Miteko sa Arummwa
8 Vano, Saulo aaheemererya wiiviwa Siteefano.+
Okhuma nihiku nle, muloko waari oYerusalemu waahipacerya olupatthiwa vanceene. Nto awiixutti ootheene yaahimwareela mittetthe sa oYudeya ni oSamariya.+ Arummwa paahi, ti yaahanle oYerusalemu. 2 Masi alopwana yaamoova Muluku, yaahinvitha Siteefano ni yaahimunlela vanceene. 3 Vano Saulo aahipacerya olupattha vanceene muloko. Owo aanikela khula empa, onaapurulela vate alopwana ni athiyana ni aanaatthukweliha mukhatteya.+
4 Masi awiixutti ale yaamwarenle mulaponi, yaanaalaleerya atthu ihapari sooreera sa nuulumo na Muluku, khula opuro yaarowa aya.+ 5 Vano Filipe aahikhuruwela epooma* ya oSamariya+ ni aahipacerya omulaleya Kristu, aalaleeryaka atthu. 6 Mittitthi sa atthu saaniwiriyana saana itthu Filipe aahimya awe, nave saaniiwa ni oweha miiriirya aapaka awe. 7 Atthu anceene yaavariwe ni malaikha ootakhala, yaanaakhuweliha vanceene ni yaanaakhuma atthu ale.+ Nave-tho, atthu anceene oorakala ni yaatuthunya, yaanipenuxiwa. 8 Tivo, atthu a epooma ele yaahitteeliwa murima vanceene.
9 Vano, epooma ele aahikhala mulopwana mmosa aihaniwa Simoni, yoowo okhuma khalai aapaka maxintta ni aaniwiiriha atthu yaakhala oSamariya otikinihiwa vanceene. Nave owo aaniihimya okhala mukhulupale. 10 Atthu ootheene, okhuma acikhaani mpakha aalupale, yaaninwiriyana, anahimya wiira: “Owerya wuulupale wa Muluku, ori ni mulopwana ola”. 11 Siiso, awo yaaninwiriyana oratteene, okhala wiira yaaniviriha okathi munceene atikinihiwaka vanceene ni maxintta aapaka awe. 12 Masi okathi Filipe aalaleya awe ihapari sooreera sa Omwene wa Muluku+ ni aalaleya awe nsina na Yesu Kristu, alopwana ni athiyana yaahimwaamini, nave yaahipatisiwa.+ 13 Nave-tho, Simoni aahaamini. Nuumala opatisiwa, nlelo aanimutthara Filipe.+ Owo aanitikinihiwa vanceene okathi aaweha awe miiriirya ni miteko sootikiniha siiraneya.
14 Okathi arummwa yaakhala oYerusalemu yaiwale aya wiira atthu a oSamariya yaahaamini nuulumo na Muluku,+ yaahimuruma Pedru ni Yohani orowa weiwo. 15 Pedru ni Yohani yaahirowa oSamariya, nto nuumala ophiya, yaahaavekelela atthu awo wiira yaakhele ikuru soowaarya.+ 16 Mweekeekhai, mpakha okathi ole, atthu ale nlelo khiyaakhenle ikuru soowaarya, masi yaapatisiwe paahi mwa nsina na Pwiya Yesu.+ 17 Siiso, Pedru ni Yohani yaahiwiixaatherya matata,+ nto awo yaahipacerya waakhela ikuru soowaarya.
18 Okathi Simoni oonale awe wiira atthu yaanaakhela ikuru soowaarya, yiixaatheriwaka matata ni arummwa, owo aahaavaha musurukhu, 19 ohimyaka wiira: “Ni miyo mukivahe owerya iwo, wiira khula mutthu onrowa aka omwiixaatherya matata, aakheleke ikuru soowaarya”. 20 Masi Pedru aahimwaakhula oriki: “Musurukhu anyu ohononeye vamosa ni nyuwo, maana muupuwela wiira mwanwerya othuma ni musurukhu,+ etthu Muluku onivaha awe mahala. 21 Nyuwo khamuniphwanela ovara muteko ola ni hiyo, okhala wiira murima anyu kholonke ohoolo wa Muluku. 22 Tivo, murukunuxe muupuwelo anyu woohiloka ni mmuxonttele Yehova* wiira, vaweryaneya, muleveleliwe mwaha wa muupuwelo anyu wootakhala. 23 Tthiri, kinnoona wiira nyuwo mwa eveneno yoohapala ni mwa epottha ya itthu sootakhala”. 24 Simoni aahaakhula wiira: “Mmuxonttele Yehova* mwaha wa miyo, wiira itthu sootheene sihimmye anyu, ehikhale nnakhala emosa enrowa okiiraneela”.
25 Nuumala olaleya moomalela mapuro ootheene ni olaleerya nuulumo na Yehova,* awo yaahitthikela oYerusalemu. Yeettaka, yaanilaleya ihapari sooreera mittetthe sinceene sa oSamariya.+
26 Masi, nlaikha na Yehova*+ naahimuleela Filipe wiira: “Nvenye murowe osuuli,* estaraata enikhuruwa ekhumaka oYerusalemu, erowaka oGaza”. (Estaraata ela enivira moothakoni.) 27 Owo aahivenya, onarowa. Vano, aahikhala mulopwana mmosa aari mukhulupale a ekuvernu ya pwiyamwene Kandasi a wEthiyopia, yoowo-tho aasuka muhakhu wa pwiyamwene owo. Mulopwana owo aaronwe oYerusalemu omukokhorela Muluku.+ 28 Nto, iira otthikelaka elapo awe owenle ene ekaaro awe, yeeyo yaapuruliwa ni inama, osomaka eliivuru ya profeta Yesaya. 29 Siiso, ikuru soowaarya saahimuleela Filipe wiira: “Murowe, mwaattamele ekaaro ele”. 30 Filipe aahitthimakela ekaaro ele eemela vakhiviru vaya, onamwiiwa mulopwana ole osomaka voowiiwanyeya eliivuru ya profeta Yesaya. Nto aahimukoha wiira: “Kiireke munnisuwela* tthiri etthu munisoma anyu?” 31 Owo aahaakhula oriki: “Kinrowa osuwela sai, ohikhanle mutthu onikitthokiherya?” Tivo, aahinvekela Filipe owela mukaaroni wiira okilaathi nuuwo. 32 Vano, opuro wa Soolempwa aasoma awe, waahimya so: “Ntoko epwittipwitthi enroihiwa wiiviwa, ni mwaapwittipwitthi onimaala ohoolo wa ole onimmettha, siiso, owo kholavunle nnakhala etthu emosa.+ 33 Owo aahiyevihiwa ni khiireliwe exariya.+ Ti pani onrowa osuweliha itthu kamosa-kamosa sa okumi awe? Tthiri okumi awe onrowa omalihiwa valaponi”.+
34 Mukhulupale ole, aahimukoha Filipe wiira: “Xontte mukileele, ti pani profeta onimuhimya awe? Niireke oniihimya mmansawe, wala onimuhimya mutthu mukina?” 35 Filipe aahipacerya olavula. Nto, opaceryaka ni yoolepa ele, aahimuleela ihapari sooreera sa Yesu. 36 Yeettaka siisaale mustaraatani, yaahiphwanya nipuro naari maasi manceene. Vano mukhulupale ole aahihimya wiira: “Maasi taala-va! Kiireke yookhala etthu enikikhoottiherya opatisiwa?” 37* —— 38 Mukhulupale ole aaheemexa ekaaro ele, owo vamosa ni Filipe yaahikhuruwa, akela mmaasini. Nto Filipe aahimpatisa mukhulupale ole. 39 Nuumala okhuma mmaasini, ikuru sa Yehova* saahimukumiha Filipe opuro ole moowaakuveya. Vano mukhulupale ole khanwenhe-tho, masi aahitthikela mukwaha awe otteeliwe ene murima. 40 Filipe aahirowa wAxidodi, onalaleya ihapari sooreera ipooma sootheene, mpakha ophiya oKesareya.+