Miteko sa Arummwa
2 Nihiku na Efesta ya Pentekoositi,+ awiixutti ootheene yaahithukumana opuro omosa. 2 Okathi yaakilanthi aya,+ yaahiiwa niinaano-ru onyakula wuulupale, okhumaka wiirimu ntoko epheyo yootupa, khusareya mpaani mootheene. 3 Nto yaahipacerya woona etthu yaalikana ni malumi a mooro, yaawo yaakawanyeyale. Malumi awo, yaahimmorela khula mmosa. 4 Vano ootheene aya yaahisareya ikuru soowaarya,+ anapacerya olavula mattaava oovirikana, siisaale ikuru iyo saawiiriha aya olavula.+
5 Okathi owo, ayuda ootheene yaamurumeela Muluku, yaawo yaakhuma maloko ootheene a olumwenku, yaari oYerusalemu.+ 6 Vano, nuumala wiiwa onyakula iwe, muttitthi wa atthu waahithukumana ni waahitikinihiwa, okhala wiira khula mutthu aaniwiiwa awiixutti alavulaka mattaava oovirikana. 7 Tthiri, awo yaahitikinihiwa vanceene, enahimya wiira: “Mooneke! Atthu ala ootheene anilavula, khahiyo aGalileya?+ 8 Nto vaniweryaneya sai khula mmosa a hiyo, owiiwa elavulaka nttaava nahu?* 9 Aakhala vaava atthu anikhuma elapo ya oPartia, oMedia,+ wElami,+ oMesopotaamia, oYudeya, oKapadosia, oPonto, muttetthe wa wAsia,+ 10 oFiriixia, oPanfiilia, wExiitu, muttetthe wa oLibia, yoowo ori waattamela oKirene. Aakhala-tho atthu anixukurya anikhuma oRoma, aakhala ayuda akina ni ale anitthara soowiixuttiha sa ayuda.+ 11 Nave-tho, akina anikhuma oKereta ni wArabia. Hiyo ninniwiiwa alavulaka ni nttaava nahu miteko suulupale sa Muluku”. 12 Aayo, ootheene aya yaahitikinihiwa vanceene, ahinasuwela yoowiira. Tivo yaanikohana ariki: “Etthu ela entaphulela-ni?” 13 Masi, akina yaanaatheya, ahimyaka wiira: “Atthu ala aroohapaliwa”.
14 Vano Pedru aaheemela vamosa ni arummwa 11,+ onaahimeerya atthu ni nsu noowiiwanyeya, oriki: “Nyuwo atthu a oYudeya ni nyuwo ootheene munikhala oYerusalemu, nwiriyane oratteene moolumo aka. 15 Mweekeekhai, atthu ala khahapaliwe, ntoko munuupuwela anyu, okhala wiira nlelo voosiisu.* 16 Masi, etthu enoona anyu-va, ti yeele yaahimmwale ni profeta Yoweli, oriki: 17 ‘Muluku onihimya wiira: “Mahiku ookiserya, kinimwaamwarexela ikuru saka atthu a makhalelo ootheene. Nave aniinyu axilopwana ni aniinyu axithiyana anrowa okhala maprofeta, atthu anyu oowuuluvala, anrowa waakhela sooloha, nave amiravo anyu anrowa woonaka itthu sootikiniha.+ 18 Nave-tho mahiku awo, kinoomwarexela ikuru saka ipottha saka soolopwana ni soothiyana. Nto iyo sinrowa olaleyaka ihapari sa Muluku.+ 19 Kinrowa wooniherya itthu sootikiniha osulu ni ithoonyeryo vathi. Itthu iyo tiiya: ephome, mooro ni meeku a mwiixi. 20 Nsuwa ninrowa okhalihiwa epiphi, nave mweeri onrowa okhalihiwa ephome, nihinatthi ophiya nihiku nuulupale ni noovuwa na Yehova.* 21 Ootheene ale anivekela aromolaka nsina na Yehova,* animoopoliwa”’.+
22 “Nyuwo atthu a wIsarayeli, nwiriyane moolumo ala: Muluku, oowooniheryani oratteene wiira tomurumme Yesu munazarethi, opakaka miiriirya ni miteko sootikiniha eriyari anyu omurumeelaka yena,+ ntoko munisuwela anyu saana. 23 Nave, ntoko Muluku aalakenle awe ni aasuwela awe vahinatthi,+ Yesu owo oovahereriwa. Okhala wiira monvahererya mmatatani mwa atakhali, nyuwo moomukhomela vamwirini ni moomwiiva.+ 24 Masi Muluku oomutaphula mookhwaani,*+ omuhihimuxaka, okhala wiira khivaaweryaneya wiira okhwa onwerye.+ 25 Tthiri, Davidi, onnimuhimya owo oriki: ‘Okathi wootheene, Yehova* ori mmuupuweloni mwaka,* okhala wiira ori moono aka woolopwana, wiira kihikhala-khale kixankaka. 26 Tivonto, murima aka waahikitteela ni kaanilavula voohakalala vanceene. Nave kinrowa okhalaka ni nlipelelo, 27 okhala wiira khamunrowa okihiya Mmahiye,* nnakhala khamunrowa ohiya yinttaka erutthu ya murumeyi anyu oororomeleya.+ 28 Mookisuweliha iphiro sa okumi, munookitteeliha murima vanceene ohoolo wanyu’.+
29 “Anna, mukihiye kooleeleni kihoovaka etthu, itthu sinimuhimya muhavinre ahu Davidi. Ntoko munisuwela anyu, Davidi owo ohookhwa ni oovithiwa,+ nave mahiye awe ari muttetthe yoola mpakha olelo-va. 30 Owo aari profeta ni aanisuwela ele Muluku aamuhimenrye awe, omulaphelaka, wiira mwaana mmosa a Davidi, aarowa okilaathi veehiceni vawe.+ 31 Nave-tho, aahiweha vahinatthi ohihimuxiwa wa Kristu ni aahihimya wiira Kristu owo khaarowa ohiiwa Mmahiye,* nnakhala erutthu awe khiyaarowa wuntta.+ 32 Muluku oomuhihimuxa Yesu, nave ootheene ahu nihoona eyo.+ 33 Tivonto, okhala wiira Yesu oorowa wiirimu ni ookilaathi moono woolopwana wa Muluku,+ nave Tiithi onvaha ikuru soowaarya+ aamuleihenrye awe, siiso, owo oonivaha ele munoona anyu ni muniiwa anyu. 34 Tthiri, Davidi khowenle wiirimu, masi owo aahihimya wiira: ‘Yehova* oomuleela Pwiya aka wiira: “Mukilaathi moono aka woolopwana, 35 mpakha miyo waapweha awanani inyu vathi va inawu sanyu”’.+ 36 Tivonto, atthu ootheene a wIsarayeli, ahaana osuwela wiira, mweekeekhai, Muluku oomukhaliha Yesu, Pwiya+ ni Kristu. Yesu owo ti yoole omukhomenle anyu vamwirini”.+
37 Vano, nuumala wiiwa moolumo awo, atthu ale yaahiriipiwa murima vanceene, anamuhimeerya Pedru ni arummwa akina wiira: “Anna, nipake exeeni?” 38 Pedru aahaahimeerya wiira: “Murukunuxe murima,+ nave khula mmosa a nyuwo opatisiwe+ mwa nsina na Yesu Kristu, wiira muleveleliwe itampi sanyu.+ Nave munrowa waakhela ikuru soowaarya mahala ene. 39 Atthu aleiheriwe+ waakhela etthu eyo, ti yaale Yehova* Muluku, owiitthanne awe: Nyuwo, aniinyu, ni ootheene yaale anikhala ottaiwene”.+ 40 Aanilavula ni aanaalaleerya atthu ootheene, aatumereryaka wiira: “Nvalaane ni atthu ala ootakhala wiira muhipwetexiwe”.+ 41 Siiso, ootheene yaale yaakhenle ni murima wootheene moolumo a Pedru, yaahipatisiwa.+ Nto nihiku nle, atthu oowiiraka 3.000 yaahitakaahana ni awiixutti.+ 42 Awo khiyaahiyererya wiixutta itthu arummwa yaixuttiha aya, yaanikawana itthu sootheene, yaanilya vamosa+ ni yaanithipelela ovekela.+
43 Tthiri, atthu ootheene yaahipacerya woova, nave arummwa yaahipacerya opaka itthu sootikiniha ni miiriirya sinceene.+ 44 Ootheene ale yaamwaamini Yesu, yaanithukumana vamosa ni yaanikawana itthu sootheene yaarina aya. 45 Nave yaanitumiha imatta saya ni itthu yaarina aya,+ nto musurukhu ene, yaanaakawela atthu ootheene, anvahaka khula mutthu etthu yaamuthowa.+ 46 Mahiku ootheene yaanithukumana mutemplo, yaanilya eyoolya aya itthoko soovirikana ni yaanikawana eyoolya eyo, atteeliwe ene murima. Yaanipaka eyo ni murima wootheene. 47 Awo yaanimuttottopela Muluku, nave atthu yaanisiveliwa naawo. Khula nihiku, Yehova* aaniwoopola atthu, nto awo yaanikhala awiixutti.+