Silempwale ni Marko
5 Yesu ni awiixutti awe, yaahiphiya ekhopela ekina ya ephareya, muttetthe wa oXeraasa.+ 2 Nto Yesu akhuruwaka-ru mukalawani, mulopwana mmosa aavariwe ni nlaikha nootakhala, aahikhuma omahiye onarowa okumana ni Yesu. 3 Mulopwana owo aakhala omahiye. Mpakha okathi ole, khuuvo aawerya omutthukwa, nnakhala ni ekwirinti. 4 Nnaamwi ikwaha sinceene aatthukiwe miyoono ni metto sawe ni ikwirinti, owo aanikwasa ikwirinti iyo, nto khuuvo aawerya onvara. 5 Othana ni ohiyu, eetta omahiye ni omiyakoni okhuwelaka ni aivulalihaka ni maluku. 6 Omoonaka-ru Yesu orwaaka ottaiwene, aahimutthimakela ni aahuurama ohoolo wawe.+ 7 Nto aahimukhuwelela Yesu, iiraka: “Exeeni erina anyu ni miyo, nyuwo Yesu, Mwaana a Muluku Muulupalexa? Mulaphe mwa nsina na Muluku wiira khamunikihaaxa”.+ 8 Yesu aanihimeerya nlaikha nle nootakhala wiira: “Nyuwo nlaikha nootakhala, mmuhiye mulopwana ola”.+ 9 Vano Yesu aahimukoha wiira: “Nsina nanyu ti pani?” Nto owo aahaakhula wiira: “Nsina naka, ka Muttitthi, maana hiyo khanireere”. 10 Mulopwana owo aanimuxonttela Yesu, wiira ohoomole malaikha ale ootakhala elapo ele.+
11 Vano, opuro ole naahikhala nikoto nuulupale na ikuluwe+ naalya vamwaako.+ 12 Tivo, malaikha ale ootakhala yaahimuxonttela Yesu, ariki: “Xontte, munihiye nikele mukuluweni-mme”. 13 Nto Yesu aaheemererya. Malaikha awo yaahimukhuma mulopwana ole, anakela mukuluweni. Vano, nikoto nle naahitthimakela oneri,* khimorela mphareya. Ikuluwe soowiiraka 2.000, saahisama. 14 Masi alipa-oolyiha ikuluwe iye yaahitthyawasa, khurowa olaleya opooma ni mmuttettheni. Atthu yaahirowa woona etthu yaakhumelenle.+ 15 Yaahirwa vaari Yesu, amoona mulopwana ole aavariwe ni muttitthi wa malaikha ootakhala, okilanthi ene, owanre ene ikuwo ni ori ene saana. Nto atthu yaahoova vanceene. 16 Nave-tho, ale yoonale etthu ele, yaahaahimeerya atthu awo etthu yaamukhumelenle mulopwana ole aavariwe ni malaikha ootakhala, ni etthu yiiraneyale ni ikuluwe. 17 Nto atthu awo yaahimuxonttela Yesu wiira okhume mmuttettheni mwaya.+
18 Okathi Yesu aakenle awe mukalawani, mulopwana ole aavariwe ni malaikha ootakhala aahimuxonttela wiira omutthare.+ 19 Yesu khaamweemihenrye, masi aamulenle wiira: “Muroweke owaani, ori amusi anyu, mwaaleele itthu sootheene Yehova* owiirenlyaaweni ni moota oomorenlyaaweni ikharari”. 20 Mulopwana ole aahirowa, khipacerya olaleya oDekaapoli,* itthu sootheene Yesu aamwiirenle awe. Nto atthu ootheene yaahitikinihiwa vanceene.
21 Nuumala Yesu olapuwela ekhopela ekina ori ene mukalawani, muttitthi muulupale wa atthu waahimuthukumanela. Owo aari okerekhere wa ephareya.+ 22 Mukhulupale mmosa a osinagoga,* iihaniwa Jairo, aahirwa. Omoonaka-ru Yesu, aahikhoroma ohoolo wawe.+ 23 Owo aahimuxonttela Yesu ikwaha sinceene, iiraka: “Mwanaka mwaamuthiyana, khoreere owereiwa.* Xontte, nrowe mwamwiixaatherye matata anyu,+ wiira owo okhale mukumi”. 24 Nto Yesu aahirowa nuuwo. Nave muttitthi muulupale wa atthu waanimutthara Yesu, omphunyaka.
25 Vano, aahikhala muthiyana mmosa aavinre iyaakha 12+ ephome awe eyiiheyaka.+ 26 Owo aahaaphwanya mameetiku manceene, yaawo yaamuhanxe vanceene. Nave, aahihonona musurukhu awe wootheene. Masi khaakhala saana, ohiya-vo aamutepa. 27 Nuumala wiiwa itthu Yesu aapaka awe, muthiyana ole aahirwa ottuli wawe, oviraka eriyari ya muttitthi wa atthu, khivara nlaya na ota na Yesu.+ 28 Owo aanuupuwela vamurimani vawe oriki: “Miyo kavara-ru malaya awe a ota paahi, kinookhala saana”.+ 29 Niinaano-ru, ephome awe yahimaala okhuma. Nto aahoona mweerutthuni mwawe wiira eretta ele yaamuhaaxa, yoovira.
30 Niinaano-ru, Yesu aahoona wiira saahikhuma ikuru+ mweerutthuni mwawe. Nto aahirukunuwa, onaweha muttitthi ole, onakoha wiira: “Ti pani ovanre malaya aka a ota?”+ 31 Awiixutti awe yaahimuhimeerya wiira: “Munnoona wiira muttitthi ola wa atthu onnoophunyani. Vano xeeni okohaka wiira, ‘Ti pani okivanre?’” 32 Masi, Yesu aaniwehaweha wiira omoone mutthu anvanre. 33 Okhala wiira muthiyana ole aahisuwela ele yaamukhumelenle, aahipacerya ottettemela ni woova. Nto, aahimwaattamela Yesu, okhoroma ohoolo wawe, omuleela ekeekhai. 34 Vano Yesu aahimuhimeerya wiira: “Mwanaka, waamini wanyu ohookhalihani saana, muroweke ni murettele.+ Mukhale mukumi, nave eretta yoohaaxani, ehootthikeleni”.+
35 Nlelo Yesu olavulaka, yaahirwa alopwana akina yaakhuma vatthokoni va Jairo, anahimya wiira: “Mwaninyu ohookhwa! Muhimuukhule-tho Mwiixuttihi”.+ 36 Nuumala Yesu wiiwa moolumo aya, aahimuhimeerya Jairo wiira: “Muhoove etthu, mooniherye waamini paahi”.+ 37 Nto Yesu khaaphavenle otthariwa ni atthu akina, ohikhanle Pedru, Yakobo, ni Yohani munnawe Yakobo.+
38 Awo yaahikela vatthokoni va Jairo. Vano, Yesu aahaaweha atthu anyakulaka, yinlaka ni akhuwelaka vanceene.+ 39 Nuumala okela mpaani, Yesu aahaahimeerya atthu ale wiira: “Xeeni muninla anyu ni onyakula? Mwaana ola khokhwiiye, masi onoorupa”.+ 40 Vano, atthu ale yaahipacerya omutheya voonyoholela. Nuumala owoomolela ota atthu ale, Yesu aahirowa ni apapawe ni amamawe mwaana ole, vamosa ni awiixutti aarina awe. Nto aahirowa vaari awe mwaana ole. 41 Yesu, aahivara ntata na mwaana ole, onahimya wiira: “Tal′i·tha cu′mi”, yeeyo enitaphulela so: “Mwaaruusi, kinooleelani wiira: ‘Nvenye!’”+ 42 Niinaano-ru, mwaaruusi owo aahivenya onapacerya weetta. (Aarina iyaakha 12.) Awehaka-ru ele yiiraneyale, axipapawe khiyaawerya omaaleleya mwaha wa otteeliwa murima vanceene. 43 Masi Yesu aahaalopola oratteene wiira ahaasuwelihe atthu akina.+ Nave aahihimya wiira mwaana ole ovahiwe yoolya.