Silempwale ni Yohani
9 Okathi Yesu eetta awe, aahinweha mulopwana mmosa, aayariwe ohoonaka. 2 Awiixutti awe yaahimukoha wiira: “Rabi,*+ mulopwana ola ohalaka oyariwa ohoonaka siisa, ti pani atthenke? Ti yoola aahiiso taale amuyanre?” 3 Yesu aahiwaakhula iiraka: “Mulopwana ola khotthenke, nnakhala ale amuyanre, khatthenke. Etthu ela ehiiraneya wiira atthu awehe miteko sa Muluku.+ 4 Hiyo nihaana ovara miteko sa Muluku yoowo okirumme, nlelo ori ene othana.+ Ohiyu onnaattamela, mutthu ohinwerya awe ovara muteko. 5 Okathi wootheene kiri aka moolumwenkuni, miyo ka muthuko wa olumwenku”.+ 6 Nuumala Yesu ohimya itthu iya, aahisenela vathi, aaheetheya etthaya ni isene sawe, ottikitthela etthaya eyo maitho a mulopwana owo,+ 7 onamuhimeerya wiira: “Murowe mwakuse owiitho ntthiya nniihaniwa Silowe” (Silowe nintaphulela, “oorummwa”). Vano, mulopwana owo aahirowa, aahikusa, ohokolowa oonaka.+
8 Nto anamwaattamanani awe ni ale khalai yanweha wiira aari nasimola, yaahipacerya ohimya so: “Ola khahiyo mulopwana yoole aakilaathi, onaveka esimola?” 9 Akina yaahimya wiira: “Ti yoowo”. Masi akina yaahimya wiira: “Nnaari, onoolikana”. Mulopwana ole aanithipelela ohimya wiira: “Ti yoomi”. 10 Vano yaahimukoha yiiraka: “Nto maitho anyu atthukunwe sai?” 11 Owo aahaakhula wiira: “Mulopwana oniihaniwa Yesu aaheetheya etthaya, ottikitthela maitho aka, onakihimeerya wiira: ‘Murowe oSilowe, mwakuse’.+ Vano miyo kaahirowa, kikusa, kinawerya woona”. 12 Nto yaahimukoha wiira: “Mulopwana owo ori vai?” Owo aahaakhula oriki: “Nkinsuwela”.
13 Nto yaahimuroiha wa afarisi mulopwana ole khalai ahoona. 14 Nihiku nenle Yesu eetheyale awe etthaya, khitthukula maitho a mulopwana ole,+ naari esaabadu.+ 15 Vano afarisi yaahimukoha mulopwana ole moota aapacenrye awe woona. Owo aahaaleela wiira: “Owo aahittikitthela maitho aka etthaya yooweetheiwa. Miyo kaahikusa, vano kinnoona”. 16 Afarisi akina yaanihimya wiira: “Mulopwana owo khorummwale ni Muluku, okhala wiira khoniiwelela nlamulo na esaabadu”.+ Akina yaahimya wiira: “Akhala wiira mulopwana owo natampi, nto oniwerya sai opaka miiriirya siisa?”+ Tivo, yaahikawanyeya yaawo-ru.+ 17 Atthu awo yaahimukoha-tho mulopwana ole khalai ahoona, yiiraka: “Nyuwo munihimya wiira owo ti pani, maana ti nyuwo atthukuliwe maitho anyu?” Mulopwana owo aahaakhula oriki: “Owo profeta”.
18 Masi, ahooleli a ayuda khiyaakupali wiira mulopwana ole aayariwe ohoonaka. Tivo, yaahiwiihana apapawe ni amamawe, 19 anaakoha wiira: “Niireke ola mwaninyu, yoowo munihimya anyu wiira oyariwe ohoonaka? Vano oniwerya sai woona?” 20 Apapawe ni amamawe yaahaakhula, yiiraka: “Aayo, ola mwanihu. Nave oyariwe ohoonaka. 21 Masi hiyo khaninsuwela moota vano onwerya awe woona, aahiiso khaninsuwela ti pani omutthukunle maitho. Mmukoheke mwaneene. Owo ohinnuwa. Onniwerya olavula mmansawe”. 22 Apapawe ni amamawe yaahaakhula siiso, mwaha woowi yaawoova ayuda,+ okhala wiira ayuda awo yaahiiwanana khalai-ru, wiira mutthu aarowa omukupali Yesu okhala Kristu, aahaana woomoliwa musinagoga.*+ 23 Tivonto apapawe ni amamawe yaakhunle aya wiira: “Owo ohinnuwa. Mmukoheke mwaneene”.
24 Yaahimwiihana-tho mulopwana ole khalai ahoona, anamuhimeerya wiira: “Munvuwihe Muluku.* Hiyo noosuwela wiira mulopwana ole natampi”. 25 Owo aahaakhula oriki: “Mulopwana owo aari natampi, miyo nkinsuwela. Etthu kinisuwela aka tiila: miyo khalai nkoona, masi vano kinnoona”. 26 Nto awo yaahimukoha-tho wiira: “Owo owiirinheni exeeni? Otthukunle sai maitho anyu?” 27 Owo aahiwaakhula oriki: “Miyo kihooleelani, masi nyuwo khamwiiwale. Xeeni muniphavela anyu-tho wiiwa? Kiireke ni nyuwo muniphavela okhala awiixutti awe?” 28 Siiso, awo yaahimuthanya, amuhimeeryaka wiira: “Nyuwo mwa mwiixutti a mulopwana ole, masi hiyo na awiixutti a Moise. 29 Hiyo noosuwela wiira Muluku oolavula ni Moise, masi khaninsuwela mulopwana ola onikhuma awe”. 30 Mulopwana ole aahiwaakhula oriki: “Etthu ela ennikitikiniha vanceene, okhala wiira munihimya wiira khamunisuwela onikhuma awe, hata okitthukunle ene maitho. 31 Noosuwela wiira Muluku khonaawiriyana anatampi,+ masi akhala mutthu onimoova, onapaka ele Muluku oniphavela awe, owo onninwiriyana mutthu owo.+ 32 Okhuma khalai, khuuvo otonko wiiwa wiira ohaavo mutthu otthukunle maitho a mutthu oyariwe ohoonaka. 33 Vaakhanle wiira mulopwana owo khorummwale ni Muluku, yena khaarowa owerya opaka itthu iya”.+ 34 Awo yaahimwaakhula yiiraka: “Nyuwo muyariwe oosareya ene itampi. Muniphavela oniixuttiha hiyo?” Nto, yaahimoomolela ota!+
35 Vano Yesu aahiiwa wiira mulopwana ole aahoomoleliwa ota. Nuumala omphwanya, Yesu aahimukoha wiira: “Munnimwaamini Mwaana a Mutthu?” 36 Mulopwana ole aahaakhula wiira: “Atokweene, ti pani owo? Akileele, wiira miyo kimwaamini!” 37 Yesu aahimuhimeerya wiira: “Nyuwo monweha. Mweekeekhai, munlavula ni yoowo”. 38 Nto mulopwana ole aahihimya wiira: “Pwiya, miyo kinnimwaamini”. Siiso, aahikokhora* ohoolo wawe. 39 Vano Yesu aahihimya wiira: “Miyo kihoorwa moolumwenkuni-mu wiira itthu kinipaka aka, siwiirihe ale ahinoona,+ owerya woona, nave ale anoona, ohiwerya woona”.+ 40 Afarisi akina, yaawo yaari opuro ole Yesu aari awe, yaahiiwa itthu iyo. Nto yaahimukoha Yesu wiira: “Niireke ni hiyo-tho khannoona?” 41 Yesu aahiwaakhula wiira: “Vaakhanle wiira khamunoona, nyuwo khimwaarowa okhalana etampi. Masi vano, munihimya wiira: ‘Hiyo ninnoona’. Tivo, etampi anyu khenrowa oleveleliwa”.+