Silempwale ni Yohani
11 Vano, aahikhala mulopwana mmosa aawereiwa, yoowo aihaniwa Laazaro, aakhala oBethania, muttetthe wa Maria ni muulupale awe, aihaniwa Marta.+ 2 Ola, ti Maria yoole aamuhenle Pwiya makhura oowunkhela, ni uuminhe inawu sa Pwiya ni ikharari sawe.+ Owo aari murokorawe Laazaro. 3 Tivo, axirokorawe Laazaro yaahiruma ohimeeriwa Yesu wiira: “Pwiya, mpatthani inyu yoole munimphenta anyu, onoowereiwa”. 4 Yesu vaiwale awe siiso, aahihimya wiira: “Eretta eyo kheniruuha okhwa, masi enrowa onvuwiha Muluku.+ Nave-tho Mwaana a Muluku onrowa ovuwihiwa mwaha wa yeeyo”.
5 Yesu aanimphenta Marta, Maria ni Laazaro. 6 Masi, Yesu vaiwale awe wiira Laazaro anwereiwa, aahikhala-tho mahiku manli nipuro nenle aari awe. 7 Nuuvira mahiku awo manli, aahaahimeerya awiixutti awe wiira: “Nrowe nitthikele oYudeya”. 8 Awiixutti awe yaahimukoha wiira: “Rabi,*+ mahiku vakhaani avinre, atthu a oYudeya yaaphavela woovonyani maluku.+ Vano munitthikela-tho weiwo?” 9 Yesu aahiwaakhula oriki: “Kiira othana orina iwoora 12?+ Mutthu yoole oneetta othana, khonikwattula etthu, maana onnoona muthuko onimwaleela elapo. 10 Masi ole oneetta ohiyu, onnikwattuliwa, okhala wiira khorina muthuko mwa yoowo”.
11 Nuumala ohimya itthu iya, Yesu aahincererya oriki: “Mpatthani ihu Laazaro onoorupa,+ masi kinrowa weiwo kanvenxe”. 12 Awiixutti yaahimuhimeerya wiira: “Pwiya, akhala wiira owo onoorupa, onookhala saana”. 13 Masi, Yesu aahimya okhwa wa Laazaro. Vano awiixutti awe yuupuwela wiira aahimya orupa wa ikhove. 14 Siiso, Yesu aahaahimeerya oratteene, oriki: “Laazaro ohookhwa.+ 15 Nave kinnitteeliwa murima mwaha woowi nkaakhanle wuuwu, okhala wiira ele enrowa aka opaka, enoolipiha waamini wanyu. Nrowe weiwo ori awe”. 16 Vano Tome, yoowo aihaniwa Maphapo, aahaahimeerya awiixutti akhwaawe wiira: “Ni hiyo nrowe, wiira nakhwe vamosa ni Yesu”.+
17 Okathi Yesu aaphiyale awe, aahoona wiira yaahivira mahiku maxexe Laazaro ovithiwe ene mmahiye. 18 OBethania ni oYerusalemu waarekamelanne etthu yoowiiraka ikiloomo tthaaru* paahi. 19 Nto ayuda anceene yaahirwa ommaaliha Marta ni Maria mwaha wookhweliwa murokoraya. 20 Marta vaiwale awe wiira Yesu aanirwa, aahirowa okumana nuuwo, masi Maria+ aahanle owaani. 21 Nto Marta aahimuhimeerya Yesu wiira: “Pwiya, mwaari vaava, murokoraka khaarowa okhwa. 22 Hata vari siiso, kinnaamini wiira khula etthu eninvekela anyu Muluku, owo onimoovahani”. 23 Yesu aahimuleela wiira: “Murokorinyu onoohihimuxiwa”. 24 Marta aahimwaakhula oriki: “Miyo koosuwela wiira onoohihimuxiwa+ nihiku nookiserya”. 25 Vano Yesu aahimuhimeerya wiira: “Miyo ki ohihimuwa ni okumi.+ Ole onikaamini, hata okhwaaka, onookhala-tho mukumi. 26 Nave-tho, ootheene yaale ari akumi ni anikaamini, khanikhala-khala akhwaaka.+ Kiireke munnikupali etthu ela?” 27 Marta aahimwaakhula Yesu wiira: “Aayo, Pwiya! Miyo kinnikupali wiira nyuwo mwa Kristu. Nyuwo mwa Mwaana a Muluku, yoowo Muluku aahimyale awe wiira aamoorwa moolumwenkuni”. 28 Nuumala olavula siiso, Marta aahirowa omwiihana Maria, onamuhimeerya wiiphiini wiira: “Mwiixuttihi+ oophiya, onoowiihanani”. 29 Maria vaiwale awe, aahivenya voowaakuveya, onarowa okumana ni Yesu.
30 Yesu nlelo khaaphiyale omuttettheni, masi aari opuro yoole Marta aakumanne awe nuuwo. 31 Okathi ole, yaahikhala ayuda yaarwiiye ommaaliha Maria vatthokoni vawe. Vaamoonale aya Maria ovenyaka voowaakuveya, awo yaahimutthara, maana yuupuwela wiira aarowa wunla omahiye.+ 32 Nuumala Maria onweha Yesu, aahaattamela opuro aari awe, okokhora ohoolo wawe, onamuhimeerya wiira: “Pwiya, mwaari vaava, murokoraka khaarowa okhwa”. 33 Yesu vaamoonale awe Maria inlaka, ni ayuda yaarwanne awe yinlaka, aahiriipiwa murima vanceene ni aahixanka. 34 Yesu aahaakoha wiira: “Munvithale vai?” Awo yaahimwaakhula wiira: “Pwiya, murwe moone”. 35 Yesu aahimoroxa maithori.+ 36 Nuumala ayuda oweha eyo, yaanihimya wiira: “Mooneke moota Yesu amphenta awe!” 37 Masi atthu akina yaahimya wiira: “Yesu ola oowerya otthukula maitho a mulopwana ahoona.+ Nto niireke khaawerya opaka etthu wiira Laazaro ohikhwe?”
38 Nuumala-vo, Yesu aahiriipiwa-tho murima, onarowa omahiye. Mahiye awo yaari nikhuku, naattiyeliwe ni nluku. 39 Vano, Yesu aahiira: “Mukumihe nluku nle”. Nto Marta, murokorawe mulipa-ookhwa owo, aahimuhimeerya wiira: “Pwiya, kinoona wiira murutthu awe onninkha, okhala wiira aavira mahiku maxexe okhwiiye awe”. 40 Yesu aahimukoha Marta oriki: “Nkoohimenryeni wiira mwakupali, mwanweha ovuwa wa Muluku?”+ 41 Siiso, nluku naahikumihiwa. Vano Yesu aahiweha wiirimu,+ onahimya so: “Tiithi, kinnooxukhuruni mwaha woowi mookiiwa. 42 Koosuwela tthiri wiira okathi wootheene munnikiiwa. Masi kihimmye siiso mwaha wa muttitthi wa atthu ala arukurenrye-va, wiira akupali wiira ti nyuwo mukirumme”.+ 43 Nuumala ohimya itthu iya, aahikhuwela vanceene oriki: “Laazaro, mukhumele ota!”+ 44 Mulopwana ole aakhwiiye aahikhumela ota, otthukiwe ene ni ikuwo inawu sawe ni matata awe, nave owiitho wawe waahivitikeleliwa ni ekuwo. Vano Yesu aahaahimeerya wiira: “Mmutaphule, mmuhiye aroweke”.
45 Nuumala ayuda anceene yaarwiiye omuxukurya Maria, woona itthu Yesu aapanke awe, yaahimwaamini Yesu owo.+ 46 Masi, atthu akina yaahirowa waaleela afarisi etthu Yesu aapanke awe. 47 Siiso, makhulupale a anamukuttho ni afarisi, yaahithukumanya eSineedrio,* anahimya wiira: “Nipake exeeni, okhala wiira mulopwana ola onnipaka miiriirya sinceene?+ 48 Namuhiya siiso, atthu ootheene anoomwaamini, nto aroma animoorwa anaakhe etemplo ahu ni nloko nahu”. 49 Aahikhala mulopwana mmosa aihaniwa Kaifa,+ yoowo aari vamosa naawo. Owo aari namukuttho muulupale eyaakha ele. Nto aahaahimerya wiira: “Nyuwo khamunsuwelasa etthu. 50 Khamunoona wiira munoophwanya mureerelo, mulopwana mmosa waakhwela atthu ootheene, ohiya nloko nootheene opwetexiwa?” 51 Masi mulopwana ole khaahimmye etthu ele okumihaka mmuru mwawe. Okhala wiira aari namukuttho muulupale eyaakha ele, nto aahihimya vahinatthi wiira Yesu aarowa waakhwela ayuda. 52 Ohiya waakhwela ayuda paahi, masi-tho, aarowa waathukumanya anamwane a Muluku, yaawo yaamwarenle mapuro manceene. 53 Okhuma nihiku nenno, yaanimpaka palano wiira amwiive Yesu.
54 Tivo, Yesu kheetteetta ooniwaka ni ayuda. Masi aahikhuma muttetthe ole aari awe, onarowa muttetthe waattamenle moothakoni, epooma yaihaniwa Efrayimi.+ Nto, aahikhala weiwo ni awiixutti awe. 55 Vano Paasikha+ a ayuda aanaattamela. Nto atthu anceene yaakhala mmuttettheni, yaaniwela arowaka oYerusalemu ohinatthi Paasikha, wiira yaireerihe, aattharaka nlamulo na Moise. 56 Atthu awo yaanimwaavya Yesu. Siiso, ari ene mutemplo yaanikohana wiira: “Nyuwo munoonela sai, niireke tthiri Yesu owo onoorweela niira nla?” 57 Vano, makhulupale a anamukuttho ni afarisi, yaahiruma wiira akhala mutthu aasuwela nipuro aari awe Yesu, aahaana waahimeerya wiira anvare.