Masi mwaha wa yaawo, aahaapwapwela mamwene,+
22 Oriki: ‘Muhaavare atthu aka kaathanlale aka,
Nave muhiwiirihe etthu yootakhala maprofeta aka’.+
23 Mmwiipele Yehova, ootheene nyuwo munikhala mulaponi!
Mulaleye moota oniwoopola awe atthu, nihiku ti nihiku!+
24 Eriyari ya maloko, mulaleyeke ovuwa wawe,
Nave eriyari ya atthu ootheene, mulaleye miteko sawe sootikiniha.
25 Tthiri Yehova ti muulupale ni toniphwanela ottottopeliwa vanceene.
Owo onniphwanela wooviwa vanceene, waavikana amuluku ootheene.+
28 Mahimo, anvahe Yehova ele eniphwanela awe,
Anvahe Yehova ele eniphwanela awe, mwaha wa ovuwa wawe ni ikuru sawe.+
Akokhore ohoolo wa Yehova, awanre ene ikuwo sooreerexa.*+
30 Nyuwo atthu ootheene a mulaponi, muttettemeleke ohoolo wawe!
Elapo yoolipihiwa, kheniweryaneya ottikinyiwa.+
31 Erimu etteeliweke murima, nave elapo ehakalaleke;+
Eriyari ya maloko, mulaleye wiira: ‘Yehova oopacerya olamulela ntoko mwene!’+
32 Ephareya ni itthu sootheene siri memmo, sikukutteyeke;
Imatta ni itthu sootheene siri memmo, sitteeliweke murima.
33 Nave okathi omosa-ru, miri sa mutakhwani sikhuweleke ni otteeliwa murima ohoolo wa Yehova,
Okhala wiira owo onnoorwa* ophukela elapo.
34 Mmuxukhureleke Yehova, okhala wiira owo tooreera murima;+
Ophenta wawe woororomeleya onikhala mahiku ootheene.+
35 Muhimyeke wiira: ‘Khoo nyuwo Muluku ahu onnoopola, munoopole,+
Munithukumanye ni munoopole eriyari ya maloko,
Wiira nivuwihe nsina nanyu noowaarya,+
Ni wiira nitteeliweke murima noottottopelakani.+
36 Ottottopeliwe Yehova, Muluku a Isarayeli,
Mahiku ootheene’”.
Atthu ootheene yaahihimya wiira: “Amen!”* Nave yaahimuttottopela Yehova.
37 Nuumala-vo, Davidi aahimuhiya Asafi+ ni axinnawe ohoolo wa Nivuku na Nivarihano na Yehova, wiira avareke muteko okathi wootheene ohoolo wa Nivuku nlo na Nivarihano,+ ettharaka eprokraama ya khula nihiku.+ 38 Nave-tho aahimuhiya Obedi-Edomi ni axinnawe 68. Owo aahimuthanla Obedi-Edomi, mwaana a Yedutuni ni Hosa ntoko makwarta a vamukhora. 39 Namukuttho Sadoki+ ni anamukuttho akhwaawe, yaawo yaari ohoolo wa etapernaakulu ya Yehova opuro woorakamela osulu wa oXibeyoni,+ 40 wiira anvaheke Yehova, soovaha para opahiwa khula nihiku valtaari yaavahiwa aya yoovaha para opahiwa, voosiisu ni makaaripi, wiira avareke miteko sootheene saalempwale muliivuruni mwa nlamulo na Yehova, yeeyo aarumme awe atthu a Isarayeli.+ 41 Vamosa naawo aahikhala Hemani, Yedutuni,+ ni alopwana akina yaathanliwe masina aya wiira amuxukhureleke Yehova,+ okhala wiira “ophenta wawe woororomeleya onikhala mahiku ootheene”.+ 42 Nave-tho, vamosa naawo aahikhala Hemani+ ni Yedutuni arumihaka malope, isimbalo, ni ikaruma sa isipo saarumeeliwa wiira ottottopeliweke Muluku eekeekhai. Anamwane a Yedutuni+ ti yaaweherya vamukhora. 43 Vano atthu ootheene yaahirowa mmawannyeya, nave Davidi aahirowa waareeliha atthu a etthoko awe.