Aamulepenle Awe Tito

1 Miyo Paulo, ka murumeyi a Muluku ni ka murummwa a Yesu Kristu. Waamini waka ni muteko aka ntoko murummwa, onivarihana ni waamini wa ale Muluku aathanlale awe. Nave onivarihana ni osuwela weekeekhai, weiwo onooniherya moota woomurumeela Muluku. 2 Itthu iya sookhala mwaha wa nlipelelo na okumi woohimala,+ yoowo Muluku ohinootha,+ oleihenrye awe khalai ene. 3 Vano, ophiyaka-ru okathi aya, owo oosuweliha moolumo awe orumeelaka muteko wa olaleiwa ihapari sooreera.+ Miyo koothanliwa wiira kilaleye ihapari iyo, kirummwaka ni Moopoli ihu, Muluku. 4 Kinnimulepela epaphelo ela Tito, yoowo ori mwanaka eekeekhai, mwaha wa waamini omosa-ru orina ahu, kiiraka:

Oreera murima wuulupale ni murettele wa Muluku Tiithi, vamosa ni wa Kristu Yesu, Moopoli ihu, okhale ni nyuwo.

5 Kihoohiyani oKereta wiira mulokiherye itthu sihilonke, ni wiira khula epooma mwaathanleke axitokweene, muttharaka malakiheryo ala koovahalyaakani: 6 Mutokweene ohaana okhala mutthu* ohiniphwanyaniwa mulattu, okhaleke mulopwana orina muthiyana mmosa paahi, okhalaneke anamwane animwaamini Muluku ni ahinihimmwa okhalana mweettelo woohiloka aahiiso oohiiwelela.+ 7 Okhala wiira mutokweene onihoolela, yoowo onikhapelela myaha sa Muluku, ohaana okhala mutthu ohinihimyaniwa mulattu, ohikhaleke oowiisoona,+ ohaakuveke onanariwa,+ ohikhaleke namuhapaliwa, oowali, ohiphaveleke ophwanya itthu voohiphiyeriwa. 8 Masi, okhaleke oowaakhela aletto,+ osiveliweke itthu sooreera, uupuweleke vookhalela,*+ okhaleke naxariya, oororomeleya,+ oowiihiiha.+ 9 Otthareke oratteene moolumo oororomeleya a Muluku okathi oniixuttiha awe,+ wiira oweryeke waalipiha* akina, orumeelaka mwiixuttiho wooreera*+ ni owooniheryeke+ ale anivaanyiha wiira aattheka.

10 Tthiri aakhala alopwana anceene ahiniiwelela, anilavula itthu seethiru, anaawoka akhwaaya ni anihimya wiira atthu ahaana winnuwihiwa.+ 11 Muhaana owala iyano sa atthu awo, okhala wiira annithipelela ohonona itthoko, yiixuttihaka itthu soohiloka, yiirelaka ophwanya etthu. 12 Profeta aya mmosa, oohimya wiira: “Atthu a oKereta annootha okathi wootheene, anlikana ni inama sa mutakhwani sootakhala, toolosowa ni waasivela olya vanceene”.

13 Owo onihimya ekeekhai. Tivo, mwaapwapweleke ni ikuru wiira yeetteke oratteene moowaaminini, 14 ehitthareke ihantisi sa ayuda ni sooruma sa atthu anihiya weettela ekeekhai. 15 Itthu sootheene ti sooreera para ale ooreera.+ Vano, para ale oonanara ni ahirina waamini, khiivo etthu yooreera, okhala wiira miyuupuwelo saya ni mirima saya ti soonanara.+ 16 Awo annihimya ohoolo wa atthu anceene wiira annimusuwela Muluku, masi itthu anipaka aya+ sinooniherya wiira annimukhootta, okhala wiira awo toothanyeya, toohiiwelela, nave khanreerela ovara miteko sooreera.