Silempwale ni Luka
10 Nuumala itthu iya, Pwiya aahaathanla awiixutti akina 70, aaruma anli-anli+ orowa ipooma ni mapuro ootheene aarowa awe ophiya. 2 Vano, Yesu aahaahimeerya wiira: “Mweekeekhai, soolya khasireere mmatta, masi anamuteko ari vakhaani. Tivonto, munvekele Mwaneene ematta wiira aaruuhe anamuteko.+ 3 Muroweke! Moone wiira kinoorumani ntoko ipwittipwitthi, eriyari ya miici.+ 4 Muhikuxe murupa wa musurukhu aahiiso murupa wa yoolya ya mukwaha, nnakhala isantaalya.+ Nave, muhimukohe ihaali mutthu mustaraatani. 5 Khula etthoko enikela anyu, mpaceryeke toko ohimya wiira: ‘Murettele okhale etthoko ela’.+ 6 Nto akhala wiira etthoko eyo ookhala mutthu oniphavela murettele, murettele onookhala ni yoowo. Masi aahikhale, murettele anyu onimootthikelani. 7 Mukhaleke etthoko yeeyo,+ mulyeeke ni nwuryeke itthu munivahiwa anyu,+ maana namuteko onniphwanela oliviwa.+ Muhimakeleke othaama etthoko emosa murowaka ekina.
8 “Nave-tho, khula epooma enikela anyu, mwaakheliwa vale, mulyeeke etthu munivahiwa anyu. 9 Mwaapenuxeke aretta a weiwo, ni mwaaleeleke wiira: ‘Omwene wa Muluku ori vakhiviru vanyu’.+ 10 Masi khula epooma ehinrowa anyu waakheliwa, muroweke iphiro suulupale sa epooma eyo, muhimyeke wiira: 11 ‘Hiyo nootatha hata ntthupi na epooma anyu naari munawuni mwahu, wiira nooniherye wiira nyuwo ti murina nthowa.+ Masi, musuweleke wiira Omwene wa Muluku ori vakhiviru’. 12 Kinooleelani wiira, itthu sinrowa okhumelela epooma eyo Nihiku Noophukela, sinrowa okhala sootepa otakhala ovikana itthu sinrowa okhumelela elapo ya oSodoma.+
13 “Mootakhaliwa nyuwo atthu a oKhorazini! Mootakhaliwa nyuwo atthu a oBethisaida, maana vaakhanle wiira atthu a mittetthe sa oTiiro ni oSiidoni aaweha miteko iya sootikiniha, awo saano attharunwe ene khalai, awaraka isaakho ni akilanthi ene vattuurwani.+ 14 Tthiri, itthu sinrowa wookhumelelani Nihiku Noophukela, sinrowa okhala sootepa otakhala ovikana itthu sinrowa okhumelela mittetthe sa oTiiro ni oSiidoni. 15 Ankhi nyuwo atthu a oKafarnawu? Munuupuwela wiira Muluku onimookhalihani vasulu va itthu sootheene?* Nnaari, khonrowa wookhalihani. Owo onimooroihani Mmahiye.*
16 “Ole onoowiriyanani, onikiwiriyana miyo.+ Ole ohinoocalani, nave khonikicala miyo. Ohiya-vo, ole ohinikicala miyo, nave-tho khonimucala Ole okirumme”.+
17 Vano awiixutti ale 70 yaahitthika atteeliwe ene murima, ariki: “Pwiya, hata malaikha ootakhala anniniiwelela, nrumeelaka nsina nanyu”.+ 18 Nto Yesu aahaaleela wiira: “Kinninweha Satana omonre ene+ wiirimu ntoko etari. 19 Mwiiwe! Miyo kihoovahani owerya woonyakela inowa ni awalisi,* ni oxintta ikuru sa nwanani.+ Nto khiivo eniwerya owiirihani etthu yootakhala. 20 Vano, muhitteeliweke murima mwaha wa wiiweleliwa ni malaikha ootakhala, masi mutteeliweke murima mwaha wa masina anyu olempwa wiirimu”.+ 21 Okathi ene yoowo, Muluku aahinvaha ikuru soowaarya, nto Yesu aahitteeliwa murima vanceene, onahimya wiira: “Miyo kinnoottottopelani, Tiithi, Pwiya a wiirimu ni elapo ya vathi, okhala wiira khimwaasuwelinhe itthu iya atthu oosuwela ni a miruku,+ masi muhaasuweliha atthu ari ntoko anamwane acikhaani. Aayo Tiithi! Okhala wiira ela ti etthu mweemerenrye anyu.+ 22 Itthu sootheene kivahiwe ni Tiithi aka. Nto khuuvo onimusuwela saana Mwaana, ohikhanle Tiithi. Nave khuuvo onimusuwela saana Tiithi, ohikhanle Mwaana+ ni ale Mwaana oniphavela awe waasuweliha”.+
23 Vano, Yesu aahaaleela awiixutti awe okathi yaari aya mekhaya, oriki: “Oohakalala taale anoona itthu nyuwo munoona anyu.+ 24 Kinooleelani ekeekhai wiira: Maprofeta ni mamwene manceene, yaaniphavela woona itthu iya munoona anyu, masi khiyoonale.+ Nave yaaniphavela wiiwa itthu muniiwa anyu, masi khiyiiwale”.
25 Vano, mulopwana mmosa aasuwela saana Nlamulo, aaheemela onamweehererya Yesu, omukohaka wiira: “Mwiixuttihi, kipake exeeni wiira kiphwanye okumi woohimala?”+ 26 Yesu aahimwaakhula wiira: “Exeeni elempwale Munlamuloni? Nyuwo muniiwa sai?” 27 Mulopwana owo aahaakhula oriki: “‘Mumphenteke Yehova* Muluku anyu ni murima anyu wootheene ni okumi anyu wootheene ni ikuru sanyu sootheene ni muupuwelo anyu wootheene’.+ Nave ‘mumphenteke mukhwiinyu ntoko muniiphenta anyu’”.+ 28 Yesu aahimwiirela wiira: “Muhaakhula oratteene. Muhihiye wiira siiso, nto munoophwanya okumi”.+
29 Masi mulopwana owo, ophavelaka wiixooniherya okhala naxariya,+ aahimukoha Yesu oriki: “Mukhwaaka ti pani?” 30 Yesu aahimwaakhula wiira: “Aahikhala mulopwana mmosa aakhuma oYerusalemu okhuruwelaka oYeriko. Mphironi, aahitupheliwa ni alatarau. Awo yaahimurula ikuwo sawe, yaahimmanakasa, khurowa, amuhiya ohanle ene vakhaani okhwa. 31 Okathi owo, aahivira estaraata yeeyo namukuttho mmosa. Vaamoonale awe mulopwana owo, aahimuxerema. 32 Siiso-tho, aahivira vaavo mulevi mmosa, nave-tho aahimoona mulopwana owo, khimuxerema. 33 Masi, aahivira estaraata yeeyo musamariya+ mmosa aarowa ekwaha awe. Amoonaka-ru mulopwana owo, aahimmorela ikharari. 34 Nto aahimwaattamela, ohela makhura ni eviinyu makhwatta a mulopwana owo, khitthukwa makhwatta awe. Aahinweliha vapuuruni vawe, amuroiha opuro waamaka aletto, omukhapelela. 35 Mmeeloni mwaya, aahikumiha itenaario* piili, khunvaha mwaneene opuro waamaka aletto, omuhimeerya wiira: ‘Mmukhapelele mulopwana ola, nto musurukhu ola waahiphiyerye, kinimoolivani kaahokolowaka’. 36 Wa alopwana ala araru, ti pani munimoona anyu okhala mukhwaawe+ mulopwana ole aatupheliwe ni alatarau?” 37 Nto mulopwana ole aasuwela saana nlamulo, aahimwaakhula Yesu oriki: “Tuule ammorenle ikharari”.+ Vano Yesu aahimuhimeerya wiira: “Muroweke, ni nyuwo mwiireke siiso”.+
38 Yesu ni awiixutti awe yaahirowa, khuphiya muttetthe mmosa. Weiwo yaahimphwanya muthiyana mmosa aitthaniwa Marta,+ yoowo aamwaakhenle Yesu vate vawe. 39 Marta owo, aahikhalana muhima awe, aihaniwa Maria, yoowo aakilanthi vakhiviru va Pwiya, onawiriyana etthu aahimya awe.* 40 Vano, Marta, khaareere oxankiheya ni miteko sinceene. Siiso, aahimwaattamela Yesu khuhimya wiira: “Pwiya, khamunoona wiira muhima aka onikihiya kivaraka mekhaka miteko iya? Mmuleele wiira orwe okikhaliherye”. 41 Pwiya aahimwaakhula wiira: “Marta, Marta, nyuwo munnitepa oxankiheya ni itthu sinceene. 42 Itthu vakhaani paahi ti sirina efaita, aahiiso etthu emosa paahi. Nto, Maria, oothanla epantta yootepa oreera,+ owo khonrowa waakhiwa”.